შპს ,,ხულოს სატყეო მეურნეობა - სატყეო სერვისი’’-ს გაკოტრებულად გამოცხადების და რეგისტრაციის გაუქმების შესახებ

გ ა ნ ჩ ი ნ ე ბ ა

  საქართველოს სახელით

  მოვალის გაკოტრებულად გამოცხადების და რეგისტრაციის

 გაუქმების შესახებ

2012 წლის 8 ნოემბერი        

ქ. ქუთაისი

 

ქუთაისის საქალაქო სასამართლო

მოსამართლე გენადი მაკარიძე

 

განმცხადებელი /მოვალე/ – შპს ,,ხულოს სატყეო მეურნეობა – სატყეო სერვისი’’;

საიდენტიფიკაციო კოდი – 248048697

დირექტორი – ნადიმ ბოლქვაძე;

მოთხოვნა – მოვალის გაკოტრებულად გამოცხადება რეგისტრაციის გაუქმების გზით.

 ზეპირი მოსმენის გარეშე განიხილა შპს ,,ხულოს სატყეო მეურნეობა –სატყეო სერვისის’’ დირქტორის ნადიმ ბოლქვაძის გაკოტრებულად გამოცხადების და საწარმოს რეგისტრაციის გაუქმების საკითხი

გ ა მ ო ა რ კ ვ ი ა :

2012 წლის 17 სექტემბერს შპს ,,ხულოს სატყეო მეურნეობა – სატყეო სერვისის’’ სახელით ქუთაისის საქალაქო სასამართლოს განცხადებით მომართა დირექტორმა ნადიმ ბოლქვაძემ და აღნიშნა, რომ საზოგადოებას გააჩნია კრედიტორული დავალიანება 4781 ლარის ოდენობით, რომელთა შორის საბიუჯეტო დავალიანება შეადგენს – 2120 ლარს. ,,მეწარმეთა შესახებ’’ საქართველოს კანონის მე-9 მუხლის მე-9 პუნქტის შესაბამისად საწარმო გადახდისუუნაროა, ვინაიდან საზოგადოებაში ადგილი აქვს ,,გადახდისუუნარობის საქმის წარმოების შესახებ’’ საქართველოს კანონის მე-13 მუხლით გათვალისწინებულ გადახდისუუნარობას.

 2012 წლის 18 სექტემბრის განჩინებით განმცხადებელს დაუდგინდა ხარვეზი და დაევალა დაეზუსტებინა მოთხოვნა. აღნიშნული ხარვეზის შესავსებად განმცხადებელს განესაზღვრა 5 (ხუთი) სამუშაო დღის ვადა.

 2012 წლის 02 ოქტომბერს შპს ,,ხულოს სატყეო მეურნეობა –სატყეო სერვისის’’ დირქტორის ნადიმ ბოლქვაძის მიერ გამოსწორდა დადგენილი ხარვეზი, კერძოდ განმცხადებელმა მიუთითა, რომ ვინაიდან მოვალე თავისი ქონებით გაკოტრების საქმის წარმოების გახსნის შემთხვევაში ვერ უზრუნველყოფს საპროცესო ხარჯების დაფარვას, ითხოვს განცხადების წარმოებაში მიღებაზე უარის თქმას იმ მითითებით, რომ შპს ,,ხულოს სატყეო მეურნეობა –სატყეო სერვისი’’ გაკოტრებულად გამოცხადდეს რეგისტრაციის გაუქმების გზით.

  2012 წლის 04 ოქტომბრის განჩინებით შპს ,,ხულოს სატყეო მეურნეობა –სატყეო სერვისის’’ დირ ე ქტორს ნადიმ ბოლქვაძეს უარი ეთქვა განცხადების წარმოებაში მიღებაზე, ვინაიდან მოვალე თავისი ქონებით ვერ უზრუნველყოფდა საპროცესო ხარჯების დაფარვას.ამასთან, განემარტათ კრედიტორებს, რომ შეეძლოთ მოემართათ სასამართლოსათვის შპს ,,ხულოს სატყეო მეურნეობა –სატყეო სერვისის’’ მიმართ გადახდისუუნარობის შესახებ საქმის წარმოების დაწყებისა და მოვალის ქონებიდან მათი მოთხოვნის დაკმაყოფილების თაობაზე სასამართლოში გადახდისუუნარობის შესახებ განცხადების შეტანის გზით. თუ განჩინების გამოქვეყნებიდან 1 თვის ვადაში კრედიტორი გადახდისუუნარობის შესახებ განცხადებას არ შეიტანდა სასამართლოში, სასამართლო მოვალეს გაკოტრებულად გამოაცხადებდა, რაც მოვალის რეგისტრაციის გაუქმების საფუძველი იყო.

