,,საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №84 ბრძანებაში ცვლილებების შეტანის თაობაზე“

სახელმწიფო სარეგისტრაციო კოდი 200.230.040.22.033.011.051

საქართველოს ფინანსთა მინისტრის

ბრძანება №1193

2007 წლის 31 ოქტომბერი

ქ. თბილისი

 „საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის  14 თებერვლის №84 ბრძანებაში ცვლილებების შეტანის თაობაზე

 „ნორმატიული აქტების შესახებ“ საქართველოს კანონის 36-ე მუხლის საფუძველზე, ვბრძანებ:

მუხლი 1. საქართველოს ფინანსთა მინისტრის 2005 წლის 14 თებერვლის №84 ბრძანებით (სსმ III, 17.02.2005წ., №18, მუხ. 171) დამტკიცებულ  „საგადასახადო ანგარიშ-ფაქტურის (მათ შორის, კორექტირების) გამოწერისა და წარდგენის შესახებ“ ინსტრუქციაში შეტანილ იქნეს შემდეგი ცვლილებები:

1. ინსტრუქციის მე-3 მუხლის 23-ე პუნქტი ჩამოყალიბდეს შემდეგი რედაქციით:

 „23. საგადასახადო ანგარიშ-ფაქტურა გამოიწერება ოთხ ეგზემპლარად, რომლის პირველი და მესამე ეგზემპლარები წარედგინება მყიდველს, ხოლო მეორე და მეოთხე – რჩება გამყიდველს. ანგარიშ-ფაქტურის მეოთხე ეგზემპლარს გამყიდველი წარუდგენს საგადასახადო ორგანოს დასაბეგრ ოპერაციაზე საგადასახადო კონტროლის განსახორციელებლად, ხოლო მე-3 ეგზემპლარს მყიდველი წარუდგენს საგადასახადო ორგანოს თავისი ადგილმდებარეობის მიხედვით დღგ-ის ჩათვლის მისაღებად. მათი წარდგენა ხდება დღგ-ის დეკლარაციასთან ერთად ყოველთვიურად. ამასთან, ელექტრონული ფორმით საგადასახადო დეკლარირებაზე გადასული გადამხდელების მიერ მათ ხელთ არსებული საგადასახადო ანგარიშ-ფაქტურების მესამე და მეოთხე ეგზემპლარები საგადასახადო ორგანოს კონტროლის მიზნით, წარედგინება მხოლოდ მისი მოთხოვნის შემთხვევაში.“.

2.    ინსტრუქციის მე-3 მუხლის 26-ე და 27-ე პუნქტები ჩამოყალიბდეს შემდეგი რედაქციით:

 „26. დაუშვებელია საგადასახადო ორგანოში საგადასახადო ანგარიშ-ფაქტურის ასლის წარდგენა დღგ-ის ჩათვლის მისაღებად. იმ შემთხვევაში, თუ საგამოძიებო და სხვა უფლებამოსილი ორგანოების მიერ საქართველოს სისხლის სამართლის საპროცესო კოდექსით დადგენილი წესით გადამხდელისაგან ამოღებულ იქნა საგადასახადო ანგარიშ-ფაქტურები, დღგ-ის ჩათვლის მოთხოვნის მიზნით გადამხდელს უფლება ეძლევა დღგ-ის დეკლარაციასთან ერთად საგადასახადო ორგანოში წარადგინოს ამოღებული საგადასახადო ანგარიშ-ფაქტურების ქსეროასლები და ამ ორგანოების სათანადო პასუხისმგებელი პირების მიერ ხელმოწერილი და ბეჭდით დამოწმებული ცნობა შესაბამისი საგადასახადო ანგარიშ-ფაქტურების ამოღების შესახებ. ამასთან, საგამოძიებო და სხვა უფლებამოსილი ორგანოების მიერ ამოღებული საგადასახადო ანგარიშ-ფაქტურების დაბრუნების შემდეგ ისინი გადამხდელის მიერ დაუყოვნებლივ წარდგენილ უნდა იქნეს შესაბამის საგადასახადო ორგანოში. აღნიშნული ვალდებულების შესრულება იმ გადამხდელებს, რომლებიც გადასული არიან ელექტრონული ფორმით საგადასახადო დეკლარირებაზე, ეკისრებათ მხოლოდ საგადასახადო ორგანოს მოთხოვნის შემთხვევაში.

