„ფარმაცევტული პროდუქტის ფასის სახელმწიფო რეგულირების მეთოდოლოგიის, წესისა და პირობების და ფარმაცევტული პროდუქტის მართული შესვლის შეთანხმებით შესყიდვის წესის დამტკიცების შესახებ“ საქართველოს მთავრობის 2022 წლის 26 დეკემბრის №593 დადგენილებაში ცვლილების შეტანის თაობაზე

1. მე-3 მუხლის მე-3 პუნქტი ჩამოყალიბდეს შემდეგი რედაქციით:

„3. სავაჭრო დასახელების დონეზე რეფერენტული ფასები დგინდება ფარმაცევტული პროდუქტის ბაზარზე დაშვების (რეგისტრაციის) შემდეგ, კვარტალში ერთხელ და ქვეყნდება ფასების კატალოგში.“.

2. მე-5 მუხლის მე-4 პუნქტი ჩამოყალიბდეს შემდეგი რედაქციით:

„4. თუ შესადარებელი პროდუქტი არცერთ რეფერენტულ ქვეყანაში არ იძებნება, მაშინ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს შესაბამისი სამსახური იძიებს საბითუმო ფასებს, დღგ-ის გარეშე, სხვადასხვა ქვეყანაში, მათ შორის, ევროპის რეგიონის, აგრეთვე „სხვა ქვეყნების ან სახელმწიფოთაშორისი ფარმაცევტული პროდუქტების მარეგულირებელი სახელმწიფო ორგანოების სიის განსაზღვრის შესახებ“ საქართველოს მთავრობის 2009 წლის 22 ოქტომბრის №188 დადგენილებით განსაზღვრულ ქვეყნებში (სამი ქვეყნის ფასი, სადაც ეს პროდუქტი ხელმისაწვდომია. თუ სამ ქვეყანაში ვერ იქნა მოძიებული შესადარებელი ფარმაცევტული პროდუქტის საბითუმო ფასი, მხედველობაში მიიღება ორი ან ერთი ქვეყნის ფასი, სადაც ეს პროდუქტი ხელმისაწვდომია). ფასების მოძიების პროცესში პრიორიტეტი ენიჭება საქართველოსთვის ამ დადგენილებით განსაზღვრული რეფერენტული ქვეყნების მიერ არჩეულ რეფერენტულ ქვეყნებს. ამ ფასებიდან ყველაზე დაბალი ფასით დადგინდება რეფერენტული საბითუმო ფასი საქართველოსთვის.“.

3. მე-5 მუხლს დაემატოს შემდეგი შინაარსის 6¹-6² პუნქტები:

„6¹. გარდა ამ დანართის მე-3 მუხლის მე-7 პუნქტისა, მაღალი საზოგადოებრივი ან/და სახელმწიფოებრივი ინტერესის მქონე ფარმაცევტულ პროდუქტებზე საბითუმო რეფერენტული ფასი განისაზღვრება აღნიშნული პროდუქტის საიმპორტო ფასზე რეგრესული საბითუმო ფასნამატის დარიცხვით:

ა) აღიარებითი რეჟიმით პროაქტიულად რეგისტრირებულ მედიკამენტებზე შემდეგი წესით:

ა.ა) თუ საიმპორტო ფასი 10 ლარამდეა – მას ემატება 20% საბითუმო ფასნამატი;

ა.ბ) თუ საიმპორტო ფასი 10-იდან 20 ლარამდეა – მას ემატება 17% საბითუმო ფასნამატი;

ა.გ) თუ საიმპორტო ფასი 20-იდან 30 ლარამდეა – მას ემატება 15% საბითუმო ფასნამატი;

ა.დ) თუ საიმპორტო ფასი 30-იდან 50 ლარამდეა – მას ემატება 13% საბითუმო ფასნამატი;

ა.ე) თუ საიმპორტო ფასი 50 ლარი ან მეტია – მას ემატება 10% საბითუმო ფასნამატი;

ბ) სპეციალურ კონტროლს დაქვემდებარებულ ფარმაცევტულ პროდუქტებზე შემდეგი წესით:

ბ.ა) თუ საიმპორტო ფასი 20 ლარამდეა – მას ემატება მაქსიმუმ 40% საბითუმო ფასნამატი;

ბ.ბ) თუ საიმპორტო ფასი 20-იდან 50 ლარამდეა – მას ემატება 35% საბითუმო ფასნამატი;

ბ.გ) თუ საიმპორტო ფასი 50 ლარი ან მეტია – მას ემატება 30% საბითუმო ფასნამატი.

6². იმ შემთხვევაში, თუ ამ მუხლის 6¹ პუნქტში მითითებული წესით განსაზღვრული საბითუმო რეფერენტული ფასი მეტია ამავე მუხლის პირველ − მე-6 პუნქტებში მითითებული წესით განსაზღვრულ რეფერენტულ ფასზე, უპირატესობა ენიჭება უმცირეს ფასს.“.

4. მე-13 მუხლის მე-3 პუნქტი ჩამოყალიბდეს შემდეგი რედაქციით:

„3. ფასების კატალოგში გამოქვეყნებული ფასები ძალაში შედის გამოქვეყნებიდან ერთი თვის შემდეგ, გარდა ამ დანართის მე-7 მუხლის მე-2 და მე-3 პუნქტებით განსაზღვრული იმავე ან მსგავსი ფარმაცევტული პროდუქტ(ებ)ისა, რა დროსაც ფასების კატალოგში გამოქვეყნებული ფასები ძალაში შედის გამოქვეყნებისთანავე. კონკრეტულ ფარმაცევტულ პროდუქტზე პრეტენზიის შემთხვევაში, რეფერენტული ფასები ძალაში შედის   განახლებული გამოქვეყნებიდან ერთი თვის ვადაში.“.

5. მე-15 მუხლის მე-2 პუნქტი ჩამოყალიბდეს შემდეგი რედაქციით:

„2. პრეტენზიის წარდგენის მიზნით, უფლებამოსილი პირი ავსებს პრეტენზიის ელექტრონულ განაცხადს, ახდენს პრეტენზიის დასაბუთებას, ტვირთავს დამადასტურებელ დოკუმენტაციას (იმპორტიორ ქვეყანაში (იმ ქვეყანაში, რომლიდანაც პროდუქტის იმპორტი ხორციელდება საქართველოში) ოფიციალურ ვებგვერდზე საჯაროდ განთავსებული/ ხელმისაწვდომი პროდუქტის სარეალიზაციო ფასი და ევროპის ქვეყნებში (არანაკლებ ერთ ქვეყანაში) იმავე პროდუქტის საბითუმო ფასები (დღგ-ის გარეშე). ასევე დამატებით შეუძლია, წარადგინოს სხვა სახის დოკუმენტაცია, რომელიც საჭიროდ მიიჩნევა პრეტენზიის განხილვისას და უდავოდ ასაბუთებს პრეტენზიას. თუ პრეტენზია ტექნიკური ხარვეზის გამო არასწორად განსაზღვრულ რეფერენტულ ფასს შეეხება, უფლებამოსილი პირი აგზავნის გათვლების ხარვეზის დამადასტურებელ დოკუმენტაციას) და აგზავნის დანიშნულებისამებრ კომისიის სამდივნოში (პრეტენზიის განხილვის მიზნით შექმნილ ოფიციალურ ელფოსტაზე).“.