„სახელმწიფო ქონების პრივატიზების შესახებ“ საქართველოს კანონში ცვლილებისა და დამატებების შეტანის თაობაზე
დოკუმენტის ტექსტი
საქართველოს კანონი
„სახელმწიფო ქონების პრივატიზების შესახებ“ საქართველოს კანონში ცვლილებისა და დამატებების შეტანის თაობაზე
მუხლი 1.
„სახელმწიფო ქონების პრივატიზების შესახებ“ საქართველოს კანონში (პარლამენტის უწყებანი, №29-30, 9.07.1997, გვ. 15) შეტანილ იქნეს შემდეგი ცვლილება და დამატებები:
1. მე-4 მუხლის:
ა) „ბ“ ქვეპუნქტი ჩამოყალიბდეს შემდეგი რედაქციით:
„ბ) დადგენილი წესით დამტკიცებული ისტორიულ-კულტურული და მხატვრული ფასეულობის ობიექტები, კულტურული და სახელოვნებო დანიშნულების შენობა-ნაგებობები დადგენილი პირობებისა და საქართველოს კულტურის, ძეგლთა დაცვისა და სპორტის სამინისტროსთან შეთანხმების გარეშე. თუ შესაბამის ობიექტს განსაკუთრებული საზოგადოებრივი, ისტორიულ-ტრადიციული მნიშვნელობა აქვს, საქართველოს მთავრობასთან შეთანხმებით კულტურის, ძეგლთა დაცვისა და სპორტის სამინისტროს მიერ მისი პრივატიზების შესახებ თანხმობის გაცემისას აუცილებელი პირობაა ამ ობიექტის საქმიანობის პროფილის შენარჩუნება;“;
ბ) „ბ“ ქვეპუნქტის შემდეგ დაემატოს შემდეგი შინაარსის „ბ1“ და „ბ2“ ქვეპუნქტები:
„ბ1) რელიგიური და საკულტო ნაგებობები (მოქმედი და არამოქმედი), მათი ნანგრევები, აგრეთვე მიწის ნაკვეთები, რომლებზედაც ისინია განთავსებული;
ბ2) ისტორიული და კულტურული მნიშვნელობის სახელმწიფო არქივები, კინო, ფოტო -და ფონოდოკუმენტების სახელმწიფო ფონდი, საქართველოს სამინისტროების (უწყებების), სამეცნიერო-კვლევითი დაწესებულებების არქივები და ფონდები, სამუზეუმო კოლექციები, ფონდები, ეროვნული მნიშვნელობის სახლ-მუზეუმები;“.
2. მე-7 მუხლს დაემატოს შემდეგი შინაარსის მე-9–მე-11 პუნქტები:
„9. ამ მუხლის მე-8 პუნქტით გათვალისწინებულ შემთხვევაში, თუ სახელმწიფო ქონების პრივატიზების დათქმული თარიღიდან 7 დღის განმავლობაში საქართველოს ეკონომიკური განვითარების სამინისტრო არ მიიღებს გადაწყვეტილებას სახელმწიფო ქონების პრივატიზების შეწყვეტის შესახებ, სახელმწიფო ქონების პრივატიზების პროცესი ითვლება 1 წლით გაგრძელებულად გამოცხადებული პირობებითა და ამ მუხლის მე-10 და მე-11 პუნქტებით დადგენილი წესით. ამ შემთხვევაში საპრივატიზებო ქონების საწყისი ფასი არ მცირდება. გადაწყვეტილება სახელმწიფო ქონების პრივატიზების შეწყვეტის თაობაზე ქვეყნდება ამ კანონით დადგენილი წესით.
10. თუ გამოცხადებული პირობებით ამ მუხლის მე-9 პუნქტით დადგენილ ვადაში წარმოდგენილი იქნება მხოლოდ ერთი დაინტერესებული მხარის განცხადება საპრივატიზებო ქონების შეძენის შესახებ, საქართველოს ეკონომიკური განვითარების სამინისტრო განცხადების წარმოდგენიდან 1 თვეში იღებს გადაწყვეტილებას განმცხადებლისათვის სახელმწიფო ქონების პრივატიზების თაობაზე. მხოლოდ ერთი დაინტერესებული მხარე არსებობს მაშინ, თუ დაინტერესებული მხარის განცხადების წარდგენიდან 1 თვის ვადაში იმავე მოთხოვნით სხვა პირმა არ წარადგინა განცხადება. საქართველოს ეკონომიკური განვითარების სამინისტრო უზრუნველყოფს წარმოდგენილი განცხადების შესახებ ინფორმაციის საჯაროობას საქართველოს კანონმდებლობით დადგენილი წესით.
11. თუ ამ მუხლის მე-10 პუნქტით გათვალისწინებულ ვადაში წარმოდგენილ იქნა სხვა პირის (პირების) განცხადება, საქართველოს ეკონომიკური განვითარების სამინისტრო შესაბამისი სახელმწიფო ქონების პრივატიზების შესახებ გადაწყვეტილებას იღებს საპრივატიზებო ქონების შეძენის თაობაზე ბოლო განცხადების წარმოდგენიდან 1 თვეში.“.
მუხლი 2.
საქართველოს მთავრობამ ამ კანონის ამოქმედებიდან 2 თვის ვადაში წარმოადგინოს „კულტურული მემკვიდრეობის დაცვის შესახებ“ საქართველოს კანონში შესატანი შესაბამისი ცვლილებები და დამატებები.
მუხლი 3.
ეს კანონი ამოქმედდეს გამოქვეყნებისთანავე.
საქართველოს პრეზიდენტი მ. სააკაშვილი
თბილისი,
2006 წლის 8 დეკემბერი.
№3937–რს