„ქ. თბილისის მუნიციპალიტეტის ტერიტორიების გამოყენებისა და განაშენიანების რეგულირების წესების დამტკიცების შესახებ“ ქალაქ თბილისის მუნიციპალიტეტის საკრებულოს 2016 წლის 24 მაისის №14-39 დადგენილებაში ცვლილების შეტანის თაობაზე

1.     16³ მუხლის:

ა) მე-3 პუნქტი ჩამოყალიბდეს შემდეგი შინაარსით:

„3. ფუნქციური ზონის ცვლილებისას მაკომპენსირებელ ღონისძიებად განისაზღვროს შესაბამისი ფასის ქალაქ თბილისის მუნიციპალიტეტისათვის გადახდა, რომელიც შეადგენს მიწის ნაკვეთის არსებული ფუნქციური ზონით საბაზრო ღირებულებასა და მოთხოვნილი ფუნქციური ზონით საბაზრო ღირებულებას შორის არსებული სხვაობის 50%-ს.“;

ბ) მე-4 პუნქტი ამოღებულ იქნეს;

გ) მე-11 პუნქტის „ზ“ ქვეპუნქტი ჩამოყალიბდეს შემდეგი რედაქციით:

„ზ) საქართველოს პარლამენტის, სასამართლოს, აღმასრულებელი ხელისუფლების განმახორციელებელი ორგანოების, მუნიციპალიტეტის ან ამ ორგანოთა მიერ დაფუძნებული საჯარო სამართლის იურიდიული პირის და 100-პროცენტიანი წილობრივი მონაწილეობით მოქმედი შეზღუდული პასუხისმგებლობის საზოგადოების/სააქციო საზოგადოების საკუთრებაში/მმართველობაში არსებულ მიწის ნაკვეთზე, თუ ეს მიწა გამოიყენება ამავე ორგანოთა უფლებამოსილების განხორციელების საჭიროებისათვის;“.

2. 21-ე მუხლის:

ა) მე-2 პუნქტს დაემატოს შემდეგი შინაარსის „მ“ ქვეპუნქტი:

„მ) სახელმწიფო ან/და საზოგადოებრივი ინტერესების დაცვის მიზნით, მიწის ნაკვეთზე ნორმატიულად დადგენილზე მაღალი განაშენიანების ინტენსივობის კოეფიციენტის (კ2) არსებობის შემთხვევაში, კერძო საკუთრებაში არსებულ სხვა მიწის ნაკვეთზე (გარდა კულტურული მემკვიდრეობის ზოგად დამცავ ზონაში (ისტორიული განაშენიანების დაცვის ზონაში, განაშენიანების რეგულირების ზონაში და ისტორიული ლანდშაფტის დაცვის ზონაში) არსებული მიწის ნაკვეთისა) კ-2 კოეფიციენტის (ან მისი ნაწილის) გადატანა.“;

ბ) 3³ პუნქტის შემდეგ დაემატოს შემდეგი შინაარსის 3⁴-3⁶ პუნქტები:

„3⁴. ამ მუხლის მე-2 პუნქტის „მ“ ქვეპუნქტის შესაბამისად, კ-2 კოეფიციენტის ადატანით დაინტერესებული მხარე განცხადებას წარუდგენს ქალაქ თბილისის მუნიციპალიტეტის საჯარო სამართლის იურიდიულ პირს – ტრანსპორტისა და ურბანული განვითარების სააგენტოს. წარდგენილ განცხადებას თან უნდა დაერთოს:

ა) ინფორმაცია იმ მიწის ნაკვეთის შესახებ, საიდანაც ხდება კ-2 კოეფიციენტის (ან მისი ნაწილის) გადატანა;

ბ) ინფორმაცია იმ მიწის ნაკვეთის შესახებ, სადაც ხდება კ-2 კოეფიციენტის (ან მისი ნაწილის) გადატანა;

გ) კ-2 კოეფიციენტის (ან მისი ნაწილის) გადატანის მიზნობრიობის დასაბუთება;

დ) ინფორმაცია ამ პუნქტის „ა“ და „ბ“ ქვეპუნქტებით მიწის ნაკვეთების საბაზრო ღირებულების შესახებ, რომელიც განისაზღვრება სსიპ – ლევან სამხარაულის სახელობის სასამართლო ექსპერტიზის ეროვნული ბიუროს ექსპერტიზის დასკვნის საფუძველზე. ამასთან, მიწის ნაკვეთი უნდა იყოს შეფასებული ვაკანტურ მდგომარეობაში, მასზე დადგენილი (მათ შორის, სპეციალური ზონალური შეთანხმებით, ასეთის არსებობის შემთხვევაში) მიწის ნაკვეთის განაშენიანების კოეფიციენტის (კ-1), მიწის ნაკვეთის განაშენიანების ინტენსივობის კოეფიციენტის (კ-2) და მიწის ნაკვეთის გამწვანების კოეფიციენტის (კ-3) გათვალისწინებით.

