საქართველოს საგადასახადო კოდექსში ცვლილებების შეტანის შესახებ

საქართველოს კანონი

საქართველოს საგადასახადო კოდექსში ცვლილებების შეტანის შესახებ

მუხლი 1. საქართველოს საგადასახადო კოდექსში (პარლამენტის უწყებანი, №32, 1997 წლის 24 ივლისი, გვ.9) შეტანილ იქნეს შემდეგი ცვლილებები:

1. 260-ე მუხლის პირველი ნაწილი ჩამოყალიბდეს შემდეგი რედაქციით:

„1. საქართველოს საგადასახადო ორგანოებია საქართველოს ფინანსთა სამინისტროს საგადასახადო დეპარტამენტი და საგადასახადო ინსპექციები.“;

2. 260-ე მუხლის მე-4 ნაწილი ჩამოყალიბდეს შემდეგი რედაქციით:

„4. საგადასახადო ორგანოების შექმნის წესი, სტრუქტურა და უფლებამოსილებანი განისაზღვრება ამ კოდექსით, „მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონით და სხვა ნორმატიული აქტებით დადგენილი წესით.“;

3. 260-ე მუხლს დაემატოს შემდეგი შინაარსის „4¹“ ნაწილი:

„4¹. საქართველოს ფინანსთა მინისტრი უფლებამოსილია ცალკეულ შემთხვევებში განსაკუთრებული ნიშნის მიხედვით შექმნას საგადასახადო ინსპექცია, რომლის მოქმედება გავრცელდება საქართველოს მთელ ტერიტორიაზე.“.

4. 264-ე მუხლის:

ა) პირველი ნაწილის „ლ“ ქვეპუნქტი ამოღებულ იქნეს;

ბ) მე-2 ნაწილი ჩამოყალიბდეს შემდეგი რედაქციით:

„2. საქართველოს ფინანსთა სამინისტროს ფინანსური პოლიციის ოპერატიული ქვედანაყოფები აწარმოებენ ოპერატიულ-სამძებრო საქმიანობას სისხლის სამართლის საპროცესო კანონმდებლობით დადგენილი წესით.“.

5. კოდექსის 268-ე მუხლის პირველი ნაწილის „ა“ ქვეპუნქტი ჩამოყალიბდეს შემდეგი რედაქციით:

„ა. საქართველოს ფინანსთა სამინისტროს სისტემის თანამშრომლებს – ამ უკანასკნელთა მიერ სამსახურებრივი მოვალეობის შესრულების მიზნით;“.

6. ამოღებულ იქნეს კოდექსის 268-ე მუხლის პირველი ნაწილის „ვ“ ქვეპუნქტი.

მუხლი 2. ამ კანონის პირველი მუხლის პირველი პუნქტი ამოქმედდეს 2004 წლის 1 აპრილიდან.

მუხლი 3. ამ კანონის პირველი მუხლის მე-4 პუნქტი ამოქმედდეს „ფინანსური პოლიციის შესახებ“ საქართველოს კანონის ამოქმედებისთანავე.

მუხლი 4. ეს კანონი, გარდა მე-2 და მე-3 მუხლებით გათვალისწინებული შემთხვევებისა ამოქმედდეს გამოქვეყნებისთანავე.

საქართველოს პრეზიდენტი                    მ. სააკაშვილი

თბილისი,

2004 წლის 24 თებერვალი.

№3413–რს