27. დაუშვებელია საქონლის (მომსახურების) მიმწოდებლის მიერ არასწორად შევსებული ანგარიშ-ფაქტურის წარდგენა მყიდველისათვის. ასეთი ანგარიშ-ფაქტურის ოთხივე ეგზემპლარი შესაბამისი თვის დღგ-ის დეკლარაციასთან (მათ შორის, ელექტრონული ფორმით წარდგენილი) ერთად წარედგინება საგადასახადო ორგანოს მისი გაუქმების მიზნით.“.

3.    ინსტრუქციის მე-4 მუხლის მე-2 და მე-3 პუნქტები ჩამოყალიბდეს შემდეგი რედაქციით:

 „2. კორექტირების საგადასახადო ანგარიშ-ფაქტურა გამოიყენება იმ შემთხვევაში, თუ მიწოდებულ საქონელზე (გაწეულ მომსახურებაზე) გამყიდველმა გამოწერა და დადგენილი წესით მყიდველს ჩააბარა ანგარიშ-ფაქტურა და:

ა) გაუქმებულია დასაბეგრი ოპერაცია, მათ შორის, დღგ-ის გადამხდელად ხელახალი რეგისტრაციისას წინა რეგისტრაციის გაუქმებისას მიწოდებად განხილული საქონლის არსებულ ნაშთზე;

ბ) შეცვლილია დასაბეგრი ოპერაციის სახე;

გ) ფასების შემცირების ან სხვა მიზეზით შეცვლილია ოპერაციაზე ადრე შეთანხმებული კომპენსაციის თანხა;

დ) საქონელი/მომსახურება სრულად ან ნაწილობრივ უბრუნდება დღგ-ის გადამხდელს; ლიზინგის საგანი უბრუნდება ლიზინგის გამცემს, თუ გათვალისწინებული იყო მისი გამოსყიდვა.

3. ამ მუხლის მე-2 პუნქტში აღნიშნული ერთ-ერთი პირობის დადგომისას დასაბეგრი ოპერაციის თანხა კორექტირდება, თუ გადამხდელის მიერ:

ა) საგადასახადო ინსპექციაში წარდგენილია საგადასახადო ანგარიშ-ფაქტურა, ან მისი მონაცემები დეკლარირებულია ელექტრონული ფორმით, რომელშიც დღგ-ის თანხა აღნიშნულია არასწორად;

ბ) დღგ-ის დეკლარაციაში არასწორად არის აღნიშნული დღგ-ის თანხა.“.

4.    ინსტრუქციის მე-4 მუხლის მე-8 პუნქტის  „გ“ ქვეპუნქტი ჩამოყალიბდეს შემდეგი რედაქციით:

 „გ) შესაბამისი უჯრის შემოხაზვით ფიქსირდება კორექტირების შემდეგი სახეობები:

გ.ა) გაუქმებულია დასაბეგრი ოპერაცია, მათ შორის, დღგ-ის გადამხდელად ხელახალი რეგისტრაციისას წინა რეგისტრაციის გაუქმებისას მიწოდებად განხილული საქონლის არსებულ ნაშთზე;

გ.ბ) შეცვლილია დასაბეგრი ოპერაციის სახე;

გ.გ) ფასების შემცირების ან სხვა მიზეზით შეცვლილია ოპერაციაზე ადრე შეთანხმებული კომპენსაციის თანხა;

გ.დ) საქონელი/მომსახურება სრულად ან ნაწილობრივ უბრუნდება დღგ-ის გადამხდელს; ლიზინგის საგანი უბრუნდება ლიზინგის გამცემს, თუ გათვალისწინებული იყო მისი გამოსყიდვა.“.

