აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს 2021-2023 წლების სამოქმედო გეგმის დამტკიცების შესახებ

აჭარის ავტონომიური რესპუბლიკის უმაღლესი საბჭოს

გენდერული თანასწორობის საბჭოს

2021-2023 წლების სამოქმედო გეგმა

1. შესავალი

წინამდებარე დოკუმენტი წარმოადგენს აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს სამოქმედო გეგმას 2021-2023 წლებისთვის.¹ აღნიშნული დოკუმენტი მომზადებულია აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს (შემდგომში - აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭო) მიერ საარჩევნო სისტემების საერთაშორისო ფონდის (IFES) მხარდაჭერით.

აჭარის ავტონომიური რესპუბლიკის გენდერული თანასწორობის საბჭოს მიზანია, აჭარის ავტონომიურ რესპუბლიკაში ეფექტიანი გენდერული თანასწორობის პოლიტიკის განსაზღვრა და მისი აღსრულების მონიტორინგი.

აჭარის ავტონომიური რესპუბლიკის გენდერული თანასწორობის საბჭო, საქართველოს პარლამენტის მიერ განსაზღვრული გენდერული თანასწორობის სახელმწიფო პოლიტიკის შესაბამისად, აჭარის ავტონომიურ რესპუბლიკაში შეიმუშავებს გენდერული თანასწორობის პოლიტიკას და უზრუნველყოფს მისი შესრულების კოორდინაციასა და მონიტორინგს.

აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭო თავის საქმიანობაში ხელმძღვანელობს საქართველოს კონსტიტუციით, „აჭარის ავტონომიური რესპუბლიკის სტატუსის შესახებ“ საქართველოს კონსტიტუციური კანონით, აჭარის ავტონომიური რესპუბლიკის კონსტიტუციით, „გენდერული თანასწორობის შესახებ“ საქართველოს კანონით, აჭარის ავტონომიური რესპუბლიკის უმაღლესი საბჭოს რეგლამენტით, აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს დებულებითა და სხვა სამართლებრივი აქტებით.

აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭო თავისი საქმიანობით უზრუნველყოფს საქართველოს მიერ საერთაშორისო ხელშეკრულებების ფარგლებში აღებული ვალდებულებების შესრულებას. მათ შორისაა საქართველოსა და ევროკავშირს შორის ასოცირების შესახებ შეთანხმება, ევროპის საბჭოს კონვენცია ქალთა მიმართ ძალადობისა და ოჯახში ძალადობის პრევენციისა და აღკვეთის შესახებ (ე.წ. „სტამბოლის კონვენცია“), გაეროს კონვენცია

ქალთა მიმართ დისკრიმინაციის ყველა ფორმის აღმოფხვრის შესახებ (CEDAW) და სხვა საერთაშორისო სამართლებრივი აქტები.

2. მეთოდოლოგია

აღნიშნული სამოქმედო გეგმის შემუშავების პროცესი მიმდინარეობდა აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს და საარჩევნო სისტემების საერთაშორისო ფონდის (IFES) მჭიდრო თანამშრომლობით. მხარეთა ერთობლივ პრიორიტეტს პროცესის ინკლუზიურად წარმართვა წარმოადგენდა.

