,,საქართველოს სოფლის მეურნეობის სამინისტროს დებულების დამტკიცების შესახებ” საქართველოს მთავრობის 2004 წლის 21 მაისის №38 დადგენილებაში ცვლილებების შეტანისა და შესაბამის ღონისძიებათა განხორციელების შესახებ”

საქართველოს მთავრობის

 დადგენილება №72

2005 წლის 17 აპრილი

 ქ. თბილისი

,,საქართველოს სოფლის მეურნეობის სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის №38 დადგენილებაში ცვლილებების შეტანისა და შესაბამის ღონისძიებათა განხორციელების შესახებ

,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-17 მუხლის პირველი პუნქტის შესაბამისად, ,,საქართველოს სოფლის მეურნეობის სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის №38 დადგენილებით დამტკიცებულ საქართველოს სოფლის მეურნეობის სამინისტროს დებულებაში (სსმ III, 2004 წელი, №54, მუხლი 461) შეტანილ იქნეს შემდეგი ცვლილება:

1. დებულების მე-8 მუხლის მე-11 პუნქტი ჩამოყალიბდეს შემდეგი რედაქციით:

,,11. სამინისტროს გამგებლობაშია შემდეგი სახელმწიფო საქვეუწყებო დაწესებულებები:

ა) სამელიორაციო სისტემების მართვის დეპარტამენტი;

ბ) თევზის მეურნეობის დეპარტამენტი ,,საქთევზი “;

გ) წყლის, ლუდისა და უალკოჰოლო სასმელების სახელმწიფო რეგულირების დეპარტამენტი ,,საქმინხილწყალი“;

დ) მეცხოველეობის სანაშენე საქმის დეპარტამენტი;

ე) თესლეულისა და სარგავი მასალის ხარისხის ინსპექცია;

ვ) კვების პროდუქტების ექსპერტიზისა და მონიტორინგის სამსახური;

ზ) სელექციური მიღწევების გამოცდის ინსპექცია;

თ) მცენარეთა დაცვის სამსახური;

ი) აგროქიმიური და ნიადაგის ნაყოფიერების სამსახური;

კ) ქვეყნის შიგნით ზამთრის საძოვრებისა და პირუტყვის გადასარეკი ტრასების რაზმი;

ლ) აჭარის საძოვრების ადმინისტრაცია;

მ) მეაბრეშუმეობის საკოორდინაციო ცენტრი ,,აბრეშუმის სახლი“;

ნ) აგროსაინჟინრო სამსახური.“.

2. საქართველოს სოფლის მეურნეობის სამინისტრომ (მ. სვიმონიშვილი) უზრუნველყოს სახელმწიფო საქვეუწყებო დაწესებულების – სოფლის მეურნეობის პროდუქციისა და ფქვილის ხარისხის ინსპექციის სახელმწიფო საქვეუწყებო დაწესებულებასთან – კვების პროდუქტების ექსპერტიზისა და მონიტორინგის სამსახურთან შეერთებისა და სახელმწიფო საქვეუწყებო დაწესებულების – მელიორაციის ინსპექციის ლიკვიდაციის ღონისძიებათა კანონმდებლობით დადგენილი წესით განხორციელება.

3. სახელმწიფო საქვეუწყებო დაწესებულების – სოფლის მეურნეობის ბიოტექნოლოგიის სამეცნიერო-კვლევითი ცენტრი გამგებლობაში გადაეცეს საქართველოს განათლებისა და მეცნიერების სამინისტროს.

4. მელიორაციის ინსპექციის ლიკვიდაციის შედეგად გამოთავისუფლებული 7 საშტატო ერთეული შესაბამისი დაფინანსებით დარჩეს საქართველოს სოფლის მეურნეობის სამინისტროს განკარგულებაში მისი ცენტრალური აპარატისათვის.

5. დადგენილება ამოქმედდეს გამოქვეყნებისთანავე.

პრემიერ-მინისტრი ზ. ნოღაიდელი