3⁵. ამ მუხლის მე-2 პუნქტის „მ“ ქვეპუნქტის შესაბამისად, სახელმწიფო ან/და საზოგადოებრივი ინტერესების დაცვის მიზნით, კ-2 კოეფიციენტის (ან მისი ნაწილის) გადატანასთან დაკავშირებით გადაწყვეტილებას იღებს ქალაქ თბილისის მუნიციპალიტეტის მთავრობა, ქალაქ თბილისის მუნიციპალიტეტის საკრებულოსთან შეთანხმებით. ქალაქ თბილისის მუნიციპალიტეტის საკრებულოს მიერ დადებითი გადაწყვეტილების გამოცემის შემდგომ, დაინტერესებული პირის განცხადების საფუძველზე, ქალაქ თბილისის მუნიციპალიტეტის ტრანსპორტისა და ურბანული პოლიტიკის განმახორციელებელი ადმინისტრაციულ ორგანო განიხილავს კ-2 კოეფიციენტის ზღვრული მაჩვენებლის გადამეტების მიზნით სპეციალური (ზონალური) შეთანხმების გაცემის საკითხს და ამზადებს შესაბამისი გადაწყვეტილების პროექტს.

3⁶. ამ მუხლის მე-2 პუნქტის „მ“ ქვეპუნქტის საფუძველზე კ-2 კოეფიციენტის გადატანა დასაშვებია, მათ შორის, იმ მიწაზე, რომელზეც უკვე გადამეტებულია კ-2 კოეფიციენტი. ამასთან, კ-2 კოეფიციენტის გადატანის შემთხვევაში, მიწაზე ჯამური კ-2 კოეფიციენტი არ უნდა აღემატებოდეს მიწის ნაკვეთზე ნორმატიულად დადგენილი კოეფიციენტის არაუმეტეს ორმაგ ოდენობას.“;

გ) 4⁴ პუნქტი ჩამოყალიბდეს შემდეგი რედაქციით:

„4⁴. მიწის ნაკვეთზე, რომელზეც განაშენიანების ინტენსივობის კოეფიციენტის (კ-2) ზღვრული მაჩვენებელი გადამეტებულია ამ მუხლის მე-2 პუნქტის „ი“ და „მ“ ქვეპუნქტების შესაბამისად, გადამეტებულ ფართზე არ ვრცელდება ამ წესების 31-ე მუხლით გათვალისწინებული მოთხოვნები.“;

დ) 4⁴ პუნქტის შემდეგ დაემატოს შემდეგი შინაარსის 4⁵ პუნქტი:

„4⁵. ამ მუხლის მე-2 პუნქტის „მ“ ქვეპუნქტის საფუძველზე, კერძო საკუთრებაში არსებულ სხვა მიწის ნაკვეთზე (გარდა კულტურული მემკვიდრეობის ზოგად დამცავ ზონაში (ისტორიული განაშენიანების დაცვის ზონაში, განაშენიანების რეგულირების ზონასა და ისტორიული ლანდშაფტის დაცვის ზონაში) არსებული მიწის ნაკვეთისა) განაშენიანების ინტენსივობის კოეფიციენტის (კ-2) გადატანა გამოითვლება შემდეგი ფორმულით:

სადაც:

K₂₁ არის გადატანილი კ2-ის ოდენობა;

S₁ არის იმ მიწის ნაკვეთის ფართობი, საიდანაც ხდება  კ2-ის გადატანა;

P₁ არის იმ მიწის ნაკვეთის  1 მ²  მიწის ფასი, საიდანაც ხდება კ2-ის გადატანა;

K₂ არის იმ მიწის ნაკვეთის განაშენიანების ინტენსივობის კოეფიციენტი, სადაც ხდება კ2-ის გადატანა;

K₁₁  არის გადასატანი კ2-ის ოდენობა;

S₂  არის იმ მიწის ნაკვეთის ფართობი, სადაც ხდება კ2-ის გადატანა;

P₂  არის იმ მიწის ნაკვეთის 1 მ² მიწის ფასი, სადაც ხდება კ2-ის გადატანა;

K₁ არის იმ მიწის ნაკვეთის განაშენიანების ინტენსივობის კოეფიციენტი, საიდანაც ხდება კ2-ის გადატანა.“;

ე) მე-8 პუნქტი ჩამოყალიბდეს შემდეგი რედაქციით:

„8. ამ მუხლის მე-2 პუნქტის „ზ“, „თ“ და „მ“ ქვეპუნქტებით გათვალისწინებულ შემთხვევებში კ-2 კოეფიციენტის გამოთვლას უზრუნველყოფს ეკონომიკური განვითარებისათვის პოლიტიკის შემუშავებაზე უფლებამოსილი მერიის სტრუქტურული ერთეული.“.

3. 30-ე მუხლის მე-2 პუნქტს დაემატოს შემდეგი შინაარსის 2¹ პუნქტი:

„2¹. წინამდებარე მუხლის მე-2 პუნქტი არ გავრცელდეს ამ წესების მე-15 მუხლის მე-11 პუნქტით გათვალისწინებული განაშენიანების რეგულირების გეგმების ფარგლებში, საპროექტოდ სსზ-1, სსზ-2 ფუნქციური ზონებით განვითარებისას, საპროექტო არეალში მონაწილე ერთმანეთის მომიჯნავე მიწის ნაკვეთებზე განთავსებული არასაცხოვრებელი ფუნქციის შენობის/შენობის ნაწილისთვის.“.

