მიკრობანკებისათვის უძრავი ქონების შეფასების ინსტრუქციის დამტკიცების თაობაზე

მიკრობანკებისათვის უძრავი ქონების შეფასების ინსტრუქციის დამტკიცების თაობაზე საქართველოს ეროვნული ბანკის პრეზიდენტის ბრძანება №118/04 2023 წლის 21 ივნისი ქ. თბილისი მიკრობანკებისათვის უძრავი ქონების შეფასების ინსტრუქციის დამტკიცების თაობაზე „საქართველოს ეროვნული ბანკის შესახებ“ საქართველოს ორგანული კანონის მე-15 მუხლის პირველი პუნქტის „ზ“ ქვეპუნქტის, ამავე კანონის 48-ე მუხლის მე-3 პუნქტისა და „მიკრობანკების საქმიანობის შესახებ” საქართველოს კანონის 25-ე მუხლის პირველი პუნქტის შესაბამისად, ვბრძანებ: მუხლი 1🔗 დამტკიცდეს მიკრობანკებისათვის უძრავი ქონების შეფასების ინსტრუქცია თანდართულ დანართთან ერთად. მუხლი 2🔗 ეს ბრძანება ამოქმედდეს 2023 წლის 1 ივლისიდან. საქართველოს ეროვნული ბანკის ვიცე–პრეზიდენტი (მოვალეობის შემსრულებელი)არჩილ მესტვირიშვილი მიკრობანკებისათვის უძრავი ქონების შეფასების ინსტრუქცია მუხლი 1🔗. ზოგადი დებულებანი 1. ეს ინსტრუქცია განსაზღვრავს უძრავი ქონების შეფასების წესებსა და პრინციპებს მიკრობანკებისთვის. 2. ამ ინსტრუქციით განსაზღვრული შეფასების წესები და პრინციპები, მათ შორის, ეფუძნება „შეფასების საერთაშორისო სტანდარტებს“ (IVS). 3. მიკრობანკი ვალდებულია შეფასების პროცესი წარმართოს ამ ინსტრუქციით განსაზღვრული წესებისა და პრინციპების დაცვით. 4. იმ შემთხვევაში, თუ ამ ინსტრუქციით არ არის დარეგულირებული უძრავი ქონების შეფასებასთან დაკავშირებული გარკვეული საკითხი ან/და არ არის მოცემული ტერმინთა განმარტება, მიკრობანკმა უნდა იხელმძღვანელოს შეფასების საერთაშორისო სტანდარტებით. 5. ამ ინსტრუქციის მოთხოვნების შესასრულებლად მიკრობანკს უნდა გააჩნდეს ადეკვატური შიდა პოლიტიკა და პროცედურები. 6. მიკრობანკი ვალდებულია უზრუნველყოს შეფასების პროცესის დამოუკიდებლობა და მიუკერძოებლობა. ინტერესთა კონფლიქტის გამორიცხვის მიზნით, მიკრობანკმა უნდა უზრუნველყოს თანამშრომელთა შორის უფლება-მოვალეობათა იმგვარად გადანაწილება, რომ კლიენტთა მოძიება/კრედიტუნარიანობის შეფასების პროცესში ჩართული თანამშრომლები არ იღებდნენ მონაწილეობას უძრავი ქონების შეფასების პროცესში. 7. მიკრობანკმა უნდა უზრუნველყოს, რომ შეფასების პროცესი განახორციელოს პროფესიონალმა შიდა/გარე შემფასებელმა, განურჩევლად შესაფასებელი უძრავი ქონების საბაზრო ღირებულებისა. 8. უძრავი ქონების შეფასების პროცესის წარმართვაზე პასუხისმგებლობა ეკისრება მიკრობანკს როგორც შიდა, ასევე გარე რესურსების გამოყენების შემთხვევაში. 9. მიკრობანკი ვალდებულია განსაზღვროს როგორც უძრავი ქონების შეფასების პროცესზე, ასევე შეფასების პროცესის ხარისხის მონიტორინგზე პასუხისმგებელი სტრუქტურული ერთეულები. ამასთან, საშემფასებლო საქმიანობა არ უნდა იყოს მოქცეული მიკრობანკის გაყიდვების სეგმენტის ქვეშ და მაქსიმალურად უნდა იქნეს უზრუნველყოფილი შეფასების პროცესის დამოუკიდებლობა ბიზნესგადაწყვეტილებებისაგან. 