დოკუმენტზე მუშაობის პროცესში ჩატარდა სიტუაციური ანალიზი და სამაგიდო კვლევა, მათ შორის “აჭარის ავტონომიურ რესპუბლიკაში გენდერული თანასწორობის ღონისძიებათა 2019-2020 წლების სამოქმედო გეგმის” შეფასების მიზნით. გარდა ამისა, ხარისხობრივი ინფორმაციის შეგროვების მიზნით, ჩატარდა სიღრმისეული ინტერვიუები დაინტერესებულ მხარეებთან. მათ შორის, აჭარის ავტონომიური რესპუბლიკის უმაღლესი საბჭოს მოქმედ და ყოფილ წევრებთან, აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს წევრებთან, საქართველოს პარლამენტის გენდერული თანასწორობის საბჭოს წევრებთან, აჭარის ავტონომიური რესპუბლიკის აღმასრულებელი შტოს წარმომადგენლებთან, აჭარის ავტონომიური რესპუბლიკის მუნიციპალიტეტების, მათ შორის მუნიციპალიტეტებში არსებული გენდერული თანასწორობის საბჭოების წარმომადგენლებთან, სახალხო დამცველის ოფისის წარმომადგენლებთან, აჭარის ავტონომიურ რესპუბლიკაში მოღვაწე არასამთავრობო ორგანიზაციების და მედიის წარმომადგენლებთან.

ინფორმაციის შეგროვებასთან ერთად, ჩატარდა SWOT ანალიზი და განისაზღვრა აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს საქმიანობის პრიორიტეტები 2021-2023 წლებისთვის.

შემუშავებული დოკუმენტი “აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს 2021-2023 წლების სამოქმედო გეგმა” წარედგინება აჭარის ავტონომიური რესპუბლიკის უმაღლეს საბჭოს დასამტკიცებლად.

3.სიტუაციური ანალიზი

1. აჭარის ავტონომიური რესპუბლიკა

აჭარის ავტონომიური რესპუბლიკა არის ტერიტორიული ერთეული, რომელიც საქართველოს განუყოფელი ნაწილია და მასში სახელმწიფო ხელისუფლება ხორციელდება საქართველოს კონსტიტუციით დადგენილი პრინციპების საფუძველზე.²

აჭარის ავტონომიურ რესპუბლიკა მოიცავს ექვს მუნიციპალიტეტს. კერძოდ, ბათუმის, ქედის, ქობულეთის, შუახევის, ხელვაჩაურის და ხულოს მუნიციპალიტეტები.

2021 წლის მონაცემებით, აჭარის ავტონომიური რესპუბლიკის მოსახლეობა შეადგენს 354,900 ადამიანს.³ მოსახლეობის 60% აჭარის ქალაქებში - ბათუმში (48.5%) და ქობულეთში (20.2%) ნაწილდება. ხელვაჩაურში მოსახლეობის 14.9%-ია. მაღალმთიანი აჭარის ავტონომიური რესპუბლიკის მუნიციპალიტეტებში მოსახლეობის მაცხოვრებელთა რაოდენობით ყველაზე დიდია ხულოს (7.5%) მუნიციპალიტეტი, ხოლო შუახევსა (7.5%) და ქედაში (4.7%) მოსახლეობა თითქმის თანაბრადაა გადანაწილებული.⁴ (იხ. გრაფიკი 1).

გრაფიკი 1. მოსახლეობის განაწილება აჭარის ავტონომიური რესპუბლიკის მუნიციპალიტეტებში

აჭარის ავტონომიური რესპუბლიკის უფლებამოსილებათა საფუძვლებია სა

აჭარის ავტონომიური რესპუბლიკის უფლებამოსილებათა საფუძვლებია: ქართველოს კონსტიტუცია, საქართველოს კონსტიტუციური კანონი “აჭარის ავტონომიური რესპუბლიკის სტატუსის შესახებ” და აჭარის ავტონომიური რესპუბლიკის კონსტიტუცია.⁵

აჭარის ავტონომიური რესპუბლიკის უმაღლესი საბჭო არის აჭარის ავტონომიური რესპუბლიკის წარმომადგენლობითი ორგანო, რომელიც თავისი კომპეტენციის ფარგლებში ახორციელებს საკანონმდებლო საქმიანობას და ზედამხედველობას უწევს აჭარის ავტონომიური რესპუბლიკის მთავრობას. აჭარის ავტონომიური რესპუბლიკის უმაღლესი საბჭო შედგება 4 წლის ვადით არჩეული არა უმეტეს 21 დეპუტატისგან.⁶

