აუცილებელი საზოგადოებრივი საჭიროებისათვის საქართველოს რეგიონული განვითარებისა და ინფრასტრუქტურის სამინისტროს გამგებლობაში არსებული სახელმწიფო საქვეუწყებო დაწესებულების - საქართველოს საავტომობილო გზების დეპარტამენტისათვის ექსპროპრიაციის უფლების მინიჭების თაობაზე

საქართველოს ეკონომიკისა და მდგრადი განვითარების მინისტრის

ბრძანება № 1-1/50     

2017 წლის 16 თებერვალი

ქ.თბილისი

აუცილებელი საზოგადოებრივი საჭიროებისათვის საქართველოს რეგიონული განვითარებისა და ინფრასტრუქტურის სამინისტროს გამგებლობაში არსებული სახელმწიფო საქვეუწყებო დაწესებულების – საქართველოს საავტომობილო გზების დეპარტამენტისათვის ექსპროპრიაციის უფლების მინიჭების თაობაზე

,,აუცილებელი საზოგადოებრივი საჭიროებისათვის ექსპროპრიაციის უფლების მინიჭების მიზნით საკითხის განმხილველი კომისიის შექმნისა და დებულების დამტკიცების თაობაზე“ საქართველოს ეკონომიკისა და მდგრადი განვითარების მინისტრის 2016 წლის 25 მარტის №1-1/159 ბრძანებით შექმნილმა ექსპროპრიაციის საკითხების განმხილველმა კომისიამ (შემდგომში – კომისია) განიხილა საქართველოს რეგიონული განვითარებისა და ინფრასტრუქტურის სამინისტროს 2017 წლის 12 იანვრის (№01/126), 2017 წლის 18 იანვრის №01/190 განცხადებები – საქართველოს რეგიონული განვითარებისა და ინფრასტრუქტურის სამინისტროს გამგებლობაში არსებული სახელმწიფო საქვეუწყებო დაწესებულების საქართველოს საავტომობილო გზების დეპარტამენტისათვის (შემდგომში -საავტომობილო გზების დეპარტამენტი) ,,ბაკურციხე-გურჯაანის შემოსავლელი საავტომობილო გზის მშენებლობის პროექტის“ ფარგლებში აუცილებელი საზოგადოებრივი საჭიროებისათვის ექსპროპრიაციის უფლების მინიჭების შესახებ და

გ ა მ ო ა რ კ ვ ი ა:

საქართველოს ეკონომიკისა და მდგრადი განვითარების სამინისტროს (შემდგომში – სამინისტრო) განცხადებით მომართა საქართველოს რეგიონული განვითრებისა და ინფრასტრუქტურის სამინისტრომ და საქართველოს კონსტიტუციის 21-ე მუხლის მე-3 პუნქტის, ,,აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ” საქართველოს კანონის მე-2 მუხლის მე-2 პუნქტის ,,ა“ ქვეპუნქტისა და ამავე კანონის მესამე მუხლის პირველი პუნქტის შესაბამისად, აუცილებელი საზოგადოებრივი საჭიროებისათვის გზის მშენებლობის მიზნით, სახელმწიფო საქვეუწყებო დაწესებულების – საქართველოს საავტომობილო გზების დეპარტამენტისათვის ექსპროპრიაციის უფლების მინიჭება მოითხოვა.

● პროექტის მოკლე აღწერა:

საავტომობილო გზების დეპარტამენტის მიერ ხორციელდება ,,ბაკურციხე-გურჯაანის შემოსავლელი გზის მშენებლობის პროექტი.“ ,,ბაკურციხე-გურჯაანის შემოსავლელი გზა“ წარმოადგენს საქართველოს მთავრობისა და მსოფლიო ბანკის მიერ დაფინანსებული ,,კახეთის რეგიონალური გზების გაუმჯობესების მიმდინარე პროექტის“ (KKRIP) კომპონენტს.

,,ბაკურციხე-გურჯაანის შემოსავლელი გზა“ იწყება ,,თბილისი-ბაკურციხე-ლაგოდეხის" და ,,ბაკურციხე-თელავი-ახმეტის" გზის გადაკვეთიდან და მთავრდება ,,ბაკურციხე-თელავი-ახმეტის" გზაზე. შემოსასვლელი გზა ძირითადში იყენებს 1980-იანი წლების თავდაპირველი გზის დერეფანს, თუმცა ითვალისწინებს ახალ რელიეფსაც. ძირითად განსხვავებას წარმოადგენს ის გარემოება, რომ ახალი გზა გვერდს უვლის იმ ფართობებს, რომლებიც განაშენიანებული და ათვისებული იქნა 1980-იანი წლების შემდეგ.

