არასამხედრო, ალტერნატიული შრომითი სამსახურის გავლის დებულების, მოქალაქეთა არასამხედრო, ალტერნატიულ შრომით სამსახურში გაწვევის სახელმწიფო კომისიის დებულებისა და არასამხედრო, ალტერნატიული შრომითი სამსახურის გავლის მიზნით შესაბამისი სამსახურებისა და არასამხედრო-შრომითი ფორმირებების დამატებითი ნუსხის დამტკიცების შესახებ

არასამხედრო, ალტერნატიული შრომითი სამსახურის გავლის დებულების, მოქალაქეთა არასამხედრო, ალტერნატიულ შრომით სამსახურში გაწვევის სახელმწიფო კომისიის დებულებისა და არასამხედრო, ალტერნატიული შრომითი სამსახურის გავლის მიზნით შესაბამისი სამსახურებისა და არასამხედრო-შრომითი ფორმირებების დამატებითი ნუსხის დამტკიცების შესახებ საქართველოს მთავრობის დადგენილება №391 2013 წლის 30 დეკემბერი ქ.თბილისი არასამხედრო, ალტერნატიული შრომითი სამსახურის გავლის დებულების, მოქალაქეთა არასამხედრო, ალტერნატიულ შრომით სამსახურში გაწვევის სახელმწიფო კომისიის დებულებისა და არასამხედრო, ალტერნატიული შრომითი სამსახურის გავლის მიზნით შესაბამისი სამსახურებისა და არასამხედრო-შრომითი ფორმირებების დამატებითი ნუსხის დამტკიცების შესახებ მუხლი 1🔗 „არასამხედრო, ალტერნატიული შრომითი სამსახურის შე­სა­ხ­ებ‘‘ საქართველოს კანონის მე-5 მუხლის მე-3 და მე-5 პუნქტებისა და მე-13 მუხლის მოთხოვნათა შესრულების მიზნით დამტკიცდეს: 1. „არასამხედრო, ალტერნატიული შრომითი სამსახურის გავლის შესახებ‘‘  დებულება (დანართი №1). 2. ,,მოქალაქეთა არასამხედრო, ალტერნატიულ შრომით სამსახურში გაწვევის სახელმწიფო კომისიის“  დებულება (დანართი №2); 3. ,,არასამხედრო, ალტერნატიული შრომითი სამსახურის გავლის მიზნით შესაბამისი სამსახურებისა და არასამხედრო-შრომითი ფორმი­რე­ბების დამატებითი ნუსხა“ (დანართი №3). 4. დაევალოს: ა) საქართველოს შინაგან საქმეთა, იუსტიციის, სპორტისა და ახა­ლ­გა­ზრდობის საქმეთა, განათლებისა და მეცნიერების, რეგიონული განვი­თა­რებისა და ინფრასტრუქტურისა და სოფლის მეურნეობის სამინისტ­როებს ამ დადგენილების ამოქმედებიდან ათი კალენდარული დღის ვა­დაში სახელმწიფო კომისიაში წარსადგენი კანდიდატურების განსაზღვრა და საქართველოს შრომის, ჯანმრთელობისა და სოციალური დაცვის სამი­ნისტროსთვის მიწოდება; ბ) საქართველოს შრომის, ჯანმრთელობისა და სოციალური დაცვის სამინისტრომ, უზრუნველყოს მოქალაქეთა არასამხედრო, ალტერნატიული შრომითი სამსახურის გავლისათვის  აუცილებელი მის კომპეტენციას მიკუთვნებული ყველა ღონისძიების შეუფერხებელი განხორციელება. 