„წყლის შესახებ“ საქართველოს კანონში ცვლილებების შეტანის თაობაზე

საქართველოს კანონი

„წყლის შესახებ“ საქართველოს კანონში ცვლილებების შეტანის თაობაზე

    მუხლი 1

 „წყლის შესახებ“ საქართველოს კანონში (პარლამენტის უწყებანი, №44, 11.11.1997, გვ. 123) შეტანილ იქნეს შემდეგი ცვლილებები:

1. 49-ე მუხლის მე-9 პუნქტი ჩამოყალიბდეს შემდეგი რედაქციით:

„9. დებულებას „წყლითსარგებლობის ლიცენზიის გაცემის მიზნით კონკურსისა და აუქციონის ჩატარების წესის შესახებ“ ბრძანებით ამტკიცებს საქართველოს გარემოს დაცვისა და ბუნებრივი რესურსების მინისტრი.“.

2. 83-ე მუხლის:

ა) პირველი პუნქტი ჩამოყალიბდეს შემდეგი რედაქციით:

„1. საქართველოს ტერიტორიაზე განსაკუთრებული სახელმწიფო და სახელმწიფო მნიშვნელობის წყლის ობიექტებით სარგებლობის ლიცენზირების სახელმწიფო სისტემას ორგანიზაციულად უზრუნველყოფს სამინისტრო.“;

ბ) მე-3 – მე-5 პუნქტები ჩამოყალიბდეს შემდეგი რედაქციით:

„3. საუწყებათაშორისო საექსპერტო-სალიცენზიო საბჭოსა და ლიცენზირების რეგიონალური საექსპერტო კომისიის ფუნქციაა წყალსარგებლობის ლიცენზიის მისაღებად წარმოდგენილი განცხადებების, პროექტების, კანონით გათვალისწინებული სხვა დოკუმენტაციის განხილვა, შეფასება და შესაბამისი რეკომენდაციის შემუშავება, რაც ფორმდება საუწყებათაშორისო საექ-სპერტო-სალიცენზიო საბჭოსა და ლიცენზირების რეგიონალური საექსპერტო კომისიის სხდომების ოქმებით.

 4. საუწყებათაშორისო საექსპერტო-სალიცენზიო საბჭო და ლიცენზირების რეგიონალური საექსპერტო კომისია დაკომპლექტებულია შესაბამისი სამინისტროების, უწყებებისა და სამეცნიერო-კვლევითი დაწესებულებების წარმომადგენლებით.

5. საუწყებათაშორისო საექსპერტო-სალიცენზიო საბჭოსა და ლიცენზირების რეგიონალური საექსპერტო კომისიის შემადგენლობაში არ შეიძლება შეყვანილნი იყვნენ წყალმოსარგებლე მეწარმე სუბიექტების წარმომადგენლები.“;

გ) მე-9 და მე-10 პუნქტები ჩამოყალიბდეს შემდეგი რედაქციით:

„9. საუწყებათაშორისო საექსპერტო-სალიცენზიო საბჭოსა და ლიცენზირების რეგიონალური საექსპერტო კომისიის რეგლამენტები და დაკომპლექტების წესი განისაზღვრება საქართველოს გარემოს დაცვისა და ბუნებრივი რესურსების მინისტრის ბრძანებით.

10. საუწყებათაშორისო საექსპერტო-სალიცენზიო საბჭოსა და ლიცენზირების რეგიონალური საექსპერტო კომისიის შემადგენლობას ბრძანებით ამტკიცებს საქართველოს გარემოს დაცვისა და ბუნებრივი რესურსების მინისტრი.“.

3. 93-ე მუხლის „პ“, „ჟ“, „ყ“ და „შ“ ქვეპუნქტები ამოღებულ იქნეს.

    მუხლი 2

 ეს კანონი ამოქმედდეს გამოქვეყნებისთანავე.

 

საქართველოს პრეზიდენტი   მ. სააკაშვილი

თბილისი,

2004 წლის 16 სექტემბერი.

№445–IIს