„საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №84 ბრძანებაში ცვლილებებისა და დამატებების შეტანის შესახებ

სახელმწიფო სარეგისტრაციო კოდი 200.230.040.22.033.014.851

საქართველოს ფინანსთა

მინისტრის ბრძანება №556

2010 წლის 7 ივლისი

ქ. თბილისი

„საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №84 ბრძანებაში ცვლილებებისა და დამატებების შეტანის შესახებ

„ნორმატიული აქტების შესახებ“ საქართველოს კანონის მე-20 მუხლის მე-4 პუნქტის საფუძველზე, ვბრძანებ:

    მუხლი 1

„საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თე-ბერვლის №84 ბრძანებით (სსმ III, 17.02.2005 წ., №18, მუხ. 171) დამტკიცებულ ინსტრუქციაში შეტანილ იქნეს შემდეგი ცვლილებები და დამატებები:

1. ინსტრუქციის პირველი მუხლის მე-2 პუნქტი ჩამოყალიბდეს შემდეგი რედაქციით:

„2. ინსტრუქცია არ ვრცელდება „ნავთობპროდუქტების მიწოდების აღრიცხვისა და დაბეგვრის კონტროლის ღონისძიებათა შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №87 ბრძანებით გათვალისწინებულ სპეციალურ საგადასახადო ანგარიშ-ფაქტურებზე.“

2. ინსტრუქციის მე-3 მუხლის მე-4 პუნქტი ჩამოყალიბდეს შემდეგი რედაქციით:

„4. დღგ-ის იმ გადამხდელების მიმართ, რომლებიც თავიანთ საქმიანობასთან დაკავშირებული ყველა სამეურნეო ოპერაციის ბუღალტრულ აღრიცხვას ახდენენ კომპიუტერული სისტემებისა და პროგრამების გამოყენებით, შესაძლებელია შემოღებულ იქნეს კომპიუტერული წესით ამობეჭდილი საგადასახადო ანგარიშ-ფაქტურა, რომელიც მყიდველს წარედგინება საანგარიშო პერიოდში განხორციელებული მიწოდებების მიხედვით.“.

3. ინსტრუქციის მე-3 მუხლის მე-7 პუნქტი ჩამოყალიბდეს შემდეგი რედაქციით:

„7. საგადასახადო ანგარიშ-ფაქტურაში „გამყიდველის“ მონაცემების აღმნიშვნელ სტრიქონებზე ჩაიწერება საქონლის გამყიდველის (მომსახურების გამწევის) – იურიდიული პირის დასახელება, ან დღგ-ის გადამხდელად რეგისტრირებული ფიზიკური პირის სახელი და გვარი, მისამართი, უფლებამოსილი ორგანოს მიერ მათთვის მინიჭებული საიდენტიფიკაციო ნომერი, დღგ-ის გადამხდელის სარეგისტრაციო სერტიფიკატის ნომერი და გაცემის თარიღი, მომსახურე ბანკის დასახელება და ანგარიშის ნომერი.“.

4. ინსტრუქციის მე-3 მუხლის მე-8 პუნქტი ჩამოყალიბდეს შემდეგი რედაქციით:

„8. საგადასახადო ანგარიშ-ფაქტურაში „მყიდველის“ მონაცემების აღმნიშვნელ სტრიქონებზე ჩაიწერება საქონლის (მომსახურების) მიმღების – იურიდიული პირის დასახელება, ან მეწარმე ფიზიკური პირის სახელი და გვარი, მისამართი, აგრეთვე უფლებამოსილი ორგანოს მიერ მათთვის მინიჭებული საიდენტიფიკაციო ნომერი, მომსახურე ბანკის დასახელება და ანგარიშის ნომერი, ხოლო ფიზიკურ პირზე ანგარიშ-ფაქტურის გამოწერის შემთხვევაში აღინიშნება მისი სახელი, გვარი და მისამართი, ხოლო საიდენტიფიკაციო ნომრის შესაბამის უჯრებში ჩაიწერება პირადი ნომერი.“.

