ქუთაისის საქალაქო სასამართლო განჩინება - შპს "იმერ-პროგრესი-2008" -ს გაკოტრებულად გამოცხადების შესახებ

   საქმე №2/1059

 

გ ა ნ ჩ ი ნ ე ბ ა

საქართველოს სახელით

 

მოვალის გაკოტრებულად გამოცხადების და რეგისტრაციის

გაუქმების შესახებ

 

2014 წლი ს 12 აგვისტო

ქ. ქუთაისი

 

    ქუთაისის საქალაქო სასამართლო

    მოსამართლე გენადი მაკარიძე

 

განმცხადებელი: შპს ,,იმერ-პროგრესი-2008’’ (ს/ნ 212916923)

დირექტორი: შპს ,,რეაბილიტაცია’’

წარმომადგენელი: ბიძინა ჩიკვილაძე.

მოთხოვნა – მოვალის გაკოტრებულად გამოცხადება რეგისტრაციის გაუქმების გზით.

  ზეპირი მოსმენის გარეშე განიხილა შპს ,,იმერ-პროგრესი-2008’’-ის (წარმომადენელი შპს ,,რეაბილიტაცია’’, ბიძინა ჩიკვილაძე) გაკოტრებულად გამოცხადების და საწარმოს რეგისტრაციის გაუქმების საკითხი

 

გ ა მ ო ა რ კ ვ ი ა:

   2014 წლის 2 ივლისს შპს ,,იმერ-პროგრესი-2008’’-ის სახელით ქუთაისის საქალაქო სასამართლოს განცხადებით მომართა ბიძინა ჩიკვილაძემ და აღნიშნა, რომ დღეის მდგომარეობით საზოგადოება არ ფუნქციონირებს. მას არც ბალანსზე, ასევე არც საკუთრებაში მოძრავი ქონება არ გააჩნია. საზოგადიებას საკუთრებაში ერიცხებოდა უძრავი ქონება მდებარე ქ. ქუთაისი, თაბუკაშვილის ქ. №94ა (საკადასტრო კოდი 03.05.01.975), რომელიც უკვე რეგისტრირებულია სახელმწიფოს საკუთრებად. საზოგადოებას საბიუჯეტო და უზრუნველყოფილი კრედიტორული დავალიანებები არ ერიცხება, დებიტორული დავალიანებების სახით გააჩნია სალდირებული დებიტორული დავალება 114,09 ლარი. ორგანიზაციას საბანკო ანგარიშზე და სალაროში თანხა არ აქვს. ერთადერთი არაუზრუნველყოფილი კრედიტორია ამავე საზოგადოების ყოფილი დირექტორი მურმან ჯანგავაძე თანხით – 1000 ლარი (სახელფასო დავალიანება). განმცხადებელი ითხოვს შპს ,,იმერ-პროგრესი-2008’’-ის გაკოტრებას.

   2014 წლის 4 ივლისის განჩინებით შპს ,,იმერ-პროგრესი-2008’’-ს უარი ეთქვა განცხადების წარმოებაში მიღებაზე, ვინაიდან მოვალე თავისი ქონებით ვერ უზრუნველყოფდა საპროცესო ხარჯების დაფარვას. ამასთან, განემარტათ კრედიტორებს, რომ შეეძლოთ მოემართათ სასამართლოსათვის შპს ,,იმერ-პროგრესი-2008’’-ის მიმართ გადახდისუუნარობის შესახებ საქმის წარმოების დაწყებისა და მოვალის ქონებიდან მათი მოთხოვნის დაკმაყოფილების თაობაზე სასამართლოში გადახდისუუნარობის შესახებ განცხადების შეტანის გზით. თუ განჩინების გამოქვეყნებიდან 1 თვის ვადაში კრედიტორი გადახდისუუნარობის შესახებ განცხადებას არ შეიტანდა სასამართლოში, სასამართლო მოვალეს გაკოტრებულად გამოაცხადებდა, რაც მოვალის რეგისტრაციის გაუქმების საფუძველი იყო.

