„საქართველოს ფინანსთა სამინისტროს შემოსავლების სამსახურის დებულების დამტკიცებისა და საქართველოს ფინანსთა სამინისტროს ფინანსური პოლიციის, საგადასახადო დეპარტამენტისა და საბაჟო დეპარტამენტის რეორგანიზაციის შესახებ“ საქართველოს ფინანსთა მინისტრის 2007 წლის 2 მარტის №170 ბრძანებაში ცვლილების შეტანის თაობაზე

სახელმწიფო სარეგისტრაციო კოდი 010.320.010.22.033.011.650

საქართველოს ფინანსთა მინისტრის

ბრძანება №297

2008 წლის 27 მარტი

ქ. თბილისი

,,საქართველოს ფინანსთა სამინისტროს შემოსავლების სამსახურის დებულების დამტკიცებისა და საქართველოს ფინანსთა სამინისტროს ფინანსური პოლიციის, საგადასახადო დეპარტამენტისა და საბაჟო დეპარტამენტის რეორგანიზაციის შესახებ“ საქართველოს ფინანსთა მინისტრის 2007 წლის 2 მარტის №170 ბრძანებაში ცვლილების შეტანის თაობაზე

,,ნორმატიული აქტების შესახებ“ საქართველოს კანონის 36-ე მუხლის შესაბამისად, ვბრძანებ:

1. ,,საქართველოს ფინანსთა სამინისტროს შემოსავლების სამსახურის დებულების დამტკიცებისა და საქართველოს ფინანსთა სამინისტროს ფინანსური პოლიციის, საგადასახადო დეპარტამენტისა და საბაჟო დეპარტამენტის რეორგანიზაციის შესახებ“ საქართველოს ფინანსთა მინისტრის 2007 წლის 2 მარტის №170 ბრძანებაში (სსმ III, 05.03.07, №29, მუხ. 348) შეტანილ იქნეს ცვლილება და საქართველოს ფინანსთა სამინისტროს შემოსავლების სამსახურის დებულება ჩამოყალიბდეს თანდართული რედაქციით.

2. ბრძანება, გარდა საქართველოს ფინანსთა სამინისტროს შემოსავლების სამსახურის დებულების მე-4 მუხლის ,,კ“ ქვეპუნქტისა, მე-6 მუხლის მე-3 პუნქტის ,,გ“ ქვეპუნქტისა, მე-7 მუხლის ,,დ.ე“ ქვეპუნქტისა, მე-11 მუხლის მე-5 პუნქტისა და მე-15 მუხლის მე-2 პუნქტის ,,ს“ ქვეპუნქტისა, ამოქმედდეს 2008 წლის 1 აპრილიდან.

3. საქართველოს ფინანსთა სამინისტროს შემოსავლების სამსახურის დებულების მე-6 მუხლის მე-3 პუნქტის ,,გ“ ქვეპუნქტი ამოქმედდეს 2008 წლის 7 აპრილიდან.

4. საქართველოს ფინანსთა სამინისტროს შემოსავლების სამსახურის დებულების მე-4 მუხლის ,,კ“ ქვეპუნქტი, მე-7 მუხლის ,,დ.ე“ ქვეპუნქტი, მე-11 მუხლის მე-5 პუნქტი და მე-15 მუხლის მე-2 პუნქტის ,,ს“ ქვეპუნქტი ამოქმედდეს ,,საქართველოს ფინანსთა სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის №39 დადგენილებაში შესაბამისი ცვლილებების განხორციელებისთანავე.

                     ნ. გილაური

საქართველოს ფინანსთა სამინისტროს შემოსავლების სამსახურის

დებულება

    მუხლი 1. ზოგადი დებულებანი

1. საქართველოს ფინანსთა სამინისტროს შემოსავლების სამსახური (შემდგომში – სამსახური) არის საქართველოს ფინანსთა სამინისტროს სახელმწიფო საქვეუწყებო დაწესებულება, რომლის ცალკეული სტრუქტურული ერთეულები ასრულებენ სამართალდამცავი ორგანოს ფუნქციებს.

2. სამსახური თავის საქმიანობას წარმართავს საქართველოს კონსტიტუციის, საერთაშორისო ხელშეკრულებების, საგადასახადო და საბაჟო კანონმდებლობის, სისხლის სამართლის საპროცესო კანონმდებლობის, ,,ოპერატიულ-სამძებრო საქმიანობის შესახებ“ საქართველოს კანონის, ,,საქართველოს ფინანსთა სამინისტროს შემოსავლების სამსახურის შესახებ“ საქართველოს კანონის, საქართველოს ფინანსთა სამინისტროს დებულების, ამ დებულებისა და სხვა საკანონმდებლო და კანონქვემდებარე ნორმატიული აქტების შესაბამისად.

3. სამსახურს აქვს ბეჭედი საქართველოს სახელმწიფო გერბის გამოსახულებით და საკუთარი დასახელებით, დამოუკიდებელი ბალანსი, ანგარიშსწორების ანგარიშები ხაზინაში.

4. სამსახურის მისამართია: ქ. თბილისი, ვ. გორგასლის ქ. №16.

    მუხლი 2. სამსახურის დაფინანსება

სამსახური ფინანსდება სახელმწიფო ბიუჯეტიდან.

    მუხლი 3. წარმომადგენლობა

1. სამსახური ახორციელებს სახელმწიფოს წარმომადგენლობას და მოქმედებს სახელმწიფოს სახელით მისთვის კანონმდებლობით დაკისრებული უფლებამოვალეობების განხორციელებისას.

2. სამსახურის წარმომადგენლობაზე უფლებამოსილი პირია სამსახურის უფროსი.

3. ცალკეული საკითხების გადაწყვეტისას სამსახურის წარმომადგენლობის უფლებამოსილება სამსახურის უფროსის მიერ კანონმდებლობით დადგენილი წესით შეიძლება დელეგირებულ იქნეს სამსახურის სხვა მოხელეებზე ან სტრუქტურულ ქვედანაყოფებზე ინდივიდუალური ადმინისტრაციულ-სამართლებრივი აქტით.

