"ძველი თბილისის რეაბილიტაციის სახელმწიფო მიზნობრივი პროგრამის დამტკიცების შესახებ" საქართველოს მთავრობის 2009 წლის 6 ივლისის №121 დადგენილებაში დამატებების შეტანის თაობაზე

საქართველოს მთავრობის

დადგენილება№162

2011 წლის 31 მარტი

ქ. თბილისი

„ძველი თბილისის რეაბილიტაციის სახელმწიფო მიზნობრივი პროგრამის დამტკიცების შესახებ“საქართველოს მთავრობის 2009 წლის 6 ივლისის №121 დადგენილებაში დამატებების შეტანის თაობაზე

მუხლი 1.„ნორმატიული აქტების შესახებ“საქართვე­ლოს კანო­ნის მე-20 მუხლის მე-4 პუნქტის შესაბამისად „ძველი თბილისის რეაბილიტაციის სა­ხელმწიფო მიზნობრივი პროგრამის დამტკიცების შესახებ“საქარ­თველოს მთავრობის 2009 წლის 6 ივლისის №121 დად­გენილებაში შეტანილ იქნეს შემდეგი დამატებები:

ა) დადგენილებას დაემატოს შემდეგი შინაარსის 3¹ მუხლი:  

„3¹. ეთხოვოს ქ. თბილისის მთავრობას მიზნობრივი პროგრამის დამატებითი ეტაპის განხორციელებისათვის საჭირო ღონისძიებების გატარება.“;

ბ) დადგენილებით დამტკიცებული ძველი თბილისის რეაბი­ლიტაციის სახელმწიფო მიზნობრივ პროგრამას ,,ძველი თბილისის ახალი სიცოცხლე“დაემატოს შემდეგი შინაარსის მე-8 მუხლი:

     „მუხლი 8. პროგრამის დამატებითი ეტაპი

1. ქ. თბილისის მთავრობა უფლებამოსილია:

ა) ამ პროგრამით განსაზღვრული წესისა და პირობებისაგან განსხვავებით, ქ. თბი­ლის­­ში დაუმთავრებელი მშენებლობების დას­რულების ხელშეწყობის მიზნით, უზრუნველყოს პროგრამის დამა­ტებითი ეტაპის ჩატარება;

ბ) დამა­ტებითი ეტაპის განსახორციელებლად თავად, ან/და მის მიერ დაფუძნებული უფლებამოსილი იურიდიული პირის მეშვეობით გასცეს დაპირება პროგრამის ფარგლებში დასრულებულ შენობებში საცხოვრებელი ფართობების შესყიდვის თაობაზე.

2. პროგრამის დამატებითი ეტაპის გავრცელების არეალად შე­საძ­ლებელია განისაზღვროს          ქ. თბილისის ადმინისტრაციულ სა­ზღვ­რებში არსებული ტერიტორია სრულად.

3. პროგრამის დამატებითი ეტაპის მონაწილეებს, განხორ­ციე­ლების წესსა და პირობებს განსაზღვრავს ქ. თბილისის მთავრობა.“.

მუხლი 2. დადგენილება ამოქმედდეს გამოქვეყნებისთა­ნავე.

პრემიერ-მინისტრი              ნ. გილაური