„ინფორმაციის კონფიდენციალურად მიჩნევის, მისი გაცემის წესის და კონფიდენციალური ინფორმაციის ნუსხის დამტკიცების თაობაზე“ საქართველოს ეროვნული ბანკის საბჭოს 2014 წლის 14 თებერვლის №1 დადგენილებაში ცვლილებების და დამატების შეტანის შესახებ

1. დადგენილებით დამტკიცებული წესის პირველ მუხლს დაემატოს შემდეგი რედაქციის მე-5 და მე-6 პუნქტები:

„5. ამ წესის მიზნებისათვის კონფიდენციალური ინფორმაცია იყოფა ორ კატეგორიად:

ა) პირველი კატეგორიის კონფიდენციალური ინფორმაცია – მიეკუთვნება მონაცემი, რომლის გავრცელება ან დაკარგვა გამოიწვევს მძიმე შედეგს და საფრთხეს შეუქმნის ქვეყნის მონეტარული პოლიტიკის, სტატისტიკური ან/და საფინანსო სექტორის სტაბილურობას. ამ კატეგორიის ინფორმაციაზე წვდომის უფლების მქონე ეროვნული ბანკის თანამშრომლებს ინდივიდუალური ადმინისტრაციულ–სამართლებრივი აქტით განსაზღვრას ეროვნული ბანკის პრეზიდენტი. პირველი კატეგორიის კონფიდენციალურ ინფორმაციას განეკუთვნება კონფიდენციალური ინფორმაციის ნუსხის (დანართი №1) პირველი, მე–2 და მე–3 პუნქტებით განსაზღვრული ინფორმაცია და ამ ინფორმაციასთან დაკავშირებით ეროვნული ბანკის შიდააუდიტორული სამსახურის მიერ შემუშავებული დოკუმენტები (შემოწმების ანგარიშები, აქტები);

ბ) მეორე კატეგორიის კონფიდენციალური ინფორმაცია – მიეკუთვნება მონაცემი, რომლის გავრცელებამ ან დაკარგვამ შეიძლება ზიანი მიაყენოს ქვეყნის მონეტარული პოლიტიკის, სტატისტიკური ან/და საფინანსო სექტორის სტაბილურობას. აღნიშნული კატეგორიის ინფორმაცია ხელმისაწვდომია ეროვნული ბანკის ნებისმიერი თანამშრომლისათვის, თუ ეს ინფორმაცია საჭიროა მისი სამსახურებრივი უფლებამოსილებების განსახორციელებლად. მეორე კატეგორიის კონფიდენციალურ ინფორმაციას მიეკუთვნება ეროვნულ ბანკში არსებული ნებისმიერი კონფიდენციალური ინფორმაცია, რომელიც არ არის განსაზღვრული ამ პუნქტის „ა“ ქვეპუნქტით.

6. ეროვნული ბანკის პრეზიდენტი უფლებამოსილია ინდივიდუალური ადმინისტრაციულ-სამართლებრივი აქტით განსაზღვროს პირველი კატეგორიის კონფიდენციალური ინფორმაციის საქმისწარმოების წესი. კონფიდენციალური ინფორმაცია, რომელიც არ მოექცევა ამ პუნქტით გათვალისწინებულ საქმისწარმოების წესში, დაექვემდებარება ეროვნულ ბანკში უკვე არსებულ საქმისწარმოების ერთიან მოთხოვნებს.“.

2.დადგენილებით დამტკიცებული წესის მე-3 მუხლის მე-4 პუნქტი ამოღებულ იქნეს.

3.დადგენილებით დამტკიცებული დანართი №1-ის პირველი პუნქტი ჩამოყალიბდეს შემდეგი რედაქციით:

„1. ეროვნული ბანკის ზედამხედველობის ქვეშ მყოფი სუბიექტების შემოწმების შესახებ ინდივიდუალური ადმინისტრაციულ-სამართლებრივი აქტები, მოხსენებითი ბარათები, შემოწმების აქტები და შემოწმების დროს დამუშავებული ინფორმაცია/დოკუმენტაცია.“.

4. დადგენილებით დამტკიცებული დანართი №1-ის მე-3 პუნქტი ჩამოყალიბდეს შემდეგი რედაქციით:

„3. ზედამხედველობას დაქვემდებარებულ სუბიექტებთან კორესპონდენცია საზედამხედველო ღონისძიებების გატარების ან/და პირის შესახებ ინფორმაციის ეროვნული ბანკის საქმიანობის მიზნებისათვის გამოთხოვის  თაობაზე.“.