    მუხლი 4. სამსახურის ფუნქციები და უფლებამოსილებები

სამსახური (სამსახურის უფლებამოსილი მოსამსახურე) თავისი კომპეტენციის ფარგლებში:

ა) უზრუნველყოფს საგადასახადო და საბაჟო კანონმდებლობის დაცვასა და შესრულებაზე კონტროლს;

ბ) ორგანიზაციას უწევს საქართველოს საგადასახადო კოდექსით განსაზღვრული გადასახადების, აგრეთვე სხვა კანონებით განსაზღვრული და მის კომპეტენციაში შემავალი გადასახდელების ადმინისტრირებას;

გ) ახორციელებს გადამხდელთა საგადასახადო და საბაჟო კონტროლს, აგრეთვე სახელმწიფო ფიტოსანიტარიულ სასაზღვრო-საკარანტინო, სახელმწიფო ვეტერინარულ სასაზღვრო-საკარანტინო, სანიტარიულ-საკარანტინო და სხვა კონტროლს;

დ) ახორციელებს ტერიტორიული ორგანოებისა და სპეციალიზებული სტრუქტურული ქვედანაყოფების საქმიანობის მართვას, კოორდინაციას და ზედამხედველობას;

ე) შეიმუშავებს საქართველოს საგადასახადო და საბაჟო კოდექსებით განსაზღვრული დადგენილებებისა და ბრძანებების პროექტებს და მეთოდურ მითითებებს, აგრეთვე, კომპეტენციის ფარგლებში, მონაწილეობს საგადასახადო და საბაჟო სფეროში, სისხლის სამართლის სფეროში კანონპროექტებისა და საერთაშორისო ხელშეკრულებების მომზადებასა და განხილვაში;

ვ) დადგენილი წესით მონაწილეობს სასამართლოში საქმეთა განხილვის დროს;

ზ) ახდენს სამსახურის სისტემაში კადრების შერჩევასა და განაწილებას, ახორციელებს ღონისძიებებს კადრების გადამზადებისა და კვალიფიკაციის ამაღლებისათვის;

თ) მონაწილეობს საერთაშორისო ურთიერთობებში და თანამშრომლობს საზღვარგარეთის ქვეყნების შესაბამის სამსახურებთან;

ი) იღებს გადაწყვეტილებებს ,,ლიცენზიებისა და ნებართვების შესახებ“ საქართველოს კანონით მის ქვემდებარეობას მიკუთვნებული ლიცენზიებისა და ნებართვების გაცემის, ცვლილებების შეტანის, გაუქმების, მოქმედების შეჩერების და განახლების თაობაზე;

კ) იხილავს საიმპორტო საქონლისათვის გრანტის ან ჰუმანიტარული დახმარების სტატუსის მინიჭების საკითხს და იღებს სათანადო გადაწყვეტილებას;

ლ) აწარმოებს საგადასახადო, საბაჟო და ადმინისტრაციულ სამართალდარღვევათა, სისხლის სამართლის საქმეებს მოქმედი კანონმდებლობით საქართველოს ფინანსთა სამინისტროს კომპეტენციას მიკუთვნებულ სამართალდარღვევებთან და დანაშაულებთან დაკავშირებით;

მ) უზრუნველყოფს საფინანსო-ეკონომიკურ სფეროში დანაშაულთა გამოვლენას, გახსნას და აღკვეთას და ამ მიზნით:

მ.ა) ახორციელებს ოპერატიულ-სამძებრო საქმიანობას, იყენებს ფიზიკურ იძულებას კანონით დადგენილი წესითა და ფარგლებში;

მ.ბ) ატარებს სისხლის სამართლის საპროცესო კოდექსით გათვალისწინებულ ყველა საგამოძიებო და საპროცესო მოქმედებას, გამოითხოვს მოსამართლის ბრძანებას კანონმდებლობით დადგენილ შემთხვევაში და დადგენილი წესით;

მ.გ) წინასწარი გამოძიების სტადიაზე საქართველოს სისხლის სამართლის საპროცესო კოდექსით დადგენილი წესით ახორციელებს შესაბამის ექსპერტიზას;

ნ) დანაშაულისა თუ სხვა სამართალდარღვევის შესახებ საკმარისი მონაცემების არსებობისას აჩერებს და ათვალიერებს სატრანსპორტო საშუალებებს, ასევე ამოწმებს მოქალაქის პირადობის დამადასტურებელ საბუთებს, ახდენს პირის (საქონლისა და სატრასპორტო საშუალებების) დაკავებას საქართველოს სისხლის სამართლის საპროცესო და საქართველოს ადმინისტრაციულ სამართალდარღვევათა კოდექსების შესაბამისად;

ო) შეიმუშავებს ერთობლივ ღონისძიებებს სხვა სამართალდამცავ ორგანოებთან ერთად, მასზე დაკისრებული ამოცანების შესრულების უზრუნველსაყოფად;

პ) სისხლის სამართლის ან ადმინისტრაციულ სამართალდარღვევათა საქმის წარმოებასთან დაკავშირებით იძახებს ფიზიკურ პირს, სთხოვს ახსნა-განმარტებას და საქმესთან (მასალებთან) დაკავშირებულ საჭირო დოკუმენტებს;

ჟ) ახორციელებს კანონმდებლობით დაკისრებულ სხვა უფლება-მოვალეობებს.

    მუხლი 5. სამსახურის ხელმძღვანელობა

1. სამსახურს ხელმძღვანელობს სამსახურის უფროსი, რომელსაც საქართველოს ფინანსთა მინისტრის წარდგინებით თანამდებობაზე ნიშნავს და თანამდებობიდან ათავისუფლებს საქართველოს პრემიერ-მინისტრი.

2. სამსახურის უფროსი:

ა) წარმოადგენს სამსახურს ან უფლებამოსილებას ანიჭებს სამსახურის წარმომადგენლობაზე, თუ კანონით სხვა რამ არ არის გათვალისწინებული;

ბ) ხელმძღვანელობს და კოორდინაციას უწევს სამსახურის საქმიანობას, უზრუნველყოფს კანონმდებლობით დაკისრებული მოვალეობების ჯეროვან შესრულებას;

გ) ანაწილებს ფუნქციებს სამსახურის უფროსის მოადგილეებს შორის, კოორდინაციას უწევს მათ მუშაობას, განსაზღვრავს სამსახურის მოსამსახურეთა ფუნქციებსა და მათი პერსონალური პასუხისმგებლობის საკითხებს;

დ) უშუალოდ, ხოლო დელეგირების შემთხვევაში  სამსახურის მოხელეების, ცენტრალური აპარატის სტრუქტურული ქვედანაყოფების, ტერიტორიული ორგანოების და მათი სტრუქტურული ქვედანაყოფების მეშვეობით წყვეტს სამსახურის კომპეტენციას მიკუთვნებულ საკითხებს;

ე) გამოსცემს მეთოდურ მითითებებს, რომელთა შესრულებაც სავალდებულოა სამსახურის საჯარო მოსამსახურეთათვის, ახორციელებს სამსახურებრივ ზედამხედველობას, უზრუნველყოფს და ახორციელებს სამსახურის მოსამსახურეთა წახალისებასა და დისციპლინურად დასჯას;