საპროექტო მონაკვეთი მოიცავს 15-კილომეტრიან გზის მონაკვეთს კახეთის რეგიონში, სოფელ ბაკურციხიდან სოფელ ჩუმლაყამდე. შემოსავლელი გზა ერთმანეთთან დააკავშირებს ,,თბილისი-ბაკურციხე-ლაგოდეხი-აზერბაიჯანის" საზღვრის საერთაშორისო გზას და ,,ახმეტა-თელავი-ბაკურციხის" არსებულ შიდასახელმწიფოებრივ გზას, რომელიც კახეთის რეგიონის ერთ-ერთი მთავარი გზაა.

პროექტით გათვალისწინებულია ორზოლიანი გზის მოწყობა წრიული გზაჯვარედინებით ტრასის დასაწყისსა და დასასრულში კმ0-ზე (სოფ. ბაკურციხე) და 15.6-ზე (სოფ. ჩუმლაყი), წრიული გზაჯვარედინის მოწყობა გურჯაანთან კმ9.6-ზე. ასევე გადასასვლელების, მილების, საყრდენი კედლების, ნაპირსამაგრი და სარეგულაციო ნაგებობების მოწყობა.

პროექტის ზემოქმედების ქვეშ მოქცეული, კერძო საკუთრებაში არსებული უძრავი ქონების პროექტისთვის გამოყენების ფარგლებში შემუშავებულია „მიწის შესყიდვისა და განსახლების სამოქმედო გეგმა“, რომელიც მოიცავს ნებაყოფლობითი და არანებაყოფლობითი განსახლების პროცედურებს. გეგმის ფარგლებში, ,,საავტომობილო გზების დეპარტამენტის“ მიერ უძრავი ქონების ნებაყოფლობითი გამოსყიდვის შესახებ შეთანხმება, მესაკუთრეთა ერთ ნაწილთან მიღწეულია. მოლაპარაკების წარმოების მიუხედავად, მიწის ნაკვეთის გამოსყიდვის შესახებ შეთანხმება ვერ შედგა პროექტის ზემოქმედების არეალში მოქცეულ შემდეგ მესაკუთრეებთან: ივანე ბრეგვაძე, პაპუნა ზარდიაშვილი, ალექსი კვეზერელი.

სამინისტრომ შეისწავლა წარმოდგენილი განცხადება, თანდართული დოკუმენტაცია და მიზანშეწონილად მიიჩნია, დაკმაყოფილდეს საქართველოს რეგიონული განვითარებისა და ინფრასტრუქტურის სამინისტროს შუამდგომლობა და საავტომობილო გზების დეპარტამენტს მოთხოვნილ მიწის ნაკვეთზე მიენიჭოს ექსპროპრიაციის უფლება შემდეგ გარემოებათა გამო:

დადგენილია, რომ საავტომობილო გზების დეპარტამენტის მიერ ხორციელდება ,,ბაკურციხე-გურჯაანის შემოსავლელი გზის მშენებლობის პროექტი“, რომლის ზემოქმედების არეალშიც მოექცა ივანე ბრეგვაძის (პ/ნ 13001010261), პაპუნა ზარდიაშვილის (პ/ნ 10001003781), ალექსი კვეზერელის (პ/ნ 13001019388) საკუთრებაში არსებული მიწის ნაკვეთების ნაწილი.

ამონაწერით საჯარო რეესტრიდან დასტურდება, რომ მიწის ნაკვეთის მდებარე გურჯაანი, ქალაქი გურჯაანი, ,,ვეძირული“ ს/კ 51.01.58.298 (ნაკვეთის წინა ნომერი 51.01.58.205) მესაკუთრეა ივანე ბრეგვაძე (პ/ნ 13001010261). მიწის ნაკვეთის მთლიანი ფართი 467 კვ.მ, პროექტისათვის საჭირო მიწის ნაკვეთი 457 კვ.მ.

ამონაწერით საჯარო რეესტრიდან დასტურდება, რომ მიწის ნაკვეთის, მდებარე ქალაქი გურჯაანში ,,მელიორაციასთან“ ს/კ 51.01.58.142 (ნაკვეთის წინა ნომერი 51.01.58.141; 51.01.58.107) მესაკუთრეა პაპუნა ზარდიაშვილი (პ/ნ 13001003781). მიწის ნაკვეთის მთლიანი ფართი 4711 კვ.მ, პროექტისათვის საჭირო მიწის ნაკვეთი 1800 კვ.მ.

ამონაწერით საჯარო რეესტრიდან დასტურდება, რომ მიწის ნაკვეთის მდებარე გურჯაანი, შესახვევი ვაჩნაძე I, №11 ს/კ 51.01.58.307 (ნაკვეთის წინა ნომერი 51.01.58.230; 51.01.58.235) მესაკუთრეა ალექსი კვეზერელი (პ/ნ13001019388). მიწის ნაკვეთის მთლიანი ფართი 1824 კვ.მ, პროექტისათვის საჭირო მიწის ნაკვეთი 410 კვ.მ.