10. მიკრობანკის შიდა აუდიტორული სამსახური ვალდებულია საკუთარი გეგმის ფარგლებში, გონივრული პერიოდულობით, მიკრობანკის კომპლექსურობისა და საქმიანობის მასშტაბის გათვალისწინებით, განახორციელოს ამ ინსტრუქციასთან შესაბამისობის აუდიტი. 11. მიკრობანკმა გარე/მიკრობანკთან დაკავშირებულ შემფასებელთან საშემფასებლო საქმიანობის ხელშეკრულების გაფორმებისას უნდა გაითვალისწინოს და დაიცვას საქართველოს ეროვნული ბანკის პრეზიდენტის  ბრძანებით დამტკიცებული „მიკრობანკების მიერ საოპერაციო რისკების მართვის შესახებ დებულების“ მოთხოვნები და ამ ინსტრუქციით გათვალისწინებული პირობები და წესები. მუხლი 2🔗. ტერმინთა განმარტება ამ ინსტრუქციის მიზნებისთვის, მასში გამოყენებულ ტერმინებს, აქვს შემდეგი მნიშვნელობა: ა) შეფასება – შემფასებლის მიერ ჩატარებული ანალიზის შედეგად მიღებული მოსაზრება უძრავი ქონების ღირებულების შესახებ; ბ) უძრავი ქონების შეფასების მეთოდები: ბ.ა) დანახარჯების მეთოდი; ბ.ბ) საბაზრო მეთოდი; ბ.გ) შემოსავლების მეთოდი. გ) შემფასებელი –  პირი, რომელიც შეფასების შედეგად გასცემს უძრავი ქონების საბაზრო ღირებულების შესახებ კომპეტენტურ, დამოუკიდებელ და მიუკერძოებელ შეფასების დასკვნას, რომელშიც წარმოადგენს შეფასებასა და მის შედეგებთან დაკავშირებულ ანალიზსა და დასაბუთებას; დ) შიდა შემფასებელი – შემფასებელი, რომელიც არის მიკრობანკის ან მიკრობანკთან დაკავშირებული პირის თანამშრომელი ან/და მიკრობანკთან დაკავშირებული პირი; ე) გარე შემფასებელი – შემფასებელი, რომელიც არ არის მიკრობანკის ან მიკრობანკთან დაკავშირებული პირის თანამშრომელი ან/და მიკრობანკთან დაკავშირებული პირი; ვ) შემფასებლის დამხმარე – ამ პუნქტის „დ“ და „ე“ ქვეპუნქტებში მითითებული შემფასებლის დამხმარე პირი, რომელსაც შეუძლია განახორციელოს შესაფასებელი უძრავი ქონების მხოლოდ ინსპექტირება იმ შემთხვევაში, თუ კრედიტის თანხა არ აღემატება 80,000 (ოთხმოცი ათასი) ლარს ან მის ეკვივალენტს სხვა ვალუტაში; ზ) უძრავი ქონება – მიწის ნაკვეთი ან/და მასზე მუდმივად მიმაგრებული გაუმჯობესება; თ) უძრავი ქონების სახეობები – საცხოვრებელი და არასაცხოვრებელი, მათ  შორის: თ.ა) საცხოვრებელი – ბინა, საკუთარი სახლი და სხვა; თ.ბ) არასაცხოვრებელი:   თ.ბ.ა) კომერციული, საოფისე ფართი და სხვა; თ.ბ.ბ) კომპლექსური კომერციული ქონება – ბიზნესცენტრი, სავაჭრო ცენტრი, სასტუმრო, საავადმყოფო, ავტოგასამართი სადგური, ინდუსტრიული ქონება, სპეციფიკური დანიშნულების ქონება და სხვა; ი) შეფასების დასკვნა – შეფასების საერთაშორისო სტანდარტების შესაბამისად, შემფასებლის მიერ მომზადებული დოკუმენტი (მათ შორის, ელექტრონული ფორმით), ხელმოწერილი შემფასებლის მიერ, რომელშიც შემფასებელი წარმოადგენს შეფასების შედეგებს, დაკავშირებულ ანალიზსა და დასაბუთებას; კ) საბაზრო ღირებულება – გამოთვლითი თანხა, რომელშიც შესაძლოა, შეფასების მომენტისათვის აღნიშნული უძრავი ქონება გაიცვალოს/გასხვისდეს გარიგების მხარეთა შორის იმ პირობით, რომ გარიგება გაშლილი მკლავის პრინციპის დაცვით დაიდებოდა და მისი მხარეები იმოქმედებდნენ გააზრებულად, წინდახედულად და ძალდაუტანებლად; ლ) ერთი (Single) დაკორექტირება (Adjs.) – ერთ ანალოგზე ერთი ტიპის კორექტირების მაჩვენებელი; მ) მთლიანი (Gross) დაკორექტირება (Adjs.)  – ერთ ანალოგზე ყველა ტიპის კორექტირების მთლიანი მაჩვენებელი; ნ) შეწონვა – განსხვავებული შედეგების ანალიზი და რეკონსილაცია, რომლებიც, როგორც წესი, მიღებულია სხვადასხვა მეთოდების ან/და მიდგომების გამოყენებით. აკრძალულია  მიღებული შედეგების გასაშუალოება; ო) ამზომველი – საკადასტრო აგეგმვითი/აზომვითი სამუშაოების შემსრულებელი სერტიფიცირებული პირი; პ) დაკავშირებული პირი – საქართველოს ეროვნული ბანკის პრეზიდენტის  ბრძანებით დამტკიცებული „მიკრობანკებისთვის ინტერესთა კონფლიქტის მართვის დებულებით“  განსაზღვრული პირი; ჟ) ინტერესთა კონფლიქტი – კონფლიქტი პიროვნების ქონებრივ ან სხვა პირად ინტერესსა და პროფესიულ მოვალეობას შორის. მუხლი 3🔗. შემფასებლის  ეთიკის სტანდარტები 1. შემფასებელი უნდა იყოს მაღალი რეპუტაციის მქონე პირი, რომელსაც გააჩნია სათანადო კვალიფიკაცია, უნარი, შეფასების საერთაშორისო სტანდარტების ცოდნა და  გამოცდილება შეფასების ხარისხიანად განხორციელებისათვის. 2. შემფასებელი შეფასების დროს უნდა მოქმედებდეს შეფასების საერთაშორისო ეთიკის სტანდარტების შესაბამისად, მათ შორის, შემფასებელმა: ა) უნდა შეინარჩუნოს პატიოსნება/კეთილსინდისიერება და იმგვარად უნდა წარმართოს თავისი საქმიანობა, რომ ზიანი არ მიადგეს მიკრობანკის (მათ შორის, მისი კლიენტის) კანონიერ ინტერესს და შემფასებლის  რეპუტაციასა და პროფესიონალიზმს; ბ) არ უნდა განახორციელოს ისეთი ქმედებები, რომლებიც არის შეცდომაში შემყვანი ან თაღლითური; გ) გამიზნულად არ უნდა ასახოს შეფასების დასკვნაში ისეთი ინფორმაცია, რომელიც შეიცავს ყალბ, არაზუსტ ან/და მიკერძოებულ შეხედულებებსა და ანალიზს; დ) არ უნდა შეიტანოს ისეთი მონაცემები შეფასების დასკვნაში, რომელსაც სხვა შემფასებელი არაგონივრულად/გაუმართლებლად მიიჩნევდა ობიექტური კრიტერიუმების გათვალისწინებით; ე) ინტერესთა კონფლიქტის არსებობის შემთხვევაში, შეფასების დაწყებამდე გაამჟღავნოს აღნიშნულის შესახებ წერილობით საქმიან ურთიერთობაში მყოფ პირთან და არ მიიღოს მონაწილეობა შეფასების პროცესში, ხოლო იმ შემთხვევაში, თუ ინტერესთა კონფლიქტი გამოვლინდა შეფასების დასრულების შემდეგ, გონივრულ ვადაში წერილობით გაამჟღავნოს აღნიშნულის შესახებ; ვ) განახორციელოს შეფასება დამოუკიდებლობის, ობიექტურობისა და მიუკერძოებლობის სრული დაცვით, პირადი ინტერესების მხედველობაში მიღების გამორიცხვით; ზ) შეფასების დროს არ უნდა გამოიყენოს წინასწარ განსაზღვრული მოსაზრებები და დასკვნები; თ) არ უნდა გამოიყენოს ისეთი დაშვება/დაშვებები შეფასებაში, რომლის გონივრულ ვადაში აღსრულება შეუძლებელი/ნაკლებად სავარაუდოა; ი) მოიძიოს და გაანალიზოს ბაზრის მონაცემები და ყოველ ჯერზე უზრუნველყოს მათი სიზუსტე და ადეკვატურობა. 