ვ) თანამდებობაზე ნიშნავს და თანამდებობიდან ათავისუფლებს სამსახურის საჯარო მოსამსახურეებს, რომელთა დანიშვნისა და გათავისუფლების კომპეტენციაც არ გააჩნია საქართველოს ფინანსთა მინისტრს საქართველოს მთავრობის 2004 წლის 21 მაისის №39 დადგენილებით დამტკიცებული საქართველოს ფინანსთა სამინისტროს დებულების საფუძველზე;

ზ) კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს;

თ) თავისი კომპეტენციის ფარგლებში ანიჭებს სპეციალურ წოდებებს და შუამდგომლობს საქართველოს ფინანსთა მინისტრის წინაშე თანამშრომლებისათვის შესაბამისი სპეციალური წოდებების მინიჭების თაობაზე;

ი) მინისტრს დასამტკიცებლად წარუდგენს სამსახურის ცენტრალური აპარატის, ტერიტორიული ორგანოებისა და სტრუქტურული ქვედანაყოფების სტრუქტურას;

კ) ბიუჯეტით განსაზღვრული წლიური ხელფასის ფონდისა და საშტატო რიცხოვნების ფარგლებში შეიმუშავებს და ამტკიცებს სამსახურის ცენტრალური აპარატის, ტერიტორიული ორგანოებისა და სტრუქტურული ქვედანაყოფების საშტატო ნუსხას;

ლ) საქართველოს ფინანსთა მინისტრს წარუდგენს წინადადებებს შემოსავლების სამსახურში სამსახურის გავლის საკითხების გადაწყვეტის შესახებ და სამსახურის საქმიანობასთან დაკავშირებული ნორმატიული აქტების თაობაზე;

მ) თავისი კომპეტენციის ფარგლებში განკარგავს სამსახურისათვის გამოყოფილ ფულად სახსრებს, პასუხისმგებელია სამსახურის მატერიალურ-ტექნიკური ბაზის შენახვასა და მიზნობრივად გამოყენებაზე;

ნ) ინდივიდუალური ადმინისტრაციულ-სამართლებრივი აქტით ქმნის უფროსის სათათბირო ორგანოს და განსაზღვრავს მის რიცხოვნობას და პერსონალურ შემადგენლობას;

ო) კომპეტენციის ფარგლებში იღებს გადაწყვეტილებებს ოპერატიულ-სამძებრო საქმიანობის განხორციელებაზე;

პ) კომპეტენციის ფარგლებში ძალადაკარგულად ცნობს სამსახურის შესაბამისი მოსამსახურეების საქართველოს კანონმდებლობასთან შეუსაბამო ან მიზანშეუწონელ გადაწყვეტილებებს;

ჟ) კანონმდებლობით გათვალისწინებულ შემთხვევებში ამტკიცებს საკვალიფიკაციო მოთხოვნებს;

რ) ახორციელებს კანონმდებლობით მის კომპეტენციას მიკუთვნებულ სხვა უფლება-მოვალეობებს.

3. სამსახურის უფროსი ანგარიშვალდებულია საქართველოს ფინანსთა მინისტრის წინაშე.

4. სამსახურის უფროსს ჰყავს სამსახურის საშტატო განრიგით გათვალისწინებული რაოდენობის მოადგილე, რომლებიც ხელმძღვანელობენ უფროსის მიერ განსაზღვრულ მიმართულებებს.

5. სამსახურის სტრუქტურული ქვედანაყოფების, ტერიტორიული ორგანოებისა და სტრუქტურული ერთეულების ხელმძღვანელები წარმართავენ შესაბამისი სტრუქტურული ქვედანაყოფების, ტერიტორიული ორგანოებისა და ერთეულების საქმიანობას.

6. სამსახურის უფროსის არყოფნის შემთხვევაში მის მოვალეობას საქართველოს ფინანსთა მინისტრის დავალებით ასრულებს უფროსის ერთ-ერთი მოადგილე.

    მუხლი 6. სამსახურის სტრუქტურა

1. სამსახური დაკისრებულ მოვალეობებს ასრულებს საქართველოს მთელ ტერიტორიაზე. სამსახური შედგება ცენტრალური აპარატის, განსაკუთრებული ნიშნის მიხედვით შექმნილი სტრუქტურული ქვედანაყოფებისა და ტერიტორიული ორგანოებისაგან, რომლებიც ქმნიან ერთიან ცენტრალიზებულ სისტემას.

2. სამსახურის ცენტრალური აპარატის სტრუქტურული ქვედანაყოფებია:

ა) სამსახურის უფროსის აპარატი;

ბ) ადმინისტრაციული დეპარტამენტი;

გ) იურიდიული დეპარტამენტი;

დ) მომსახურების დეპარტამენტი;

ე) მეთოდოლოგიის დეპარტამენტი;

ვ) საბაჟო კონტროლის დეპარტამენტი;

ზ) სპეციალურ გამოკვლევათა და ფინანსური ექსპერტიზის დეპარტამენტი;

თ) ინფორმაციის დამუშავების და ანალიზის დეპარტამენტი.

3. სამსახურის განსაკუთრებული ნიშნის მიხედვით შექმნილი სტრუქტურული ქვედანაყოფებია:

ა) საგამოძიებო დეპარტამენტი;

ბ) სპეციალური დანიშნულების რაზმი;

გ) აუდიტის დეპარტამენტი.

4. სამსახურის ტერიტორიული ორგანოებია:

ა) აფხაზეთის საგადასახადო ინსპექცია;

ბ) მსხვილ გადამხდელთა საგადასახადო ინსპექცია;

გ) თბილისის რეგიონალური ცენტრი (საგადასახადო ინსპექცია);

დ) ბათუმის რეგიონალური ცენტრი (საგადასახადო ინსპექცია);

ე) ქუთაისის რეგიონალური ცენტრი (საგადასახადო ინსპექცია);

ვ) რუსთავის რეგიონალური ცენტრი (საგადასახადო ინსპექცია);

ზ) ფოთის რეგიონალური ცენტრი (საგადასახადო ინსპექცია);

თ) გორის რეგიონალური ცენტრი (საგადასახადო ინსპექცია);

ი) თელავის რეგიონალური ცენტრი (საგადასახადო ინსპექცია);

კ) ახალციხის რეგიონალური ცენტრი (საგადასახადო ინსპექცია);

ლ) ცხინვალის რეგიონალური ცენტრი (საგადასახადო ინსპექცია);

მ) გურიის საგადასახადო ინსპექცია.