5. ინსტრუქციის მე-3 მუხლის 23-ე პუნქტი ჩამოყალიბდეს შემდეგი რედაქციით:

„23. საგადასახადო ანგარიშ-ფაქტურა გამოიწერება ოთხ ეგზემპლარად. ოთხივე ეგზემპლარს აქვს თანაბარი იურიდიული ძალა და თითოეული მათგანი წარმოადგენს დედანს. პირველი და მე-3 ეგზემპლარები წარედგინება მყიდველს, ხოლო მე-2 და მე-4 – რჩება გამყიდველს. საგადასახადო ანგარიშ-ფაქტურის მონაცემებს მყიდველი და გამყიდველი შეიტანენ საგადასახადო ორგანოში წარსადგენ დღგ-ის დეკლარაციაში, რომლის საფუძველზეც მყიდველი იღებს ჩათვლას. ამასთან, გადამხდელებთან არსებული საგადასახადო ანგარიშ-ფაქტურების ეგზემპლარები საგადასახადო ორგანოს კონტროლის მიზნით წარედგინება მხოლოდ მისი მოთხოვნის შემთხვევაში.“.

6. ინსტრუქციის მე-3 მუხლის 25-ე პუნქტი ჩამოყალიბდეს შემდეგი რედაქციით:

„25. დაუშვებელია საგადასახადო ორგანოს მიერ დღგ-ის გადამხდელზე გაცემული ანგარიშ-ფაქტურის სხვა პირისათვის გადაცემა.“.

7. ინსტრუქციის მე-3 მუხლის 26-ე პუნქტი ჩამოყალიბდეს შემდეგი რედაქციით:

„26. იმ შემთხვევაში, თუ საგამოძიებო და სხვა უფლებამოსილი ორგანოების მიერ საქართველოს სისხლის სამართლის საპროცესო კოდექსით დადგენილი წესით გადამხდელისაგან ამოღებულ იქნა საგადასახადო ანგარიშ-ფაქტურები, საგადასახადო ორგანოს მოთხოვნის შემთხვევაში, გადამხდელებს უფლება აქვთ საგადასახადო ორგანოში წარადგინონ ამოღებული საგადასახადო ანგარიშ-ფაქტურების ქსეროასლები და ამ ორგანოების სათანადო პასუხისმგებელი პირების მიერ ხელმოწერილი და ბეჭდით დამოწმებული ცნობა შესაბამისი საგადასახადო ანგარიშ-ფაქტურის ამოღების შესახებ, ხოლო დაბრუნების შემთხვევაში – მათი დედნები.“.

8. ინსტრუქციის მე-3 მუხლის 27-ე პუნქტი ჩამოყალიბდეს შემდეგი რედაქციით:

„27. დაუშვებელია საქონლის (მომსახურების) მიმწოდებლის მიერ, არასწორად შევსებული (არასწორად შეტანილი რეკვიზიტებით) საგადასახადო ანგარიშ-ფაქტურის წარდგენა მყიდველისათვის. ასეთი საგადასახადო ანგარიშ-ფაქტურის ყველა ეგზემპლარი შესაბამისი თვის დღგ-ის დეკლარაციასთან ერთად წარედგინება საგადასახადო ორგანოს მისი გაუქმების მიზნით. თუ შესაძლებელია საგადასახადო ანგარიშ-ფაქტურაში არასწორად შეტანილი რეკვიზიტების გასწორება, გარდა შეცდომით (არასწორად) შეტანილი გადასახადის თანხისა, ამ შემთხვევაში საგადასახადო ორგანოს მოთხოვნით მის წარდგენამდე, შეცდომით შევსებული საგადასახადო ანგარიშ-ფაქტურის ყველა ეგზემპლარში არასწორი მონაცემები გადაიხაზება და მათ თავზე ჩაიწერება დაზუსტებული მონაცემები. გადასწორების ფაქტი ყველა ეგზემპლარში დამოწმებული უნდა იქნეს მიმწოდებლის ან მისი უფლებამოსილი პირის ხელმოწერით და ბეჭდით (ასეთის არსებობის შემთხვევაში). ელექტრონული ფორმით წარდგენილი საგადასახადო ანგარიშ-ფაქტურის გაუქმება და გაუქმებული საგადასახადო ანგარიშ-ფაქტურების საგადასახადო ორგანოში წარდგენა შესაძლებელია განხორციელდეს ასევე ელექტრონული ფორმით.“.

