„ვალუტის გადამცვლელი პუნქტებისა და მათი ადმინისტრატორების მიმართ ფულადი ჯარიმების ოდენობის განსაზღვრის, დაკისრებისა და აღსრულების წესის დამტკიცების თაობაზე“ საქართველოს ეროვნული ბანკის პრეზიდენტის 2020 წლის 5 თებერვლის №17/04 ბრძანებაში ცვლილების შეტანის შესახებ

საქართველოს ეროვნული ბანკის პრეზიდენტის

2026 წლის 2 ივლისი

ქ. თბილისი

„საქართველოს ეროვნული ბანკის შესახებ“ საქართველოს ორგანული კანონის მე-15 მუხლის პირველი პუნქტის „ზ“ ქვეპუნქტისა და „ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის საფუძველზე, ვბრძანებ:

„ვალუტის გადამცვლელი პუნქტებისა და მათი ადმინისტრატორების მიმართ ფულადი ჯარიმების ოდენობის განსაზღვრის, დაკისრებისა და აღსრულების წესის დამტკიცების თაობაზე“ საქართველოს ეროვნული ბანკის პრეზიდენტის 2020 წლის 5 თებერვლის №17/04 ბრძანებით (www.matsne.gov.ge; 06/02/2020; ს/კ: 220090000.18.011.016433) დამტკიცებულ წესში შეტანილ იქნეს შემდეგი ცვლილება:

  1. მე-2 მუხლის პირველი პუნქტი ჩამოყალიბდეს შემდეგი რედაქციით:

„1. ამ წესის პირველი მუხლის მე-2 პუნქტის „ა“ ქვეპუნქტით განსაზღვრულ შემთხვევებში, ეროვნული ბანკი უფლებამოსილია, ვალუტის გადამცვლელი პუნქტის მიმართ გამოიყენოს ფულადი ჯარიმები შემდეგი ოდენობებით:

ა) ვალუტის გადამცვლელი პუნქტი დაჯარიმდება 10 000 (ათი ათასი) ლარის ოდენობით, თუ ვალუტის გადამცვლელი პუნქტის/ფილიალის მიერ დაირღვა საქართველოს ეროვნული ბანკის პრეზიდენტის 2025 წლის 9 ივლისის №167/04 ბრძანებით დამტკიცებული „ვალუტის გადამცვლელი პუნქტების რეგისტრაციისა და რეგულირების წესით“ (შემდგომში – რეგისტრაციისა და რეგულირების წესი) განსაზღვრული შემდეგი მოთხოვნები და ვალდებულებები:

ა.ა) მე-4 მუხლის მე-2 პუნქტის „გ“ ქვეპუნქტით ან/და მე-8 მუხლით განსაზღვრული ვიდეომეთვალყურეობის სისტემასთან დაკავშირებული ვალდებულებები;

ა.ბ) მე-6 მუხლის მე-3 პუნქტით, მე-7 მუხლის მე-2 პუნქტით ან/და მე-10 მუხლის მე-6 პუნქტით განსაზღვრული ვალდებულებები;

ბ) ვალუტის გადამცვლელი პუნქტი დაჯარიმდება 2 000 (ორი ათასი) ლარის ოდენობით, თუ ვალუტის გადამცვლელი პუნქტის/ფილიალის მიერ დაირღვა რეგისტრაციისა და რეგულირების წესით განსაზღვრული შემდეგი მოთხოვნები და ვალდებულებები:

ბ.ა) მე-3, მე-4 (გარდა მე-4 მუხლის მე-2 პუნქტის „გ“ ქვეპუნქტისა) ან/და მე-9 მუხლებით განსაზღვრული სარეგისტრაციო პირობები;

ბ.ბ) მე-6 მუხლის პირველი პუნქტით, მე-7 მუხლის პირველი პუნქტით ან/და მე-10 მუხლის მე-2 პუნქტით განსაზღვრული მომხმარებელთა ინფორმირებასთან დაკავშირებული ვალდებულებები;

ბ.გ) რეგისტრაციისა და რეგულირების წესით განსაზღვრული სხვა ვალდებულებები;

გ) ეროვნული ბანკის მიერ ფულადი ჯარიმის დაკისრების შემდეგ ამ პუნქტის „ა.ა“ ან/და „ა.ბ“ ქვეპუნქტებში მითითებული მოთხოვნების/ვალდებულებების განმეორებითი დარღვევა გამოიწვევს ვალუტის გადამცვლელი პუნქტის დაჯარიმებას 20 000 (ოცი ათასი) ლარის ოდენობით, ხოლო „ბ.ა“, „ბ.ბ“ ან/და „ბ.გ“ ქვეპუნქტებში მითითებული მოთხოვნების/ვალდებულებების განმეორებითი დარღვევა გამოიწვევს ვალუტის გადამცვლელი პუნქტის დაჯარიმებას 5 000 (ხუთი ათასი) ლარის ოდენობით;