5. საგამოძიებო დეპარტამენტის, სპეციალური დანიშნულების რაზმის და აუდიტის დეპარტამენტის, როგორც განსაკუთრებული ნიშნის მიხედვით შექმნილი შემოსავლების სამსახურის სტრუქტურული ქვედანაყოფების დებულებები მტკიცდება საქართველოს ფინანსთა მინისტრის ნორმატიული აქტით.

    მუხლი 7. სამსახურის ცენტრალური აპარატის სტრუქტურული ქვედანაყოფების სტრუქტურა

სამსახურის ცენტრალური აპარატის სტრუქტურული ქვედანაყოფები შედგება შემდეგი სტრუქტურული ერთეულებისაგან:

ა) სამსახურის უფროსის აპარატი:

ა.ა) საორგანიზაციო სამმართველო;

ა.ბ) სატელეფონო და ვიდეომონიტორინგის ცენტრი;

ბ) ადმინისტრაციული დეპარტამენტი:

ბ.ა) საფინანსო სამმართველო;

ბ.ბ) კადრების სამმართველო;

ბ.გ) სამეურნეო სამმართველო;

ბ.დ) საქმისწარმოების სამმართველო;

გ) იურიდიული დეპარტამენტი:

გ.ა) ექსპერტიზის სამმართველო;

გ.ბ) სასამართლო დავების სამმართველო;

გ.გ) საჩივრების სამმართველო;

დ) მომსახურების დეპარტამენტი:

დ.ა) აქციზური მარკების სამმართველო;

დ.ბ) არაპირდაპირი გადასახადის სამმართველო;

დ.გ) გადამხდელთა მომსახურების სამმართველო;

დ.დ) სათამაშო ბიზნესის რეგულირების სამმართველო;

დ.ე) გრანტებისა და ჰუმანიტარული დახმარების სამმართველო;

ე) მეთოდოლოგიის დეპარტამენტი:

ე.ა) დაბეგვრის მეთოდოლოგიის სამმართველო;

ე.ბ) საბაჟო პროცედურების მეთოდოლოგიის სამმართველო;

ვ) საბაჟო კონტროლის დეპარტამენტი:

ვ.ა) საბაჟო დამუშავების ოპერაციების მონიტორინგის სამმართველო;

ვ.ბ) საბაჟო კონტროლის ქვეშ გადაადგილებაზე ზედამხედველობის სამმართველო;

ვ.გ) ვეტერინარული, სანიტარიული და ფიტოსანიტარიული კონტროლის ორგანიზაციის სამმართველო;

ვ.დ) სპეციალური საბაჟო კონტროლის ორგანიზაციის სამმართველო;

ზ) სპეციალურ გამოკვლევათა და ფინანსური ექსპერტიზის დეპარტამენტი:

ზ.ა) განსაკუთრებით მნიშვნელოვან საქმეთა სამმართველო;

ზ.ბ) სპეციალურ გამოკვლევათა სამმართველო;

თ) ინფორმაციის დამუშავების და ანალიზის დეპარტამენტი:

თ.ა) რისკების მართვის სამმართველო;

თ.ბ) სტატისტიკის და ანალიზის სამმართველო;

თ.გ) ადმინისტრირების ღონისძიებების სამმართველო.

    მუხლი 8. სამსახურის უფროსის აპარატი

1. საორგანიზაციო სამმართველოს ძირითადი ფუნქციებია:

ა) პროტოკოლით გათვალისწინებული ღონისძიებების, უცხო ქვეყნების, საერთაშორისო ორგანიზაციების უმაღლესი და მაღალი რანგის ოფიციალური დელეგაციების ვიზიტების, შემოსავლების სამსახურის მიერ გასამართი ღონისძიებების ორგანიზაციული უზრუნველყოფა, სამსახურის ოფიციალური დელეგაციების (თანამშრომელთა) უცხოეთში მივლინების ორგანიზება;

ბ) შემოსავლების სამსახურის საერთაშორისო ურთიერთობების კოორდინაცია;

გ) საზოგადოებრივ ორგანიზაციებთან, მასობრივ საინფორმაციო საშუალებებთან ურთიერთობის წარმართვა; სამსახურის მიერ დაგეგმილი და განხორციელებული ღონისძიებების საზოგადოებასთან და მასმედიასთან ურთიერთობის საკითხებთან დაკავშირებული რეკომენდაციების მომზადება; სამსახურის საქმიანობასთან დაკავშირებით ოფიციალური შეტყობინების, განცხადების და სხვა საინფორმაციო მასალების მომზადება;

დ) საჯარო ინფორმაციის გაცემის ორგანიზება;

ე) სამსახურის ხელმძღვანელობის თათბირების ორგანიზება, თათბირების ოქმების წარმოება, საოქმო დავალების შესრულების ვადების კონტროლი;

ვ) მოქალაქეთა მიღების ორგანიზება;

ზ) კომპეტენციის ფარგლებში სამსახურის უფროსის სხვა დავალებების შესრულება.

2. სატელეფონო და ვიდეომონიტორინგის ცენტრის ძირითადი ფუნქციებია:

ა) ფიზიკური და იურიდიული პირებისათვის, ორგანიზაციებისათვის კონსულტაციების გაწევა საბაჟო და საგადასახადო კანონმდებლობის გამოყენების თაობაზე სატელეფონო და ელექტრონული კომუნიკაციების (ვებგვერდი, ელექტრონული ფოსტა, ფაქსი) მეშვეობით;

ბ) გადამხდელთათვის და დაინტერესებული პირებისათვის ინფორმაციების მიწოდება საბაჟო და საგადასახადო კანონმდებლობის საკითხებზე საინფორმაციო კომუნიკაციების საშუალებებით (ბროშურები, სამახსოვროები, სხვა ბეჭდვითი გამოცემები, ინტერნეტსაშუალებები, სატელევიზიო გადაცემები);

გ) დაინტერესებული პირებისათვის კომპეტენციის ფარგლებში ინფორმაციების მიწოდება სამსახურის უფლებამოსილებაში შემავალ საკითხებთან დაკავშირებით;

დ) კომპეტენციის ფარგლებში ანალიტიკური მასალების მომზადებაში მონაწილეობა;

ე) საბაჟო და საგადასახადო მომსახურების მიმდინარე საქმიანობის ონლაინ რეჟიმში კოორდინაცია და მუდმივი მონიტორინგის განხორციელება;

