საქართველოს სასჯელაღსრულებისა და პრობაციის სამინისტროს პენიტენციურ დაწესებულებაში ტუბერკულოზის კონტროლთან დაკავშირებული ღონისძიებების შესახებ

საქართველოს შრომის, ჯანმრთელობისა და სოციალური დაცვის მინისტრისა და საქართველოს სასჯელაღსრულებისა და პრობაციის მინისტრის ერთობლივი

2016 წლის 31 დეკემბერი

ქ. თბილისი

მუხლი 1. მოქმედების სფერო

1. ეს დანართი მოიცავს საქართველოს სასჯელაღსრულებისა და პრობაციის სამინისტროს პენიტენციურ დაწესებულებაში (შემდგომში – პენიტენციური დაწესებულება) ტუბერკულოზის დიაგნოსტიკასთან (გამოკვლევასთან), გავრცელების თავიდან აცილებასთან და ტუბერკულოზის შემთხვევის მართვასთან დაკავშირებული ღონისძიებების ერთობლიობას.

2. პენიტენციურ დაწესებულებაში ტუბერკულოზით დაავადებული ბრალდებულისთვის/მსჯავრდებულისთვის სამედიცინო მომსახურების გაწევა ხორციელდება საქართველოს კანონმდებლობის შესაბამისად, თუ ამ წესით სხვა რამ არ არის დადგენილი.

მუხლი 2. ტუბერკულოზის გამოვლენა

1. ტუბერკულოზის გამოვლენის მიზნით, პენიტენციურ დაწესებულებაში განთავსებულ  ყველა ბრალდებულს/მსჯავრდებულს უტარდება გამოკითხვა სპეციალური სტანდარტული ფორმის კითხვარით (შემდგომში - აქტიური სკრინინგი). ბრალდებულს/მსჯავრდებულს აქტიური სკრინინგი უტარდება პენიტენციურ დაწესებულებაში შემოსვლისას და შემდგომში – სამ თვეში ერთხელ.

2. ბრალდებულის/მსჯავრდებულის აქტიურ სკრინინგს ახორციელებს სააქციო საზოგადოება „ტუბერკულოზისა და ფილტვის დაავადებათა ეროვნული ცენტრის“ (შემდგომში – ცენტრი) სპეციალურად განსწავლული ექთანი (შემდგომში – ცენტრის ექთანი).

3. აქტიური სკრინინგის შედეგად ტუბერკულოზის სავარაუდო შემთხვევის გამოვლენისას, ცენტრის ექთანი მიმართავს პენიტენციური დაწესებულების საექიმო-სამედიცინო პუნქტის/სამედიცინო ნაწილის ექიმს ბრალდებულისათვის/მსჯავრდებულისათვის შესაბამისი გამოკვლევების (პასიური სკრინინგი) ჩატარების მიზნით. საექიმო-სამედიცინო პუნქტის/სამედიცინო ნაწილის ექიმი იღებს გადაწყვეტილებას შესაბამისი ლაბორატორიული/ინსტრუმენტული გამოკვლევების ჩატარების თაობაზე.

4. ბრალდებულს/მსჯავრდებულს, პენიტენციური დაწესებულების საექიმო-სამედიცინო პუნქტის/სამედიცინო ნაწილის ექიმის გადაწყვეტილებით, შესაძლებელია დამატებით ჩაუტარდეს აქტიური სკრინინგი ან/და გამოკვლევა - მიმართვის შემთხვევაში ან/და ტუბერკულოზით დაავადებულ პირთან ახლო კონტაქტისას.

5. ბიოლოგიური მასალის აღება ხდება ცენტრის ექთნის მიერ, საჭიროების შემთხვევაში,  პენიტენციური დაწესებულების უსაფრთხოების/რეჟიმის განყოფილების მოსამსახურის თანდასწრებით.

