„ქ. თბილისის მუნიციპალიტეტის ტერიტორიაზე მწვანე ნარგავების დაცვის, მოვლისა და აღდგენის წესის დამტკიცების შესახებ“ ქალაქ თბილისის მუნიციპალიტეტის საკრებულოს 2014 წლის 12 დეკემბრის №17-55 დადგენილებაში ცვლილების შეტანის თაობაზე

1. მე-2 მუხლს დაემატოს შემდეგი შინაარსის 41-ე პუნქტი:

„41. დიდტანიანი ხე – ხე, რომლის დიამეტრი აღემატება 25 სმ-ს.“.

2. 21¹  მუხლი ჩამოყალიბდეს შემდეგი რედაქციით:

„მუხლი 21¹. დიდტანიანი ხის გადარგვის წინაპირობები

1. ამ წესის 21-ე მუხლის საფუძველზე დიდტანიანი ხის გადარგვა დაიშვება, თუ:

ა) ხე არის საღი და კარგად განვითარებული;

ბ) ხე არ არის წვერხმელი;

გ) ხის ვარჯში ხმელი ტოტების რაოდენობა არ აღემატება 10-15%-ს;

დ) ხის მერქნის ბოლო წლების საშუალო შემატება არ არის მოცემული სახეობის საშუალო წლიურ შემატებაზე ნაკლები;

ე) ხის დიამეტრი აღემატება 25 სმ-ს.

2. ამ წესის 21-ე მუხლის საფუძველზე დიდტანიანი ხის გადარგვა დაუშვებელია, თუ:

ა) ხე არის წვერხმელი ან/და ხმობადი;

ბ) ხეს გააჩნია გულის სიდამპლე ან არის დაავადებული;

გ) ხე არის ხნიერი და ზრდაში შესუსტებული;

დ) ხეს აქვს დაგრეხილი ღერო;

ე) ხის ვარჯი ცალმხრივად არის განვითარებული;

ვ) სწრაფმზარდი სახეობების (ვერხვი, აკაცია, ტირიფი) მწიფე და გადაბერებული ინდივიდებისათვის, რომელთა საამორტიზაციო ხნოვანება 40-50 წელია;

ზ) ხეს აქვს მექანიკურად დაზიანებული ფესვის ყელი და ღერო;

თ) ხე, რომელის რიზოსფერო (კომის დიამეტრიდან გამომდინარე) 1,5-2,0 მეტრით ემიჯნება შენობა-ნაგებობას;

ი) ხე, რომლის ფესვთა სისტემა განვითარებულია დედა ქანის ბზარებსა და ნაპრალებში.“.

3. 21¹ მუხლის შემდეგ დაემატოს 21²  მუხლი:

„მუხლი 21² . 25 სმ ან ნაკლები დიამეტრის მქონე ხის გადარგვა

25 სმ ან ნაკლები დიამეტრის მქონე ხის გადარგვის თაობაზე  სამსახური გადაწყვეტილებას იღებს ყოველ კონკრეტულ შემთხვევაში ინდივიდუალური შეფასების საფუძველზე.“.