„მონაცემებზე დაფუძნებული სტატისტიკური, ხელოვნური ინტელექტის და მანქანური სწავლების მოდელების რისკების მართვის დებულების დამტკიცების თაობაზე“ საქართველოს ეროვნული ბანკის პრეზიდენტის 2020 წლის 17 აგვისტოს №151/04 ბრძანებაში ცვლილების შეტანის შესახებ

საქართველოს ეროვნული ბანკის პრეზიდენტის

2023 წლის 26 ივნისი

ქ. თბილისი

1. პირველი მუხლის მე-2 პუნქტი ჩამოყალიბდეს შემდეგი რედაქციით:

„2. ეს დებულება განსაზღვრავს მოდელების აგებისა და გამოყენების პროცესს და მის ძირითად კომპონენტებს საქართველოს ეროვნული ბანკის ზედამხედველობისადმი დაქვემდებარებული შემდეგი სუბიექტების მიერ – კომერციული ბანკები, მიკრობანკები, არასაბანკო სადეპოზიტო დაწესებულებები, მიკროსაფინანსო ორგანიზაციები, საკრედიტო საინფორმაციო ბიურო და სესხის გამცემი სუბიექტები, რომლებიც წარმოადგენენ იურიდიულ პირებს (შემდგომში – მოდელის გამომყენებელი სუბიექტი).“.

2. მე-4 მუხლის მე-3 პუნქტი ჩამოყალიბდეს შემდეგი რედაქციით:

„3. მოდელის მართვის პროცესში მოდელის გამომყენებელმა სუბიექტმა უნდა შეიმუშაოს ეთიკის პრინციპები, ხოლო კომერციულმა ბანკმა და მიკრობანკმა ასევე უნდა იხელმძღვანელოს საქართველოს ეროვნული ბანკის პრეზიდენტის 2021 წლის 2 თებერვლის №13/04 ბრძანებით დამტკიცებული „საბანკო და ფასიანი ქაღალდების ბაზრის მონაწილეების ეთიკის პრინციპებისა და პროფესიული ქცევის კოდექსით“ განსაზღვრული შესაბამისი პრინციპებით.“.

3. მე-6 მუხლის მე-5 პუნქტის „ბ.ე“ ქვეპუნქტი ჩამოყალიბდეს შემდეგი რედაქციით:

„ბ.ე) მოდელის რისკის შესახებ უნდა ხორციელდებოდეს რეგულარული ანგარიშგება უმაღლეს მენეჯმენტთან, კომერციული ბანკისა და მიკრობანკის შემთხვევაში – სამეთვალყურეო საბჭოსთან და დაცვის დანარჩენ ხაზებთან.“.

4. მე-7 მუხლის მე-3 პუნქტი ჩამოყალიბდეს შემდეგი რედაქციით:

„3. კომერციული ბანკის შემთხვევაში, დაცვის მესამე ხაზი ასევე უნდა აკმაყოფილებდეს „კომერციული ბანკების კორპორაციული მართვის კოდექსის დამტკიცების თაობაზე“ საქართველოს ეროვნული ბანკის პრეზიდენტის 2018 წლის 26 სექტემბრის №215/04 ბრძანებით დამტკიცებული კოდექსის მოთხოვნებს, ხოლო მიკრობანკების შემთხვევაში დაცვის მესამე ხაზი ასევე უნდა აკმაყოფილებდეს „მიკრობანკების კორპორაციული მართვის კოდექსის დამტკიცების თაობაზე“ საქართველოს ეროვნული ბანკის პრეზიდენტის ბრძანებით დამტკიცებული კოდექსის მოთხოვნებს.“.

5. მე-8 მუხლის მე-2 პუნქტი ჩამოყალიბდეს შემდეგი რედაქციით:

„2. კომერციული ბანკისა და მიკრობანკის შემთხვევაში, სამეთვალყურეო საბჭოს წევრები უნდა დარწმუნდნენ, რომ მოდელის რისკი კომერციული ბანკის/მიკრობანკის რისკის აპეტიტთან თანხვედრაშია.“.

6. მე-9 მუხლის პირველი პუნქტი ჩამოყალიბდეს შემდეგი რედაქციით:

„1. მოდელის გამომყენებელ სუბიექტს შეუძლია განახორციელოს მოდელის აგების, შიდა ვალიდაციის ან/და აუდიტის პროცესის აუთსორსინგი. პროცესი უნდა განხორციელდეს „კომერციული ბანკების მიერ საოპერაციო რისკების მართვის შესახებ დებულების დამტკიცების თაობაზე“ საქართველოს ეროვნული ბანკის პრეზიდენტის 2014 წლის 13 ივნისის №47/04 და „მიკრობანკების მიერ საოპერაციო რისკების მართვის შესახებ დებულების დამტკიცების თაობაზე“ საქართველოს ეროვნული ბანკის პრეზიდენტის ბრძანებებით დამტკიცებული დებულების მე-8 მუხლით დადგენილი აუთსორსინგის პრინციპების დაცვით, რათა ხელი არ შეეშალოს ზედამხედველობის პროცესს. მოდელის აგების, შიდა ვალიდაციის ან/და აუდიტის პროცესის შემთხვევაში დაცვის სამი ხაზის დამოუკიდებლობის მოთხოვნა უნდა იყოს დაცული.“.