„სამეანო სერვისის მიმწოდებელი სამედიცინო სტაციონარული დაწესებულებებიდან მელოგინისა და ახალშობილის გაწერის წესის დამტკიცების შესახებ“ საქართველოს შრომის, ჯანმრთელობისა და სოციალური დაცვის მინისტრის 2018 წლის 29 მარტის №01-16/ნ ბრძანებაში ცვლილების შეტანის თაობაზე

,,12. დედა, ლოგინობის ხანის გართულებისას, შესაბამისი იურიდიული დოკუმენტაციის გაფორმების შემდეგ, რეფერალური სისტემით გადაყვანილი უნდა იქნეს შესაბამისი დონის პერინატალური სერვისის მიმწოდებელ დაწესებულებაში მინისტრის 2015 წლის 15 იანვრის №01-2/ნ ბრძანებით განსაზღვრული კრიტერიუმების გათვალისწინებით, ამ შემთხვევაში ჯანმრთელი ახალშობილი, ეწერება ბინაზე პირველ პუნქტში განსაზღვრული ვადის მიხედვით. იმ შემთხვევაში, როდესაც გადაყვანას (რეფერალს) დაქვემდებარებული მელოგინე მარტოხელაა და ახალშობილს არ ჰყავს დედის გარდა სხვა კანონიერი წარმომადგენელი, დაწესებულება ახალშობილის თაობაზე ინფორმაციას გადასცემს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს სახელმწიფო კონტროლს დაქვემდებარებულ სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების  სააგენტოს ან მის ტერიტორიულ ერთეულს, „ბავშვთა დაცვის მიმართვიანობის (რეფერირების) პროცედურების დამტკიცების თაობაზე“ საქართველოს მთავრობის 2016 წლის 12 სექტემბრის №437 დადგენილებით (შემდგომში – მთავრობის 2016 წლის 12 სექტემბრის №437 დადგენილება) განსაზღვრული წესით.‘‘.

,,19. თუ მელოგინეს არა აქვს პირადობის დამადასტურებელი დოკუმენტი, ჰოსპიტალიზაციისთანავე მიმღების მორიგე ექიმი ვალდებულია, აცნობოს აღნიშნულის თაობაზე სამეანო განყოფილების/სამსახურის გამგეს/უფროსს ან სხვა დასახელების მქონე ანალოგიური დატვირთვის მქონე სტრუქტურული ერთეულის ხელმძღვანელს, იურისტს და დაწესებულების ხელმძღვანელს. ასეთ შემთხვევაში:

ა) დაწესებულების ხელმძღვანელი ვალდებულია აცნობოს საპატრულო პოლიციას და სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ან მის ტერიტორიულ ერთეულს და მოითხოვოს მელოგინის პიროვნების დადგენა;

ბ) მელოგინის პიროვნების დაუდგენლობის შემთხვევაში, დაწესებულების ხელმძღვანელი უზრუნველყოფს აქტის შედგენას, რომელსაც ხელს აწერს: დაწესებულების ხელმძღვანელი, სამეანო განყოფილების/სამსახურის გამგე/უფროსი ან სხვა დასახელების მქონე ანალოგიური დატვირთვის მქონე სტრუქტურული ერთეულის ხელმძღვანელი, მკურნალი ექიმი, იურისტი, პოლიციის წარმომადგენელი, სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ან მისი ტერიტორიული ერთეულის წარმომადგენელი და თავად მელოგინე. აქტი დამოწმებული უნდა იქნეს დაწესებულების ხელმძღვანელის ბეჭდით და მასში მითითებული უნდა იყოს:

ბ.ა) დედა თავის სახელად და გვარად რას ასახელებს;

ბ.ბ) დედა რა სახელსა და გვარს ანიჭებს ბავშვს;

ბ.გ) მონაცემები მამის შესახებ (ვინ უნდა ჩაიწეროს მამად);

გ) ბავშვის დაბადების მოწმობის აღება ხდება სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს უფლებამოსილი პირის მიერ, ბავშვის დაბადების შესახებ სამედიცინო ცნობის საფუძველზე, რომელთან ერთად წარადგენს სამედიცინო დაწესებულებაში შედგენილ აქტს.‘‘.

,,21. ამ წესის მე-11 პუნქტით განსაზღვრულ შემთხვევებში, ახალშობილის გადაყვანა (რეფერალი) ხორციელდება რეფერალური სისტემის მობილური ბრიგადის მიერ სათანადო წესით შევსებული ცნობის თანხლებით. დაბადების მოწმობას იღებს ახალშობილის კანონიერი წარმომადგენელი. თუ ახალშობილს არ ჰყავს კანონიერი წარმომადგენელი, დაწესებულება აღნიშნულ ინფორმაციას გადასცემს სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ან მის ტერიტორიულ ერთეულს მთავრობის 2016 წლის 12 სექტემბრის №437 დადგენილებით განსაზღვრული წესით და ახალშობილის დაბადების მოწმობის აღება ხდება სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების  სააგენტოს უფლებამოსილი პირის მიერ.‘‘.

,,გ) დედის მიერ მიტოვებული ახალშობილის თაობაზე გადასცეს ინფორმაცია სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს ან მის ტერიტორიულ ერთეულს იმ წესით, როგორც ამას ითვალისწინებს მთავრობის 2016 წლის 12 სექტემბრის №437 დადგენილება. ამ შემთხვევაში ახალშობილის დაბადების მოწმობის აღება ხდება სსიპ – სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს უფლებამოსილი პირის მიერ.‘‘.