,,საჯარო სამართლის იურიდიული პირის – მასწავლებელთა პროფესიული განვითარების ცენტრის“ დებულების დამტკიცების შესახებ“ საქართველოს განათლებისა და მეცნიერების მინისტრის 2006 წლის 20 ივლისის №714 ბრძანებაში ცვლილებებისა და დამატებების შეტანის თაობაზე“

სახელმწიფო სარეგისტრაციო კოდი 040.030.000.22.022.010.683

საქართველოს განათლებისა და მეცნიერების მინისტრის

ბრძანება №560

2007 წლის 31 ივლისი

ქ. თბილისი

„საჯარო სამართლის იურიდიული  პირის – მასწავლებელთა პროფესიული განვითარების ცენტრის“ დებულების დამტკიცების შესახებ“ საქართველოს განათლებისა და მეცნიერების მინისტრის 2006 წლის 20 ივლისის №714 ბრძანებაში ცვლილებებისა და დამატებების შეტანის თაობაზე

„ნორმატიული აქტების შესახებ“ საქართველოს კანონის 36-ე მუხლის, საქართველოს ზოგადი ადმინისტრაციული კოდექსის 63-ე მუხლის, „ზოგადი განათლების შესახებ“ საქართველოს კანონის 25-ე მუხლის მე-3 პუნქტის, 26-ე მუხლის პირველი პუნქტის „შ1“ ქვეპუნქტის, 281 მუხლის მე-2 პუნქტისა და „საქართველოს განათლებისა და მეცნიერების სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის №37 დადგენილებით დამტკიცებული დებულების მე-3 მუხლის მე-2 პუნქტის „ა“ და „მ“ ქვეპუნქტების საფუძველზე, ვბრძანებ:

    მუხლი 1

„საჯარო სამართლის იურიდიული პირის – მასწავლებელთა პროფესიული განვითარების ცენტრის“ დებულების დამტკიცების შესახებ“ საქართველოს განათლებისა და მეცნიერების მინისტრის 2006 წლის 20 ივლისის №714 ბრძანებით დამტკიცებულ დებულებაში (სსმ III, 25.07.2006წ., №98, მუხ. 1346) შეტანილ იქნეს შემდეგი ცვლილებები და დამატებები:

1. დებულების მე-2 მუხლის მე-2 პუნქტის:

ა) „გ“ ქვეპუნქტში შეტანილ იქნეს ცვლილება და ჩამოყალიბდეს შემდეგი რედაქციით:

 „გ) მასწავლებელთა დამატებითი საკვალიფიკაციო მოთხოვნების შემუშავება;“;

ბ) „ე“ ქვეპუნქტში შეტანილ იქნეს ცვლილება და ჩამოყალიბდეს შემდეგი რედაქციით:

„ე) ზოგადსაგანმანათლებლო დაწესებულებებში არსებული მასწავლებლისა და მაძიებლების ვაკანსიების რეგისტრაცია.“;

გ) დაემატოს „ი“ ქვეპუნქტი და ჩამოყალიბდეს შემდეგი რედაქციით:

„ი) კანონმდებლობით დადგენილ შემთხვევებში და წესით სერტიფიცირებული მასწავლებლის სტატუსის ვადამდე ჩამორთმევა.“;

2. დებულების მე-2 მუხლის მე-3 პუნქტის „მ“ ქვეპუნქტში შეტანილ იქნეს ცვლილება და ჩამოყალიბდეს შემდეგი რედაქციით:

„მ) საქართველოს კანონმდებლობით დადგენილი წესით აღრიცხავს მასწავლებელთა პერსონალურ მონაცემებს;“;

3. დებულების მე-2 მუხლის მე-3 პუნქტს დაემატოს „ნ“, „ო“, „პ“, „ჟ“, „რ“, „ს“, „ტ“, „უ“ და „ფ“ ქვეპუნქტები და ჩამოყალიბდეს შემდეგი რედაქციით:

„ნ) მასწავლებელთა ასოციაციებისა და ორგანიზაციების მონაწილეობით, უზრუნველყოფს მასწავლებლის პროფესიული ეთიკის კოდექსის პროექტის მომზადებას და დასამტკიცებლად სამინისტროსათვის წარდგენას;

ო) შეიმუშავებს მასწავლებლობის მაძიებელთა რეგისტრაციისა და მაძიებლობის პერიოდის გავლის წესს, მაძიებლობის პერიოდის გავლის დამადასტურებელი დოკუმენტის ნიმუშსა და მისი გაცემის წესს და დასამტკიცებლად წარუდგენს სამინისტროს;

პ) საჯარო სამართლის იურიდიული პირის – გამოცდების ეროვნული ცენტრის მონაწილეობით შეიმუშავებს მასწავლებელთა სერტიფიცირების დებულების პროექტს და დასამტკიცებლად წარუდგენს სამინისტროს;

ჟ) შეიმუშავებს მასწავლებელობის უფლების დამადასტურებელი სერტიფიკატის ნიმუშს და დასამტკიცებლად წარუდგენს სამინისტროს;

რ) შეიმუშავებს მასწავლებლის პროფესიული განვითარების სქემას და დასამტკიცებლად წარუდგენს სამინისტროს;

ს) ამტკიცებს მასწავლებლის პორტფოლიოს ნიმუშს და მისი მომზადების წესს;

ტ) მონაწილეობას ღებულობს და ითანხმებს მასწავლებლის მომზადებისა და პროფესიული განვითარების საგანმანათლებლო პროგრამების აკრედიტაციის დებულების შემუშავებაში;

უ) შეიმუშავებს პროფესიული ეთიკის კოდექსით გათვალისწინებული ნორმების დარღვევის შემთხვევაში მასწავლებლის მიმართ განსახორციელებელი დის­ციპ­ლინური წარმოების წესის პროექტს და ამ ნორმე­ბის დარღვევის შემთხვევაში იღებს საქართველოს კანონ­მდებლობით გათვალისწინებულ ზომებს;

ფ) ახორციელებს საქართველოს კანონმდებლობით განსაზღვრულ სხვა უფლებამოსილებებს“.

4. დებულების მე-3 მუხლის პირველ პუნქტში შეტანილ იქნეს ცვლილება და ჩამოყალიბდეს შემდეგი რედაქციით:

„1. ცენტრს ხელმძღვანელობს და მართავს ცენტრის დირექტორი, რომელსაც მინისტრის წარდგინებით თანამდებობაზე ნიშნავს და თანამდებობიდან ათავისუფლებს საქართველოს პრემიერ-მინისტრი.“.

    მუხლი 2

ბრძანება ძალაში შევიდეს გამოქვეყნებისთანავე.

ა. ლომაია