„ვაზისა და ღვინის შესახებ“ საქართველოს კანონში ცვლილების შეტანის თაობაზე

1. მე-3 მუხლის:

ა) „ხ“ ქვეპუნქტი ჩამოყალიბდეს შემდეგი რედაქციით:

„ხ) მცირე ზომის მარანი – ღვინის საწარმო, რომლის წლიური წარმადობა 25 000 ლიტრ ღვინოს არ აღემატება;“;

ბ) „ჰ²⁰“ ქვეპუნქტი ჩამოყალიბდეს შემდეგი რედაქციით:

„ჰ²⁰) ბუნებრივი ღვინო − ღვინო, რომელიც მიიღება სისტემური პესტიციდების, ჰერბიციდებისა და სხვა ქიმიური სინთეზური საშუალებების გამოყენების გარეშე მოყვანილი ყურძნის ტკბილის სპონტანური დადუღებით. ბუნებრივი ღვინის მისაღებად დაუშვებელია მეღვინეობის პრაქტიკაში ნებადართული ოპერაციებისა და ნივთიერებების გამოყენება, გარდა გოგირდის დიოქსიდისა, რომლის შემცველობა 50 მგ/ლ-ს არ უნდა აღემატებოდეს;“;

გ) „ჰ⁵¹“ ქვეპუნქტის შემდეგ დაემატოს შემდეგი შინაარსის „ჰ⁵²“ ქვეპუნქტი:

„ჰ⁵²) ნიშანდება – ალკოჰოლიანი სასმლის ეტიკეტზე, ჭურჭელზე ან შეფუთვაზე სააგენტოს მიერ გაცემული ნიშნის (QR კოდი, რომელიც შეიცავს ინფორმაციას ალკოჰოლიანი სასმლისა და მისი სერტიფიცირების შესახებ) დატანა.“.

2. მე-14 მუხლის მე-2 პუნქტის „ლ“ ქვეპუნქტი ჩამოყალიბდეს შემდეგი რედაქციით:

„ლ) ბუნებრივი ღვინო;“.

3. 33² მუხლის:

ა) მე-4 და მე-5 პუნქტები ჩამოყალიბდეს შემდეგი რედაქციით:

„4. სავალდებულოა საქართველოში წარმოებული, დაცული ადგილწარმოშობის დასახელების ალკოჰოლიანი სასმლის, აგრეთვე საექსპორტოდ და ადგილობრივ სამომხმარებლო ბაზარზე სარეალიზაციოდ განკუთვნილი ყველა კატეგორიის ღვინის ორგანოლეპტიკური შემოწმება. აღნიშნულ შემოწმებას ახორციელებს სააგენტოსთან არსებული მუდმივმოქმედი სადეგუსტაციო კომისია.

5. ამ მუხლის მე-4 პუნქტის მოთხოვნა არ ვრცელდება მცირე ზომის მარანში წარმოებულ ბუნებრივ ღვინოზე.“;

ბ) მე-6 პუნქტის შემდეგ დაემატოს შემდეგი შინაარსის 6¹ და 6² პუნქტები:

„6¹. სარეალიზაციოდ განკუთვნილი, სერტიფიცირებული ალკოჰოლიანი სასმლის ნიშანდება სავალდებულოა.

6². ალკოჰოლიანი სასმლის ნიშანდებას ახორციელებს სააგენტო საქართველოს გარემოს დაცვისა და სოფლის მეურნეობის მინისტრის მიერ დადგენილი წესით.“.

4. 33⁶ მუხლს დაემატოს შემდეგი შინაარსის 1⁷ და 1⁸ პუნქტები:

„1⁷. საქართველოს გარემოს დაცვისა და სოფლის მეურნეობის მინისტრმა 2026 წლის 1 ნოემბრამდე:

ა) გამოსცეს ბრძანება „ალკოჰოლიანი სასმლის ნიშანდების წესისა და ფორმის დამტკიცების შესახებ“;

ბ) უზრუნველყოს სათანადო ნორმატიული აქტების ამ კანონთან შესაბამისობა.

1⁸. საქართველოს მთავრობამ 2027 წლის 1 თებერვლამდე უზრუნველყოს სარეალიზაციოდ განკუთვნილი, სერტიფიცირებული ალკოჰოლიანი სასმლის ნიშანდების საფასურის განსაზღვრა.“.

1. ეს კანონი, გარდა ამ კანონის პირველი მუხლის პირველი პუნქტის „გ“ ქვეპუნქტისა და მე-3 პუნქტის „ბ“ ქვეპუნქტისა, ამოქმედდეს გამოქვეყნებისთანავე.

2. ამ კანონის პირველი მუხლის პირველი პუნქტის  „გ“ ქვეპუნქტი და მე-3 პუნქტის „ბ“ ქვეპუნქტი ამოქმედდეს 2027 წლის 1 თებერვლიდან.