საავტომობილო გზების დეპარტამენტმა მიწის ნაკვეთის გამოსყიდვის თაობაზე წერილობით მიმართა ქონების მესაკუთრეებს და შესთავაზა პროექტისათვის საჭირო მიწის ნაკვეთების და მასზე განთავსებული ქონების სანაცვლოდ, სათანადო ხელშეკრულების გაფორმების საფუძველზე, მსოფლიო ბანკთან შეთანხმებული მიწის შესყიდვისა და განსახლების გეგმით განსაზღვრული შესაბამისი ღირებულების ანაზღაურება, რაზედაც მათ უარი განაცხადეს. მითითებული შეტყობინებებით მოქალაქეებს ასევე მიეწოდათ ინფორმაცია, რომ მათი უარის შემთხვევაში საავტომობილო გზების დეპარტამენტი, როგორც პროექტის განმახორციელებელი, იმოქმედებდა „აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ“ საქართველოს კანონის შესაბამისად და მათი საკუთრების (პროექტის ფარგლებში მოქცეულ ნაწილზე) ექსპროპრიაციის უფლების მოპოვების მიზნით მიმართავდა კანონმდებლობით დადგენილ ღონისძიებებს.

დადასტურებულია, რომ მიწის ნაკვეთის მესაკუთრეებსა და საავტომობილო გზების დეპარტამენტს შორის შეუთანხმებლობა ძირითადად განაპირობა გამოსასყიდი ქონების ღირებულებაზე შეუთანხმებლობამ.

საკუთრების უფლების, ისევე როგორც სხვა ძირითადი უფლებების, სამართლებრივ გარანტიას წარმოადგენს კონსტიტუცია. უშუალოდ საკუთრების უფლების კონკრეტული კონსტიტუციური გარანტია ასახულია კონსტიტუციის 21-ე მუხლში. საქართველოს კონსტიტუციის 21-ე მუხლის პირველი პუნქტის თანახმად, საქართველოში „საკუთრება და მემკვიდრეობის უფლება აღიარებული და ხელშეუვალია. დაუშვებელია საკუთრების, მისი შეძენის, გასხვისების და მემკვიდრეობით მიღების საყოველთაო უფლების გაუქმება“. საკუთრების, როგორც ძირითადი უფლების გარანტია, პირველ რიგში, ნიშნავს თითოეული მესაკუთრის უფლებას, თავი დაიცვას სახელმწიფოს გაუმართლებელი და სხვა პირების ნებისმიერი ჩარევისგან, თუმცა საკუთრების უფლება არ არის აბსოლუტური უფლება. კონსტიტუციის 21-ე მუხლი უარყოფს იმგვარ საკუთრებით წესრიგს, რომელშიც კერძო ინტერესი საჯარო ინტერესთა მიმართ უპირობო, აბსოლუტური უპირატესობით სარგებლობს.

საქართველოს კონსტიტუციის 21-ე მუხლი ითვალისწინებს საჯარო მიზნებისთვის საკუთრების ჩამორთმევას. კერძოდ, საქართველოს კონსტიტუციის 21-ე მუხლის მე-3 პუნქტის თანახმად ,,აუცილებელი საზოგადოებრივი საჭიროებისათვის საკუთრების ჩამორთმევა დასაშვებია კანონით პირდაპირ გათვალისწინებულ შემთხვევებში, სასამართლოს გადაწყვეტილების ან ორგანული კანონით დადგენილი გადაუდებელი აუცილებლობისას, წინასწარი, სრული და სამართლიანი ანაზღაურების პირობით. ანაზღაურება თავისუფლდება ყოველგავარი გადასახადისა და მოსაკრებლისგან. აღნიშნული ნორმით გათვალისწინებულ საკუთრების ჩამორთმევაში იგულისხმება ექსპროპრიაცია, რომლის პირობები და წესი დადგენილია საქართველოს კანონით „აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ“.

„აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ“ საქართველოს კანონის მე-2 მუხლის პირველი პუნქტის შესაბამისად, ,,ამ კანონის მიზანია, განსაზღვროს აუცილებელი საზოგადოებრივი საჭიროებისათვის ექსპროპრიაციის უფლების მინიჭებისა და ექსპროპრიაციის განხორციელების წესი. აუცილებელი საზოგადოებრივი საჭიროებისათვის ექსპროპრიაცია ხორციელდება საქართველოს ეკონომიკისა და მდგრადი განვითარების მინისტრის ბრძანების საფუძველზე და სასამართლოს გადაწყვეტილებით, სახელმწიფო ორგანოს ან ადგილობრივი თვითმმართველობის ორგანოს, ანდა საჯარო ან კერძო სამართლის იურიდიული პირის სასარგებლოდ, რომელსაც ამ კანონის შესაბამისად ენიჭება ექსპროპრიაციის უფლება.“ ამავე მუხლის მე-2 ნაწილის „ა“ ქვეპუნქტის თანახმად კი აუცილებელი საზოგადოებრივი საჭიროებისათვის ექსპროპრიაცია ხორციელდება გზისა და მაგისტრალის გაყვანა - მშენებლობისათვის.

