შპს „ქარ სერვისის“ განცხადების წარმოებაში მიღებაზე უარის თქმის შესახებ

განმცხადებელი – შპს „ქარ სერვისი“ (ს/ნ 405151730)

წარმომადგენელი – სერგო კაპანაძე

მოთხოვნა გაკოტრების საქმის წარმოების დაწყება

 სასამართლომ ზეპირი მოსმენის გარეშე განიხილა შპს „ქარ სერვისის“ განცხადება გაკოტრების საქმის წარმოების დაწყების შესახებ და

 გ ა მ ო ა რ კ ვ ი ა:

2018 წლის 19 ნოემბერს თბილისის საქალაქო სასამართლოს სამოქალაქო საქმეთა კოლეგიას განცხადებით მომართა შპს „ქარ სერვისის“ დირექტორმა სერგო კაპანაძემ საწარმოს მიმართ გაკოტრების საქმის წარმოების დაწყების თაობაზე.

 განმცხადებლის განმარტებით, შპს „ქარ სერვისი“ დაფუძნდა 2016 წლის 27 მაისს. საზოგადოების 100%-იანი წილის მქონე პარტნიორია სერგო კაპანაძე. კომპანიის ძირითად მიმართულებას წარმოადგენდა ავტომობილების ნაწილებით და აქსესუარებით საცალო ვაჭრობა. საწარმოს კრედიტორები 2018 წლის 13 ნოემბრის მდგომარეობით არიან WING CORPORATION და SHONAI TYPE CO.LTD, ხოლო მისი დავალიანება შეადგენს 51577.74 აშშ დოლარს. საზოგადოებას არ გააჩნია უძრავ-მოძრავი ქონება, არ ერიცხება ნაშთი საბანკო ანგარიშებზე. კომპანიის ფინანსური მდგომარეობა ყოველდღიურად უარესდება. შესაბამისად, საწარმოს დირექტორის მიერ მიღებულ იქნა გადაწყვეტილება საზოგადოების მიმართ გადახდისუუნარობის შესახებ.

 2018 წლის 21 ნოემბრის განჩინებით განმცხადებელს დაუდგინდა ხარვეზი და დაევალა წარმოადგინოს უცხო ენაზე შედგენილი დოკუმენტის სათანადოდ დამოწმებული თარგმანი.

 2018 წლის 30 ნოემბერს სასამართლოს ხარვეზის შევსების შესახებ განცხადებით მომართა შპს „ქარ სერვისის“ დირექტორმა სერგო კაპანაძემ. განმცხადებლის მიერ წარმოდგენილ იქნა უცხო ენაზე შედგენილი დოკუმენტის სათანადოდ დამოწმებული თარგმანი.

 სასამართლო გაეცნო წარმოდგენილ განცხადებას და თანდართულ დოკუმენტებს, მიაჩნია, რომ შპს „ქარ სერვისს“ უარი უნდა ეთქვას განცხადების წარმოებაში მიღებაზე შემდეგ გარემოებათა გამო:

„გადახდისუუნარობის საქმის წარმოების შესახებ” საქართველოს კანონის მე-20 მუხლის მე-4 პუნქტის მიხედვით, თუ მოვალე გადახდისუუნარობის შესახებ განცხადებით მოითხოვს გაკოტრებას და სასამართლო ამ კანონის მე-19 მუხლის პირველი პუნქტით განსაზღვრულ ვადაში მოვალის მიერ ამავე კანონის მე-16 მუხლით გათვალისწინებული გადახდისუუნარობის შესახებ განცხადების საფუძველზე დაადგენს, რომ გადახდისუუნარობის შესახებ განცხადების შეტანის დროისათვის გაკოტრების დაწყების შემთხვევაში მოვალე თავისი ქონებით ვერ უზრუნველყოფს საპროცესო ხარჯების დაფარვას, სასამართლოს გამოაქვს განჩინება გადახდისუუნარობის შესახებ განცხადების წარმოებაში მიღებაზე უარის თქმის შესახებ და მასში უთითებს, რომ მოვალე გაკოტრებულად გამოცხადდება რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