4. 39¹ მუხლის:

ა) მე-2 პუნქტი ჩამოყალიბდეს შემდეგი რედაქციით:

„2. ამ მუხლის მოქმედება ვრცელდება მხოლოდ იმ ავარიულ შენობა-ნაგებობებზე, რომელთა ავარიულობის ხარისხი მიეკუთვნება IV ან V კატეგორიას, ან თუ ეს შენობა-ნაგებობა, ავარიულობის ხარისხის კატეგორიის მიუხედავად, საფრთხის შემცველია და საჭიროებს დემონტაჟს.“;

ბ) მე-9 პუნქტის „ე“ ქვეპუნქტი ჩამოყალიბდეს შემდეგი რედაქციით:

„ე) შენობა-ნაგებობის ავარიულობის ხარისხის დამადასტურებელი დასკვნა, რომელიც ადასტურებს, რომ ამ შენობა-ნაგებობის ავარიულობის ხარისხი არის IV ან V კატეგორიის, ან დასკვნა, რომელიც ადასტურებს, რომ ეს შენობა-ნაგებობა, ავარიულობის ხარისხის კატეგორიის მიუხედავად, საფრთხის შემცველია და საჭიროებს დემონტაჟს. ამასთან, ეს დასკვნა გაცემული უნდა იქნეს სსიპ – ლევან სამხარაულის სახელობის სასამართლო ექსპერტიზის ეროვნული ბიუროს მიერ. იმ შემთხვევაში, თუ შენობა-ნაგებობა ავარიულობის საფუძვლით დემონტირებულია/დანგრეულია სსიპ – ლევან სამხარაულის სახელობის სასამართლო ექსპერტიზის ეროვნული ბიუროს ან სხვა აკრედიტირებული ექსპერტიზის ორგანოს მიერ 2023 წლის 1 იანვრამდე გაცემული დასკვნის საფუძველზე, დამატებითი დასკვნის წარმოდგენა სავალდებულო არ არის;“;

გ) მე-14 პუნქტი ჩამოყალიბდეს შემდეგი რედაქციით:

„14. ჩანაცვლებულ შენობა-ნაგებობაში მესაკუთრისათვის/ბინათმესაკუთრეთა ამხანაგობის წევრისათვის გადასაცემი ფართის რემონტი მოიცავს შემდეგ სამუშაოებს:

ა) ელექტრო ფარის, ჩამრთველების და როზეტების მოწყობას;

ბ) აივნების, სამზარეულოსა და სააბაზანოში კედლებსა და იატაკებზე კერამიკული ფილების გაკვრა-დაგებას, სააბაზანოში ჭერის მოწყობას;

გ) იატაკის მოწყობას (ლამინატი, პარკეტი ან კაფელი) და პლინტუსების მონტაჟს;

დ) კედლებისა და ჭერის საბოლოო დამუშავებას (თაბაშირის ფითხით დამუშავება, გასწორება, შეღებვა ან შპალერის გაკვრა);

ე) ფართის შიდა ღიობებში კარების ჩასმას;

ვ) ფანჯრის რაფების მოწყობას (შიდა მხარეს).“.

5. 39³ მუხლის მე-4 პუნქტი ჩამოყალიბდეს შემდეგი რედაქციით:

„4.  ხელშემწყობი ღონისძიებების სახით შესაძლებელია გამოყენებულ იქნეს მიწის ნაკვეთის განაშენიანების ინტენსივობის კოეფიციენტის (კ-2) ზღვრული მაჩვენებლის გადამეტება. ამ პუნქტით გათვალისწინებული ხელშემწყობი ღონისძიებები შესაძლებელია გამოყენებულ იქნეს ქ. თბილისის მუნიციპალიტეტის ტერიტორიაზე არსებულ მიწის ნაკვეთებზე მრავალბინიანი საცხოვრებელი სახლის ან მრავალბინიანი საცხოვრებელი ფუნქციის შემცველი მრავალფუნქციური შენობა-ნაგებობის განთავსების მიზნით, გარდა კულტურული მემკვიდრეობის ზოგად დამცავ ზონებში (ისტორიული განაშენიანების დაცვის ზონაში, განაშენიანების რეგულირების ზონაში და ისტორიული ლანდშაფტის დაცვის ზონაში) არსებული მიწის ნაკვეთებისა.“.

6. 39⁵ მუხლის მე-2 პუნქტი ჩამოყალიბდეს შემდეგი რედაქციით:

„2. ამ მუხლის პირველი პუნქტის „ბ“ ქვეპუნქტით გათვალისწინებული დასკვნა, არ უნდა იყოს გაცემული ქ. თბილისის მუნიციპალიტეტის მერიაში განცხადების წარდგენამდე 1 წელზე გვიან.“.