„ბაზარზე ზედამხედველობის წესისა და პროდუქტის რეალიზაციის შეჩერების, ბაზრიდან ამოღების, გამოთხოვისა და განადგურების წესის დამტკიცების შესახებ“ საქართველოს მთავრობის 2018 წლის 14 ნოემბრის №539 დადგენილებაში ცვლილების შეტანის თაობაზე

1. მე-2 მუხლის მე-2 პუნქტი ჩამოყალიბდეს შემდეგი რედაქციით:

„2. სსიპ − ბაზარზე ზედამხედველობის სააგენტო (შემდგომში − სააგენტო) ბაზარზე ზედამხედველობას ახორციელებს დამოუკიდებლად, ობიექტურად და მიუკერძოებლად, პროპორციულობის პრინციპის დაცვით, რაც გულისხმობს, რომ შემზღუდველი ღონისძიებების შესახებ ბაზარზე ზედამხედველობის ორგანოს გადაწყვეტილება უნდა იყოს ბაზარზე განთავსებულ პროდუქტზე გამოვლენილი შეუსაბამობის ტიპის, შესაძლო ზიანისა და საფრთხის სიმძიმის თანაზომიერი.“.

2. მე-3 მუხლის პირველი პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) შემზღუდველი ღონისძიებები − სააგენტოს  გადაწყვეტილება პროდუქტის რეალიზაციის შეჩერების, ბაზრიდან ამოღების ან/და ბაზრიდან გამოთხოვის შესახებ;“.

3. მე-9 მუხლის:

ა) მე-3 და მე-4 პუნქტები ჩამოყალიბდეს შემდეგი რედაქციით:

„3. ეკონომიკური ოპერატორი ვალდებულია, უზრუნველყოს სააგენტოს წარმომადგენლის დაშვება პროდუქტის წარმოების, დასაწყობების, შენახვისა და რეალიზაციის ადგილებში.

4. სააგენტო უფლებამოსილია, შეამოწმოს პროდუქტის შესაბამისობა კოდექსითა და შესაბამისი ტექნიკური რეგლამენტით დადგენილ  მოთხოვნებთან.“;

ბ) მე-8 პუნქტი ჩამოყალიბდეს შემდეგი რედაქციით:

„8. ბაზარზე ეფექტიანი ზედამხედველობის განსახორციელებლად სააგენტო უფლებამოსილია, გამოითხოვოს დამატებითი ინფორმაცია პროდუქტის ბაზარზე განთავსების თარიღის, ასევე გაყიდული და ბაზარზე განთავსებული პროდუქტის რაოდენობისა და პროდუქტის ბაზარზე მიწოდების ჯაჭვში ჩართული ეკონომიკური ოპერატორების შესახებ.“.

4. 10¹ მუხლის მე-3 პუნქტი ჩამოყალიბდეს შემდეგი რედაქციით:

„3. ადმინისტრაციული სამართალდარღვევის ოქმი შესაძლებელია, არ შედგეს შემოწმების ადგილზე კოდექსის 13¹¹ მუხლით გათვალისწინებული სამართალდარღვევის გამოვლენისას, იმ შემთხვევაში, თუ:    

ა) შეუსაბამობა დადგინდება ლაბორატორიული დასკვნის საფუძველზე;

ბ) ეკონომიკური ოპერატორი სააგენტოს არ წარუდგენს მოთხოვნილ ინფორმაციას სააგენტოს მიერ განსაზღვრულ ვადაში;

გ) ეკონომიკური ოპერატორის მიერ სააგენტოსთვის წარდგენილი შესაბამისობის დამადასტურებელი დოკუმენტი საჭიროებს დამატებით  მოკვლევას, რის ფარგლებშიც დადგინდება აღნიშნული დოკუმენტის შეუსაბამობა საქართველოს კანონმდებლობით დადგენილ მოთხოვნებთან.“.

5. 11² მუხლის:

ა) მე-4 პუნქტი ჩამოყალიბდეს შემდეგი რედაქციით:

„4. პროდუქტთან დაკავშირებული შეუსაბამობის გამოვლენის შემთხვევაში, სააგენტოში შემზღუდველი ღონისძიების გამოყენების შესახებ გადაწყვეტილების მიღების საკითხთან ერთად, შესაძლებელია, განხილულ იქნეს კოდექსის 13¹¹ მუხლით გათვალისწინებული სამართალდარღვევის საქმე და შესაბამისი ადმინისტრაციული სახდელის დაკისრების საკითხი, ამ მუხლით გათვალისწინებული წესით.“;

ბ) მე-6 პუნქტი ჩამოყალიბდეს შემდეგი რედაქციით:

„6. კოდექსის 13¹¹ მუხლით გათვალისწინებული სამართალდარღვევის ჩამდენს აღნიშნული მუხლით გათვალისწინებული ადმინისტრაციული სახდელი შეიძლება, დაედოს შესაბამისი ადმინისტრაციული სამართალდარღვევის ჩადენის დღიდან არაუგვიანეს 3 თვისა, ხოლო, როცა ადმინისტრაციული სამართალდარღვევა დენადია – მისი გამოვლენის დღიდან არაუგვიანეს 3 თვისა.“.