აჭარის ავტონომიური რესპუბლიკის მთავრობა არის აჭარის ავტონომიური რესპუბლიკის აღმასრულებელი ორგანო, რომელიც ახორციელებს აჭარის ავტონომიური რესპუბლიკის აღმასრულებელ ხელისუფლებას და განსაზღვრავს აჭარის ავტონომიური რესპუბლიკის აღმასრულებელი ხელისუფლების საქმიანობის ძირითად მიმართულებებს. მთავრობა შედგება აჭარის ავტონომიური რესპუბლიკის მთავრობის თავმჯდომარისა და აჭარის ავტონომიური რესპუბლიკის მინისტრებისაგან. აჭარის ავტონომიური რესპუბლიკის მთავრობა ანგარიშვალდებულია საქართველოს პრეზიდენტისა და აჭარის ავტონომიური რესპუბლიკის უმაღლესი საბჭოს წინაშე.⁷

2. გენდერული თანასწორობის პოლიტიკის განსაზღვრა აჭარის ავტონომიურ რესპუბლიკაში

აჭარის ავტონომიურ რესპუბლიკაში გენდერული თანასწორობის პოლიტიკას განსაზღვრავს და საქართველოს პარლამენტის მიერ შექმნილ გენდერული თანასწორობის მუდმივმოქმედ საპარლამენტო საბჭოსთან კოორდინირებულ მუშაობას უზრუნველყოფს, აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭო.

აჭარის ავტონომიური რესპუბლიკის გენდერული თანასწორობის საბჭოს სტატუსი, ფუნქციები, უფლებამოსილება და საქართველოს პარლამენტის მიერ შექმნილ გენდერული თანასწორობის მუდმივმოქმედ საპარლამენტო საბჭოსთან ურთიერთობა განისაზღვრება რეგლამენტითა და გენდერული თანასწორობის საბჭოს დებულებით,⁸ რომელსაც ამტკიცებს უმაღლესი საბჭო.

აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭო ხელს უწყობს აჭარის ავტონომიური რესპუბლიკის უმაღლესი საბჭოს მიერ გენდერულ სფეროში ძირითადი მიმართულებების განსაზღვრას, გენდერული თანასწორობის სფეროში საკანონმდებლო ბაზის შექმნისა და განვითარების უზრუნველყოფას, შესაბამისი სამოქმედო გეგმის განხილვასა და დამტკიცებას, გენდერული თანასწორობის შესახებ ცნობიერების ამაღლებას და ქალთა გაძლიერების მხარდამჭერი ღონისძიებების განხორციელებას.⁹

აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭო უფლებამოსილია შეიმუშაოს გენდერული თანასწორობის უზრუნველსაყოფად აჭარის ავტონომიურ რესპუბლიკაში განსახორციელებელი სამოქმედო გეგმა და უზრუნველყოს ამ გეგმის შესრულების კოორდინაცია და მონიტორინგი, განახორციელოს აჭარის ავტონომიური რესპუბლიკის კანონმდებლობის ანალიზი და შეიმუშაოს წინადადებები კანონმდებლობაში არსებული გენდერული უთანასწორობის აღმოფხვრის უზრუნველსაყოფად, საქართველოს პარლამენტის მიერ შექმნილ გენდერული თანასწორობის მუდმივმოქმედ საბჭოსთან ერთად დაგეგმოს და განახორციელოს სხვადასხვა სახის ღონისძიებები, შეიმუშაოს და დაგეგმოს ცალკეული ღონისძიებები გენდერული თანასწორობის მისაღწევად, ქალთა და მამაკაცთა თანასწორი უფლებების რეალიზაციისათვის, გამოითხოვოს და მიიღოს გენდერული თანასწორობის საკითხის შესწავლასთან დაკავშირებული ნებისმიერი ინფორმაცია და დოკუმენტაცია, გარდა ისეთი დოკუმენტებისა, რომელთა კონფიდენციალურობაც დაცულია საქართველოს კანონმდებლობის შესაბამისად, განიხილოს გენდერული თანასწორობის დარღვევის თაობაზე წარმოდგენილი განცხადებები, დოკუმენტაცია და სხვა ინფორმაცია, თავისი კომპეტენციის ფარგლებში მოახდინოს მათზე რეაგირება, შეიმუშაოს შესაბამისი რეკომენდაციები და სხვ.

