განჩინება შპს „ჭარნალის მეურნეობის“ გაკოტრების მმართველად სსიპ აღსრულების ეროვნული ბიუროს დანიშვნის თაობაზე

№ 2 /846-13

 

გ ა ნ ჩ ი ნ ე ბ ა

 

საქართველოს სახელით

 

შპს ,,ჭარნალის მეურნეობის” გაკოტრების მმართველად სსიპ – აღსრულების                         ეროვნული ბიუროს დანიშვნის თაობაზე

 

2013 წლის 1 აგვისტო

 

ქ. ქუთაისი

 

ქუთაისის საქალაქო სასამართლო

მოსამართლე გენადი მაკარიძე

 

ნოდარ გიორგიძის მდივნობით

შპს ,,ჭარნალის მეურნეობის” მეურვის – სსიპ აღსრულების ეროვნული ბიუროს წარმომადგენლის ნათია სახოკიას, კრედიტორ სსიპ შემოსავლების სამსახურის წარმომადგენლის მადონა გეწაძის, კრედიტორების ა. მაკარაძის, რ. მიქელაძის და სხვ. მონაწილეობით განიხილა შპს ,,ჭარნალის მეურნეობის” გაკოტრების მმართველის დამტკიცების საკითხი და

გ ა მ ო ა რ კ ვ ი ა:

2013წლის21 ივნისს შპს „ჭარნალის მეურნეობის’’ სახელით ქუთაისის საქალაქო სასამართლოს განცხადებით მომართა დირექტორმა ვლადიმერ შაინიძემ და აღნიშნა, რომ საზოგადოებას გააჩნია კრედიტორული დავალიანება – 295029,05 ლარის ოდენობით, მათ შორის, 273428,05 ლარი წარმოადგენს საგადასახადო დავალიანებას, რომელიც არის უზრუნველყოფილი კრედიტორულ ი დავალიანება (საგადასახდო-საბიუჯეტო დავალიანება). განმცხადებელმა შპს „ჭარნალის მეურნეობის’’ მიმართ გაკოტრების საქმის წარმოების გახსნა ითხოვა.

2013 წლის 24 ივნისის განჩინებით შპს ,,ჭარნალის მეურნეობის” დირექტორის ვლადიმერ შაინიძის განცხადება მიღებულ იქნა წარმოებაში.

შპს ,,ჭარნალის მეურნეობის” მეურვის – სსიპ აღსრულების ეროვნული ბიუროს წარმომადგენლის ნათია სახოკიას მიერ კრებაზე წარმოდგენილი იქნა მოხსენება.

კრედიტორებმა გაკოტრების მმართველად სასამართლოს მიერ აღსრულების ეროვნული ბიუროს დანიშვნა მოითხოვეს, რასაც დაეთანხმა   სსიპ – აღსრულების ეროვნული ბიუროს წარმომადგენლი.

   სასამართლო გაეცნო რა კრედიტორთა კრების გადაწყვეტილებას, მიაჩნია, რომ შპს ,,ჭარნალის მეურნეობის” გაკოტრების მმართველად დანიშნული უნდა იქნეს სსიპ – აღსრულების ეროვნული ბიურო შემდეგ გარემოებათა გამო:

 სასამართლო აღნიშნავს, რომ ,,გადახდისუუნარობის საქმის წარმოების შესახებ“ საქართველოს კანონის მე-17 მუხლის პირველი პუნქტის თანახმად, თუ მოვალე გადახდისუუნარობის შესახებ განცხადებით მოითხოვს გაკოტრებას, მაშინ კრედიტორთა კრებაზე ინიშნება გაკოტრების მმართველი და იწყება გაკოტრების საქმის წარმოება ამ კანონით დადგენილი წესით.