9. ინსტრუქციის მე-3 მუხლის 29-ე პუნქტი ჩამოყალიბდეს შემდეგი რედაქციით:

„29. შევსებული (გამოწერილი) საგადასახადო ანგარიშ-ფაქტურის დაკარგვის შემთხვევაში იგივე დასაბეგრ ოპერაციაზე იმავე თარიღით გამოიწერება ახალი საგადასახადო ანგარიშ-ფაქტურა, რომელზედაც შენიშვნის სახით აღინიშნება დაკარგული საგადასახადო ანგარიშ-ფაქტურის სერია და ნომერი. ამასთან, ახალი საგადასახადო ანგარიშ-ფაქტურის გამოწერის შემთხვევაში, შევსებული (გამოწერილი) საგადასახადო ანგარიშ-ფაქტურის დაკარგვის შესახებ გადამხდელი დაუყოვნებლივ აცნობებს საგადასახადო ორგანოს ამ ანგარიშ-ფაქტურის გაუქმების მიზნით. იმ შემთხვევაში, როდესაც საგადასახადო ანგარიშ-ფაქტურის გამოწერის და მყიდველისათვის გადაცემის შემდეგ გამყიდველი დაკარგავს ამ ანგარიშ-ფაქტურის მასთან დარჩენილ ეგზემპლარს, მას უფლება აქვს საგადასახადო ორგანოს მოთხოვნის შემთხვევაში საგადასახადო ორგანოში წარადგინოს დაკარგული საგადასახადო ანგარიშ-ფაქტურის პირველი ეგზემპლარის ნოტარიულად დამოწმებული ასლი, ხოლო თუ მყიდველმა დაკარგა ანგარიშ-ფაქტურის მისი ეგზემპლარი, მას შეუძლია წარადგინოს გამყიდველთან არსებული ანგარიშ-ფაქტურის ნოტარიულად დამოწმებული ასლი.“.

10. ინსტრუქციის მე-4 მუხლის მე-3 პუნქტის „ა“ ქვეპუნქტი ჩამოყალიბდეს შემდეგი რედაქციით:.

„ა) საგადასახადო ორგანოში წარდგენილია ან/და დღგ-ის დეკლარაციაში ასახულია დღგ-ის ანგარიშფაქტურა, რომელშიც დღგ-ის თანხა აღნიშნულია არასწორად;“.

11. ინსტრუქციის მე-4 მუხლის მე-8 პუნქტის „გ.დ“ ქვეპუნქტი ჩამოყალიბდეს შემდეგი რედაქციით:

„გ.დ) საქონელი/მომსახურება სრულად ან ნაწილობრივ უბრუნდება დღგ-ის გადამხდელს;“.

12. ინსტრუქციის მე-4 მუხლის მე-10 პუნქტი ჩამოყალიბდეს შემდეგი რედაქციით:

„10. კორექტირების საგადასახადო ანგარიშ-ფაქტურა გამოიწერება ოთხ ეგზემპლარად. ოთხივე ეგზემპლარს აქვს თანაბარი იურიდიული ძალა და თითოეული მათგანი წარმოადგენს დედანს. პირველი და მე-3 ეგზემპლარები წარედგინება მყიდველს, ხოლო მე-2 და მე-4 – რჩება გამყიდველს. კორექტირების საგადასახადო ანგარიშ-ფაქტურის მონაცემებს მყიდველი და გამყიდველი შეიტანენ საგადასახადო ორგანოში წარსადგენ დღგ-ის დეკლარაციაში. ამასთან, გადამხდელებთან არსებული კორექტირების საგადასახადო ანგარიშ-ფაქტურების ეგზემპლარები საგადასახადო ორგანოს კონტროლის მიზნით წარედგინება მხოლოდ მისი მოთხოვნის შემთხვევაში.“.