ვ) მონიტორინგის შედეგების ანალიზი და საჭიროების შემთხვევაში რიგების აღმოფხვრის, საბაჟო და საგადასახადო მომსახურების ხარისხის გაუმჯობესების მიზნით შესაბამისი რეაგირება; გამოვლენილი დარღვევების შესახებ სამსახურის ხელმძღვანელობის ინფორმირება;

ზ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 9. ადმინისტრაციული დეპარტამენტი

1. საფინანსო სამმართველოს ძირითადი ფუნქციებია:

ა) სამსახურის სისტემის ნაერთი ბიუჯეტის პროექტის მომზადება და საქართველოს ფინანსთა სამინისტროში წარდგენა;

ბ) წლიური საბიუჯეტო კანონით, სამსახურის ამოცანებისა და ფუნქციების შესრულების მიზნით, გამოყოფილი ფულადი სახსრების მართვა;

გ) საშტატო ნუსხის პროექტის მომზადება და ხელმძღვანელისთვის დასამტკიცებლად წარდგენა;

დ) კომპეტენციის ფარგლებში, მოქმედი კანონმდებლობის შესაბამისად, სახელმწიფო შესყიდვების განხორციელება;

ე) კომპეტენციის ფარგლებში სამსახურის ხარჯთანუსხის შესრულების პერიოდული ანგარიშების მომზადებაში მონაწილეობის მიღება;

ვ) სამსახურის სისტემის ფინანსური და მატერიალური აქტივებისა და პასივების აღრიცხვა-ანგარიშგების წარმოება;

ზ) საბუღალტრო საქმიანობის წარმართვა თანამედროვე მოთხოვნათა დონეზე; სამსახურის ბიუჯეტის ხარჯვითი ნაწილის შესრულება;

თ) კვარტალური და წლიური საფინანსო, სტატისტიკური, აგრეთვე სამსახურის ნაერთი ბიუჯეტის შესრულების ანგარიშგების მომზადება და მათი დროულად წარდგენა;

ი) მოსამსახურეთა შრომის ანაზღაურების ორგანიზება და სოციალური დაცვის მექანიზმების უზრუნველყოფა;

კ) საპენსიო საბუთების გაანგარიშება წელთა ნამსახურობის მიხედვით;

ლ) კომპეტენციის ფარგლებში სამსახურის უფროსის სხვა დავალებების შესრულება.

2. კადრების სამმართველოს ძირითადი ფუნქციებია:

ა) დაწესებულების შინაგანაწესის შემუშავება და სტრუქტურული ერთეულების ხელმძღვანელების მონაწილეობით მის განხორციელებაზე კონტროლის გაწევა. წარდგინების შესაბამისად დისციპლინური პასუხისმგებლობის გამოყენებასთან დაკავშირებით სამსახურის უფროსის ინდივიდუალური ადმინისტრაციულ-სამართლებრივი აქტის (ბრძანების) პროექტების მომზადება;

ბ) დადგენილი წესის შესაბამისად, სისტემის საჯარო მოსამსახურეთა პირადი საქმეების წარმოება, საჭიროებისამებრ მოსამსახურეთა შრომის წიგნაკებში შესაბამისი ჩანაწერების შეტანა;

გ) წარდგინების საფუძველზე, დადგენილი წესის შესაბამისად, მოსამსახურეთა დანიშვნის, განთავისუფლებისა და გადაადგილების თაობაზე სამსახურის უფროსის ინდივიდუალური ადმინისტრაციულ-სამართლებრივი აქტების (ბრძანებების) პროექტების მომზადება;

დ) დადგენილი წესის შესაბამისად, სამსახურის სისტემის მოსამსახურეთათვის სახელმწიფო სპეციალური წოდების მინიჭების თაობაზე წინადადებების მომზადება;

ე) სამსახურის უფროსის გადაწყვეტილებით სისტემის მოსამსახურეთათვის დადგენილი წესით კონკურსის და ატესტაციის ჩატარების ორგანიზება, დადგენილი წესის შესაბამისად პრაქტიკისა და სტაჟირების გავლასთან დაკავშირებული საკითხების ორგანიზება; სამინისტროს ადამიანური რესურსების მართვის დეპარტამენტის სასწავლო ცენტრში სამსახურის მოსამსახურეთა მომზადების, გადამზადების (კვალიფიკაციის შეცვლა) და კვალიფიკაციის ამაღლების უზრუნველყოფის საკითხების კოორდინაცია.

3. სამეურნეო სამმართველოს ძირითადი ფუნქციებია:

ა) სამსახურის სისტემაში ძირითადი საშუალებების, სასაქონლო-მატერიალური ფასეულობების განაწილება, კონტროლი და ცენტრალურ აპარატში ინვენტარიზაციის ჩატარების უზრუნველყოფა;

ბ) სამსახურის სისტემის კუთვნილი ავტოსატრანსპორტო საშუალებების აღრიცხვა და საწვავის გაცემა განსაზღვრული ლიმიტების ფარგლებში;

გ) სამსახურის სისტემის მატერიალურ-ტექნიკური უზრუნველყოფა;

დ) ხელმძღვანელობასთან შეთანხმებით კაპიტალური და მიმდინარე სამშენებლო და სარემონტო სამუშაოების ზედამხედველობა;

ე) სასაწყობო მეურნეობის წარმოება;

ვ) კომპეტენციის ფარგლებში სამსახურის უფროსის სხვა დავალებების შესრულება.

4. საქმისწარმოების სამმართველოს ძირითადი ფუნქციებია:

ა) სამსახურში საქმისწარმოების ორგანიზება და კონტროლი; შემოსული და გასული კორესპონდენციის რეგისტრაცია, ზემდგომი ორგანოებისა და სამსახურის ხელმძღვანელის გადაწყვეტილებათა შესრულებაზე კონტროლი; შესრულებული დოკუმენტაციის აღრიცხვა და ორგანიზება;

ბ) სამსახურის უფროსის ინდივიდუალური ადმინისტრაციულ-სამართლებრივი აქტებისა და დავალებების რეგისტრაცია, მათი შესრულების ორგანიზების უზრუნველყოფა, გაწეული მუშაობის შედეგების შესახებ ინფორმაციის მომზადება სამსახურის უფროსისათვის;

გ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 10. იურიდიული დეპარტამენტი

1. ექსპერტიზის სამმართველოს ძირითადი ფუნქციებია:

ა) კომპეტენციის ფარგლებში შემოსავლების სამსახურში შემუშავებული ან სხვა სახელისუფლებო ორგანოებიდან გადმოგზავნილი საკანონმდებლო და კანონქვემდებარე ნორმატიული აქტების პროექტების სამართლებრივი ექსპერტიზის წარმოება;

ბ) სამსახურის საქმიანობის მარეგულირებელი საკანონმდებლო და კანონქვემდებარე ნორმატიული აქტების პროექტების მომზადების ორგანიზება;

გ) კომპეტენციის ფარგლებში სამსახურის უფროსის სხვა დავალებების შესრულება.

