საქართველოს თავდაცვის სამინისტროს 2017 წლის ანგარიში

საქართველოს თავდაცვის სამინისტროს 2017 წლის ანგარიშ ი

 

ზოგადი ინფორმაცია

საქართველოს თავდაცვის სამინისტროს გამჭვირვალობისა და საზოგადოების წინაშე ანგარიშვალდებულების ამაღლების მიზნით, სამინისტროს ადმინისტრაციაში, 2016 წლის მიწურულს, შეიქმნა ახალი სტრუქტურული ერთეული - საჯარო ინფორმაციის სამმართველო (შემდგომში - სამმართველო). სამმართველოს შემადგენლობაშია საჯარო ინფორმაციის განყოფილება და პერსონალურ მონაცემთა დაცვის განყოფილება.

სამმართველოს კომპეტენციას განეკუთვნება სამინისტროში, საუკეთესო პრაქტიკის გათვალისწინებით, საჯარო ინფორმაციის ხელმისაწვდომობის, სისტემის გამჭვირვალობისა და საჯაროობის უზრუნველყოფა. ასევე, საჯარო ინფორმაციის პროაქტიულად გამოქვეყნება, პერსონალური მონაცემების დაცვის მდგომარეობის შესწავლა, მონაცემების დაცვასთან დაკავშირებულ საკითხებზე რეკომენდაციების შემუშავება და სხვა.

საერთაშორისო და ეროვნულ კანონმდებლობასთან შესაბამისი, ერთიანი სტანდარტების ჩამოყალიბებისა და სამინისტროს მაქსიმალური გამჭვირვალობის უზრუნველყოფის მიზნით, 2017 წლის განმავლობაში, განახლდა მოქმედი, საჯარო ინფორმაციასთან დაკავშირებული საკითხების მარეგულირებელი, სამართლებრივი აქტები.

კერძოდ, მინისტრის 2017 წლის 5 აპრილის №27 ბრძანებით განახლდა საჯარო ინფორმაციის პროაქტიულად გამოქვეყნების წესი და საჯარო ინფორმაციის ელექტრონული ფორმით მოთხოვნისა და გაცემის სტანდარტი.

დაინტერესებული პირებისათვის ინფორმაციის მოპოვების გაადვილების მიზნით, შეიქმნა საჯარო ინფორმაციის პროაქტიულად გამოქვეყნების ერთიანი სისტემა - საჯარო ინფორმაციის ვებ-გვერდი - public.mod.gov.ge. პორტალზე, კატეგორიების მიხედვით, განთავსებულია შესაბამისი ინფორმაცია, ასევე უზრუნველყოფილია ინფორმაციის ელექტრონულად მოთხოვნის შესაძლებლობა. სამინისტროს საქმიანობასთან დაკავშირებული საზოგადოებისათვის საინტერესო საკითხების შესახებ ინფორმაციის პროაქტიულად გამოქვეყნება ხორციელდება მუდმივ რეჟიმში.

გარდა ზემოაღნიშნულისა, გამოიცა მინისტრის 2017 წლის 20 აპრილის №335 ბრძანება. ბრძანების შესაბამისად, გამჭვირვალობის მაღალი სტანდარტის უზრუნველყოფისა და ერთიანი პრაქტიკის დანერგვის მიზნით, სამმართველო კოორდინაციას უწევს სამინისტროს სისტემაში ს აჯარო ინფორმაციასთან დაკავშირებულ საკითხებს, ასევე, შეიმუშავებს შესაბამის რეკომენდაციებსა და წინადადებებს სამინისტროს სტრუქტურული ქვედანაყოფებისა და სამინისტროს სისტემაში მოქმედი საჯარო სამართლის იურიდიული პირებისათვის.

აღნიშნული ღონისძიებების პარალელურად, საქართველოს თავდაცვის სამინისტროში აქტიურად ხორციელდება მუშაობა პერსონალურ მონაცემთა დამუშავების და დაცვის სტანდარტების გაუმჯობესებისათვის. მუდმივ რეჟიმში მიმდინარეობს არსებული სისუსტეების, რისკების იდენტიფიცირება და შესაბამისად, რელევანტური სტანდარტის დანერგვა.

2017 წლის განმავლობაში, საჯარო ინფორმაციის გაცემაზე უარის თქმის სამართლებრივ საფუძვლებს წარმოადგენდა: საქართველოს ზოგადი ადმინისტრაციული კოდექსის მე-3, 28-ე, 29-ე, 44-ე, 83-ე, 99-ე და 102-ე მუხლები, „პერსონალურ მონაცემთა დაცვის შესახებ" საქართველოს კანონი, „სახელმწიფო საიდუმლოების შესახებ“ საქართველოს კანონი, „ოპერატიულ-სამძებრო საქმიანობის შესახებ“ საქართველოს კანონი. ასევე, დაინტერესებული პირის მიერ მოთხოვნილი ინფორმაციის არარსებობა სამინისტროს სისტემაში.

 

საქართველოს თავდაცვის სამინისტროში საჯარო ინფორმაციის ხელმისაწვდომობას უზრუნველყოფს სამმართველო, ბრძანებით განსაზღვრულ ზოგიერთ შემთხვევაში კი:

ფინანსების მართვის დეპარტამენტი;

სამინისტროს ადამიანური რესურსების მართვისა და პროფესიული განვითარების დეპარტამენტი;

საქართველოს შეიარაღებული ძალების გენერალური შტაბის J-1 პირადი შემადგენლობის დეპარტამენტი;

საქართველოს შეიარაღებული ძალების გენერალური შტაბის ჯარების ლოგისტიკური უზრუნველყოფის სარდლობა.