13. ინსტრუქციის მე-4 მუხლის მე-13 პუნქტი ჩამოყალიბდეს შემდეგი რედაქციით:

„13. დაუშვებელია საგადასახადო ორგანოს მიერ დღგ-ის გადამხდელზე გაცემული კორექტირების საგადასახადო ანგარიშ-ფაქტურის სხვა პირისათვის გადაცემა.“.

14. ინსტრუქციის მე-4 მუხლის მე-14 პუნქტი ჩამოყალიბდეს შემდეგი რედაქციით:

„14. იმ შემთხვევაში, თუ საგამოძიებო და სხვა უფლებამოსილი ორგანოების მიერ საქართველოს სისხლის სამართლის საპროცესო კოდექსით დადგენილი წესით გადამხდელისაგან ამოღებულ იქნა კორექტირების საგადასახადო ანგარიშ-ფაქტურები, საგადასახადო ორგანოს მოთხოვნის შემთხვევაში, გადამხდელებს უფლება აქვთ საგადასახადო ორგანოში წარადგინონ ამოღებული კორექტირების საგადასახადო ანგარიშ-ფაქტურების ქსეროასლები და ამ ორგანოების სათანადო პასუხისმგებელი პირების მიერ ხელმოწერილი და ბეჭდით დამოწმებული ცნობა შესაბამისი კორექტირების საგადასახადო ანგარიშ-ფაქტურის ამოღების შესახებ, ხოლო დაბრუნების შემთხვევაში – მათი დედნები.“.

15. ინსტრუქციის მე-4 მუხლის მე-16 პუნქტი ჩამოყალიბდეს შემდეგი რედაქციით:

„16. შევსებული (გამოწერილი) კორექტირების საგადასახადო ანგარიშ-ფაქტურის დაკარგვის შემთხვევაში იგივე დასაბეგრ ოპერაციაზე იმავე თარიღით გამოიწერება ახალი კორექტირების საგადასახადო ანგარიშ-ფაქტურა, რომელზედაც შენიშვნის სახით აღინიშნება დაკარგული კორექტირების საგადასახადო ანგარიშ-ფაქტურის სერია და ნომერი. ამასთან, ახალი კორექტირების საგადასახადო ანგარიშ-ფაქტურის გამოწერის შემთხვევაში, შევსებული (გამოწერილი) კორექტირების საგადასახადო ანგარიშ-ფაქტურის დაკარგვის შესახებ გადამხდელი დაუყოვნებლივ აცნობებს საგადასახადო ორგანოს ამ ანგარიშ-ფაქტურის გაუქმების მიზნით. იმ შემთხვევაში, როდესაც კორექტირების საგადასახადო ანგარიშ-ფაქტურის გამოწერის და მყიდვე-ლისათვის გადაცემის შემდეგ გამყიდველი დაკარგავს ამ ანგარიშ-ფაქტურის მასთან დარჩენილ ეგზემპლარს, მას უფლება აქვს საგადასახადო ორგანოს მოთხოვნის შემთხვევაში საგადასახადო ორგანოში წარადგინოს დაკარგული კორექტირების საგადასახადო ანგარიშ-ფაქტურის პირველი ეგზემპლარის ნოტარიულად დამოწმებული ასლი, ხოლო თუ მყიდველმა დაკარგა კორექტირების ანგარიშ-ფაქტურის მისი ეგზემპლარი, მას შეუძლია წარადგინოს გამყიდველთან არსებული ანგარიშ-ფაქტურის ნოტარიულად დამოწმებული ასლი.“.