2. სასამართლო დავების სამმართველოს ძირითადი ფუნქციებია:

ა) კომპეტენციის ფარგლებში შესაბამისი მინდობილობის (რწმუნებულების) საფუძველზე სამსახურის ინტერესების წარმომადგენლობა სასამართლო და სხვა სახის დავებში;

ბ) სასამართლო და სხვა სახის დავების წარმოშობის მიზეზების ანალიზი და შესაბამისი რეკომენდაციების შემუშავება და ხელმძღვანელობისათვის წარდგენა;

გ) კომპეტენციის ფარგლებში სამსახურის უფროსის სხვა დავალებების შესრულება.

3. საჩივრების სამმართველოს ძირითადი ფუნქციებია:

ა) სამსახურში შემოსული საჩივრების განხილვა და შესაბამისი გადაწყვეტილებების პროექტების მომზადება;

ბ) სათანადო ინფორმაციის მომზადება საჩივრების განსახილველად დანიშნულ სხდომებზე გასატანად;

გ) დავების განმხილველი სხდომების ორგანიზება და სხდომის ოქმების წარმოების უზრუნველყოფა;

დ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 11. მომსახურების დეპარტამენტი

1. აქციზური მარკების სამმართველოს ძირითადი ფუნქციებია:

ა) კომპეტენციის ფარგლებში მოქმედი საგადასახადო და საბაჟო კანონმდებლობის და განხორციელებული საკანონმდებლო ცვლილებების ეფექტურობის ანალიზის უზრუნველყოფა და შესაბამისი ცვლილებების და დამატებების პროექტების მომზადება;

ბ) აქციზური მარკების მიღებისა და გაცემის ორგანიზება, აღრიცხვა, ინვენტარიზაცია და კომპეტენციის ფარგლებში ანალიტიკური მასალების მომზადებაში მონაწილეობა; საქართველოს ფინანსთა სამინისტროსთან ერთად მბეჭდავ კომპანიებთან გაფორმებული ხელშეკრულებების პირობების დაცვაზე ზედამხედველობა;

გ) წინადადებების მომზადება აქციზური მარკების დამცავი ნიშნებისა და დიზაინის სრულყოფისათვის;

დ) საგადასახადო ორგანოს თანამშრომლებისათვის კონსულტაციის გაწევა აქციზური მარკების გამოყენების, კონტროლისა და დამცავი ნიშნების გაყალბების პრევენციის საკითხებთან დაკავშირებით;

ე) კომპეტენციის ფარგლებში სამსახურის უფროსის სხვა დავალებების შესრულება.

2. არაპირდაპირი გადასახადის სამმართველოს ძირითადი ფუნქციებია:

ა) კომპეტენციის ფარგლებში მოქმედი საგადასახადო და საბაჟო კანონმდებლობის და განხორციელებული ცვლილებების ეფექტურობის ანალიზის უზრუნველყოფა და შესაბამისი ცვლილებების და დამატებების პროექტების მომზადება;

ბ) საგადასახადო ორგანოების უზრუნველყოფა ანგარიშ-ფაქტურებით და დღგ-ის გადამხდელის სარეგისტრაციო სერტიფიკატებით. წინადადებების მომზადება და დღგ-ით დაბეგვრაზე შესაბამისი ხელშეკრულებებით გათვალისწინებული სპეციალური დღგ-ის ანგარიშ-ფაქტურა-სერტიფიკატების გაცემა; კომპეტენციის ფარგლებში ანალიტიკური მასალების მომზადებაში მონაწილეობა;

გ) წინადადებების მომზადება მკაცრი აღრიცხვის ბლანკების და სათამაშო ბიზნესის მოსაკრებლის გადახდის ნიშნების ბეჭდვის ორგანიზებაზე და მათი გაცემის უზრუნველყოფა;

დ) კომპეტენციის ფარგლებში სამსახურის უფროსის სხვა დავალებების შესრულება.

3. გადამხდელთა მომსახურების სამმართველოს ძირითადი ფუნქციებია:

ა) საგადასახადო და საბაჟო ორგანოებში გადასახადის გადამხდელთა მომსახურების ორგანიზების პროცესის კოორდინაცია. წინადადებების და მეთოდური მითითებების მომზადება;

ბ) დადგენილი წესით საწარმოთა (მათ შორის, ინდივიდუალურ საწარმოთა), არასამეწარმეო (არაკომერციულ) იურიდიულ პირთა, ფილიალების (წარმომადგენლობების) სახელმწიფო და საგადასახადო რეგისტრაციისა და გადასახადის გადამხდელთა საგადასახადო აღრიცხვის ერთიანი სახელმწიფო (მათ შორის, სამეწარმეო) რეესტრების წარმოების უზრუნველყოფა, კომპეტენციის ფარგლებში საგადასახადო და საბაჟო კანონმდებლობის სრულყოფაზე წინადადებების და შესაბამისი სამართლებრივი აქტების პროექტების მომზადების უზრუნველყოფა;

გ) უცხოური და საერთაშორისო საწარმოების და ორგანიზაციების საგადასახადო ორგანოში საგადასახადო აღრიცხვაზე აყვანის ძირითადი პრინციპების შემუშავება;

დ) სახელმწიფო და საგადასახადო რეგისტრაციის სრულყოფის მიზნით ურთიერთობების დამყარება სათანადო ორგანოებთან და მათგან ინფორმაციების მიღება, მისი შედარება გადამხდელთა სარეგისტრაციო ბაზებთან და ხარვეზების გამოვლენის შემთხვევაში ზომების მიღება მათ აღმოსაფხვრელად;

ე) არსებული პრაქტიკის განზოგადება სახელმწიფო (საგადასახადო) რეგისტრაციის შესახებ კანონმდებლობის გამოყენებაზე, საანგარიშგებო და სტატისტიკური მონაცემების გაანალიზება და შესაბამისი წინადადებების მომზადება ხელმძღვანელობისათვის წარსადგენად;

ვ) კომპეტენციის ფარგლებში მოქმედი საგადასახადო და საბაჟო კანონმდებლობის და განხორციელებული ცვლილებების ეფექტურობის ანალიზის უზრუნველყოფა და შესაბამისი ცვლილებების და დამატებების პროექტების მომზადება;

