შპს "სამტრედიის სატყეო-სანერგე მეურნეობა" გაკოტრებულად გამოცხადების შესახებ

 

საქმე №2/322

გ ა ნ ჩ ი ნ ე ბ ა

საქართველოს სახელით

 

მოვალის გაკოტრებულად გამოცხადების და რეგისტრაციის

გაუქმების შესახებ

 

2014 წლის 5 მაისი

ქ. ქუთაისი

 

ქუთაისის საქალაქო სასამართლო

მოსამართლე გენადი მაკარიძე

 

განმცხადებელი: შპს ,,სამტრედიის სატყეო-სანერგე მეურნეობა (ს/ნ 238751944)

 წარმომადგენელი: გიორგი ზღუდაძე.

მოთხოვნა: შპს ,,სამტრედიის სატყეო-სანერგე მეურნეობის’’ გაკოტრებულად გამოცხადება.

  ზეპირი მოსმენის გარეშე შპს ,,სამტრედიის სატყეო-სანერგე მეურნეობის’’ (წარმომადგენელი გიორგი ზღუდაძე) გაკოტრებულად გამოცხადების და საწარმოს რეგისტრაციის გაუქმების საკითხი

 

გ ა მ ო ა რ კ ვ ი ა:

  2014 წლის 4 მარტს შპს ,,სამტრედიის სატყეო-სანერგე მეურნეობის’’ სახელით ქუთაისის საქალაქო სასამართლოს განცხადებით მომართა გიორგი ზღუდაძემ და აღნიშნა, რომ საზოგადოებას სახელმწიფო ბიუჯეტის მიმართ კრედიტორული დავალიანება არ გააჩნია, ორგანიზაციას ერიცხება სალდირებული ზედმეტობა 2069,94 ლარის ოდენობით. საზოგადოებას ჰყავს არაუზრუნველყოფილი კრედიტორი დავით მჟავანაძე, რომლის მიმართ დავალიანებაა 5300 ლარი (სახელფასო დავალიანება). ორგანიზაციას საბანკო ანგარიშზე თანხა არ ერიცხება, ასევე რაიმე სახის უძრავ-მოძრავი ქონება საზოგადოებას არ გააჩნია. განმცხადებელი აღნიშნავს, რომ საზოგადოება გაკოტრების საქმის წარმოების გახსნის შემთხვევაში ვერ უზრუნველყოფს მისი ქონებით საპროცესო ხარჯების დაფარვას. განმცხადებელი ითხოვს შპს ,,სამტრედიის სატყეო-სანერგე მეურნეობის’’ გაკოტრებას.

   2014 წლის 7 მარტის განჩინებით შპს ,,სამტრედიის სატყეო-სანერგე მეურნეობას’’ უარი ეთქვა განცხადების წარმოებაში მიღებაზე, ვინაიდან მოვალე თავისი ქონებით ვერ უზრუნველყოფდა საპროცესო ხარჯების დაფარვას. ამასთან, განემარტათ კრედიტორებს, რომ შეეძლოთ მოემართათ სასამართლოსათვის შპს ,,სამტრედიის სატყეო-სანერგე მეურნეობის’’ მიმართ გადახდისუუნარობის შესახებ საქმის წარმოების დაწყებისა და მოვალის ქონებიდან მათი მოთხოვნის დაკმაყოფილების თაობაზე სასამართლოში გადახდისუუნარობის შესახებ განცხადების შეტანის გზით. თუ განჩინების გამოქვეყნებიდან 1 თვის ვადაში კრედიტორი გადახდისუუნარობის შესახებ განცხადებას არ შეიტანდა სასამართლოში, სასამართლო მოვალეს გაკოტრებულად გამოაცხადებდა, რაც მოვალის რეგისტრაციის გაუქმების საფუძველი იყო.

   ქუთაისის საქალაქო სასამართლოს 2014 წლის 7 მარტის განჩინება გადახდისუუნარობის განცხადების წარმოებაში მიღებაზე უარის თქმის შესახებ საქართველოს საკანონმდებლო მაცნეს ვებგვერდზე გამოქვეყნდა 2014 წლის 28 მარტს და განჩინების გამოქვეყნებიდან 1 თვის ვადაში კრედიტორს გადახდისუუნარობის შესახებ განცხადებით არ მოუმართავს სასამართლოსათვის.

   ,,გადახდისუუნარობის საქმის წარმოების შესახებ” საქართველოს კანონის მე-20 მუხლის მიხედვით, თუ მოვალე გადახდისუუნარობის შესახებ განცხადებით მოითხოვს გაკოტრებას და სასამართლო ამ კანონის მე-19 მუხლის პირველი პუნქტით განსაზღვრულ ვადაში მოვალის მიერ ამავე კანონის მე-16 მუხლით გათვალისწინებული გადახდისუუნარობის შესახებ განცხადების საფუძველზე დაადგენს, რომ გადახდისუუნარობის შესახებ განცხადების შეტანის დროისათვის გაკოტრების დაწყების შემთხვევაში მოვალე თავისი ქონებით ვერ უზრუნველყოფს საპროცესო ხარჯების დაფარვას, სასამართლოს გამოაქვს განჩინება გადახდისუუნარობის შესახებ განცხადების წარმოებაში მიღებაზე უარის თქმის შესახებ და მასში უთითებს, რომ მოვალე გაკოტრებულად გამოცხადდება რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

  ,,გადახდისუუნარობის საქმის წარმოების შესახებ” საქართველოს კანონის მე-20 მუხლის მე-9 პუნქტის მიხედვით, თუ ამ მუხლის მე-5 პუნქტით გათვალისწინებული ინფორმაციის გამოქვეყნებიდან 1 თვის ვადაში კრედიტორი ამავე მუხლის მე-7 პუნქტით განსაზღვრულ გადახდისუუნარობის შესახებ განცხადებას არ შეიტანს სასამართლოში, სასამართლო მოვალეს გაკოტრებულად აცხადებს, რაც მოვალის რეგისტრაციის გაუქმების საფუძველია.

   გამომდინარე აღნიშნულიდან, შპს ,,სამტრედიის სატყეო-სანერგე მეურნეობა’’ უნდა გამოცხადდეს გაკოტრებულად და უნდა გაუქმდეს შპს ,,სამტრედიის სატყეო-სანერგე მეურნეობის’’ რეგისტრაცია სამეწარმეო რეესტრში.

  სასამართლომ იხელმძღვანელა ,,გადახდისუუნარობის საქმის წარმოების შესახებ” საქართველოს კანონის 1-ლი, მე-5, მე-7, მე-8, მე-19, მე-20 მუხლებით, სამოქალაქო საპროცესო კოდექსის 284-ე, 285-ე მუხლებით,

 

დ ა ა დ გ ი ნ ა :

1.  შპს ,,სამტრედიის სატყეო-სანერგე მეურნეობა’’ (ს/ნ 238751944) გამოცხადდეს გაკოტრებულად და გაუქმდეს შპს ,,სამტრედიის სატყეო-სანერგე მეურნეობის’’ რეგისტრაცია სამეწარმეო რეესტრში.

2. განჩინება გამოქვეყნდეს ,,საქართველოს საკანონმდებლო მაცნეს” ვებგვერდზე.

3. განჩინებაზე შეიძლება კერძო საჩივრის შეტანა ქუთაისის საქალაქო სასამართლოში (ქ. ქუთაისი, კუპრაძის ქ. №11) განჩინების განმცხადებლისათვის გადაცემიდან 5 დღის ვადაში.

 

მოსამართლე                                                          გენადი მაკარიძე