,,საქართველოს ეკონომიკური განვითარების სამინისტროს დებულების დამტკიცების შესახებ” საქართველოს მთავრობის 2004 წლის 10 სექტემბრის №77 დადგენილებაში ცვლილებებისა და დამატების შეტანის თაობაზე”

საქართველოს მთავრობის

დადგენილება №32

2005 წლის 24 თებერვალი

ქ. თბილისი

 „საქართველოს ეკონომიკური განვითარების სამინისტროს დებულების დამტკიცების შესახებ“ საქართველოს მთავრობის 2004 წლის 10 სექტემბრის №77 დადგენილებაში ცვლილებებისა და დამატების შეტანის თაობაზე

    მუხლი 1

„საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-17 მუხლის პირველი პუნქტისა და „საქართველოს ნორმატიული აქტების შესახებ“ საქართველოს კანონის 36-ე მუხლის შესაბამისად,„საქართველოს ეკონომიკური განვითარების სამინისტროს დებულების დამტკიცების შესახებ“ საქართველოს მთავრობის 2004 წლის 10 სექტემბრის №77 დადგენილებაში (სსმ III, 2004 წელი, №99, მუხლი 849) შეტანილ იქნეს შემდეგი ცვლილებები და დამატება:

1. დებულების მე-4 მუხლი ჩამოყალიბდეს შემდეგი რედაქციით:

„4. სამინისტროს სტრუქტურა

სამინისტროს სტრუქტურული ერთეულები არიან:

ა) პრივატიზების დეპარტამენტი;

ბ) ეკონომიკური პოლიტიკის დეპარტამენტი;

გ) კავშირგაბმულობის დეპარტამენტი;

დ) მშენებლობისა და ურბანიზაციის დეპარტამენტი;

ე) ტრანსპორტის დეპარტამენტი;

ვ) საგარეო ეკონომიკური ურთიერთობისა და საერთაშორისო პროგრამების დეპარტამენტი;

ზ) იურიდიული დეპარტამენტი;

თ) ადმინისტრაციული დეპარტამენტი;

ი) საზოგადოებასთან ურთიერთობის დეპარტამენტი;

კ) მინისტრის აპარატი;

ლ) გენერალური ინსპექცია;

მ) ქონების მართვის პოლიტიკის დეპარტამენტი.“.

2. დებულების მე-9 მუხლის „ა“ პუნქტი ჩამოყალიბდეს შემდეგი რედაქციით:

„ა) პრივატიზების დეპარტამენტი – ორგანიზებას უწევს აღმასრულებელი ხელისუფლების შესაბამის დაწესებულებებთან და ადგილობრივი მმართველობის ორგანოებთან შეთანხმების საფუძველზე ეროვნული მეურნეობის ცალკეული დარგების თავისებურებათა გათვალისწინებით სახელმწიფო ქონების პრივატიზების განხორციელების ერთიანი გეგმის პროექტის შემუშავებას; ორგანიზებას უწევს ტენდერზე გასატანი საპრივატიზებო ობიექტების საკონკურსო პირობების შემუშავებას; ამზადებს წინადადებებს სახელმწიფო ქონების პრივატიზებისა და საპრივატიზებო ობიექტთა ნუსხების დამტკიცების თაობაზე;“.

3. დებულების მე-9 მუხლს დაემატოს „მ“ პუნქტი შემდეგი რედაქციით:

„მ) ქონების მართვის პოლიტიკის დეპარტამენტი – ამზადებს წინადადებებს მოქმედი კანონმდებლობით გათვალისწინებული სახელმწიფო ქონების პრივატიზების ფორმით, თუ სხვა სახით სარგებლობაში გადაცემისა და განკარგვის თაობაზე; ახორციელებს სახელმწიფო საკუთრებაში არსებული ქონების აღრიცხვასა და მართვას (გარდა საწარმოებში არსებული სახელმწიფო წილისა და აქციებისა); ამზადებს წინადადებებს საერთო სახელმწიფო, ავტონომიური რესპუბლიკებისა და ადგილობრივი მმართველობის ქონების საკუთრების უფლების გამიჯვნისა და იმ ობიექტთა ნუსხების დამტკიცების შესახებ, რომელთა პრივატიზება აკრძალულია კანონმდებლობით; ამზადებს წინადადებებს სახელმწიფო წილობრივი მონაწილეობით ახალი საწარმოების დაფუძნების თაობაზე, იხილავს საწარმოების ბალანსზე რიცხული ქონების გირაოთი ან იპოთეკით დატვირთვის, ჩამოწერის, რეალიზაციის საკითხებს; იხილავს წინადადებებს საწარმოების საწესდებო კაპიტალში ცვლილებების შეტანის, სახელმწიფო წილობრივი მონაწილეობით მოქმედი საწარმოების მიერ სხვა საწარმოების აქციებისა და წილების შესყიდვისა და თავიანთი წილობრივი მონაწილეობით ახალი საწარმოების შექმნის თაობაზე; ამზადებს წინადადებებს მიწის, წიაღისეულისა და სხვა ბუნებრივი რესურსების, ტყის მართვისა და განკარგვის შესახებ.“.

    მუხლი 2

დადგენილება ამოქმედდეს გამოქვეყნებისთანავე.

პრემიერ-მინისტრი ზ. ნოღაიდელი