„გადახდისუუნარობის საქმის წარმოების შესახებ“ საქართველოს კანონის 37-ე მუხლის პირვლი პუნქტის თანახმად, გაკოტრების პროცესში საწარმოს მართვასა და წარმომადგენლობას ახორციელებს გაკოტრების მმართველი. გაკოტრების მმართველი აღჭურვილია „მეწარმეთა შესახებ“ საქართველოს კანონითა და შესაბამისი სამეწარმეო საქმიანობის სუბიექტთა მართვაზე, ხელმძღვანელობასა და წარმომადგენლობაზე უფლებამოსილი პირებისათვის მინიჭებული ყველა უფლებამოსილებით. გაკოტრების პროცესში მოვალის ხელმძღვანელობაზე უფლებამოსილ პირს ხელმძღვანელობითი და წარმომადგენლობითი უფლებამოსილებები უჩერდება, გარდა ამ კანონის 36 ¹ მუხლით გათვალისწინებული შემთხვევისა.

   ამავე მუხლის მე-3 პუნქტის მიხედვით, გაკოტრების მმართველი შესაძლებელია იყოს როგორც ფიზიკური, ისე იურიდიული პირი. გაკოტრების მმართველი უნდა იყოს მხარეთაგან დამოუკიდებელი, მიუკერძოებელი, კეთილსინდისიერი (იურიდიული პირის შემთხვევაში – საქმიანი რეპუტაციის მქონე) პირი. გაკოტრების მმართველად არ შეიძლება დაინიშნოს პირი, რომელიც ახორციელებს იმავე ან მსგავს საქმიანობას, როგორსაც მოვალე.

   ამავე მუხლის მე-4 პუნქტის თანახმად, გაკოტრების მმართველსა და კრედიტორებს შორის იდება ხელშეკრულება, რომლითაც განისაზღვრება გაკოტრების მმართველის უფლებამოსილების ფარგლები, მისი ანაზღაურებისა და პასუხისმგებლობის საკითხები. პასუხისმგებლობის უზრუნველსაყოფად შესაძლებელია საბანკო გარანტიის ან/და პასუხისმგებლობის დაზღვევის გამოყენება; ,,გადახდისუუნარობის საქმის წარმოების შესახებ“ საქართველოს კანონის 27-ე მუხლის მე-5 პუნქტის ,,ბ“ ქვეპუნქტის თანახმად, კრედიტორთა კრება ამ კანონით დადგენილი წესით განიხილავს საკითხს და იღებს გადაწყვეტილებას გაკოტრების მმართველის დანიშვნის შესახებ, ხოლო მე- 8 პუნქტის თანახმად, კრედიტორთა კრებაზე გადაწყვეტილება მიიღება მასზე წარმოდგენილ ხმათა უბრალო უმრავლესობით, თუ კანონით სხვა რამ არ არის განსაზღვრული.

   „გადახდისუუნარობის საქმის წარმოების შესახებ“ საქართველოს კანონის 37-ე მუხლის მე-2 პუნქტის მიხედვით,  გაკოტრების მმართველს ირჩევენ კრედიტორები გაკოტრების შესახებ სასამართლოს განჩინების გამოქვეყნებიდან 3 დღის ვადაში. თუ გაკოტრების მმართველი კრედიტორთა კრებაზე ვერ აირჩევა ან კრედიტორები არ წარადგენენ გაკოტრების მმართველის კანდიდატურებს, გაკოტრების მმართველად სასამართლო ნიშნავს აღსრულების ეროვნულ ბიუროს. ამავე მუხლის მე-5 პუნქტის შესაბამისად, გაკოტრების მმართველად აღსრულების ეროვნული ბიუროს დანიშვნის შემთხვევაში მმართველის უფლებამოსილების განხორციელებასთან დაკავშირებული  აღსრულების ეროვნული ბიუროს მომსახურების საფასურის ოდენობას განსაზღვრავს საქართველოს იუსტიციის მინისტრი. მომსახურების საფასური ანაზღაურდება სამეურვეო ქონებიდან.