ზ) კომპეტენციის ფარგლებში საბაჟო და საგადასახადო ორგანოების შესაბამისი სტრუტურული ერთეულების საქმიანობის მონიტორინგი. დადგენილ ვადებში გადამხდელთა სახელმწიფო და საგადასახადო რეგისტრაციის მდგომარეობის მონიტორინგის განხორციელება საგადასახადო ორგანოების ჭრილში, მათი საქმიანობის გაანალიზება, პრაქტიკული დახმარების გაწევა საგადასახადო ორგანოებისათვის;

თ) ბანკის ან საბანკო ოპერაციების ცალკეულ სახეობათა შემსრულებელი ორგანიზაციების მიერ უცხოური საწარმოსათვის გახსნილ საბანკო ანგარიშებზე მოწოდებული ინფორმაციების დამუშავება და შესაბამისი საგადასახადო ორგანოების ინფორმირება;

ი) მომხმარებლებთან ნაღდი ფულით ანგარიშსწორებისას გამოსაყენებელი საკონტროლო-სალარო აპარატების მოდელების სახელმწიფო რეესტრის წარმოება და რეგისტრაციის პროცესის ორგანიზება;

კ) კომპეტენციის ფარგლებში სამსახურის უფროსის სხვა დავალებების შესრულება.

4. სათამაშო ბიზნესის რეგულირების სამმართველოს ძირითადი ფუნქციებია:

ა) კომპეტენციის ფარგლებში მოქმედი კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადება;

ბ) საქართველოს ტერიტორიაზე ლატარიების, აზარტული და სხვა მომგებიანი თამაშობების სახელმწიფოებრივი რეგულირება;

გ) კანონმდებლობით დადგენილი წესით აზარტული და სხვა მომგებიანი თამაშობების თითოეულ სახეობაზე ნებართვის გაცემა, ცვლილების შეტანა, გაუქმება, მოქმედების შეჩერება, განახლება და კანონით დადგენილი წესით ნებართვის მფლობელის მიერ სანებართვო პირობების შესრულების კონტროლი, აგრეთვე ამ სფეროში ნორმატიული აქტების პროექტების შემუშავება;

დ) ლატარიის ბილეთებისა და სხვა მომგებიან თამაშობებში მონაწილეობის დამადასტურებელი დოკუმენტების/ნივთის (გარდა ტოტალიზატორის ბილეთებისა) ლეგალიზაცია, განაღდებული და გაუქმებული ლატარიის ბილეთებისა და სხვა მომგებიან თამაშობებში მონაწილეობის დამადასტურებელი დოკუმენტების/ნივთის (გარდა ტოტალიზატორის ბილეთებისა) და ღირებულების მქონე ბლანკების (ფორმების, დოკუმენტების) ექსპერტიზა და უტილიზაცია;

ე) შემოსავლების სამსახურის ტერიტორიული და სპეციალიზებული ორგანოებიდან წარმოდგენილი ინფორმაციის მიღება, გაანალიზება და შესაბამისი წინადადებების მომზადება;

ვ) შემოსავლების სამსახურის ხელმძღვანელობისათვის პერიოდულად სათანადო ანგარიშის წარდგენა;

ზ) კომპეტენციის ფარგლებში სამსახურის უფროსის სხვა დავალებების შესრულება.

5. გრანტებისა და ჰუმანიტარული დახმარების სამმართველოს ძირითადი ფუნქციებია:

ა) კომპეტენციის ფარგლებში მოქმედი კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადება;

ბ) საიმპორტო საქონლისათვის გრანტის ან ჰუმანიტარული დახმარების სტატუსის მინიჭების საკითხის განხილვა და სათანადო გადაწყვეტილების პროექტის მომზადება;

გ) გრანტით და ჰუმანიტარული დახმარებით იმპორტირებული საქონლის აღრიცხვა;

დ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 12. მეთოდოლოგიის დეპარტამენტი

1. დაბეგვრის მეთოდოლოგიის სამმართველოს ძირითადი ფუნქციებია:

ა) კომპეტენციის ფარგლებში საგადასახადო და საბაჟო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადება;

ბ) კომპეტენციის ფარგლებში საგადასახადო და საბაჟო ორგანოებში მეთოდოლოგიური ერთიანობის დაცვის უზრუნველყოფა შემუშავებული ინსტრუქციების, განმარტებების და რეკომენდაციების ნაწილში;

გ) კომპეტენციის ფარგლებში გადამხდელთა დაბეგვრასთან და საგადასახადო/საბაჟო სამართალდარღვევებთან დაკავშირებული ინსტრუქციის პროექტების, მეთოდური მითითებების და სხვა აქტების, აგრეთვე საგადასახადო დეკლარაციების და გაანგარიშებების სხვა ფორმების (მათ შორის საჯარო მოხელეთა დეკლარაციების) და მათი შევსების წესების შემუშავება;

დ) შემოსავლების სამსახურის მიერ ადმინისტრირებადი გადასახადებისა და მოსაკრებლების დეკლარაციების კუთხით საგადასახადო ორგანოთა საქმიანობის მეთოდოლოგიურად უზრუნველყოფა;

ე) სხვა სახელმწიფოებთან ორმაგი დაბეგვრის შესახებ ხელშეკრულების პროექტების მომზადებასა და განხილვაში მონაწილეობა. საერთაშორისო ხელშეკრულების გამოყენების საკითხებზე ნორმატიული და მეთოდოლოგიური დოკუმენტების შემუშავება კომპეტენციის ფარგლებში;

ვ) წარმოდგენილი ანგარიშების ფორმების გაანალიზება და გამოკვეთილი ტენდენციების განზოგადება კომპეტენციის ფარგლებში;

ზ) კომპეტენციის ფარგლებში საგადასახადო კანონმდებლობის გამოყენებასთან დაკავშირებით გადამხდელებისაგან, საგადასახადო და საბაჟო ორგანოებიდან და სხვა უწყებებიდან სამსახურში შემოსულ წერილებზე პასუხების მომზადება და დასმულ საკითხებზე ერთიანი მიდგომის გამომუშავება;

თ) საგადასახადო და საბაჟო ვალდებულებების ვადის შეცვლის, რესტრუქტურიზაციის და დავალიანებათა ჩამოწერის, საგადასახადო ვალდებულების შესრულების უზრუნველყოფის ღონისძიებების შესახებ სამართლებრივი აქტების და მეთოდური რეკომენდაციების პროექტების მომზადება;

ი) კომპეტენციის ფარგლებში სამსახურის უფროსის სხვა დავალებების შესრულება.

