“სასჯელაღსრულების დეპარტამენტის დებულების დამტკიცების შესახებ” საქართველოს იუსტიციის მინისტრის 2000 წლის 14 ნოემბრის №315 ბრძანებაში ცვლილებებისა და დამატებების შეტანის თაობაზე”

სახელმწიფო სარეგისტრაციო კოდი 100.020.010.11.106.004.555

საქართველოს იუსტიციის მინისტრის

ბრძანება №367

2000 წლის 27 დეკემბერი

ქ. თბილისი

„სასჯელაღსრულების დეპარტამენტის დებულების დამტკიცების შესახებ“ საქართველოს იუსტიციის მინისტრის 2000 წლის 14 ნოემბრის №315 ბრძანებაში ცვლილებებისა და დამატებების შეტანის თაობაზე

„ნორმატიული აქტების შესახებ“ საქართველოს კანონის 36-ე მუხლის მოთხოვნათა შესაბამისად, ვბრძანებ:

I. „სასჯელაღსრულების დეპარტამენტის დებულების დამტკიცების შესახებ“ საქართველოს იუსტიციის მინისტრის 2000 წლის 14 ნოემბრის №315 ბრძანებაში შეტანილ იქნეს შემდეგი სახის ცვლილებები და დამატებები:

1. მე-4 მუხლის:

ა) მე-4 პუნქტში სიტყვები „ხუთი მოადგილე“ შეიცვალოს სიტყვებით „ოთხი მოადგილე“;

ბ) მე-4 პუნქტიდან ამოღებულ იქნეს „ე“ ქვეპუნქტი.

2. მე-5 მუხლი ჩამოყალიბდეს შემდეგი რედაქციით:

     „მუხლი 5. დეპარტამენტის სტრუქტურა

1. დეპარტამენტის სტრუქტურაში შედის შემდეგი ქვედანაყოფები:

ა) შტაბი;

ბ) სარეჟიმო სამსახური;

გ) უსაფრთხოების სამსახური;

დ) სპეციალური დაცვის სამსახური;

ე) საერთო სამსახური;

ვ) სპეციალური განყოფილება;

ზ) კადრების განყოფილება;

თ) იურიდიული განყოფილება;

ი) მსჯავრდებულთა უფლებების დაცვის, განათლების და სოციალურ საკითხთა უზრუნველყოფის განყოფილება.“.

3. მე-6 მუხლის:

ა) სახელწოდება ჩამოყალიბდეს შემდეგი რედაქციით:

     „მუხლი 6. უფლებამოსილების განაწილება დეპარტამენტის ხელმძღვანელთა შორის“;

ბ) მე-4 პუნქტში სიტყვები „სპეციალური სამსახურის“ შეიცვალოს სიტყვებით „სპეციალური განყოფილების“;

გ) მე-4 პუნქტს სიტყვების „სპეციალური განყოფილების“ შემდეგ დაემატოს სიტყვები „მსჯავრდებულთა უფლებების დაცვის, განათლების და სოციალურ საკითხთა უზრუნველყოფის განყოფილების“.

4. მე-7 მუხლის:

ა) პირველი პუნქტი ჩამოყალიბდეს შემდეგი რედაქციით:

„1. შტაბის შემადგენლობაში შედის:

ა) საორგანიზაციო-საინსპექტორო განყოფილება;

ბ) სამდივნო;

ბ) კომენდატურა.“.

ბ) მე-2 პუნქტის „გ“ ქვეპუნქტში სიტყვები „სამორიგეო ნაწილებსა და კანცელარიებს“ შეიცვალოს სიტყვებით „კომენდატურის და სამდივნოს“;

გ) მე-2 პუნქტიდან ამოღებულ იქნეს „თ - ჟ“ ქვეპუნქტები;

დ) მე-2 პუნქტს დაემატოს შემდეგი შინაარსის „ვ“ ქვეპუნქტი:

„ვ) ახორციელებს კანონმდებლობით დადგენილ სხვა ამოცანებს“.

5. დებულებას დაემატოს შემდეგი შინაარსიის 7¹ მუხლი:

     „მუხლი 7¹. საერთო სამსახური

1. საერთო სამსახურის შემადგენლობაში შედის:

ა) საფინანსო-სააღრიცხვო განყოფილება;

ბ) მატერიალურ-ტექნიკური უზრუნველყოფის განყოფილება;

გ) ბაზა;

დ) სამშენებლო უბანი;

ე) ავტოსატრანსპორტო კოლონა.