ვინაიდან საავტომობილო გზების დეპარტამენტის მიერ ვერ ხერხდება ზემოთ მითითებულ კერძო მესაკუთრესთან უძრავი ქონებების გამოსყიდვაზე თანხმობის მიღება, არსებობს ექსპროპრიაციის გზით საკუთრების უფლების ჩამორთმევის საჭიროება.

ამასთან, საექსპროპრიაციო ქონების ღირებულებასთან დაკავშირებით ექსპროპრიატორისა და ქონების მესაკუთრის შეუთანხმებლობის საკითხის განხილვა/გადაწყვეტა არ წარმოადგენს საქართველოს ეკონომიკისა და მდგრადი განვითარების სამინისტროს უფლებამოსილებას. „აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ“ საქართველოს კანონის მე-8 მუხლის პირველი პუნქტის მიხედვით - ,,თუ ექსპროპრიატორი და ქონების მესაკუთრე ვერ თანხმდებიან ქონების საბაზრო ღირებულებასა და საკომპენსაციო თანხაზე ან კომპენსაციის სახით შეთავაზებული ქონების გადაცემაზე, მაშინ თითოეულ მხარეს უფლება აქვს სარჩელი შეიტანოს სასამართლოში განსჯადობის მიხედვით, საქართველოს სამოქალაქო კანონმდებლობით დადგენილი წესით."

ამდენად, „აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ“ საქართველოს კანონის მე-2 მუხლის მე-2 პუნქტის „ა“ ქვეპუნქტის, მე-3 მუხლის პირველი პუნქტისა და საქართველოს ეკონომიკისა და მდგრადი განვითარების მინისტრის 2016 წლის 25 მარტის №1-1/159 ბრძანებით შექმნილი კომისიის 2017 წლის 30 იანვრის სხდომის ოქმისა და დასკვნის საფუძველზე, ვბრძანებ:

1. საქართველოს რეგიონული განვითარებისა და ინფრასტრუქტურის სამინისტროს გამგებლობაში არსებულ სახელმწიფო საქვეუწყებო დაწესებულებას – საქართველოს საავტომობილო გზების დეპარტამენტს მიენიჭოს ექსპროპრიაციის უფლება ,,ბაკურციხე-გურჯაანის შემოსავლელი გზის მშენებლობის პროექტის“ ფარგლებში მოქცეულ შემდეგ უძრავ ქონებაზე: ა) მესაკუთრე ივანე ბრეგვაძე (პ/ნ 13001010261), მიწის ნაკვეთი მდებარე გურჯაანი, ქალაქი გურჯაანი, ,,ვეძირული“ ს/კ 51.01.58.298 (ნაკვეთის წინა ნომერი 51.01.58.205), მიწის ნაკვეთის მთლიანი ფართი 467 კვ.მ, საექპროპრიაციო ქონება 467 კვ.მ და მასზე განთავსებული შენობა/ნაგებობა, ნარგავები; ბ) მესაკუთრე პაპუნა ზარდიაშვილი (პ/ნ 13001003781), მიწის ნაკვეთი მდებარე ქალაქი გურჯაანი ,,მელიორაციასთან“ ს/კ 51.01.58.142 (ნაკვეთის წინა ნომერი 51.01.58.141, 51.01.58.107), მიწის ნაკვეთის მთლიანი ფართი 4711 კვ.მ, საექპროპრიაციო ქონება 1800 კვ.მ და მასზე არსებული შენობა/ნაგებობა, ნარგავები; გ) მესაკუთრე ალექსი კვეზერელი (პ/ნ13001019388), მიწის ნაკვეთი მდებარე გურჯაანი, შესახვევი ვაჩნაძე I, N11 ს/კ 51.01.58.307 (ნაკვეთის წინა ნომერი 51.01.58.230, 51.01.58.235) მიწის ნაკვეთის მთლიანი ფართი 1824 კვ.მ, პროექტისათვის საჭირო მიწის ნაკვეთი 410 კვ.მ მასზე არსებული შენობა/ნაგებობა, ნარგავები.

2. ბრძანება შეიძლება გასაჩივრდეს მისი გამოქვეყნების ან ოფიციალური წესით გაცნობის დღიდან ერთი თვის ვადაში, თბილისის საქალაქო სასამართლოს ადმინისტრაციულ საქმეთა კოლეგიაში (მის. ქ. თბილისი, დავით აღმაშენებლის ხეივანი მე-12 კ.მ, №6).

მინისტრი გიორგი გახარია