აჭარის ავტონომიური რესპუბლიკის ექვსივე მუნიციპალიტეტში ფუნქციონირებს გენდერული თანასწორობის ადგილობრივი საბჭოები. კერძოდ, ბათუმის მუნიციპალიტეტის გენდერული თანასწორობის საბჭო, ქობულეთის მუნიციპალიტეტის გენდერული თანასწორობის საბჭო, ქედის მუნიციპალიტეტის გენდერული თანასწორობის საბჭო, შუახევის მუნიციპალიტეტის გენდერული თანასწორობის საბჭო, ხელვაჩაურის მუნიციპალიტეტის გენდერული თანასწორობის საბჭო და ხულოს მუნიციპალიტეტის გენდერული თანასწორობის საბჭო. (იხ. გრაფიკი 2) მუნიციპალიტეტებში მდებარე საბჭოები ხელს უწყობენ ადგილობრივ დონეზე პრიორიტეტების განსაზღვრას გენდერული თანასწორობის განმტკიცებისთვის, ცენტრალური და რეგიონული პრიორიტეტებთან თანხვედრას და შესაბამისი ღონისძიებების განხორციელებას.

2021 წლის ივნისის მონაცემებით, აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს შედგება რვა წევრისგან. აქედან 6 კაცი (75%) და 2 ქალი (25%). გენდერული თანასწორობის საბჭოს თავმჯდომარეა ფატი ხალვაში, საბჭოს თავმჯდომარის მოადგილე - ცოტნე ანანიძე, საბჭოს წევრები: მარინე გვიანიძე, გიორგი მანველიძე, ირაკლი ჭეიშვილი, ილია ვერძაძე, ნადიმ ვარშანიძე, დავით თედორაძე.

3. მიმდინარე ტენდენციები და 2019-2020 წლების აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს სამოქმედო გეგმის შეფასება

აჭარის ავტონომიური რესპუბლიკის უმაღლესი საბჭოს გენდერული თანასწორობის სამოქმედო გეგმის შეფასება განხორციელდა, როგორც მის შესრულების ანგარიშზე დაყრდნობით,¹⁰ ასევე ხარისხობრივი ინფორმაციის შეგროვებით. შედეგად, გამოიკვეთა რამდენიმე ძირითადი ტენდენცია.

აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს სამოქმედო გეგმის, როგორც პოლიტიკის განმსაზღვრელი დოკუმენტის, მნიშვნელობა ერთხმად გააზრებულია საჯარო სფეროს წარმომადგენელთა მიერ.

„მსგავსი დოკუმენტის არსებობა ნამდვილად მნიშვნელოვანია რეგიონისთვის. განსაკუთრებით იმიტომ, რომ დოკუმენტი, რომელსაც აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭო იღებს, ვრცელდება სრულად აჭარის ავტონომიურ რესპუბლიკაზე და პოლიტიკის განმსაზღვრელ დოკუმენტს წარმოადგენს.”

- აღმასრულებელი ხელისუფლების წარმომადგენელი.

2019-2020 წლებისთვის აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს სამოქმედო გეგმის მთავარ მიღწევად გენდერული კვოტირების საკითხი დასახელდა.