  ქუთაისის საქალაქო სასამართლოს 2012 წლის 04 ოქტომბრის განჩინება გადახდისუუნარობის განცხადების წარმოებაში მიღებაზე უარის თქმის შესახებ საქართველოს საკანონმდებლო მაცნეს ვებგვერდზე გამოქვეყნდა 2012 წლის 05 ოქტომბერს და განჩინების გამოქვეყნებიდან 1 თვის ვადაში კრედიტორს გადახდისუუნარობის შესახებ განცხადებით არ მოუმართავს სასამართლოსათვის.

  ,,გადახდისუუნარობის საქმის წარმოების შესახებ” საქართველოს კანონის მე-20 მუხლის მიხედვით , თუ მოვალე გადახდისუუნარობის შესახებ განცხადებით მოითხოვს გაკოტრებას და სასამართლო ამ კანონის მე-19 მუხლის პირველი პუნქტით განსაზღვრულ ვადაში მოვალის მიერ ამავე კანონის მე-16 მუხლით გათვალისწინებული გადახდისუუნარობის შესახებ განცხადების საფუძველზე დაადგენს, რომ გადახდისუუნარობის შესახებ განცხადების შეტანის დროისათვის გაკოტრების დაწყების შემთხვევაში მოვალე თავისი ქონებით ვერ უზრუნველყოფს საპროცესო ხარჯების დაფარვას, სასამართლოს გამოაქვს განჩინება გადახდისუუნარობის შესახებ განცხადების წარმოებაში მიღებაზე უარის თქმის შესახებ და მასში უთითებს, რომ მოვალე გაკოტრებულად გამოცხადდება რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

 ,,გადახდისუუნარობის საქმის წარმოების შესახებ” საქართველოს კანონის მე-20 მუხლის მე-9 პუნქტის მიხედვით, თუ ამ მუხლის მე-5 პუნქტით გათვალისწინებული ინფორმაციის გამოქვეყნებიდან 1 თვის ვადაში კრედიტორი ამავე მუხლის მე-7 პუნქტით განსაზღვრულ გადახდისუუნარობის შესახებ განცხადებას არ შეიტანს სასამართლოში, სასამართლო მოვალეს გაკოტრებულად აცხადებს, რაც მოვალის რეგისტრაციის გაუქმების საფუძველია.

  გამომდინარე აღნიშნულიდან, შპს ,,ხულოს სატყეო მეურნეობა – სატყეო სერვისი’’ უნდა გამოცხადდეს გაკოტრებულად და უნდა გაუქმდეს შპს ,,ხულოს სატყეო მეურნეობა – სატყეო სერვისის’’ რეგისტრაცია სამეწარმეო რეესტრში.

 სასამართლომ იხელმძღვანელა ,,გადახდისუუნარობის საქმის წარმოების შესახებ” საქართველოს კანონის 1-ლი, მე-5, მე-7, მე-8, მე-19, მე-20 მუხლებით, სამოქალაქო ს ა პროცესო კოდექსის 284-ე, 285-ე მუხლებით,

დ ა ა დ გ ი ნ ა :

1. შპს ,,ხულოს სატყეო მეურნეობა – სატყეო სერვისი’’ (ს/ნ 248048697) გამოცხადდეს გაკოტრებულად და გაუქმდეს შპს ,,ხულოს სატყეო მეურნეობა – სატყეო სერვისი ს’’ რეგისტრაცია სამეწარმეო რეესტრში.

2. განჩინება გამოქვეყნდეს ,,საქართველოს საკანონმდებლო მაცნეს” ვებგვერდზე.

3. განჩინებაზე შეიძლება კერძო საჩივრის შეტანა ქუთაისის საქალაქო სასამართლოში(ქ. ქუთაისი, კუპრაძის ქ. №11 ) განჩინების განმცხადებლისათვის გადაცემიდან 5 დღის ვადაში.

 

მოსამართლე           გ . მაკარიძე