2. საერთო სამსახური:

ა) ახორციელებს სასჯელაღსრულების დაწესებულებებიდან ინფორმაციის მიღებას, დამუშავებას, სამინისტროსა და შესაბამის ორგანოებში მიწოდებას და ახდენს დროულ რეაგირებას მინისტრის ბრძანებით დადგენილი წესით;

ბ) უფლებამოსილების ფარგლებში ახორციელებს საბუღალტრო - საფინანსო საქმიანობას;

გ) წარმოადგენს წინადადებებს სასჯელაღსრულების ორგანოთა და მსჯავრდებულთა კვების პროდუქტებით, ინვენტარით, სამშენებლო-ტექნიკური, ელექტრომასალებითა და მოწყობილობებით, ტანსაცმლით და ფეხსაცმლით, იარაღითა და სპეციალური დანიშნულების ქონებით უზრუნველყოფის თაობაზე;

დ) უზრუნველყოფს დაწესებულების მოწყობილობების, საინჟინრო ქსელების, სატრანსპორტო საშუალებებისა და მექანიზმების სისტემის ტექნიკურად გამართულ მუშაობას და ახორციელებს კონტროლს მათ სწორ ექსპლუატაციაზე;

ე) საქმიანობის პროცესში ასრულებს დეპარტამენტისა და სამინისტროს მითითებებს ფინანსური და მატერიალური რესურსების ეკონომიური ხარჯვის თაობაზე და ატარებს ამ მიმართებით პრაქტიკულ ღონისძიებებს;

ვ) მონაწილეობას იღებს სასჯელაღსრულების დაწესებულებებში საინჟინრო ქსელების, ენერგეტიკული ობიექტების სისტემების, ახალი საწარმოო საამქროების ან არსებულის რეკონსტრუქციის ტექნიკური პირობებისა და პროექტების დამუშავებაში;

ზ) ახორციელებს კანონმდებლობით განსაზღვრულ სხვა ამოცანებს.“.

6. მე-8 მუხლში სიტყვა „განყოფილება“ შეიცვალოს სიტყვით „სამსახური“.

7. მე-9 მუხლიდან ამოღებულ იქნეს „გ“ ქვეპუნქტი.

8. მე-10 მუხლის „ა“ქვე პუნქტი ჩამოყალიბდეს შემდეგი რედაქციით:

„ა) დაცვისა და საინჟინრო-ტექნიკური უზრუნველყოფის განყოფილება“.

9. მე-11 მუხლის:

ა) პირველი პუნქტის „ი“ ქვეპუნქტი ჩამოყალიბდეს შემდეგი რედაქციით: „შეისწავლის პირად შემადგენლობასთან აღმზრდელობითი მუშაობის ფორმებსა და მეთოდებს“;

ბ) „კ“ ქვეპუნქტი ჩამოყალიბდეს შემდეგი რედაქციით:

„კ) სისტემატურად ახორციელებს სასაჯელაღსრულების დაწესებულებათა ინსპექტირებას“.

10. მე-12 მუხლი ჩამოყალიბდეს შემდეგი რედაქციით:

     „მუხლი 12. სპეციალური განყოფილება

1. სპეციალური განყოფილება:

ა) აკონტროლებს მსჯავრდებულთა მიმართ კანონმდებლობით გათვალისწინებული შეღავათების გავრცელებაზე მათი წარდგენის კანონიერებას;

ბ) ახორციელებს მსჯავრდებულთა შეწყალების შესახებ მასალების დროულად და ხარისხიანად მომზადებასა და გაგზავნას;

გ) ორგანიზებას უკეთებს მსჯავრდებულთა გათავისუფლებას, საქართველოს პრეზიდენტის შეწყალების აქტებისა და ამინისტიის შესრულებას;

დ) აწარმოებს მსჯავრდებულთა ერთიან რეესტრს და ქმნის მათი მონაცემების ერთიან კომპიუტერიზებულ საინფორმაციო ბანკს;

ე) უზრუნველყოფს გათავისუფლებული მსჯავრდებულების პირადი საქმის დამუშავებასა და სათანადო შენახვას;

ვ) ასრულებს კანონმდებლობით განსაზღვრულ სხვა ამოცანებს.

II. ეს ბრძანება ამოქმედდეს გამოქვეყნებისთანავე.

მ. სააკაშვილი