6. მე-12 მუხლის მე-11 პუნქტის „ბ“ ქვეპუნქტი ჩამოყალიბდეს შემდეგი რედაქციით:

„ბ) პროდუქტის ბაზრიდან ამოღების შესახებ დადგენილება, განმეორებით შეუსრულებლობის შემთხვევაში, კოდექსის 13⁹ მუხლის მე-2 ნაწილით გათვალისწინებული ჯარიმის დაკისრების შემდეგ,  დაუყოვნებლივ მიექცევა აღსასრულებლად, „სააღსრულებო წარმოებათა შესახებ“ საქართველოს კანონის შესაბამისად და ამის თაობაზე გაიცემა სათანადო სააღსრულებო ფურცელი.“.

7. მე-14 მუხლს მე-2 პუნქტის შემდეგ დაემატოს შემდეგი შინაარსის 2¹ − 2³ პუნქტები:

„2¹. სააგენტო უფლებამოსილია, პროდუქტის ბაზრიდან ამოღების შესახებ დადგენილებით ეკონომიკურ ოპერატორს ასევე დაავალოს ამ პროდუქტის განადგურება, მისი სხვაგვარად გამოუსადეგრად ქცევა, ექსპორტი ან იმგვარად გადამუშავება, რომ პროდუქტი ადამიანის სიცოცხლეს, ჯანმრთელობას, საკუთრებას ან/და გარემოს საფრთხეს აღარ უქმნიდეს.

2². ამ მუხლის 2¹ პუნქტით გათვალისწინებულ შემთხვევაში, დადგენილებით უნდა განისაზღვროს შესაბამისი პირობები და ვადები.

2³. ეკონომიკური ოპერატორი ვალდებულია, ამ მუხლის 2¹ და 2² პუნქტებით გათვალისწინებული ქმედებები განახორციელოს საკუთარი ხარჯით, საქართველოს კანონმდებლობით დადგენილი წესით და მათი განხორციელების დამადასტურებელი მტკიცებულებები წარუდგინოს სააგენტოს დადგენილებით განსაზღვრულ ვადაში.“.

8. მე-15 მუხლს მე-4 პუნქტის შემდეგ დაემატოს შემდეგი შინაარსის 4¹ − 4³ პუნქტები:

„4¹. სააგენტო უფლებამოსილია, პროდუქტის ბაზრიდან გამოთხოვის შესახებ დადგენილებით ეკონომიკურ ოპერატორს ასევე დაავალოს ამ პროდუქტის განადგურება, მისი სხვაგვარად გამოუსადეგრად ქცევა, ექსპორტი ან იმგვარად გადამუშავება, რომ პროდუქტი ადამიანის სიცოცხლეს, ჯანმრთელობას, საკუთრებას ან/და გარემოს საფრთხეს აღარ უქმნიდეს.

4². ამ მუხლის 4¹ პუნქტით გათვალისწინებულ შემთხვევაში, დადგენილებით უნდა განისაზღვროს შესაბამისი პირობები და ვადები.

4³. ეკონომიკური ოპერატორი ვალდებულია, ამ მუხლის 4¹ და 4² პუნქტებით გათვალისწინებული ქმედებები განახორციელოს საკუთარი ხარჯით, საქართველოს კანონმდებლობით დადგენილი წესით და მათი განხორციელების დამადასტურებელი მტკიცებულებები წარუდგინოს სააგენტოს დადგენილებით განსაზღვრულ ვადაში.“.

9. მე-16 მუხლი ამოღებულ იქნეს.

10. მე-17 მუხლის:

ა) პირველი პუნქტი ჩამოყალიბდეს შემდეგი რედაქციით:

„1. კოდექსის 13⁶ მუხლის მე-6 ნაწილითა და 13¹¹ მუხლით გათვალისწინებული დადგენილებები, ასევე კოდექსის 13¹¹ მუხლის საფუძველზე შედგენილი ადმინისტრაციული სამართალდარღვევის ოქმი შესაბამის ეკონომიკურ ოპერატორს ეგზავნება ფოსტის მეშვეობით, რეგისტრაციის ადგილის ან/და შემოწმების ოქმის შედგენის ადგილის მიხედვით, გარდა იმ შემთხვევისა, როდესაც აღნიშნული დადგენილება ან/და ადმინისტრაციული სამართალდარღვევის ოქმი ადრესატს ჰბარდება ხელზე.“;

ბ) მე-4 პუნქტი ჩამოყალიბდეს შემდეგი რედაქციით:

„4. საჯაროდ გამოქვეყნების შემთხვევაში, კოდექსის 13⁶ მუხლის მე-6 ნაწილით გათვალისწინებული დადგენილებები და კოდექსის 13¹¹ მუხლის საფუძველზე შედგენილი ადმინისტრაციული სამართალდარღვევის ოქმი პირისთვის ჩაბარებულად ჩაითვლება ამ მუხლით დადგენილი წესით სააგენტოს ვებგვერდზე გამოქვეყნებისთანავე, ხოლო კოდექსის 13¹¹ მუხლით გათვალისწინებული დადგენილებები პირისთვის ჩაბარებულად ჩაითვლება ამ მუხლით დადგენილი წესით სააგენტოს ვებგვერდზე გამოქვეყნებიდან მე-7 დღეს.“.