5. ამ დადგენილებით დამტკიცებული ,,მოქალაქეთა არასამხედრო, ალტერნატიულ შრომით სამსახურში გაწვევის სახელმწიფო კომისიის დე­ბულების“ მე-3 მუხლის პირველი პუნქტით გათვალისწინებული მო­თ­­ხოვნის შესრულებამდე, მოქალაქეთა არასამხედრო, ალტერნატიულ შრომით სამსახურში გაწვევის პროცესის შეუფერხებელი განხორციე­ლე­ბ­ის მიზნით კომისიის შემადგენლობა განისაზღვროს „მოქალაქეთა არასა­მ­ხედრო, ალტერნატიულ შრომით სამსახურში გაწვევის სახე­ლმ­წი­ფო კო­მი­სიის შემადგენლობის დამტკიცების შესახებ“ საქართველოს პრეზი­დე­ნ­ტ­ის 2004 წლის 18 აგვისტოს №722 განკარგულების შესაბამისად, (2013 წლის 16 ნოემბრისთვის განსაზღვრული შემადგენ­ლო­ბით, გარდა იმ შემ­თ­ხვევებისა, როდესაც კონკრეტული თანამდე­ბო­ბის პირი აღარ არის მო­ცე­მულ თანამდებობაზე, ხოლო შესაბამისი ცვლი­ლებები პრეზი­დენ­ტის ზე­მოხსენებულ განკარგულებაში ასახული არ არის).   6. „საქართველოს მოქალაქეთა მიერ არასამხედრო, ალტერ­ნატი­ული შრომითი სამსახურის გავლის მიზნით შესაბამისი სამსახურებისა და არასამხედრო-შრომითი ფორმირებების ნუსხის დამტკიცების შესა­ხებ“ საქართველოს პრეზიდენტის 2009 წლის 1 დეკემბრის №887 ბრძა­ნებულების შესაბამისად, გაწვეული პირები თავის მოვალეობას იხდიან გაწვევის შესაბამისად განსაზღვრულ ადგილებზე არასამხედრო, ალტერ­ნა­ტიული შრომითი სამსახურის გავლის დასრულებამდე ან ვადამდე შეწყვეტამდე. მუხლი 2🔗 დადგენილება ამოქმედდეს გამოქვეყნებისთანავე. პრემიერ-მინისტრიირაკლი ღარიბაშვილი                                                                                     დანართი №1 არასამხედრო, ალტერნატიული შრომითი სამსახურის გავლის შესახებ დებულება თავი I. ზოგადი დებულებანი მუხლი 1🔗. ეს დებულება ეფუძნება საქართველოს კონსტიტუციას, „არა­სამხედრო, ალტერნატიული შრომითი სამსახურის შესახებ‘‘ საქარ­თ­ვე­ლოს კანონს, საქართველოს სხვა საკანონმდებლო და კანონქვემდებარე აქ­ტებს და ადგენს მოქალაქეთა მიერ არასამხედრო, ალტერნატიული შრო­მითი სამსახურის გავლის წესს. მუხლი 2🔗 1. არასამხედრო, ალტერნატიული შრომითი სამსახურის გავლას და­ქვემდებარებულ პირთა წრე, ასევე არასამხედრო, ალტერნატიული შრო­მითი სამსახურის გავლის მოთხოვნით მიმართვის, მოქალაქეთა არა­სა­მხედრო, ალტერნატიული შრომით სამსახურში ჩარიცხვის ან ჩარი­ცხ­ვაზე უარის შესახებ გადაწყვეტილებების მიღების, გაფორმებისა და გასა­ჩივრებისა და ადმინისტრირების პროცედურები, რომელიც არ არის მო­წე­­სრიგებული ამ დებულებით, განისაზღვრება „არა­სამხედრო, ალტე­რნა­ტი­ული შრომითი სამსახურის შესახებ‘‘ საქართველოს კანო­ნი­თა და საქა­რ­თველოს მოქმედი კანონმდებლობით. 