განჩინება შპს „ეროვნული სამედიცინო ბიბლიოთეკ“-ის გადახდისუუნარობის განცხადების წარმოებაში მიღებაზე უარის თქმის შესახებ

საქმე №2/18736-13

 

გ ა ნ ჩ ი ნ ე ბ ა

საქართველოს სახელით

 

გადახდისუუნარობის განცხადების წარმოებაში

      მიღებაზე უარის თქმის შესახებ

 

2013 წლი ს 24 დეკემბერი

ქ. თბილისი

 

  თბილისის საქალაქო სასამართლო

მოსამართლე   ლაშა ქოჩიაშვილი

 

განმცხადებელი: შპს „ეროვნული სამედიცინო ბიბლიოთეკა”

წარმომადგენელი: გიორგი ზღუდაძე

 

მოთხოვნა: შპს „ეროვნული სამედიცინო ბიბლიოთეკა ს” მიმართ

                     გაკოტრების საქმის წარმოების დაწყება

 

განიხილა გადახდისუუნარობის განცხადების წარმოებაში მიღების საკითხი,

 

გამოარკვია:

 

2013 წლის 19 დეკემბერს შპს „ეროვნული სამედიცინო ბიბლიოთეკა ს” წარმომადგენელმა გიორგი ზღუდაძემ განცხადებით მომართა სასამართლოს შპს „ეროვნული სამედიცინო ბიბლიოთეკა ს”  მიმართ გაკოტრების საქმის წარმოების დაწყების შესახებ .  განმცხადებლის მითითებით, საწარმო არ ფუნქციონირებს. მას არც ბალანსზე და არც საკუთრებაში უძრავი ქონება არ ერიცხება. შპს „ეროვნული სამედიცინო ბიბლიოთეკა ს” სახელმწიფო ბიუჯეტის მიმართ კრედიტორული დავალიანება არ გააჩნია, ხოლო დებიტორული დავალიანება სალდირებული ზედმეტობის სახით შეადგენს 372,07 ლარს.  სახელმწიფო ბიუჯეტის გარდა შპს „ეროვნული სამედიცინო ბიბლიოთეკა ს” დებიტორული დავალიანება არ გააჩნია. შპს „ეროვნული სამედიცინო ბიბლიოთეკა ს” არ ჰყავს უზრუნველყოფილი კრედიტორები. სსიპ შინაგან საქმეთა სამინისტროს მომსახურების სააგენტოს ცნობის მიხედვით, შპს „ეროვნული სამედიცინო ბიბლიოთეკა ს” სახელზე რეგისტრირებულია სატრანსპორტო საშუალება „მოსკვიჩ 21401” სახელმწიფო სანომრე ნიშნით ADH 159, რომელიც ამორტიზებულია და მისი ღირებულება შეადგენს 600 ლარს.  აღნიშნული სატრანსპორტო საშუალების გარდა ორგანიზაციას სხვა მოძრავი ქონება არც ბალანსზე და არც საკუთრებაში არ ერიცხება. შპს „ეროვნული სამედიცინო ბიბლიოთეკა ს” ანგარიშწორების ანგარიში არ აქვს გახსნილი არც ერთ ბანკში, ორგანიზაციას თანხა არ ერიცხება ასევე სალაროში.

შპს „ეროვნული სამედიცინო ბიბლიოთეკა” გადახდისუუნაროა, რადგან არ შესწევს უნარი დააკმაყოფილოს კრედიტორთა ვადამოსული მოთხოვნები და უზრუნველყოს თავისი ქონებით საპროცესო ხარჯების დაფარვა.

საჯარო რეესტრის ეროვნული სააგენტოს ცნობის მიხედვით შპს „ეროვნული სამედიცინო ბიბლიოთეკა ს” სახელზე  უძრავი ქონება რეგისტრირებული არ არის. სასამართლო გაეცნო წარმოდგენილ განცხადებას და თანდართულ დოკუმენტებს და მიაჩნია, რომ შპს „ეროვნული სამედიცინო ბიბლიოთეკა”-ს უარი უნდა ეთქვას განცხადების წარმოებაში მიღებაზე შემდეგ გარემოებათა გამო :

„გადახდისუუნარობის საქმის წარმოების შესახებ” საქართველოს კანონის მე-20 მუხლის მე-4 პუნქტის მიხედვით თუ მოვალე გადახდისუუნარობის შესახებ განცხადებით მოითხოვს გაკოტრებას და სასამართლო ამ კანონის მე-19 მუხლის პირველი პუნქტით განსაზღვრულ ვადაში მოვალის მიერ ამავე კანონის მე-16 მუხლით გათვალისწინებული გადახდისუუნარობის შესახებ განცხადების საფუძველზე დაადგენს, რომ გადახდისუუნარობის შესახებ განცხადების შეტანის დროისათვის გაკოტრების დაწყების შემთხვევაში მოვალე თავისი  ქონებით ვერ უზრუნველყოფს საპროცესო ხარჯების დაფარვას, სასამართლოს გამოაქვს განჩინება გადახდისუუნარობის შესახებ განცხადების წარმოებაში მიღებაზე უარის თქმის შესახებ და მასში უთითებს, რომ მოვალე გაკოტრებულად გამოცხადდება რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