16. ინსტრუქციას დაემატოს შემდეგი შინაარსის მე-5–მე-8 მუხლები:

     „მუხლი 5. ბრძანების დანართი №5-ით გათვალისწინებული საგადასახადო ანგარიშ-ფაქტურის გამოწერა და წარდგენა

1. ამ ბრძანების დანართი №5-ის შესაბამისი ფორმის საგადასახადო ანგარიშ-ფაქტურა წარმოადგენს საქართველოს საგადასახადო კოდექსის 248-ე მუხლის შესაბამისად, საქართველოს ფინანსთა მინისტრის მიერ დამტკიცებულ მკაცრი აღრიცხვის დოკუმენტს, რომლითაც დასტურდება დღგ-ით დასაბეგრი ოპერაციის განხორციელების ფაქტი. აღნიშნული ფორმის საგადასახადო ანგარიშ-ფაქტურაში სერია და ნომერი ჩაბეჭდილია სტამბური წესით. მას აქვს დამცავი ნიშნები.

2. ამ ბრძანების დანართი №5 ივსება ორ ეგზემპლარად (ორივე ეგზემპლარს აქვს თანაბარი იურიდიული ძალა და თითოეული მათგანი წარმოადგენს დედანს). საგადასახადო ანგარიშ-ფაქტურის მონაცემებს მყიდველი და გამყიდველი შეიტანენ საგადასახადო ორგანოში წარსადგენ დღგ-ის დეკლარაციაში, რომლის საფუძველზეც მყიდველი იღებს ჩათვლას. ამასთან, გადამხდელებთან არსებული საგადასახადო ანგარიშ-ფაქტურების ეგზემპლარები საგადასახადო ორგანოს კონტროლის მიზნით წარედგინება მხოლოდ მისი მოთხოვნის შემთხვევაში.

3. პირველ სტრიქონში ჩაიწერება ანგარიშ-ფაქტურის ნომერი.

4. მე-2 სტრიქონში ჩაიწერება ოპერაციის განხორციელების პერიოდი (თვე სიტყვიერად, წელი).

5. მე-3 სტრიქონში ჩაიწერება გამოწერის თარიღი (რიცხვი, თვე სიტყვიერად, წელი).

6. მე-4 სტრიქონში ჩაიწერება საქონლის გამყიდველის (მომსახურების გამწევის) – დასახელება ან სახელი და გვარი, შესაბამისი უფლებამოსილი ორგანოს მიერ მათთვის მინიჭებული საიდენტიფიკაციო ნომერი.

7. მე-5 სტრიქონში ჩაიწერება საქონლის მყიდველის (მომსახურების მიმღების) – დასახელება, ან დღგ-ის გადამხდელად რეგისტრირებული ფიზიკური პირის სახელი და გვარი, შესაბამისი უფლებამოსილი ორგანოს მიერ მათთვის მინიჭებული საიდენტიფიკაციო ნომერი.

8. ცხრილის პირველ სვეტში ჩაიწერება საქონლის (მომსახურების) დასახელება.

9. ცხრილის მე-2 სვეტში ჩაიწერება ზომის ერთეული.

10. ცხრილის მე-3 სვეტში ჩაიწერება მიწოდებული საქონლის რაოდენობა.

11. ცხრილის მე-4 სვეტში ჩაიწერება საქონლის (მომსახურების) ღირებულება დღგ-ის და აქციზის ჩათვლით.

12. ცხრილის მე-5 და მე-6 სვეტებში ჩაიწერება დღგ-ის და აქციზის თანხები.

13. მე-6 და მე-7 სტრიქონებში ჩაიწერება სასაქონლო ზედნადების ნომერი და თარიღი.

14. ამ ინსტრუქციის მე-3 მუხლის 21-ე პუნქტში აღნიშნულ შემთხვევებში, დანართ №5-თან ერთად გამოიყენება დანართი №7.

    მუხლი 6. სპეციალური საგადასახადო ანგარიშ-ფაქტურის (მათ შორის, კომპიუტერული საგადასახადო ანგარიშ-ფაქტურის) გამოწერა და წარდგენა

1. იმ შემთხვევაში, როდესაც საქონლის მიწოდებასთან ერთად ხორციელდება მისი ტრანსპორტირება (გარდა საქართველოს ფინანსთა მინისტრის 2005 წლის 14 თებერვლის №87 ბრძანებით დამტკიცებული ინსტრუქციით გათვალისწინებული შემთხვევებისა), შესაძლებელია გამოყენებულ იქნეს ამ ინსტრუქციის დანართი №6-ის შესაბამისი ფორმის სპეციალური საგადასახადო ანგარიშ-ფაქტურა (შემდგომში – სპეციალური ანგარიშ-ფაქტურა).