3. შემფასებლის ანაზღაურება არ უნდა იყოს დამოკიდებული უძრავი ქონების საბაზრო ღირებულებაზე. 4. კომპლექსური კომერციული უძრავი ქონების შეფასებისას, შემფასებელს უნდა გააჩნდეს მსგავსი ქონების შეფასების შესაბამისი გამოცდილება, უნარი და კვალიფიკაცია. 5. რეკომენდებულია, შემფასებელმა კომპლექსური კომერციული უძრავი ქონების შეფასება განახორციელოს ამ ინსტრუქციის მე-2 მუხლის „ბ“ ქვეპუნქტით განსაზღვრული შეფასების სამივე მეთოდის ერთობლივი გამოყენებით. მუხლი 4🔗. შეფასების პროცესი და პრინციპები 1. შემფასებელმა უძრავი ქონების შეფასების პროცესი უნდა წარმართოს „შეფასების საერთაშორისო სტანდარტების“ (IVS), ამ მუხლისა და ამ ინსტრუქციის №1 დანართის შესაბამისად. 2. უძრავი ქონების ინსპექტირება უნდა განხორციელდეს შემდეგი წესების დაცვით: ა) უძრავი ქონების პირველადი შეფასების დროს სავალდებულო წესით უნდა მოხდეს შემფასებლის ან მისი დამხმარის მიერ შესაფასებელი ქონების იდენტიფიცირება ადგილზე ვიზიტით; ბ) შემფასებელმა/შემფასებლის დამხმარემ ინსპექტირებისას საფუძვლიანად უნდა განახორციელოს: ბ.ა) ქონების ექსტერიერისა და ინტერიერის დათვალიერება/შეფასება (მათ შორის, ფოტოსურათების გადაღება); ბ.ბ) ქონების მდგომარეობის განსაზღვრა, არსებული გაუმჯობესებებისა და ცვეთის დაფიქსირება; ბ.გ) ქონების ღირებულებაზე გავლენის მქონე ყველა ფაქტორის (გარე/ფუნქციონალური/ფიზიკური) დაფიქსირება; გ) იმ შემთხვევაში, თუ უძრავი ქონების რეალური ფართობი არ ემთხვევა სსიპ – საჯარო რეესტრის ეროვნული სააგენტოს (შემდგომში - საჯარო რეესტრი) მონაცემს, შემფასებელმა უნდა მოითხოვოს ამზომველის მიერ მომზადებული აზომვითი ნახაზი. ამასთან, მოთხოვნილი უნდა იქნეს განახლებული მონაცემების საფუძველზე მომზადებული ამონაწერი საჯარო რეესტრიდან.  3. ამ მუხლის მე-2 პუნქტის „გ“ ქვეპუნქტის მოთხოვნების დაკმაყოფილება შესაძლებელია კრედიტის გაცემის შემდგომ მხოლოდ იმ პირობით, რომ კრედიტის გაცემიდან არაუგვიანეს 2 თვეში განხორციელდება რეალური ფართობის დარეგისტრირება საჯარო რეესტრში. 4. იმ შემთხვევაში, თუ კრედიტის გაცემის შემდგომ შეფასების დასკვნაში მითითებული ქონების იდენტიფიცირებული ფართობი და რეალური ფართობი ერთმანეთისაგან არსებითად განსხვავდება, შემფასებელმა უმოკლეს ვადაში უნდა განახორციელოს ქონების  შეფასება/გადაფასება. 5. წინასწარი ანალიზი, ბაზრის ანალოგების მოძიება და შერჩევა უნდა განხორციელდეს შემდეგი პრინციპების დაცვით: ა) შემფასებელი ვალდებულია, მოიძიოს და გამოიყენოს შესაფასებელი ქონების ბაზარზე არსებული მინიმუმ სამი მსგავსი ანალოგი (გაყიდვები და შეთავაზებები). დამატებით, იგი ვალდებულია მოძიებული ანალოგების (მინიმუმ, სამი ანალოგი) შესახებ ინფორმაცია გადაამოწმოს, შეინახოს და საქართველოს ეროვნული ბანკის მიერ მოთხოვნის შემთხვევაში, უზრუნველყოს აღნიშნული ინფორმაციის, ისევე როგორც შეფასების დასკვნის, დაუყოვნებლივ წარდგენა; იმ შემთხვევაში, თუ ობიექტური მიზეზების გამო ბაზარზე არ მოიძებნა სამი მსგავსი ანალოგი და ამასთან, შემფასებელი მკაფიოდ და ნათლად დაასაბუთებს წინამდებარე ფაქტს შეფასების დასკვნაში, სამი მსგავსი ანალოგის გამოყენება სავალდებულო არ იქნება;   ბ) შემფასებელი ვალდებულია დაიცვას მოძიებული ანალოგების დაკორექტირების ქვემოთ მოცემული ზღვრები: ბ.