2. ტერმინთა განმარტებები: ა) სამინისტრო - საქართველოს შრომის, ჯანმრთელობისა და სოციალური დაცვის სამინისტრო; ბ) მინისტრი - საქართველოს შრომის, ჯანმრთელობისა და სოციალური დაცვის მინისტრი; გ) სამინისტროს კომპეტენტური სამსახური - სამინისტროს შრომისა და დასაქმების პოლიტიკის დეპარტამენტი; დ) სახელმწიფო კომისია - მოქალაქეთა არასამხედრო, ალტერნატიული შრომითი სამსახურში გაწვევის სახელმწიფო კომისია.          თავი II. არასამხედრო, ალტერნატიული შრომითი სამსახურის გავლის წესი მუხლი 3🔗 1. მინისტრის ბრძანების საფუძველზე  სამინისტროს კომპეტენტური სამსახური უგზავნის მოქალაქეს ცნობას არასამხედრო, ალტერნატიულ შრომით სამსახურში გაწვევის ან გაწვევაზე უარის შესახებ. ამ ცნობის ასლი ეგზავნება აგრეთვე იმ მუნიციპალიტეტის, ხოლო ქალაქ თბილისში - იმ რაიონის გამწვევ კომისიას, რომელსაც მოქალაქემ მიმართა განცხადებით არასამხედრო, ალტერნატიულ შრომით სამსახურში გაწვევასთან დაკავშირებით. 2. არასამხედრო, ალტერნატიულ შრომით სამსახურში გაწვევის შემთხვევაში, ამ მუხლის პირველი პუნქტით განსაზღვრულ ცნობაში მითითებული უნდა იყოს არასამხედრო, ალტერნატიული შრომითი სამსახურის ვადის დაწყებისა და მისი ამოწურვის „არასამხედრო, ალტერნატიული შრომითი სამსახურის შესახებ“ საქართველოს კანონის შესაბამისად განსაზღვრული თარიღები, ასევე იმ დამსაქმებლის რეკვიზიტები ან/და საიდენტიფიკაციო მონაცემები და ფაქტობრივი ადგილსამყოფელის მისამართი, რომელთანაც მოქალაქე ვალდებულია გამოცხადდეს მისთვის ამ ცნობის ჩაბარებიდან არაუგვიანეს 10 კალენდარული დღისა. ამასთან, ცნობას თან უნდა ერთოდეს სამინისტროს კომპეტენტურ  სამსახურსა და დამსაქმებელს ან მის კანონიერ წარმომადგენელს შორის დადებული არასამხედრო, ალტერნატიულ შრომით სამსახურში გაწვეული მოქალაქის დასაქმების შესახებ ხელშეკრულების ასლი. დასაქმების შესახებ ხელშეკრულების ნიმუშს ამტკიცებს საქართველოს შრომის, ჯანმრთელობისა და სოციალური დაცვის მინისტრი ინდივიდუალური ადმინისტრაციულ-სამართლებრივი აქტით - ბრძანებით. 3. არასამხედრო, ალტერნატიულ შრომით სამსახურში გაწვეული მოქალაქის დასაქმების შესახებ ხელშეკრულებით განსაზღვრული ხელშემკვრელი დამსაქმებელი ან მისი კანონიერი წარმომადგენელი: ა) პასუხისმგებელია ხელშეკრულებით გათვალისწინებულ სამუშაო ადგილზე ამ მოქალაქის მიერ არასამხედრო, ალტერნატიულ შრომით სამსახურის კეთილსინდისიერად გავლის უზრუნველყოფაზე; ბ) აწარმოებს სააღ­რიცხვო ბარათს, რომელშიც აღინიშნება ამ მოქალაქის მიერ არასამხედრო, ალტერნატიული შრომითი სამსახურის გავლის მსვლელობა. ბარათის ფორმას შეიმუშავებს სახელმწიფო კომისია და ამტკიცებს საქართველოს შრომის, ჯანმრთელობისა და სოციალური დაცვის მინისტრი ინდივიდუალური ადმინისტრაციულ-სამართლებრივი აქტით - ბრძანებით; გ) პასუხისმგებელია დასაქმების შესახებ ხელშეკრულებით განსაზღვრული სხვა უფლება-მოვალეობების განხორციელებაზე. 