2. სპეციალური ანგარიშ-ფაქტურა ივსება ორ ეგზემპლარად (ორივე ეგზემპლარს აქვს თანაბარი იურიდიული ძალა და თითოეული მათგანი წარმოადგენს დედანს). სპეციალური ანგარიშ-ფაქტურის მონაცემებს მყიდველი და გამყიდველი შეიტანენ საგადასახადო ორგანოში წარსადგენ დღგ-ის დეკლარაციაში, რომლის საფუძველზეც მყიდველი იღებს ჩათვლას. ამასთან, გადამხდელებთან არსებული სპეციალური ანგარიშ-ფაქტურების ეგზემპლარები საგადასახადო ორგანოს კონტროლის მიზნით წარედგინება მხოლოდ მისი მოთხოვნის შემთხვევაში.

3. სპეციალური ანგარიშ-ფაქტურის, გარდა მე-6, მე-7, მე-8 და მე-9 სტრიქონებისა, შევსება ხორციელდება ამ ინსტრუქციის მე-5 მუხლით განსაზღვრული წესით.

4. მე-6 და მე-7 სტრიქონებში ჩაიწერება ტრანსპორტირების დაწყებისა და დასრულების ადგილების მისამართები.

5. მე-8 და მე-9 სტრიქონებში ჩაიწერება სატრანსპორტო საშუალების მარკა, ნომერი და მძღოლის პირადი ნომერი.

6. ამ მუხლით გათვალისწინებული სპეციალური ანგარიშ-ფაქტურის გამოყენების შემთხვევაში, სასაქონლო ზედნადების გამოყენება სავალდებულო არ არის.

 7. ამ ინსტრუქციის მე-3 მუხლის 21-ე პუნქტში აღნიშნულ შემთხვევებში, დანართ №6-თან ერთად გამოიყენება დანართი №7.

    მუხლი 7. ბრძანების დანართი №8-ით გათვალისწინებული კორექტირების საგადასახადო ანგარიშ-ფაქტურის გამოწერა და წარდგენა

1. ამ ბრძანების დანართი №8-ის შესაბამისი ფორმის კორექტირების საგადასახადო ანგარიშ-ფაქტურა (შემდგომში – კორექტირების ანგარიშ-ფაქტურა) წარმოადგენს საქართველოს საგადასახადო კოდექსის 228-ე მუხლის შესაბამისად საქართველოს ფინანსთა მინისტრის მიერ დამტკიცებულ მკაცრი აღრიცხვის დოკუმენტს, რომლითაც დასტურდება დასაბეგრი ოპერაციის კორექტირება. კორექტირების ანგარიშ-ფაქტურაში სერია და ნომერი ჩაბეჭდილია სტამბური წესით. მას აქვს დამცავი ნიშნები.

2. კორექტირების ანგარიშ-ფაქტურა გამოიყენება მე-4 მუხლით გათვალისწინებულ შემთხვევებში.

3. კორექტირების ანგარიშ-ფაქტურა ივსება ორ ეგზემპლარად (ორივე ეგზემპლარს აქვს თანაბარი იურიდიული ძალა და თითოეული მათგანი წარმოადგენს დედანს), შევსებული ეგზემპლარებიდან პირველი წარედგინება მყიდველს, მეორე რჩება გამყიდველს. მათ მონაცემებს მყიდველი და გამყიდველი შეიტანენ საგადასახადო ორგანოში წარსადგენ დღგ-ის დეკლარაციაში, ხოლო გადამხდელებთან არსებული ეგზემპლარები საგადასახადო ორგანოს კონტროლის მიზნით წარედგინება მხოლოდ მისი მოთხოვნის შემთხვევაში.