  „გადახდისუუნარობის საქმის წარმოების შესახებ“ საქართველოს კანონის მუხლი 55¹ მუხლის პირველი პუნქტის თნახმად, სასამართლოს გადაწყვეტილებები გადახდისუუნარობის, გაკოტრების ან რეაბილიტაციის საქმის წარმოების დაწყების, შეწყვეტის, გადახდისუუნარობის საქმის წარმოების მეურვის, გაკოტრების ან რეაბილიტაციის მმართველის დანიშვნის (ასევე მათი ცვლილების), რეაბილიტაციის საქმის წარმოების დასრულების და გაკოტრების საქმის წარმოების დასრულების საფუძველზე იურიდიული პირის რეგისტრაციის გაუქმების შესახებ რეგისტრირდება მეწარმეთა და არასამეწარმეო (არაკომერციული) იურიდიული პირების რეესტრში.

   ამავე მუხლის მე-2 პუნქტის მიხედვით, გადახდისუუნარობის, გაკოტრების ან რეაბილიტაციის საქმის წარმოება დაწყებულად, შეწყვეტილად, მეურვის, გაკოტრების ან რეაბილიტაციის მმართველის უფლებამოსილება (ასევე მათი ცვლილება) წარმოშობილად, რეაბილიტაციის საქმის წარმოება დასრულებულად და გაკოტრების საქმის წარმოების დასრულების საფუძველზე იურიდიული პირის რეგისტრაცია გაუქმებულად ჩაითვლება მხოლოდ შესაბამისი გადაწყვეტილების საფუძველზე, მისი მეწარმეთა და არასამეწარმეო (არაკომერციული) იურიდიული პირების რეესტრში რეგისტრაციის შემდეგ.

   სასამართლომ იხელმძღვანელა „გადახდისუუნარობის საქმის წარმოების შესახებ“ საქართველოს კანონის მე-4, მე-5, მე-7, მე-8, 27-ე, 37-ე, 39-ე, 55¹ მუხლებით, საქართველოს სამოქალაქო საპროცესო კოდექსის 284-ე, 285-ე მუხლებით და

 

დ ა ა დ გ ი ნ ა:

1. შპს ,,ჭარნალის მეურნეობის” (ს/კ 248381166) მიმართ გაიხსნას გაკოტრების საქმის წარმოება.

2. შპს ,,ჭარნალის მეურნეობის” (ს/კ 248381166) გაკოტრების მმართველად დაინიშნოს სსიპ –აღსრულების ეროვნული ბიურო.

3. დაევალოს სსიპ – აღსრულების ეროვნულ ბიუროს შპს ,,ჭარნალის მეურნეობის” (ს/კ 248381166) გაკოტრების საქმესთან დაკავშირებით განახორციელოს „გადახდისუუნარობის საქმის წარმოების შესახებ“ საქართველოს კანონით გათვალისწინებული მოქმედებები.

4. შპს ,,ჭარნალის მეურნეობის” (ს/კ 248381166) გაკოტრების მმართველად სსიპ – აღსრულების ეროვნული ბიუროს დანიშვნის შესახებ ინფორმაცია დარეგისტრირდეს მეწარმეთა და არასამეწარმეო (არაკომერციული) იურიდიული პირების რეესტრში.

5. განჩინება გაეგზავნოთ მხარეებს, შესასრულებლად სსიპ აღსრულების ეროვნული ბიუროს და სსიპ საჯარო რეესტრის ეროვნულ სააგენტოს მეწარმეთა და არასამეწარმეო (არაკომერციული) იურიდიული პირების რეესტრს.

6. განჩინებაზე შეუძლია კერძო საჩივრის შეტანა გადახდისუუნარობის საქმის წარმოების პროცესის მხარეებს, აგრეთვე იმ პირებს, რომელთაც უშუალოდ ეხებათ ეს განჩინება მისი გადაცემიდან 5 (ხუთი) დღის ვადაში, ქუთაისის საქალაქო სასამართლოში (მის.: ქ. ქუთაისი, კუპრაძის №11). ამ ვადის გაგრძელება დაუშვებელია. თუ განჩინების გამოცხადებას ესწრებოდა კერძო საჩივრის შეტანის უფლების მქონე პირი, კერძო საჩივრის შეტანის ვადა დაიწყება მისი გამოცხადების მომენტიდან.

 

მოსამართლე                                                            გენადი მაკარიძე