4. დამსაქმებლისგან დამოუკიდებელი მიზეზით არასამხედრო, ალტერნატიულ შრომით სამსახურში გაწვეული მოქალაქის დასაქმების შესახებ ხელშეკრულების განხორციელების შეუძლებლობის შემთხვევაში, არასამხედრო, ალტერნატიულ შრომით სამსახურში გაწვეული მოქალაქე ვალდებულია მიმართოს სახელმწიფო კომისიას არაუგვიანეს 10 კალენდარული დღისა იმ დღიდან, როდესაც დასაქმების შესახებ ხელშეკრულების განხორციელების შეუძლებლობის თაობაზე ინფორმაცია ამ მოქალაქისთვის გახდა ცნობილი. 5. ამ მუხლის მე-4 პუნქტით განსაზღვრულ შემთხვევაში არასამხედრო, ალტერნატიული შრომითი სამსახურის გავლის ვადის დენა შეჩერდება დასაქმების შესახებ ხელშეკრულების შეწყვეტის დღიდან. აღნიშნული ვადის დენა განახლდება ამ მოქალაქის მიერ არასამხედრო, ალტერნატიული შრომითი სამსახურის მოქმედი კანონმდებლობის შესაბამისად სხვა დამსაქმებელთან გაგრძელების შემთხვევაში. თავი III. არასამხედრო, ალტერნატიული შრომითი სამსახურის გავლის პერიოდში მოქალაქის დასაქმების ადგილის შეცვლა, მივლინება, პროფესიული მომზადება და რეზერვში ჩარიცხვა  მუხლი 4🔗. არასამხედრო, ალტერნატიული შრომითი სამსახურის გავ­ლის პერიოდში მყოფი მოქალაქის ერთი სამუშაო ადგილიდან მეორეზე გადაყვანაზე გადაწყვეტილებას იღებს მინისტრი სახელმწიფო კომისიის დასკვნის საფუძველზე. მუხლი 5🔗. 1. არასამხედრო, ალტერნატიული შრომითი სამსახურის გავლის პერიოდში   მოქალაქის სამსახურებრივ მივლინებაში გაგზავნა ხდება დამსაქმებლის მიერ, რაც ფორმდება წერილობით. თუ სამსახურებრივი მივლინების ხანგრძლივობა აღემატება 30 კალენდარულ დღეს, დამსაქმე­ბელი ვალდებულია აღნიშნულის თაობაზე აცნობოს სახელმწიფო კომი­სიას. 2. დამსაქმებელი ვალდებულია აანაზღაუროს არასამხედრო, ალ­ტე­რ­ნატიული შრომითი სამსახურში მყოფი მივლინებული მოქალა­ქის მი­ვ­ლი­ნებასთან დაკავშირებული ყველა ხარჯი. მუხლი 6🔗. მოქალაქე, რომელიც გადის არასამხედრო, ალტერნა­ტი­ულ შრო­მით სამსახურს, პროფესიული მომზადებისათვის სახელმწიფო კო­მისიის გადაწყვეტილებით შეიძლება გაიგზავნოს შესაბამის სასწავლე­ბე­ლში. მუხლი 7🔗. არასამხედრო, ალტერნატიული შრომითი სამსახურის გავლის ვადის ამოწურვის შემდგომ მოქალაქის პირადი საქმე, დასაქმების შესახებ ხელშეკრულებით გათვალისწინებული ცნობა-დახასიათებასა და სააღრიცხვო ბარათთან ერთად ეგზავნება მუნიციპალიტეტის ან რაიონის სამხედრო განყოფილებას, მოქალაქის საცხოვრებელი ადგილის მიხედვით. ეს სამხედრო განყოფილება უზრუნველყოფს მოქალაქის ჩარიცხვას არასამხედრო, ალტერნატიული შრომითი სამსახურის რეზერვში.          