ა) ერთი (Single) დაკორექტირება (Adjs.) ნაკლები ან ტოლი +/-15%; ბ.ბ) მთლიანი (Gross) დაკორექტირება (Adjs.) ნაკლები ან ტოლი +/-25%. (აღნიშნული ზღვარი შესაძლოა გადაცდენილ იქნეს 10%-ით (პირობითად +/-35%-მდე, თუ შემფასებელი მკაფიოდ და ნათლად დაასაბუთებს მის მიერ დაშვებულ დაკორექტირებას). 6. შეფასების დასკვნა უნდა შეიცავდეს: ა) შეფასების თარიღს, შესაფასებელი ობიექტის დახასიათება-აღწერას, ფიზიკურ და იურიდიულ მახასიათებლებს (მათ შორის, საჯარო რეესტრიდან ამონაწერის მონაცემებს); ბ) უძრავი ქონების ინსპექტირების დროს გადაღებულ უძრავი ქონების ექსტერიერისა და ინტერიერის დათარიღებულ ფოტოსურათებს; გ) გამოყენებული შეფასების მეთოდ(ების)ის (სასურველია, რამდენიმე) შესაბამის კალკულაცია(ებ)ს, დეტალურ ინფორმაციას მოპოვებულ შესადარის ანალოგებზე; დ) შემფასებლის სახელს, გვარს და ხელმოწერას (მათ შორის, ელექტრონულს); ე) შეფასების პროცესში გამოყენებულ დაშვებებსა და შეზღუდვებს (არსებობის შემთხვევაში). 7. უძრავი ქონების გადაფასება სავალდებულოა, თუ: ა) სახეზეა ეკონომიკური პარამეტრების მნიშვნელოვანი ცვლილებები. ამ ქვეპუნქტის მიზნებისათვის, მთლიანი პოპულაციის გადაფასების ნაცვლად შესაძლოა გამოყენებულ იქნეს სტატისტიკური შერჩევის მეთოდოლოგია, რეპრეზენტატიული შერჩევის ფორმირებისა და გადაფასებისათვის;  ბ) მიკრობანკის მიერ ხორციელდება მსესხებელზე ვალდებულების/მოთხოვნის რესტრუქტურიზაცია ან/და ზრდა და ბოლო შეფასებიდან გასულია 1 (ერთი) წელი და მეტი; გ) მიკრობანკი ფლობს ინფორმაციას უძრავი ქონების ფიზიკური მდგომარეობის მნიშვნელოვანი ცვლილების შესახებ; დ) მიკრობანკის საკუთრებაში არსებული უძრავი ქონების შეფასება/გადაფასებიდან გასულია 3 წელი;  ე) უძრავი ქონების დასაკუთრებისას, უზრუნველყოფის საშუალება უნდა შეაფასოს გარე შემფასებელმა,  როდესაც უზრუნველყოფის საშუალების საბაზრო ღირებულება მეტია ან ტოლი  1,000,000 (ერთი მილიონი) ლარის ან მისი ეკვივალენტის სხვა ვალუტაში.  8. მიკრობანკის მიერ მიკრობანკთან დაკავშირებული პირის დაკრედიტების შემთხვევაში და ასევე, მიკრობანკის საკუთრებაში არსებული უძრავი ქონების შეფასება უნდა განხორციელდეს გარე შემფასებლის მიერ. მუხლი 5🔗. საქართველოს ეროვნული ბანკის უფლებები 1. საქართველოს ეროვნული ბანკი უფლებამოსილია, მიკრობანკს მოსთხოვოს შიდა შემფასებლის უფლებების და მოვალეობების შეჩერება/შეზღუდვა მინიმუმ 6 თვის ვადით იმ შემთხვევაში, თუ: ა) შიდა შემფასებელმა უხეშად/არსებითად დაარღვია ამ ინსტრუქციის მოთხოვნები; ბ) შეფასების ზოგადი ანგარიშგება (შეფასების დასკვნა, შეფასებისას გამოყენებული მონაცემები) არ არის მომზადებული ინსტრუქციის/შეფასების საერთაშორისო სტანდარტების საფუძველზე; გ) შეფასების პროცესი არ იყო შესაბამისობაში ინსტრუქციასთან/შეფასების საერთაშორისო სტანდარტებთან; დ) არსებობს გონივრული ეჭვი შიდა შემფასებლის დამოუკიდებლობასთან ან/და მიუკერძოებლობასთან დაკავშირებით. 