კერძოდ კი, “აჭარის ავტონომიური რესპუბლიკის უმაღლესი საბჭოს არჩევნების შესახებ” აჭარის ავტონომიური რესპუბლიკის კანონში¹¹ 2020 წელს განხორციელებული ცვლილებების თანახმად, უმაღლესი საბჭოს 2020 წლის 31 ოქტომბრის არჩევნების შემდგომ 2028 წლამდე ჩასატარებელი უმაღლესი საბჭოს არჩევნებისათვის პარტიული სიის შედგენის წესს განსაზღვრავს პოლიტიკური პარტია, იმგვარად, რომ უსკოს თავმჯდომარისათვის წარდგენილი პარტიული სიის ყოველ ოთხეულში ერთი პირი მაინც უნდა იყოს განსხვავებული სქესის წარმომადგენელი.¹²

უმაღლესი საბჭოს 2028 წლის 28 ოქტომბრის არჩევნებისა და ამ არჩევნების მომდევნო, 2032 წლამდე ჩასატარებელი უმაღლესი საბჭოს არჩევნებისათვის პარტიული სიის შედგენის წესს განსაზღვრავს პოლიტიკური პარტია, იმგვარად, რომ უსკოს თავმჯდომარისათვის წარდგენილი პარტიული სიის ყოველ სამეულში ერთი პირი მაინც უნდა იყოს განსხვავებული სქესის წარმომადგენელი.¹³

შედეგად, 2020 წელს აჭარის ავტონომიური რესპუბლიკის უმაღლესი საბჭოს არჩეულ 21 წევრს შორის სამი ქალია, რაც 14 პროცენტიან წარმომადგენლობას უტოლდება. 2016-2020 წლების მოწვევის უმაღლეს საბჭოში 21 წევრიდან მხოლოდ ერთი იყო ქალი (4.7%). ყველაზე მეტი ქალი 2012-2016 წლების მოწვევის უმაღლეს საბჭოში იყო, კერძოდ კი წევრთა შორის ოთხი ქალი იყო (19%). 2008-2012 წლების მოწვევის საბჭოს 18 წევრიდან მხოლოდ ერთი იყო ქალი (5.5%), ხოლო 2004-2008 წლებში უმაღლესი საბჭოს 30 წევრიდან ოთხი (13%) იყო ქალი.¹⁴ (იხ. გრაფიკი 3)

გრაფიკი 3. აჭარის ავტონომიური რესპუბლიკის უმაღლესი საბჭოს წევრთა განაწილება გენდერულ ჭრილში წლების მიხედვით

აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს 2019-2020 წლების სამოქმედო გეგმის შესრულების შეფასებისას, საანგარიშო პერიოდში გამოწვევად სახელდებოდა შემდეგი საკითხები:

• კოორდინაციის ნაკლებობა აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს და როგორც ადგილობრივ, ასევე საერთაშორისო აქტორებთან,

• კოორდინაციის ნაკლებობა აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს და მუნიციპალიტეტებში არსებულ გენდერული თანასწორობის საბჭოებთან,

• ცნობადობის დაბალი დონე, რაც თავისთავად იწვევდა მიმართვიანობის დაბალ დონეს, მათ შორის ოჯახში ძალადობის საკითხებზე,

• თანამშრომლობის ნაკლებობა საქართველოს სახალხო დამცველის ოფისთან,

• თანამშრომლობის ნაკლებობა რეგიონში მომუშავე არასამთავრობო ორგანიზაციებთან და მედიასთან.

აღსანიშნავია, რომ COVID-19-ით გამოწვეულმა პანდემიამ მნიშვნელოვნად შეაფერხა 2019-2020 წლების სამოქმედო გეგმით გათვალისწინებული აქტივობების განხორციელების პროცესი.

შეფასების შედეგად ასევე გამოვლინდა, რომ მუნიციპალიტეტებში არსებული გენდერული თანასწორობის საბჭოები წარმატებით თანამშრომლობენ ერთმანეთთან და ცვლიან ინფორმაციას გენდერული თანასწორობის გაძლიერების მიზნით ჩატარებული ღონისძიებების შესახებ. მუნიციპალიტეტების წარმომადგენლების მხრიდან დადებითად შეფასდა აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს სამოქმედო გეგმის განსაზღვრის პროცესში მათი მონაწილეობა.