თავი IV. არასამხედრო, ალტერნატიულ შრომით სამსახურში დასაქმებული მოქალაქის უფლებები და გარანტიები მუხლი 8🔗. მოქალაქეებს არასამხედრო, ალტერნატიული შრომითი სამ­სახურის გავლის პერიოდში ეძლევათ ანაზღაურებადი შვებულება 24 სამუშაო დღის ოდენობით. ანაზღაურებადი შვებულების გარდა, შესაბამისი დოკუმენტების წარმოდგენის პირობით მოქალაქეებს არასამხედრო, ალტერნატიული შრომითი სამ­სახურის გავლის პერიოდში შეიძლება დამატებით მიეცეთ მოკლევადიანი უხელფასო შვებულება 10 დღემდე ვადით:  ა) ახლო ნათესავის (მშობელი, შვილად ამყვანი, შვილი, შვილო­ბი­ლი, პაპა, ბებია, და, ძმა, მეუღლე) გარდაცვალების ან მათი მძიმე ავა­დ­მყ­ო­ფობის გამო; ბ) სტიქიური უბედურების შემთხვევაში, რომლის დროსაც დაზა­რალდა მისი ოჯახი. მუხლი 9🔗. 1. მოქალაქეს, რომელიც გადის არასამხედრო, ალტერნატიულ შრო­მით სამსახურს დამსაქმებლის მიერ მისი სამსახურში მიღების დღიდან სამსახურიდან გათავისუფლების დღემდე ეძლევა შრომითი გასამრჯე­ლო (ხელფასი), რომლის ოდენობას ადგენს დამსაქმებელი არანაკლებ სა­ხე­ლმწიფოში დაწესებული მინიმალური ხელფასის ოდენობისა. 2. თუ არასამხედრო, ალტერნატიულ შრომით სამსახურში დამსა­ქმე­ბელია საქართველოს კანონმდებლობით განსაზღვრული ადმინის­ტ­რა­­ციული ორგანო, ამ მუხლის პირველი პუნქტით განსაზღვრული მო­ქალაქის შრომითი გასამრჯელოს (ხელფასის)ოდენობა არ უნდა აღემა­ტე­ბო­დეს სავალდებულო სამხედრო სამსახურში მყოფი პირისათვის საქარ­თ­ველოს მოქმედი კანონმდებლობით განსაზღვრულ ფულად სარგოს. მუხლი 10🔗 1. თუ არასამხედრო, ალტერნატიულ შრომით სამსახურში მყოფი მოქალაქის დროებითი შრომისუუნარობის ხანგრძლივობა აღემატება ზედიზედ 4 თვეს, დამსაქმებელი ვალდებულია აღნიშნულის თაობაზე აცნობოს სახელმწიფო კომისიას. 2. ამ მუხლის პირველი პუნქტით განსაზღვრულ შემთხვევაში სახელმწიფო კომისია აყენებს შუამდგომლობას  ცენტრალურ გამწვევ კომისიასთან არსებულ მუდმივმოქმედმა სამხედრო-სამედიცინო საქსპერტო კომისიასთან, გამოიტანოს დასკვნა ამ მოქალაქის არასამხედრო, ალტერ­ნატიული შრომითი სამსახურისათვის ვარგისიანობის შესახებ. 3. არასამხედრო, ალტერნატიულ შრომით სამსახურში მყოფი მოსამსახურეები, რომლებიც ცენტრალურ გამწვევ კომისიასთან არსებულმა მუდმივმოქმედმა სამხედრო-სამედიცინო საქსპერტო კომისიამ ცნო სამსახურისათვის უვარგისად, სამსახურიდან დათხოვნილი იქნებიან ავადმყოფობის გამო არასამხედრო, ალტერნატიული შრომითი სამსახურის აღრიცხვიდან მოხსნით. ის პირები, რომლებიც ცნობილი იქნებიან შეზღუდულად ვარგისებად სამსახურისათვის, არასამხედრო, ალტერნატიული შრომითი სამსახურიდან დათხოვნილი იქნებიან რეზერვში ავადმყოფობის გამო. მუხლი 11🔗. არასამხედრო, ალტერნატიულ შრომით სამსახურში გავლის დროს მოქალაქის სამუშაო დროის ხანგრძლივობა უნდა შეესა­ბა­მებოდეს საქართველოს შრომის კოდექსით განსაზღვრულ მოთხოვნებს. მუხლი 12🔗. 