4. კორექტირების ანგარიშ-ფაქტურაში აისახება:

ა) გამოწერის თარიღი (თვე ჩაიწერება სიტყვიერად);

ბ) იმ ანგარიშ-ფაქტურის ნომერი, სერია, თარიღი (თვე ჩაიწერება სიტყვიერად), რომელშიც ხდება კორექტირება;

გ) შესაბამისი უჯრის შემოხაზვით ფიქსირდება კორექტირების შემდეგი სახეობები:

გ.ა) გაუქმებულია დასაბეგრი ოპერაცია, მათ შორის, დღგ-ის გადამხდელად ხელახალი რეგისტრაციისას, წინა რეგისტრაციის გაუქმებისას მიწოდებად განხილულ საქონლის არსებულ ნაშთზე;

გ.ბ) შეცვლილია დასაბეგრი ოპერაციის სახე;

გ.გ) ფასების შემცირების ან სხვა მიზეზით შეცვლილია ოპერაციაზე ადრე შეთანხმებული კომპენსაციის თანხა;

გ.დ) საქონელი/მომსახურება სრულად ან ნაწილობრივ უბრუნდება დღგ-ის გადამხდელს;

დ) ცხრილის პირველ სვეტში ჩაიწერება იმ საქონლის (მომსახურების) დასახელება, რომლის მიმართ წარმოებს კორექტირება;

ე) ცხრილის მე-2 სვეტში ჩაიწერება ზომის ერთეული;

ვ) ცხრილის მე-3 სვეტში ჩაიწერება კორექტირებას დაქვემდებარებული საქონლის რაოდენობა;

ზ) ცხრილის მე-4 სვეტში ჩაიწერება კორექტირებას დაქვემდებარებული საქონლის (მომსახურების) ღირებულება დღგ-ის და აქციზის ჩათვლით;

თ) ცხრილის მე-5 და მე-6 სვეტებში ჩაიწერება კორექტირებას დაქვემდებარებული საქონლის (მომსახურების) ღირებულების დღგ-ის და აქციზის თანხა;

ი) ცხრილის მე-4, მე-5 და მე-6 სვეტებში ჩაწერილი მონაცემების ჯამები აისახება სტრიქონზე „დასაბეგრი ბრუნვის კორექტირების შედეგი“;

კ) ცხრილის მე-3-მე-6 სვეტებში ჩანაწერი კეთდება 2 სტრიქონად: I – კორექტირებამდე, სადაც ჩაიწერება შესაბამისი მონაცემები კორექტირებამდე მიწოდებული საქონლის (მომსახურების) შესახებ და II – კორექტირების შემდეგ, სადაც ჩაიწერება მონაცემები კორექტირების შემდეგ მყიდველთან დარჩენილი საქონლის (მომსახურების) შესახებ. ამასთან, დასაბეგრი ბრუნვის კორექტირების შედეგის მე-5 სვეტში ჩაიწერება დღგ-ის თანხა, რომლითაც ხდება პირვანდელი დღგ-ის თანხის კორექტირება. იმ შემთხვევაში, როდესაც მიწოდებული საქონლის (მომსახურების) ღირებულების კორექტირებისას ადგილი აქვს გამყიდველთან დასაბეგრი ბრუნვის ზრდას, დასაბეგრ ბრუნვაზე დღგ-ის კორექტირების ჯამს გამყიდველი ასახავს დღგ-ის დეკლარაციის მე-2 განაყოფში დასაბეგრ ოპერაციებზე გამოწერილი ანგარიშ-ფაქტურების ნაწილში, ხოლო მყიდველი – ანგარიშ-ფაქტურებით განხორციელებული ჩათვლების ნაწილში. დადებითი სხვაობა წარმოადგენს გამყიდველთან დღგ-ის თანხის შემცირების, ხოლო მყიდველთან დღგ-ის გაზრდის საფუძველს და პირიქით;

ლ) კორექტირების ანგარიშ-ფაქტურის გამოწერის ფაქტი დასტურდება ხელმძღვანელი ან სხვა უფლებამოსილი პირის ხელმოწერითა და ბეჭდის დასმით (ამ უკანასკნელის არსებობის შემთხვევაში).