5.    ინსტრუქციის მე-4 მუხლის მე-10 და მე-11 პუნქტები ჩამოყალიბდეს შემდეგი რედაქციით:

 „10. კორექტირების ანგარიშ-ფაქტურა გამოიწერება ოთხ ეგზემპლარად, რომლის პირველი და მესამე ეგზემპლარები წარედგინება მყიდველს, ხოლო მეორე და მეოთხე რჩება გამყიდველს. გამყიდველი და მყიდველი საგადასახადო აღრიცხვის ადგილის მიხედვით საგადასახადო ორგანოში წარადგენენ ამ ანგარიშ-ფაქტურის მეოთხე და მესამე ეგზემპლარს დღგ-ის დეკლარაციასთან ერთად საგადასახადო კონტროლის განხორციელების მიზნით და დღგ-ის ჩათვლის მისაღებად. ამასთან, ელექტრონული ფორმით საგადასახადო დეკლარირებაზე გადასული გადამხდელების მიერ მათ ხელთ არსებული საგადასახადო ანგარიშ-ფაქტურების მესამე და მეოთხე ეგზემპლარები საგადასახადო ორგანოს, კონტროლის მიზნით, წარედგინება მხოლოდ მისი მოთხოვნის შემთხვევაში.

11. დაუშვებელია საქონლის (მომსახურების) მიმწოდებლის მიერ რეკვიზიტების შეცდომით, არასწორად შევსებული კორექტირების საგადასახადო ანგარიშ-ფაქტურის წარდგენა მყიდველისათვის. ასეთი ანგარიშ-ფაქტურის ოთხივე ეგზემპლარი შესაბამისი თვის დღგ-ის დეკლარაციასთან (მათ შორის, ელექტრონული ფორმით წარდგენილი) ერთად წარედგინება საგადასახადო ორგანოს მისი გაუქმების მიზნით.“.

6.    ინსტრუქციის მე-4 მუხლის მე-14 პუნქტი ჩამოყალიბდეს შემდეგი რედაქციით:

 „14. დაუშვებელია საგადასახადო ორგანოში კორექტირების საგადასახადო ანგარიშ-ფაქტურის ასლის წარდგენა დღგ-ის ჩათვლის მისაღებად. იმ შემთხვევაში, თუ საგამოძიებო და სხვა უფლებამოსილი ორგანოების მიერ საქართველოს სისხლის სამართლის საპროცესო კოდექსით დადგენილი წესით გადამხდელისაგან ამოღებულ იქნა კორექტირების საგადასახადო ანგარიშ-ფაქტურები, დღგ-ის ჩათვლის მოთხოვნის მიზნით გადამხდელს უფლება ეძლევა დღგ-ის დეკლარაციასთან ერთად საგადასახადო ორგანოში წარადგინოს ამოღებული კორექტირების საგადასახადო ანგარიშ-ფაქტურების ქსეროასლები და ამ ორგანოების სათანადო პასუხისმგებელი პირების მიერ ხელმოწერილი და ბეჭდით დამოწმებული ცნობა შესაბამისი კორექტირების საგადასახადო ანგარიშ-ფაქტურების ამოღების შესახებ. ამასთან, საგამოძიებო და სხვა უფლებამოსილი ორგანოების მიერ ამოღებული კორექტირების საგადასახადო ანგარიშ-ფაქტურების დაბრუნების შემდეგ ისინი გადამხდელის მიერ დაუყოვნებლივ წარდგენილ უნდა იქნეს შესაბამის საგადასახადო ორგანოში. აღნიშნული ვალდებულების შესრულება იმ გადამხდელებს, რომლებიც გადასული არიან ელექტრონული ფორმით საგადასახადო დეკლარირებაზე, ეკისრებათ მხოლოდ საგადასახადო ორგანოს მოთხოვნის შემთხვევაში.“.

მუხლი 2. ბრძანება ამოქმედდეს გამოქვეყნებისთანავე.

მინისტრის პირველი

მოადგილე  კ. ბაინდურაშვილი