1. არასამხედრო, ალტერნატიულ შრომით სამსახურში მყოფ მოქალაქისთვის სამსახურებრივ მოვალეობათა სანიმუშო შესრულებისათვის შეიძლება გათვალისწინებულ იქნას წახალისების შემდეგი ფორმები: ა) მადლობის გამოცხადება; ბ) პრემიის მიცემა; გ) ფასიანი საჩუქრით დაჯილდოება; დ)  შრომის შინაგანაწესით გათვალისწინებული წახალისების სხვა ღონისძიებები. 2. ამ მუხლის პირველი პუნქტით განსაზღვრული წახალისების ფო­რ­მების გამოყენებისას მათი ოდენობა ან ღირებულება არ უნდა აღემატე­ბო­დეს წახალისების შესაბამისი ფორმების ოდენობას ან ღირებულებას, რომელიც საქართველოს მოქმედი კანონმდებლობის მიხედვით გამოი­ყე­ნე­ბა სამხედრო სავალდებულო სამსახურში მყოფი პირების მიმართ. 3. დისციპლინური გადაცდომისათვის არასამხედრო, ალტერნა­ტი­ულ შრომით სამსახურში მყოფი მოქალაქის მიმართ გამო­იყენება სას­ჯე­ლის შემდეგი ზომები: ა) შენიშვნა; ბ) საყვედური; გ) სასტიკი საყვედური; დ) ,,არასამხედრო, ალტერნატიული შრომითი სამსახურის შესახებ‘‘ საქართველოს კანონის მე-16 მუხლით გათვალისწინებული დისციპლი­ნუ­რი სასჯე­ლ­ე­ბი. მუხლი 13🔗. მოქალაქე, რომელიც გადის არასამხედრო, ალტერნა­ტ­ი­ულ შრო­მით სამსახურს, სარგებლობს საქართველოს კონსტიტუციითა და კანონმდებლობით განსაზღვრული ყველა უფლებით, გარდა „არა­სამ­ხე­დრო, ალტერნატიული შრომითი სამსახურის შესახებ‘‘ საქართველოს კა­ნონით დადგენილი ცალკეული შეზღუდვებისა. თავი V. არასამხედრო, ალტერნატიული შრომითი სამსახურის გავლის თავისებურებანი საომარი ან საგანგებო მდგომარეობის დროს მუხლი 14🔗.  არასამხედრო, ალტერნატიული შრომითი სამსახურის მოსამ­სახურეები საომარი ან საგანგებო მდგომარეობის დროს სამსახურს გადიან შემდეგი თავისებურებების გათვალისწინებით: ა) ჩერდება განსაკუთრებულ განკარგულებამდე ყველა მოსამ­სახურის არასამხედრო, ალტერნატიული შრომითი სამსახურიდან დათ­ხოვნა არა უმეტეს სამი თვისა; ბ) წყდება ყველა სახის შვებულებები (გარდა შვებულებისა ავადმ­ყო­ფობის, ახლო ნათესავების გარდაცვალების გამო). შვებულებაში მყოფი მოსამსახურეები ვალდებული არიან სასწრაფოდ დაუბრუნდნენ სამსა­ხუ­რ­ის გავლის ადგილებს; გ) მობილიზაციის გამოცხადებისთანავე არასამხედრო, ალტერნა­ტი­ული შრომითი სამსახურის რეზერვში რიცხული მოქალაქეები ვალ­დე­ბული არიან დაუყოვნებლივ გამოცხადდნენ მუნიციპალიტეტის ან რაი­ო­ნის სამხედრო განყოფილებაში, საცხოვრებელი ადგილის