5. საქონლის ასორტიმენტის მრავალსახეობის დროს, როდესაც კორექტირების ანგარიშ-ფაქტურაში საკმარისი არ არის სტრიქონების რაოდენობა, გამოიყენება კორექტირების ანგარიშ-ფაქტურის დანართი (დანართი №9), რომელშიც ხელით ჩაიწერება იმ კორექტირების ანგარიშ-ფაქტურის სერია და ნომერი, რომლის გაგრძელებასაც წარმოადგენს მოცემული დანართი. მათი შევსების თარიღი ერთი და იგივეა.  დანართ №9-ში ინფორმაცია შეიტანება იმ სახით, როგორც ეს გათვალისწინებულია კორექტირების ანგარიშ-ფაქტურაში. დანართის მე-4 მე-5 და მე-6 სვეტების ჯამები ჩაიწერება კორექტირების ანგარიშ-ფაქტურაში და საქონლის დასახელების ამსახველ პირველ სვეტში კეთდება ჩანაწერი „ამ კორექტირების საგადასახადო ანგარიშ-ფაქტურით მიეწოდა . . . დასახელების საქონელი დანართის მიხედვით“.

6. იმ შემთხვევაში, თუ საგამოძიებო და სხვა უფლებამოსილი ორგანოების მიერ საქართველოს სისხლის სამართლის საპროცესო კოდექსით დადგენილი წესით გადამხდელისაგან ამოღებულ იქნა კორექტირების საგადასახადო ანგარიშ-ფაქტურები, საგადასახადო ორგანოს მოთხოვნის შემთხვევაში, გადამხდელებს უფლება აქვთ საგადასახადო ორგანოში წარადგინონ ამოღებული კორექტირების საგადასახადო ანგარიშ-ფაქტურების ქსეროასლები და ამ ორგანოების სათანადო პასუხისმგებელი პირების მიერ ხელმოწერილი და ბეჭდით დამოწმებული ცნობა შესაბამისი კორექტირების საგადასახადო ანგარიშ-ფაქტურის ამოღების შესახებ, ხოლო დაბრუნების შემთხვევაში – მათი დედნები.

7. შეუვსებელი კორექტირების ანგარიშ-ფაქტურის დაკარგვის შემთხვევაში გადამხდელი დაუყოვნებლივ აცნობებს შესაბამის საგადასახადო ორგანოს ამ ანგარიშ-ფაქტურის გაუქმების მიზნით.

8. კორექტირების ანგარიშ-ფაქტურა ასევე გამოიყენება დანართი №6-ით გათვალისწინებული სპეციალური ანგარიშ-ფაქტურით დადასტურებული დასაბეგრი ოპერაციის კორექტირებისას.

    მუხლი 8. საგადასახადო ანგარიშ-ფაქტურის ელექტრონულად წარდგენა

1. იმ გადასახადის გადამხდელებს, რომლებიც თავიანთ საქმიანობასთან დაკავშირებული ყველა სამეურნეო ოპერაციის ბუღალტრულ აღრიცხვას ახდენენ კომპიუტერული სისტემებისა და პროგრამების გამოყენებით, უფლება აქვთ გამოიყენონ ამ ბრძანების დანართი №5-ის, №6-ის, №7-ის, №8-ის და №9-ის შესაბამისი ფორმის კომპიუტერული წესით ამობეჭდილი საგადასახადო ანგარიშ-ფაქტურები და მათი წარდგენა განახორციელონ ელექტრონული ფორმით – შემოსავლების სამსახურის ინტერნეტ-მომსახურების პორტალის გამოყენებით.

2. ელექტრონული წესით წარდგენილ საგადასახადო ანგარიშ-ფაქტურას გააჩნია ისეთივე იურიდიული ძალა, როგორიც წერილობითი ფორმით წარდგენილ საგადასახადო ანგარიშ-ფაქტურას.“.

    მუხლი 2

ბრძანებას დაემატოს დანართები №5, №6, №7, №8 და №9 თანდართული რედაქციით.

    მუხლი 3

ეს ბრძანება ამოქმედდეს გამოქვეყნებისთანავე.

კ. ბაინდურაშვილი