„გადახდისუუნარობის საქმის წარმოების შესახებ” საქართველოს კანონის 1-ლი მუხლის მიხედვით ამ კანონის მიზანია მოვალის და კრედიტორის  (კრედიტორების) ინტერესების თანაბარზომიერი დაცვა, შესაძლებლობის შემთხვევაში მოვალის ფინანსური სიძნელეების გადაჭრა და კრედიტორთა მოთხოვნების დაკმაყოფილება ან ამის შეუძლებლობის შემთხვევაში მოვალის ქონების რეალიზაციით მიღებული თანხების განაწილებით კრედიტორთა მოთხოვნების დაკმაყოფილება.

აღნიშნული ნორმის მიხედვით კანონის მიზნის განხორციელება დამოკიდებულია საწარმოს ფინანსურ მდგომარეობაზე და ასეთი მდგომარეობის ანალიზის საფუძველზე იმ შემთხვევაში დაიწყება საწარმოს მიმართ გადახდისუუნარობის საქმის წარმოება, თუ შესაძლებელი იქნება „გადახდისუუნარობის საქმის წარმოების შესახებ” საქართველოს კანონით გათვალისწინებული მიზნის მიღწევა. მხოლოდ ის გარემოება, რომ კანონი ითვალისწინებს გადახდისუუნარო მოვალის მიერ გაკოტრების საქმის წარმოების გახსნის მოთხოვნით სასამართლოსათვის მიმართვის შესაძლებლობას, ვერ იქნება საკმარისი ასეთი წარმოების დაწყებისათვის თუ იმთავითვე აშკარაა, რომ მოვალის ფინანსური მდგომარეობა გამორიცხავს გაკოტრების მიზნის მიღწევას.

ამდენად, ვინაიდან შპს „ეროვნული სამედიცინო ბიბლიოთეკა ს”  არ გააჩნია იმ ღირებულების ქონება, რაც უზრუნველყოფს საპროცესო ხარჯების დაფარვას, შპს „ეროვნული სამედიცინო ბიბლიოთეკა ს”  უარი უნდა ეთქვას გადახდისუუნარობის შესახებ განცხადების წარმოებაში მიღებაზე, ამასთან უნდა განიმარტოს, რომ მოვალე გაკოტრებულად გამოცხადდება რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

სასამართლომ იხელმძღვანელა „გადახდისუუნარობის საქმის წარმოების შესახებ” საქართველოს კანონის 1-ლი, მე-5, მე-7, მე-8, მე-19, მე-20 მუხლებით, საქართველოს სამოქალაქო საპროცესო კოდექსის 284-ე, 285-ე მუხლებით,

 

დ ა ა დ გ ი ნ ა :

 

1. შპს „ეროვნული სამედიცინო ბიბლიოთეკა ს”  (ს/კ 211370078) განცხადება არ იქნას მიღებული სასამართლოს წარმოებაში.

2.   განემარტოთ კრედიტორებს, რომ შეუძლიათ მიმართონ სასამართლოს შპს „ეროვნული სამედიცინო ბიბლიოთეკა ს”   მიმართ გადახდისუუნარობის შესახებ საქმის წარმოების დაწყებისა და მოვალის ქონებიდან მათი მოთხოვნის დაკმაყოფილების თაობაზე სასამართლოში გადახდისუუნარობის შესახებ განცხადების შეტანის გზით. თუ განჩინების გამოქვეყნებიდან 1 თვის ვადაში კრედიტორი გადახდისუუნარობის შესახებ განცხადებას არ შეიტანს სასამართლოში, სასამართლო მოვალეს გაკოტრებულად აცხადებს, რაც მოვალის რეგისტრაციის გაუქმების საფუძველია.

3. განჩინება გამოქვეყნდეს „საქართველოს საკანონმდებლო მაცნეში”. განჩინების გამოქვეყნებასთან დაკავშირებული ხარჯების გადახდა  უზრუნველყოს განმცხადებელმა.

4. განჩინებაზე შეიძლება კერძო საჩივრის შეტანა თბილისის საქალაქო სასამართლოს სამოქალაქო საქმეთა კოლეგიაში (ქ.თბილისი, დავით აღმაშენებლის ხეივანი, მე-12 კმ. №6) განჩინების განმცხადებლისათვის გადაცემიდან 5 დღის ვადაში.

 

მოსამართლე:                              ლაშა ქოჩიაშვილი