 ,,გადახდისუუნარობის საქმის წარმოების შესახებ” საქართველოს კანონის 1-ლი მუხლის თანახმად, ამ კანონის მიზანია მოვალის და კრედიტორის (კრედიტორების) ინტერესების თანაბარზომიერი დაცვა, შესაძლებლობის შემთხვევაში მოვალის ფინანსური სიძნელეების გადაჭრა და კრედიტორთა მოთხოვნების დაკმაყოფილება ან ამის შეუძლებლობის შემთხვევაში მოვალის ქონების რეალიზაციით მიღებული თანხების განაწილებით კრედიტორთა მოთხოვნების დაკმაყოფილება.

 აღნიშნული ნორმის მიხედვით, კანონის მიზნის განხორციელება დამოკიდებულია საწარმოს ფინანსურ მდგომარეობაზე და ასეთი მდგომარეობის ანალიზის საფუძველზე იმ შემთხვევაში დაიწყება საწარმოს მიმართ გადახდისუუნარობის საქმის წარმოება, თუ შესაძლებელი იქნება ,,გადახდისუუნარობის საქმის წარმოების შესახებ” საქართველოს კანონით გათვალისწინებული მიზნის მიღწევა. მხოლოდ ის გარემოება, რომ კანონი ითვალისწინებს გადახდისუუნარო მოვალის მიერ გაკოტრების საქმის წარმოების გახსნის მოთხოვნით სასამართლოსათვის მიმართვის შესაძლებლობას, ვერ იქნება საკმარისი ასეთი წარმოების დაწყებისათვის თუ იმთავითვე აშკარაა, რომ მოვალის ფინანსური მდგომარეობა გამორიცხავს გაკოტრების მიზნის მიღწევას.

ამდენად, ვინაიდან, შპს „ქარ სერვისს“ არ გააჩნია ქონება, მას უარი უნდა ეთქვას გაკოტრების საქმის წარმოების დაწყების შესახებ განცხადების წარმოებაში მიღებაზე, ამასთან, უნდა განიმარტოს, რომ მოვალე გაკოტრებულად გამოცხადდება რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

სასამართლომ იხელმძღვანელა ,,გადახდისუუნარობის საქმის წარმოების შესახებ” საქართველოს კანონის 1-ლი, მე-5, მე-7, მე-8, მე-19, მე-20 მუხლებით, საქართველოს სამოქალაქო საპროცესო კოდექსის 284-ე, 285-ე მუხლებით და

დ ა ა დ გ ი ნ ა:

1. შპს „ქარ სერვისის“ (ს/ნ 405151730) განცხადება არ იქნას მიღებული სასამართლოს წარმოებაში.

2. განემარტოთ კრედიტორებს, რომ შეუძლიათ მიმართონ სასამართლოს შპს „ქარ სერვისის“ (ს/ნ 405151730) მიმართ გადახდისუუნარობის შესახებ საქმის წარმოების დაწყებისა და მოვალის ქონებიდან მათი მოთხოვნის დაკმაყოფილების თაობაზე სასამართლოში გადახდისუუნარობის შესახებ განცხადების შეტანის გზით. თუ განჩინების გამოქვეყნებიდან 1 თვის ვადაში კრედიტორი გადახდისუუნარობის შესახებ განცხადებას არ შეიტანს სასამართლოში, სასამართლო მოვალეს გაკოტრებულად აცხადებს, რაც მოვალის რეგისტრაციის გაუქმების საფუძველია.

3. განჩინება გამოქვეყნდეს ,,საქართველოს საკანონმდებლო მაცნეში”. განჩინების გამოქვეყნებასთან დაკავშირებული ხარჯების გადახდა უზრუნველყოს განმცხადებელმა.

4. განჩინებაზე შეიძლება კერძო საჩივრის შეტანა თბილისის საქალაქო სასამართლოს სამოქალაქო საქმეთა კოლეგიაში (ქ.თბილისი, დავით აღმაშენებლის ხეივანი, მე-12 კმ. №6) განჩინების გამოქვეყნებიდან/გადაცემიდან 05 (ხუთი) დღის ვადაში.

მოსამართლე მაია სვიანაძე