მუხლი 3. ტუბერკულოზის მართვა

1. სკრინინგის, ობიექტური მონაცემებისა და ჩატარებული გამოკვლევების შედეგად ტუბერკულოზის სავარაუდო ან დადასტურებული შემთხვევის გამოვლენისას, დაუყოვნებლივ ხდება ბრალდებულის/მსჯავრდებულის განცალკევება სხვა ბრალდებულებისგან/მსჯავრდებულებისგან ან/და მისი საქართველოს სასჯელაღსრულებისა და პრობაციის სამინისტროს №19 პენიტენციურ დაწესებულებაში – ტუბერკულოზის სამკურნალო და სარეაბილიტაციო ცენტრში (შემდგომში – სარეაბილიტაციო ცენტრი) გადაყვანა, საქართველოს კანონმდებლობით დადგენილი წესით.

2. სარეაბილიტაციო ცენტრი ვალდებულია მოახდინოს ტუბერკულოზით დაავადებულ ბრალდებულთა/მსჯავრდებულთა სეპარაცია (განთავსება) ტუბერკულოზის ფორმის მიხედვით.

3. გამოკვლევების შედეგად ბრალდებულისთვის/მსჯავრდებულისთვის ტუბერკულოზის დადასტურებისას, საექიმო-სამედიცინო პუნქტის/სამედიცინო ნაწილის მთავარი ექიმი/ექიმი, საჭიროების შემთხვევაში, იღებს გადაწყვეტილებას ტუბერკულოზით დაავადებულ ბრალდებულთან/მსჯავრდებულთან კონტაქტში მყოფი ბრალდებულების/მსჯავრდებულებისა და პენიტენციური დაწესებულების მოსამსახურეების სკრინინგისა და გამოკვლევის თაობაზე.

4. პენიტენციური დაწესებულებიდან ბრალდებულის/მსჯავრდებულის დიაგნოსტიკური გამოკვლევების ან/და მკურნალობის მიზნით სამოქალაქო სექტორის საავადმყოფოში გადაყვანა ხორციელდება საქართველოს კანონმდებლობის შესაბამისად.

მუხლი 4. ტუბერკულოზის მკურნალობა

1. საჭიროების შემთხვევაში, პენიტენციურ დაწესებულებაში განთავსებული ბრალდებულის/მსჯავრდებულის მკურნალობა ხორციელდება ტუბერკულოზის მართვის შესაბამისი სახელმწიფო პროგრამის ფარგლებში და საქართველოს კანონმდებლობით დადგენილი მოთხოვნების გათვალისწინებით. 

2. როგორც წესი, ამბულატორიულ მკურნალობაზე მყოფი ტუბერკულოზით დაავადებული ბრალდებული/მსჯავრდებული, პენიტენციურ დაწესებულებაში მედიკამენტს იღებს სპეციალურად გამოყოფილ ადგილას, პენიტენციური დაწესებულების ექთნისა და უსაფრთხოების/რეჟიმის განყოფილების მოსამსახურის თანდასწრებით.

3. პენიტენციურ დაწესებულებაში სტაციონარულ მკურნალობაზე მყოფი ბრალდებული/მსჯავრდებული მედიკამენტს იღებს პალატაში, პენიტენციური დაწესებულების ექთნის და უსაფრთხოების/რეჟიმის განყოფილების მოსამსახურის თანდასწრებით.

მუხლი 5. ინფორმაციის მიწოდების წესი

1. ტუბერკულოზით დაავადებული ბრალდებულის/მსჯავრდებულის პენიტენციური დაწესებულებიდან გათავისუფლების შემთხვევაში, პენიტენციური დაწესებულების სამედიცინო ნაწილი/საექიმო სამედიცინო პუნქტი, საქართველოს კანონმდებლობით დადგენილი წესით, აწვდის ბრალდებულს/მსჯავრდებულს ინფორმაციას სამოქალაქო სექტორის შესაბამის სამედიცინო დაწესებულებაში მკურნალობის გაგრძელების თაობაზე.

2. პენიტენციურ სისტემაში ტუბერკულოზით დაავადებული ბრალდებულების/მსჯავრდებულების შესახებ სტატისტიკური მონაცემების დამუშავება ხორციელდება სარეაბილიტაციო ცენტრის სამედიცინო ნაწილის მიერ, რომელიც უზრუნველყოფს ინფორმაციის გადაცემას ცენტრისთვის და საქართველოს კანონმდებლობით განსაზღვრული სხვა პირებისთვის.