   ქუთაისის საქალაქო სასამართლოს 2014 წლის 4 ივლი ს ის განჩინება გადახდისუუნარობის განცხადების წარმოებაში მიღებაზე უარის თქმის შესახებ საქართველოს საკანონმდებლო მაცნეს ვებგვერდზე გამოქვეყნდა 2014 წლის 8 ივლისს და განჩინების გამოქვეყნებიდან 1 თვის ვადაში კრედიტორს გადახდისუუნარობის შესახებ განცხადებით არ მოუმართავს სასამართლოსათვის.

   ,,გადახდისუუნარობის საქმის წარმოების შესახებ” საქართველოს კანონის მე-20 მუხლის მიხედვით, თუ მოვალე გადახდისუუნარობის შესახებ განცხადებით მოითხოვს გაკოტრებას და სასამართლო ამ კანონის მე-19 მუხლის პირველი პუნქტით განსაზღვრულ ვადაში მოვალის მიერ ამავე კანონის მე-16 მუხლით გათვალისწინებული გადახდისუუნარობის შესახებ განცხადების საფუძველზე დაადგენს, რომ გადახდისუუნარობის შესახებ განცხადების შეტანის დროისათვის გაკოტრების დაწყების შემთხვევაში მოვალე თავისი ქონებით ვერ უზრუნველყოფს საპროცესო ხარჯების დაფარვას, სასამართლოს გამოაქვს განჩინება გადახდისუუნარობის შესახებ განცხადების წარმოებაში მიღებაზე უარის თქმის შესახებ და მასში უთითებს, რომ მოვალე გაკოტრებულად გამოცხადდება რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

  ,,გადახდისუუნარობის საქმის წარმოების შესახებ” საქართველოს კანონის მე-20 მუხლის მე-9 პუნქტის მიხედვით, თუ ამ მუხლის მე-5 პუნქტით გათვალისწინებული ინფორმაციის გამოქვეყნებიდან 1 თვის ვადაში კრედიტორი ამავე მუხლის მე-7 პუნქტით განსაზღვრულ გადახდისუუნარობის შესახებ განცხადებას არ შეიტანს სასამართლოში, სასამართლო მოვალეს გაკოტრებულად აცხადებს, რაც მოვალის რეგისტრაციის გაუქმების საფუძველია.

   გამომდინარე აღნიშნულიდან, შპს ,,იმერ-პროგრესი-2008’’ უნდა გამოცხადდეს გაკოტრებულად და უნდა გაუქმდეს შპს ,,იმერ-პროგრესი-2008’’-ის რეგისტრაცია სამეწარმეო რეესტრში.

  სასამართლომ იხელმძღვანელა ,,გადახდისუუნარობის საქმის წარმოების შესახებ” საქართველოს კანონის 1-ლი, მე-5, მე-7, მე-8, მე-19, მე-20 მუხლებით, სამოქალაქო საპროცესო კოდექსის 284-ე, 285-ე მუხლებით,

 

დ ა ა დ გ ი ნ ა :

1. შპს ,,იმერ-პროგრესი-2008’’ (ს/ნ 212916923) გამოცხადდეს გაკოტრებულად და გაუქმდეს შპს ,,იმერ-პროგრესი-2008’’-ის რეგისტრაცია სამეწარმეო რეესტრში.

2. განჩინება გამოქვეყნდეს ,,საქართველოს საკანონმდებლო მაცნეს” ვებგვერდზე.

3. განჩინებაზე შეიძლება კერძო საჩივრის შეტანა ქუთაისის საქალაქო სასამართლოში (ქ. ქუთაისი, კუპრაძის ქ. №11) განჩინების განმცხადებლისათვის გადაცემიდან 5 დღის ვადაში.

 

  მოსამართლე                                                                         გენადი მაკარიძე