აღსანიშნავია, რომ მუნიციპალურ დონეზე არამხოლოდ ხორციელდება თანამშრომლობა არასამთავრობო ორგანიზაციებთან, არამედ რამდენიმე მუნიციპალიტეტში ადგილზე მომუშავე არასამთავრობო ორგანიზაციები გენდერული თანასწორობის საბჭოს წევრებიც კი არიან.

შეფასებისას გამოიკვეთა, რომ აჭარის ავტონომიურ რესპუბლიკაში არსებულ ტენდენცია და მოსახლეობის ცნობიერების ცვლილება გენდერული თანასწორობის გაძლიერების მიმართულებით, დადებითად ფასდება. მაგალითისთვის, აღნიშნულ იქნა მნიშვნელოვნად შემცირებული მიმღებლობა ქალთა მიმართ და ოჯახში ძალადობის მიმართ. თუმცა, აქვე აღინიშნა, რომ სოციალური ცვლილებისთვის, რაც აუცილებელია ძალადობის აღმოფხვრისათვის, მნიშვნელოვანია მოსახლეობასთან მუშაობის გაგრძელება, განსაკუთრებით კი მაღალმთიან აჭარაში.

აჭარის ავტონომიურ რესპუბლიკაში გენდერული თანასწორობის და ქალთა უფლებების რეალიზაციის კუთხით არსებულ გამოწვევებს შორის, რესპოდენტების მხრიდან განსაკუთრებული ყურადღება დაეთმო შემდეგ საკითხებს:

• ეკონომიკური საჭიროებები და ქალთა ეკონომიკური გაძლიერების მნიშვნელობა,

• ქალთა მიმართ და ოჯახში ძალადობის აღმოფხვრა,

• ტრეფიკინგთან ბრძოლა,

• ზრუნვის ეკონომიკასთან დაკავშირებული, მათ შორის ინფრასტრუქტურული საკითხები,

• ფსიქოლოგიური მხარდაჭერის სერვისების არსებობა, განსაკუთრებით პანდემიის პერიოდში,

• სოციალური პროგრამების სიმწირე,

• პოლიტიკაში და გადაწყვეტილების მიმღებ პოზიციებზე ქალების ნაკლებობა (გამონაკლისის სახით აღინიშნა აჭარის ავტონომიური რესპუბლიკის განათლების, კულტურის და სპორტის სამინისტრო და აჭარის ავტონომიური რესპუბლიკის ჯანმრთელობის და სოციალური დაცვის სამინისტრო),

• ახალგაზრდებთან მუშაობის და მათი ჩართულობის ნაკლებობა,

• მედიის მხრიდან დაბალი ინტერესი გენდერული თანასწორობის, გოგოების და ქალების გაძლიერების საკითხების მიმართ. განსაკუთრებით კი პოზიტიური საკითხების მიმართ,

• აჭარის ავტონომიურ რესპუბლიკაში გენდერული თანასწორობის მიმართულებით არსებული მონაცემების ნაკლებობა,

• აჭარის ავტონომიური რესპუბლიკის მთავრობის პროგრამებსა და ქვე-პროგრამებში გენდერული თანასწორობის და ზეგავლენის შეფასების ნაკლებობა.

  1. არასამთავრობო და საერთაშორისო ორგანიზაციებთან თანამშრომლობა

ISFED-თან ერთად, შეფასებისას აღინიშნა თანამშრომლობა ისეთ საერთაშორისო და ადგილობრივი ორგანიზაციებთან, როგორიცაა გაეროს განვითარების პროგრამა (UNDP), გაეროს ბავშვთა ფონდი (UNICEF), საერთაშორისო რესპუბლიკური ინსტიტუტი საქართველო (IRI), ეროვნულ დემოკრატიული ინსტიტუტი (NDI), აშშ საერთაშორისო განვითარების სააგენტო (USAID), პარტნიორობა ადამიანის უფლებებისთვის (PHR), ასოციაცია „ერთმანეთისთვის“, ჟურნალისტთა ქსელი გენდერული თანასწორობისთვის, ევროკავშირისა და ნატოს საინფორმაციო ბიუროები აჭარაში.