დ) ვალუტის გადამცვლელი პუნქტის მიერ ეროვნული ბანკისთვის ყოველთვიური ანგარიშგების დადგენილ ვადაში ან/და დადგენილი ფორმით წარუდგენლობა ან/და ანგარიშგებით არაზუსტი ინფორმაციის წარდგენა გამოიწვევს ვალუტის გადამცვლელი პუნქტის დაჯარიმებას 1 000 (ათასი) ლარის ოდენობით, დარღვევის თითოეულ ფაქტზე;

ე) ვალუტის გადამცვლელ პუნქტთან და მის საქმიანობასთან დაკავშირებული ნებისმიერი სახის დოკუმენტაციისა და ინფორმაციის დადგენილ ვადებში ეროვნული ბანკისთვის წარუდგენლობა ან/და არაზუსტი ინფორმაციის წარდგენა ან/და წერილობითი მითითების/მოთხოვნის შეუსრულებლობა გამოიწვევს ვალუტის გადამცვლელი პუნქტის დაჯარიმებას – 1 000 (ათასი) ლარის ოდენობით, დარღვევის თითოეულ ფაქტზე;

ვ) ვალუტის გადამცვლელ პუნქტთან და მის საქმიანობასთან დაკავშირებული ნებისმიერი სახის დოკუმენტაციისა და ინფორმაციის დადგენილ ვადებში ეროვნული ბანკისთვის განმეორებით წარუდგენლობა ან/და არაზუსტი ინფორმაციის განმეორებით წარდგენა ან/და წერილობითი მითითების/მოთხოვნის განმეორებით შეუსრულებლობა გამოიწვევს ვალუტის გადამცვლელი პუნქტის დაჯარიმებას – 10 000 (ათი ათასი) ლარის ოდენობით, დარღვევის თითოეულ ფაქტზე.“.

  2. მე- 3 მუხლის:

ა) მე-2 პუნქტის „ე“ და „ე¹“ ქვეპუნქტები ჩამოყალიბდეს შემდეგი რედაქციით:

  „ე) ფულის გათეთრებისა და ტერორიზმის დაფინანსების აღკვეთის ხელშეწყობის შესახებ საქართველოს კანონმდებლობით, „საქართველოს ეროვნული ბანკის ზედამხედველობას დაქვემდებარებული ანგარიშვალდებული პირების მიერ სანქციათა რეჟიმების შესრულების წესის დამტკიცების თაობაზე“ საქართველოს ეროვნული ბანკის პრეზიდენტის 2023 წლის 4 აგვისტოს №208/04 ბრძანებით დამტკიცებული წესის (შემდგომში – სანქციათა რეჟიმების შესრულების წესი) მე-2 მუხლით ან/და ეროვნული ბანკის მიერ წერილობითი მითითებით განსაზღვრული სანქციათა რეჟიმებით გათვალისწინებული მოთხოვნების შესრულების ხელშეწყობის მიზნებისთვის პროგრამული (ელექტრონული) სისტემის, (რომელიც უზრუნველყოფს საყურადღებო/საეჭვო ნიშნების, მათ შორის, დანაწევრებული გარიგებების (ოპერაციების) გამოვლენას და პირის ავტომატურ გადამოწმებას პოლიტიკურად აქტიურ, გაეროს უშიშროების საბჭოს რეზოლუციებით და სანქციათა რეჟიმების შესრულების წესით ან/და ეროვნული ბანკის წერილობითი მითითებებით განსაზღვრულ სანქციათა რეჟიმებით გათვალისწინებულ სანქციადაკისრებულ პირთა სიებში), არქონის ან მნიშვნელოვანი ხარვეზებით ფუნქციონირების შემთხვევაში – 10 000 (ათი ათასი) ლარის ოდენობით;

„ე¹) გაეროს უშიშროების საბჭოს რეზოლუციებით ან გაეროს უშიშროების საბჭოს რეზოლუციების შესრულების საკითხებზე მომუშავე სამთავრობო კომისიის გადაწყვეტილებით განსაზღვრულ სანქციადაკისრებულ პირთან, სანქციათა რეჟიმების შესრულების წესით ან/და ეროვნული ბანკის მიერ წერილობითი მითითებებით განსაზღვრულ სანქციათა რეჟიმებით გათვალისწინებული მოთხოვნების დარღვევით ან გვერდის ავლით განხორციელებული ოპერაციების (გარიგების) გამოვლენის შემთხვევაში – 7 000 (შვიდი ათასი) ლარის ოდენობით, დარღვევის თითოეულ ფაქტზე;“;