მიხედვ­ით; დ) არასამხედრო, ალტერნატიული შრომითი სამსახურის მოსამსახურეები, რომლებიც შვებულებიდან ან მივლინებიდან არასაპატიო მიზეზით დროულად არ დაუბრუნდებიან სამსახურის გავლის ადგილებს, აგრეთვე რეზერვში ჩარიცხული პირები, რომლებიც თავს აარიდებენ მობილიზაციის დროს საცხოვრებელი ადგილის მიხედვით მუნიციპალიტეტის ან რაიონის სამხედრო განყოფილებაში გამოცხადებას, პასუხს აგებენ მოქმედი კანონმდებლობის შესაბამისად; ე) საომარი ან საგანგებო მდგომარეობის დროს, საჭიროების შემ­თხვევაში, მოსამსახურეებს შეიძლება მიეცეთ მოკლევადიანი შვებულება 10 დღის ვადით. დანართი №2 მოქალაქეთა არასამხედრო, ალტერნატიულ შრომით სამსახურში გაწვევის სახელმწიფო კომისიის  დებულება თავი I.  ზოგადი დებულებები მუხლი 1🔗. მოქალაქეთა არასამხედრო, ალტერნატიულ შრომით სამსახურში გაწვევის სახელმწიფო კომისია (შემდგომში – სახელმწიფო კომისია) იქმნება მოქალაქეთა მიერ სამხედრო ვალდებულების არასამხედრო, ალტერნატიული შრომითი სამსახურის ფორმით მოხდასთან დაკავშირებული საკითხების გადასაწყვეტად. მუხლი 2🔗. სახელმწიფო კომისია საკუთარ საქმიანობას წარმართავს საქართველოს კონსტიტუციის, „არასამხედრო, ალტერნატიული შრომითი სამსახურის შესახებ‘‘ საქართველოს კანონის, საქართველოს სხვა საკანონმდებლო და კანონქვემდებარე სამართლებრივი აქტებისა და ამ დებულების შესაბამისად. თავი II. სახელმწიფო კომისიის შემადგენლობა მუხლი 3🔗.  1. სახელმწიფო კომისიის შემადგენლობას ამტკიცებს საქართველოს შრომის, ჯანმრთელობისა და სოციალური დაცვის მინისტრი ინდივიდუალური ადმინისტრაციულ-სამართლებრივი აქტით - ბრძანებით. 2. სახელმწიფო კომისიის თავმჯდომარეა საქართველოს შრომის, ჯანმრთელობისა და სოციალური დაცვის მინისტრის მოადგილე. 3. სახელმწიფო კომისიაში სახელმწიფო კომისიის თავმჯდომარესთან ერთად წარმოდგენილ უნდა იქნენ საქართველოს შრომის, ჯანმრთელობისა და სოციალური დაცვის სამინისტროს, საქართველოს შინაგან საქმეთა სამინისტროს, საქართველოს იუსტიციის სამინისტროს, საქართველოს სპორტისა და ახალგაზრდობის საქმეთა სამი­ნისტროს, საქართველოს განათლებისა და მეცნიერების სამინი­სტ­რ­ოს, საქართველოს რეგიონული განვითარებისა და ინფრას­ტრუ­ქტურის სა­მინისტროსა და საქართველოს სოფლის მეურნეობის სამინისტროს  თა­ნა­მდებობის პირები.  4. სახელმწიფო კომისიასთან წინასწარი შეთანხმებით ამ კომისიის მუშაობაში სათათბირო სტატუსით (კენჭისყრაში მონაწილეობის გარეშე) მონაწილეობის მიღება შეუძლიათ საქართველოში კანონიერ საფუძველზე მოქმედი საზოგადოებრივი, არასამთავრობო ან/და რელიგიური გაერთიანებების წარმომადგენლებს.            