„საქართველოს სახელმწიფო დაცვის სპეციალური სამსახურის სამეურნეო სამმართველოს დებულების დამტკიცების შესახებ“ საქართველოს სახელმწიფო დაცვის სპეციალური სამსახურის უფროსის 2005 წლის 25 ივლისის №258 ბრძანებაში ცვლილებების შეტანის თაობაზე

სახელმწიფო სარეგისტრაციო კოდი 140.080.000.42.047.014.457

საქართველოს სახელმწიფო დაცვის სპეციალური სამსახურის უფროსის

ბრძანება №232

2010 წლის 6 აპრილი

ქ. თბილისი

 „საქართველოს სახელმწიფო დაცვის სპეციალური სამსახურის სამეურნეო სამმართველოს დებულების დამტკიცების შესახებ“ საქართველოს სახელმწიფო დაცვის სპეციალური სამსახურის უფროსის 2005 წლის 25 ივლისის №258 ბრძანებაში ცვლილებების შეტანის თაობაზე

„ნორმატიული აქტების შესახებ“ საქართველოს კანონის 20-ე მუხლის მე-4 პუნქტის და „სახელმწიფო დაცვის სპეციალური სამსახურის შესახებ“ საქართველოს კანონის მე-7 მუხლის მე-2 პუნქტის „კ“ ქვეპუნქტის შესაბამისად, ვბრძანებ:

    მუხლი 1

„საქართველოს სახელმწიფო დაცვის სპეციალური სამსახურის სამეურნეო სამმართველოს დებულების დამტკიცების შესახებ“ საქართველოს სახელმწიფო დაცვის სპეციალური სამსახურის უფროსის 2005 წლის 25 ივლისის №258 ბრძანებით (სსმ III, 01.08.2005წ., №89, მუხ.1024) დამტკიცებულ დებულებაში შეტანილ იქნეს შემდეგი ცვლილებები:

1. დებულების მე-3 მუხლის „ვ“ ქვეპუნქტი ჩამოყალიბდეს შემდეგი რედაქციით:

„ვ)     საქართველოს კანონმდებლობით დადგენილი წესით, კომპეტენციის ფარგლებში, სახელმწიფო შესყიდვების განხორციელება, აგრეთვე, შესყიდვებისა და პრივატიზების პროცესში სამსახურის სატენდერო, საკონკურსო და სააუქციონო კომისიების საქმიანობის უზრუნველყოფა;“.

2. დებულების მე-9 მუხლის „გ“ ქვეპუნქტი ჩამოყალიბდეს შემდეგი რედაქციით:

„გ) სახელმწიფო შესყიდვების და პრივატიზების განყოფილება;“:

3. დებულების მე-12 მუხლი ჩამოყალიბდეს შემდეგი რედაქციით:

     „მუხლი 12. სახელმწიფო შესყიდვების და პრივატიზების განყოფილება

სახელმწიფო შესყიდვების და პრივატიზების განყოფილების ამოცანებია:

ა) საქართველოს კანონმდებლობით დადგენილი წესით, სახელმწიფო შესყიდვების განხორციელება და შესყიდვების პროცესში სამსახურის სატენდერო კომისიის საქმიანობის უზრუნველყოფა;

ბ) პრივატიზების პროცესში სამსახურის საკონკურსო და სააუქციონო კომისიების საქმიანობის უზრუნველყოფა;

გ) სახელმწიფო შესყიდვებისათვის და პრივატიზების განხორციელებისათვის საჭირო დოკუმენტების მომზადება, განცხადებების დადგენილი წესით გამოქვეყნება და ანგარიშების მომზადება;

დ) საქართველოს სახელმწიფო დაცვის სპეციალური სამსახურის უფროსთან შეთანხმებით, საქართველოს კანონმდებლობით დადგენილი წესით პრივატიზების თაობაზე ხელშეკრულებების მომზადება და შესაბამის ორგანიზაციებთან და მომწოდებლებთან შეთანხმება;

ე) სახელშეკრულებო პირობების შესრულებაზე კონტროლის განხორციელება;

ვ) კანონმდებლობით დადგენილი წესით, საჯარო სამართლის იურიდიული პირ – სახელმწიფო შესყიდვების სააგენტოში წარსადგენი შესაბამისი ინფორმაციის მომზადება;

ზ) კანონმდებლობით დადგენილი წესით, საპრივატიზებო ქონების შესახებ საქართველოს ეკონომიკური განვითარების სამინისტროში წარსადგენი ინფორმაციის მომზადება.“.

    მუხლი 2

ბრძანება ამოქმედდეს გამოქვეყნებისთანავე.

ო. ქველიძე