„საქართველოს შინაგანი ჯარების შესახებ” საქართველოს კანონში ცვლილებების შეტანის თაობაზე

საქართველოს კანონი

„საქართველოს შინაგანი ჯარების შესახებ“ საქართველოს კანონში ცვლილებების შეტანის თაობაზე

საქართველოს პარლამენტი ადგენს:

I. „საქართველოს შინაგანი ჯარების შესახებ“ საქართველოს კანონში (პარლამენტის უწყებანი, №19-20, 30.05.1998) შეტანილ იქნეს შემდეგი ცვლილებები:

1. ამოღებულ იქნეს მე-2 მუხლის პირველი პუნქტის „დ“ ქვეპუნქტი, ხოლო „ე“ ქვეპუნქტი ჩაითვალოს „დ“ ქვეპუნქტად.

2. მე-4 მუხლის „გ“ ქვეპუნქტი ჩამოყალიბდეს შემდეგი რედაქციით:

„გ) სპეციალური დანიშნულების სამხედრო ნაწილები და ქვედანაყოფები“.

3. ამოღებულ იქნეს მე-8 მუხლის მე-2 პუნქტი.

4. მე-12 მუხლის პირველი პუნქტის „გ“ ქვეპუნქტიდან ამოღებულ იქნეს სიტყვები „ხოლო აუცილებლობის შემთხვევაში – სასჯელთა აღსრულების დაწესებულებებში;“.

5. მე-13 მუხლი ჩამოყალიბდეს შემდეგი რედაქციით:

     „მუხლი 13. სპეციალური დანიშნულების სამხედრო ნაწილებისა და ქვედანაყოფების მოვალეობანი

სპეციალური დანიშნულების სამხედრო ნაწილებსა და ქვედანაყოფებს ევალებათ:

ა) ქვეყანაში სახელმწიფო გადატრიალების მცდელობის აღკვეთაში მონაწილეობა;

ბ) კონფლიქტური სიტუაციების ლოკალიზაციაში მონაწილეობა;

გ) საომარი მოქმედების რაიონებში მოწინააღმდეგის დივერსიული ჯგუფებისა და სხვა შეიარაღებული ძალების ლიკვიდაციაში მონაწილეობა;

დ) გაქცეულ მსჯავრდებულთა და განსასჯელთა ძებნაში მონაწილეობა.“.

6. მე-14 მუხლის „ა“ ქვეპუნქტი ჩამოყალიბდეს შემდეგი რედაქციით:

„ა) საქართველოს პრეზიდენტის მიერ დამტკიცებული ნუსხით გათვალისწინებული განსაკუთრებული მნიშვნელობის სახელმწიფო ობიექტების, საქართველოს შინაგან საქმეთა სამინისტროს მატერიალურ-ტექნიკური და სამხედრო მომარაგების საწყობებისა და ბაზების, სასიცოცხლო კომუნიკაციებისა და სპეციალური ტვირთების დაცვა, ობიექტების შიდა და სასაშვო რეჟიმების განხორციელება;“.

II. ეს კანონი ამოქმედდეს გამოქვეყნებისთანავე.

საქართველოს პრეზიდენტი ედუარდ შევარდნაძე.

თბილისი,

2000 წლის 16 მაისი.

№299–IIს