  ბ) მე-3 პუნქტის:

ბ.ა) „ზ“ ქვეპუნქტი ჩამოყალიბდეს შემდეგი რედაქციით:

„ზ) ვალუტის გადამცვლელი პუნქტი, კანონმდებლობის ან/და შიდა პოლიტიკის/პროცედურების შესაბამისად, არ ახორციელებს კლიენტთან დამყარებული საქმიანი ურთიერთობის მონიტორინგს, გარიგების (ოპერაციის), საქმიანობის, ქონების ან/და ფულადი სახსრების/ვირტუალური აქტივის წარმომავლობის შესწავლას – 3 000 (სამი ათასი) ლარის ოდენობით, თითოეულ კლიენტთან მიმართებაში;“;  

ბ.ბ) „კ“ ქვეპუნქტი ჩამოყალიბდეს შემდეგი რედაქციით:

„კ) ვალუტის გადამცვლელი პუნქტის მიერ ფულის გათეთრებისა და ტერორიზმის დაფინანსების რისკის ზედამხედველობის ანგარიშგების ეროვნული ბანკისთვის დადგენილი ვადის გასვლიდან 30 კალენდარული დღის ვადაში წარუდგენლობის შემთხვევაში – 3 000 (სამი ათასი) ლარის ოდენობით;“;

  გ) მე-4 პუნქტის „დ“ და „ე“ ქვეპუნქტები ჩამოყალიბდეს შემდეგი რედაქციით:

„დ)ვალუტის გადამცვლელი პუნქტის მიერ ფულის გათეთრებისა და ტერორიზმის დაფინანსების რისკის ზედამხედველობის ანგარიშგებით ეროვნული ბანკისთვის არასწორი ინფორმაციის წარდგენის შემთხვევაში – 1 000 (ათასი) ლარის ოდენობით, წარდგენილი ანგარიშგების თითოეულ ფორმასთან მიმართებაში;

ე) ვალუტის გადამცვლელი პუნქტის მიერ ფულის გათეთრებისა და ტერორიზმის დაფინანსების რისკის ზედამხედველობის ანგარიშგების ეროვნული ბანკისთვის 30 კალენდარულ დღემდე დაგვიანებით წარდგენის შემთხვევაში – 2 000 (ორი ათასი) ლარის ოდენობით;“;

  დ) მე-5 პუნქტის:

დ.ა) „ა“ და „ბ“ ქვეპუნქტები ჩამოყალიბდეს შემდეგი რედაქციით:

„ა) ვალუტის გადამცვლელი პუნქტის მიერ ფულის გათეთრებისა და ტერორიზმის დაფინანსების რისკის ზედამხედველობის ანგარიშგების ეროვნული ბანკისთვის განმეორებით წარუდგენლობა, თუ ვალუტის გადამცვლელი პუნქტი უკვე იყო დაჯარიმებული ამ მუხლის მე-3 პუნქტის „კ“ ქვეპუნქტის შესაბამისად, გამოიწვევს დაჯარიმებას – 6 000 (ექვსი ათასი) ლარის ოდენობით წარუდგენელ ანგარიშგებაზე;

ბ) ვალუტის გადამცვლელი პუნქტის მიერ ფულის გათეთრებისა და ტერორიზმის დაფინანსების რისკის ზედამხედველობის ანგარიშგების საქართველოს ეროვნული ბანკისთვის 30 კალენდარულ დღემდე დაგვიანებით წარდგენა, თუ ვალუტის გადამცვლელი პუნქტი უკვე იყო დაჯარიმებული ამ მუხლის მე-4 პუნქტის „ე“ ქვეპუნქტის შესაბამისად, გამოიწვევს დაჯარიმებას – 4 000 (ოთხი ათასი) ლარის ოდენობით, თითოეულ დაგვიანებით წარდგენილ ანგარიშგებაზე;“;

დ.ბ) „ზ“ ქვეპუნქტი ჩამოყალიბდეს შემდეგი რედაქციით:

„ზ) განმეორებით იმავე კლიენტისთვის (ან/და კლიენტის სახელით მოქმედი პირისთვის) იდენტიფიკაციის/ვერიფიკაციის გარეშე მომსახურების გაწევის შემთხვევაში, თუ ვალუტის გადამცვლელი პუნქტი ამ პირთან მიმართებაში უკვე დაჯარიმებული იყო ამ მუხლის მე-3 პუნქტის „ბ“ ქვეპუნქტის შესაბამისად – 2 000 (ორი ათასი) ლარის ოდენობით, დარღვევის თითოეულ ფაქტზე;“.

ეს ბრძანება ამოქმედდეს 2026 წლის 1 სექტემბრიდან.