„საქართველოს სოფლის მეურნეობისა და სურსათის სამინისტროს დებულების შესახებ“ საქართველოს პრეზიდენტის 1997 წლის 17 ნოემბრის №670 ბრძანებულებით დამტკიცებულ დებულებაში ცვლილების შეტანის თაობაზე

საქართველოს პრეზიდენტის

ბრძანებულება №203

2001 წლის 20 მაისი

ქ. თბილისი

„საქართველოს სოფლის მეურნეობისა და სურსათის სამინისტროს დებულების შესახებ“ საქართველოს პრეზიდენტის 1997 წლის 17 ნოემბრის №670 ბრძანებულებით დამტკიცებულ დებულებაში ცვლილების შეტანის თაობაზე

1. შეტანილ იქნეს ცვლილება „საქართველოს სოფლის მეურნეობისა და სურსათის სამინისტროს დებულების შესახებ“ საქართველოს პრეზიდენტის 1997 წლის 17 ნოემბრის №670 ბრძანებულებით დამტკიცებულ დებულებაში და მე-9 თავი ჩამოყალიბდეს შემდეგი რედაქციით:

„IX. სამინისტროს ცენტრალური აპარატის სტრუქტურა

42. სამინისტროს ცენტრალური აპარატი შედგება შემდეგი ქვედანაყოფებისაგან:

ა) მინისტრის სამდივნო, რომლის ძირითადი მიზანია მინისტრის საქმიანობისათვის საჭირო საინფორმაციო-ტექნიკური და სხვა სახის მომსახურების ორგანიზაციული უზრუნველყოფა;

ბ) სამინისტროს აპარატი, რომლის ძირითადი ამოცანები და კომპეტენციებია – მინისტრის, მინისტრის მოადგილეებისა და სამინისტროს სისტემაში არსებული სტრუქტურული ქვედანაყოფების, ტერიტორიული ორგანოებისა და საქვეუწყებო დაწესებულებების მართვისათვის საჭირო საინფორმაციო-ტექნიკური და სხვა სახის მომსახურების უზრუნველყოფა და უფლებამოსილებათა განხორციელებისათვის ხელშეწყობა;

გ) საბუღალტრო აღრიცხვისა და ანგარიშგების განყოფილება, რომლის ძირითადი ამოცანები და კომპეტენციებია – სამინისტროსა და მის სისტემაში არსებული საქვეუწყებო დაწესებულებების საბუღალტრო აღრიცხვისა და ანგარიშგების წარმოების ერთიანი მეთოდოლოგიური საფუძვლების უზრუნველყოფა;

დ) იურიდიული, პარლამენტთან ურთიერთობისა და კანონშემოქმედებითი საქმიანობის სამსახური, რომლის ძირითადი ამოცანები და კომპეტენციებია – სამინისტროს უზრუნველყოფა იურიდიული მომსახურებით, სამინისტროში არსებული დოკუმენტაციის სამართლებრივი ექსპერტიზა და ვიზირება, სამართლებრივი დასკვნების გაცემა, სამინისტროში კანონშემოქმედებითი საქმიანობისა და პარლამენტთან ურთიერთობის წარმართვის უზრუნველყოფა;

ე) საგარეო ურთიერთობების დეპარტამენტი, რომლის ძირითადი ამოცანები და კომპეტენციებია – სამინისტროს საგარეო ურთიერთობის წარმართვის უზრუნველყოფა, სამინისტროს მიერ განსახორციელებელი სხვადასხვა საერთაშორისო პროგრამებისა და პროექტების შემუშავება, საერთაშორისო პოლიტიკის ფორმირების ხელშეწყობა და სოფლის მეურნეობისა და სურსათის სფეროში მოქმედ საერთაშორისო ორგანიზაციებთან ურთიერთობის კოორდინაცია;

ვ) სასოფლო-სამეურნეო წარმოების მომსახურების დეპარტამენტი, რომლის ძირითადი ამოცანები და კომპეტენციებია – სასოფლო-სამეურნეო წარმოების განვითარებისათვის მეთოდოლოგიური და პრაქტიკული ხასიათის მომსახურება, ახალი ტექნოლოგიებისა და ტექნიკის დანერგვის ღონისძიებათა გატარება;

ზ) სტრატეგიული განვითარებისა და პოლიტიკის დეპარტამენტი, რომლის ძირითადი ამოცანები და კომპეტენციებია – აგრარულ-სამრეწველო და სასურსათო სექტორის სტრატეგიული განვითარების ხელშეწყობის ღონისძიებათა დამუშავება, დარგობრივი და საფინანსო პოლიტიკის განსაზღვრისათვის წინადადებების მომზადება, ბიუჯეტთან ფინანსური ურთიერთობის რეგულირება;

თ) კვებისა და გადამმუშავებელი მრეწველობის დეპარტამენტი, რომლის ძირითადი ამოცანები და კომპეტენციებია – სახელმწიფოს სასურსათო უსაფრთხოების უზრუნველყოფის ღონისძიებათა განხორციელება, დარგში საინვესტიციო კლიმატის გაუმჯობესების შესახებ წინადადებების შე მუშავება.

ე. შევარდნაძე