2. მისია, ხედვა და პრიორიტეტები

აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს მისიაა ინსტიტუციური გაძლიერების გზით, ხელი შეუწყოს აჭარის ავტონომიურ რესპუბლიკაში თანასწორობის პრინციპებზე დაფუძნებული საზოგადოების შექმნას, რომლის თითოეულ წევრსაც ექნება თანაბარი შესაძლებლობა განახორციელოს საკუთარი უფლებები და თანაბრად ისარგებლოს სახელმწიფოში არსებული სიკეთეებით.

გენდერული თანასწორობა, როგორც კონსტიტუციით განმტკიცებული ღირებულება წარმოადგენს პრიორიტეტს ეროვნულ და ადგილობრივ დონეზე.

აღნიშნული სამოქმედო გეგმის მიზანია აჭარის ავტონომიურ რესპუბლიკაში გენდერული თანასწორობის გაძლიერების ზოგადი ხედვისა და კონკრეტული აქტივობების განსაზღვრა, რომელიც ითვალისწინებს ეროვნულ და ადგილობრივ საჭიროებებს; პასუხობს პოლიტიკის შემუშავებისათვის საჭირო მონაცემებზე მოთხოვნას; განსაზღვრავს გენდერული თანასწორობის გაძლიერების პრიორიტეტულ მიმართულებებს; უზრუნველყოფს შესაბამისი მატერიალურ-ფინანსური რესურსების განაწილებას; წარმოადგენს ჩარჩოს ეროვნული და საერთაშორისო თანამშრომლობისათვის; მოიცავს პოლიტიკის აღსრულების პროცესის ყველა საფეხურს და შეესაბამება თანამედროვე საერთაშორისო სტანდარტებს.

2021-2023 წლებისთვის აჭარის ავტონომიური რესპუბლიკის უმაღლესი საბჭოს გენდერული თანასწორობის საბჭოს პრიორიტეტები შემდეგნაირად განისაზღვრა:

1. აჭარის ავტონომიურ რესპუბლიკაში გენდერული თანასწორობის საკითხებზე უწყებათაშორისი კოორდინაციის გაძლიერება და ინსტიტუციური მექანიზმების გაუჯობესება.

2. აჭარის ავტონომიურ რესპუბლიკაში გენდერული თანასწორობის გაძლიერების ხელშეწყობა მონაცემებზე დაყრდნობილი პოლიტიკის წარმოების, თანამშრომლობის და ცნობიერების ამაღლების გზით.

3. აჭარის ავტონომიურ რესპუბლიკაში ქალთა ეკონომიკური გაძლიერების ხელშეწყობა.

4. აჭარის ავტონომიურ რესპუბლიკაში ქალთა მიმართ და ოჯახში ძალადობის აღმოფხვრის ხელშეწყობა.

5. აჭარის ავტონომიურ რესპუბლიკაში ქალთა პოლიტიკური გაძლიერების ხელშეწყობა.

სოციალური გარდატეხის მიღწევის მიზნით, გენდერული თანასწორობისა და ქალთა უფლებების შესახებ საჯარო მოხელეთა ცოდნის გაღრმავება და მოსახლეობის ცნობიერების ამაღლება გამჭოლ პრიორიტეტად გასდევს სამოქმედო გეგმას.

აღნიშნულ პრიორიტეტებზე დაყრდნობით მომზადდა წინამდებარე სამოქმედო გეგმა.

3. ლოგიკური ჩარჩო