თავი III. სახელმწიფო კომისიის საქმიანობის ძირითადი მიმართულებები მუხლი 4🔗. სახელმწიფო კომისიის საქმიანობის ძირითადი მიმართულებებია: ა) „არასამხედრო, ალტერნატიული შრომითი სამსახურის შესახებ‘‘ საქართველოს კანონით განსაზღვრული ფუნქციების განხორციელება; ბ) წინადადებების მომზადება „არასამხედრო, ალტერნატიული შრომითი სამსახურის შესახებ“ საქართველოს კანონის მე-5 მუხლის მე-3 პუნქტით გათვალისწინებული სამსახურებისა და არასამხედრო-შრომითი ფორმირებების ნუსხის შემუშავების ან/და გადასინჯვისათვის, არაუგვიანეს ყოველი წლის 1 თებერვლისა; გ) კანონმდებლობით განსაზღვრულ სხვა უფლება-მოვალეობების განხორციელება. თავი IV. სახელმწიფო კომისიის საქმიანობის წესი მუხლი 5🔗. 1. სახელმწიფო კომისიის სხდომებს, როგორც წესი, თავმჯდო­მა­რე­ობს სახელმწიფო კომისიის თავმჯდომარე, ხოლო მისი არყოფნის შემთხვევაში - კომისიის ერთ-ერთი სხვა წევრი, რომელსაც ეს ფუნქცია დაეკისრება სხდომაზე დამსწრე კომისიის წევრთა უბრალო უმრავლე­სო­ბის გადაწყვეტილებით. 2. სახელმწიფო კომისიის წევრებს კომისიის სხდომაზე მოწვევასთან ერთად ეგზავნებათ დღის წესრიგი და საჭიროების შემთხვევაში, წინასწარი ინფორმაცია დღის წესრიგის საკითხების შესახებ. 3. სახელმწიფო კომისიის სხდომები მოიწვევა სახელმწიფო კომისიის თავმჯდომარის გადაწყვეტილებით, მოქალაქეთა სამხედრო სამსახურში გაწვევის პერიოდში საჭიროებისამებრ, აგრეთვე სახელმწიფო კომისიის წევრის წინადადებით. 4. სახელმწიფო კომისია უფლებამოსილია, თუ სხდომას ესწრება კომისიის წევრთა ორი მესამედი მაინც. 5. სახელმწიფო კომისიას დასკვნა გამოაქვს სხდომაზე დამსწრე წევრთა ხმების უმრავლესობით. ხმების თანაბრად გაყოფის შემთხვევაში გადამწყვეტია სახელმწიფო კომისიის სხდომის თავმჯდომარის ხმა. დანართი №3 არასამხედრო, ალტერნატიული შრომითი სამსახურის გავლის მიზნით შესაბამისი სამსახურებისა და არასამხედრო-შრომითი ფორმირებების დამატებითი ნუსხა შესაბამისი სამსახურები და არასამხედრო-შრომითი ფორმირე­ბე­ბი, „არასამხედრო, ალტერნატიული შრომითი სამსახურის შესახებ“ საქა­რ­თველოს კანონით გათვალისწინებულის გარდა, სადაც დადგენილი წესითა და ვადებში საქართველოს მოქალაქეები გაივლიან არასამხედრო, ალტერნატიულ შრომით სამსახურს: ა) ადგილობრივი თვითმმართველობის ორგანოებში არსებული ან ადგილობრივი თვითმმართველობის ორგანოების მიერ უფლებამოსილი დაწესებულებები, რომლებიც ელექტრონული ტექნოლოგიებისა და კომუნიკაციების სფეროში ახორციელებენ მომსახურებას - ტექნიკურ ან დამხმარე მუშად; ბ) საქართველოში კანონიერ საფუძველზე მოქმედი რელიგიური ორგანიზაციების მიერ წარმოებულ სამშენებლო, სარემონტო და სასოფლო-სამეურნეო სამუშაოები.