,,საგადასახადო ანგარიშ-ფაქტურის (მ.შ. კორექტირების) გამოწერისა და წარდგენის შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №84 ბრძანებაში ცვლილებების შეტანის შესახებ“

სახელმწიფო სარეგისტრაციო კოდი 200.230.040.22.033.009.753

საქართველოს ფინანსთა მინისტრის

ბრძანება №1875

2006 წლის 27 დეკემბერი

ქ. თბილისი

,,საგადასახადო ანგარიშ-ფაქტურის   (მ.შ. კორექტირების) გამოწერისა და წარდგენის შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის       14 თებერვლის №84 ბრძანებაში ცვლილებების შეტანის შესახებ

,,ნორმატიული აქტების შესახებ“ საქართველოს კანონის 36-ე მუხლის შესაბამისად, ვბრძანებ:

1. ,,საგადასახადო ანგარიშ-ფაქტურის (მ.შ. კორექტირების) გამოწერისა და წარდგენის შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №84 ბრძანებაში (სსმ III, 2005 წ., №18, მუხ. 171) შეტანილ იქნეს შემდეგი ცვლილებები:

ა) ბრძანების სათაური ჩამოყალიბდეს შემდეგი რედაქციით;

,,საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ“ ინსტრუქციის დამტკიცების თაობაზე“;

ბ) ბრძანების პირველი პუნქტი ჩამოყალიბდეს შემდეგი რედაქციით:

,,1. დამტკიცდეს ინსტრუქცია ,,საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ“ (თანდართულ დანართებთან ერთად)“;

გ) ,,ინსტრუქციის“ სათაური ჩამოყალიბდეს შემდეგი რედაქციით:

,,ინსტრუქცია საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ“;

დ) ,,ინსტრუქციის“ პირველი მუხლის პირველი პუნქტი ჩამოყალიბდეს შემდეგი რედაქციით:

,,1. ინსტრუქცია შემუშავებულია საქართველოს საგადასახადო კოდექსის მე-3, 228-ე და 248-ე მუხლების შესაბამისად და განსაზღვრავს დღგ-ის გადამხდელების მიერ საგადასახადო ანგარიშ-ფაქტურის (მათ შორის, კორექტირების) გამოწერისა და საგადასახადო ორგანოებში წარდგენის წესს“;

ე) მე-2 მუხლის მე-2 და მე-3 პუნქტები ჩამოყალიბდეს შემდეგი რედაქციით:

,,2. მიმწოდებელი (შემდგომში – გამყიდველი) – ამ ინსტრუქციის მიზნებისათვის იგულისხმება დღგ-ის გადამხდელი, რომელიც აწარმოებს დღგ-ით დასაბეგრ ოპერაციას და ვალდებულია საქონლის (მომსახურების) მიმღების მოთხოვნისას გამოწეროს საგადასახადო ანგარიშ-ფაქტურა (მათ შორის, კორექტირების).

3. მიმღები (შემდგომში – მყიდველი) – ამ ინსტრუქციის მიზნებისათვის იგულისხმება პირი, რომელიც დღგ-ის გადამხდელად რეგისტრირებული პირისაგან მიიღებს საქონელს (მომსახურებას).“;

ვ) მე-3 მუხლის 26-ე პუნქტი ჩამოყალიბდეს შემდეგი რედაქციით:

,,26. დაუშვებელია საგადასახადო ორგანოში საგადასახადო ანგარიშ-ფაქტურის ასლის წარდგენა დღგ-ის ჩათვლის მისაღებად. იმ შემთხვევაში, თუ საგამოძიებო და სხვა უფლებამოსილი ორგანოების მიერ საქართველოს სისხლის სამართლის საპროცესო კოდექსით დადგენილი წესით გადამხდელისაგან ამოღებულ იქნა საგადასახადო ანგარიშ-ფაქტურები, დღგ-ის ჩათვლის მოთხოვნის მიზნით გადამხდელს უფლება ეძლევა დღგ-ის დეკლარაციასთან ერთად საგადასახადო ორგანოში წარადგინოს ამოღებული საგადასახადო ანგარიშ-ფაქტურების ქსეროასლები და ამ ორგანოების სათანადო პასუხისმგებელი პირების მიერ ხელმოწერილი და ბეჭდით დამოწმებული ცნობა შესაბამისი საგადასახადო ანგარიშ-ფაქტურების ამოღების შესახებ. ამასთან, საგამოძიებო და სხვა უფლებამოსილი ორგანოების მიერ ამოღებული საგადასახადო ანგარიშ-ფაქტურების დაბრუნების შემდეგ, ისინი გადამხდელის მიერ დაუყოვნებლივ წარდგენილ უნდა იქნეს შესაბამის საგადასახადო ორგანოში.“;

ზ) მე-4 მუხლის მე-14 პუნქტი ჩამოყალიბდეს შემდეგი რედაქციით:

,,14. დაუშვებელია საგადასახადო ორგანოში კორექტირების საგადასახადო ანგარიშ-ფაქტურის ასლის წარდგენა დღგ-ის ჩათვლის მისაღებად. იმ შემთხვევაში, თუ საგამოძიებო და სხვა უფლებამოსილი ორგანოების მიერ საქართველოს სისხლის სამართლის საპროცესო კოდექსით დადგენილი წესით გადამხდელისაგან ამოღებულ იქნა კორექტირების საგადასახადო ანგარიშ-ფაქტურები, დღგ-ის ჩათვლის მოთხოვნის მიზნით გადამხდელს უფლება ეძლევა დღგ-ის დეკლარაციასთან ერთად საგადასახადო ორგანოში წარადგინოს ამოღებული კორექტირების საგადასახადო ანგარიშ-ფაქტურების ქსეროასლები და ამ ორგანოების სათანადო პასუხისმგებელი პირების მიერ ხელმოწერილი და ბეჭდით დამოწმებული ცნობა შესაბამისი კორექტირების საგადასახადო ანგარიშ-ფაქტურების ამოღების შესახებ. ამასთან, საგამოძიებო და სხვა უფლებამოსილი ორგანოების მიერ ამოღებული კორექტირების საგადასახადო ანგარიშ-ფაქტურების დაბრუნების შემდეგ, ისინი გადამხდელის მიერ დაუყოვნებლივ წარდგენილ უნდა იქნეს შესაბამის საგადასახადო ორგანოში.“.

2. ბრძანება ამოქმედდეს გამოქვეყნებისთანავე.

ა. ალექსიშვილი