2. საქართველოს ეროვნული ბანკი უფლებამოსილია, მიკრობანკს მოსთხოვოს გარე შემფასებელთან დადებული მომსახურების ხელშეკრულების შეჩერება მინიმუმ 12 თვის ვადით (ან მოითხოვოს ხელშეკრულების შეწყვეტა) იმ შემთხვევაში, თუ: ა) გარე შემფასებელმა უხეშად/არსებითად დაარღვია ამ ინსტრუქციის მოთხოვნები; ბ) შეფასების ზოგადი ანგარიშგება (შეფასების დასკვნა, შეფასებისას გამოყენებული მონაცემები) არ არის მომზადებული ინსტრუქციის/შეფასების საერთაშორისო სტანდარტების საფუძველზე; გ) შეფასების პროცესი არ იყო შესაბამისობაში ინსტრუქციასთან/შეფასების საერთაშორისო სტანდარტებთან; დ) არსებობს გონივრული ეჭვი გარე შემფასებლის დამოუკიდებლობასთან ან/და მიუკერძოებლობასთან დაკავშირებით. 3. საქართველოს ეროვნული ბანკი უფლებამოსილია მოითხოვოს გარე შემფასებელთან გაფორმებულ ხელშეკრულებაში ცვლილებების შეტანა. 4. საქართველოს ეროვნული ბანკი უფლებამოსილია, ამ ინსტრუქციის მიზნებიდან გამომდინარე, განახორციელოს მოთხოვნებისა და მითითებების დაწესება მიკრობანკების მიმართ, მოითხოვოს შეფასებული უძრავი ქონების გადაფასება და ყველა იმ ღონისძიების განხორციელება, რომელიც მიმართულია საშემფასებლო საქმიანობის დამოუკიდებლობის და მიუკერძოებლობის უზრუნველსაყოფად. თავის მხრივ, მიკრობანკი ვალდებულია შეასრულოს  საქართველოს ეროვნული ბანკის მითითებები. მუხლი 6🔗. საზედამხედველო ზომები და სანქცია (ფულადი ჯარიმა) მიკრობანკის მიერ ამ ინსტრუქციით გათვალისწინებული მოთხოვნების დარღვევის შემთხვევაში, საქართველოს ეროვნული ბანკი უფლებამოსილია, მიკრობანკის მიმართ გამოიყენოს კანონმდებლობით განსაზღვრული საზედამხედველო ზომები ან/და სანქცია (ფულადი ჯარიმა). მუხლი 7🔗. ანგარიშგება საქართველოს ეროვნულ ბანკთან მიკრობანკმა საქართველოს ეროვნულ ბანკს ყოველთვიურად უნდა წარუდგინოს შეფასებული უძრავი ქონების შესახებ ანგარიშგება საქართველოს ეროვნული ბანკის მიერ შემუშავებული ფორმის შესაბამისად. მუხლი 8🔗. გარდამავალი დებულებები 1. მიკრობანკები ვალდებულნი არიან თავიანთი საქმიანობა შესაბამისობაში მოიყვანონ ამ ინსტრუქციით  გათვალისწინებულ მოთხოვნებთან არაუგვიანეს 2023 წლის 1 დეკემბრისა. 2. მიკრობანკის საქმიანობის ლიცენზიის მიღებიდან 6 თვის განმავლობაში შესაფასებელი უძრავი ქონების ინსპექტირება შესაძლებელია განხორციელდეს მიკრობანკის უფლებამოსილი პირის მიერ, თუ კრედიტის თანხა არ აღემატება 80,000 (ოთხმოცი ათასი) ლარს ან მის ეკვივალენტს სხვა ვალუტაში. სხვა შემთხვევაში, სავალდებულოა ინსპექტირება განხორციელდეს შემფასებლის მიერ. 3. ამ ინსტრუქციით გათვალისწინებული წესებისა და პირობების დარღვევით დადებული ხელშეკრულება არ შეიძლება გახდეს აღნიშნული ხელშეკრულების ბათილობის საფუძველი.