2. საბაჟო პროცედურების მეთოდოლოგიის სამმართველოს ძირითადი ფუნქციებია:

ა) კომპეტენციის ფარგლებში საბაჟო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადება;

ბ) კომპეტენციის ფარგლებში საბაჟო ორგანოებში მეთოდოლოგიური ერთიანობის დაცვის უზრუნველყოფა შემუშავებული ინსტრუქციების, განმარტებების და რეკომენდაციების ნაწილში;

გ) კომპეტენციის ფარგლებში საბაჟო კანონმდებლობის გამოყენებასთან დაკავშირებით გადამხდელებისაგან, საგადასახადო ორგანოებიდან და სხვა უწყებებიდან სამსახურში შემოსულ წერილებზე პასუხების მომზადება და დასმულ საკითხებზე ერთიანი მიდგომის გამომუშავება;

დ) საბაჟო პროცედურების, აგრეთვე საბაჟო ორგანოების და მათი სტრუქტურული ერთეულების მუშაობის ტექნოლოგიური სქემების შემუშავება და მათი სრულყოფა. სამსახურის ცენტრალური აპარატის შესაბამისი ქვედანაყოფების და სამსახურის ტერიტორიული და სპეციალიზებული ორგანოების მიერ წინასწარი ოპერაციების, საბაჟო პროცედურების განხორციელებისას საბაჟო კანონმდებლობის (მათ შორის, საერთაშორისო ხელშეკრულებების) ნორმათა გამოყენების პრაქტიკის (პრაქტიკული საქმიანობის, მისი ამსახველი დოკუმენტების და მონაცემების) შესწავლა, ხოლო შესწავლის შედეგებიდან გამომდინარე შესაბამისი რეკომენდაციებისა და პროექტების შემუშავება;

ე) ჰარმონიზირებული სისტემების და საგარეო-ეკონომიკური საქმიანობის ეროვნული სასაქონლო ნომენკლატურის საკითხებზე მუშაობა, ჰარმონიზირებული სისტემის ცვლილებების სისტემატიზაციის და ამ ცვლილებებთან სასაქონლო ნომენკლატურის შესაბამისობაში მოყვანის, აგრეთვე ამ სფეროში საქართველოს მიერ ნაკისრი ვალდებულებების შესრულების უზრუნველსაყოფად შესაბამისი რეკომენდაციების და წინადადებების წარდგენა;

ვ) საქონლის საბაჟო ღირებულების განსაზღვრის საკითხებზე მუშაობა, აღნიშნული სფეროს მომწესრიგებელი საერთაშორისო ხელშეკრულებების მიღების და მათში ცვლილებებისა და დამატებების შეტანის თაობაზე ინფორმაციის სისტემატიზაცია, ამ სფეროში საქართველოს მიერ ნაკისრი ვალდებულებების შესრულების უზრუნველსაყოფად შესაბამისი რეკომენდაციების და წინადადებების წარდგენა;

ზ) ამ პუნქტის ,,ე“ და ,,ვ“ ქვეპუნქტებით გათვალისწინებულ საკითხებზე შესაბამისი სამართლებრივი აქტების პროექტების მომზადება და არსებული სამართლებრივი აქტების სრულყოფაზე წინადადებების შემუშავება;

თ) საბაჟო საქმის (მათ შორის, საერთაშორისო საბაჟო თანამშრომლობის) მომწესრიგებელ საერთაშორისო ხელშეკრულებებთან მიერთების, ასევე ამ ხელშეკრულებებში ცვლილებებისა და დამატებების შეტანის თაობაზე რეკომენდაციების შემუშავება, შესაბამის საერთაშორისო ორგანიზაციებთან მუშაობის წარმართვა;

ი) წინადადებების შემუშავება საბაჟო პროცედურების განხორციელებისათვის საჭირო ინფრასტრუქტურის განვითარების, კონტროლის მეთოდების და ტექნიკური საშუალებების დანერგვის თაობაზე;

კ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 13. საბაჟო კონტროლის დეპარტამენტი

1. საბაჟო დამუშავების ოპერაციების მონიტორინგის სამმართველოს ძირითადი ფუნქციებია:

ა) საბაჟო დამუშავების ოპერაციების მონიტორინგი და ზედამხედველობა; საბაჟო დამუშავების ოპერაციის განხორციელებისას საბაჟო კონტროლის თაობაზე გადაწყვეტილების მიღებისა და აღსრულების პროცესის მონიტორინგი;

ბ) რისკის მართვის სისტემის საფუძველზე შერჩეული საბაჟო კონტროლის ღონისძიებების ეფექტურობის შეფასება, საბაჟო კონტროლის განმახორციელებელ პირებზე ზედამხედველობა, შესაძლო არასასურველი პრაქტიკის გამოვლენა და მათი აღკვეთის მიზნით ღონისძიებების შემუშავება;

გ) საბაჟო დამუშავების ოპერაციის განხორციელებასთან დაკავშირებული საბაჟო პროცედურების წარმართვისას საქონლის მესაკუთრის ან/და მფლობელის მიერ საბაჟო ორგანოში წარდგენილი დოკუმენტაციის შერჩევა და ამ დოკუმენტაციის შემოწმება საბაჟო საქმის სფეროში საერთაშორისო თანამშრომლობისა და ურთიერთდახმარების მექანიზმების გამოყენებით, შემოწმების შედეგებზე შესაბამისი რეაგირება;

დ) საბაჟო კონტროლის განხორციელების და საბაჟო კონტროლის შედეგების რეალიზაციის ერთიანი პრინციპებისა და სტანდარტების დანერგვის, საბაჟო კონტროლის სრულყოფისა და ეფექტურობის გაზრდის მიზნით, კომპეტენციის ფარგლებში რეგიონალური ცენტრების (საგადასახადო ინსპექციების) საქმიანობის ზედამხედველობა, პრაქტიკული დახმარების აღმოჩენა და კონკრეტულ საკითხებზე შესასრულებლად სავალდებულო მითითებების მიცემა;

ე) საბაჟო საქმის ორგანიზებასთან დაკავშირებულ საკითხებზე საერთაშორისო ორგანიზაციებთან ურთიერთობების ორგანიზება. სამმართველოს კომპეტენციაში შემავალი საკითხების ანალიზისა და საზღვარგარეთის ქვეყნების გამოცდილების შესწავლის საფუძველზე დეპარტამენტის ხელმძღვანელობისათვის კანონმდებლობაში აუცილებელი ცვლილებებისა და დამატებების განხორციელების თაობაზე რეკომენდაციების წარდგენა, სამსახურის ცენტრალური აპარატის შესაბამის სტრუქტურულ ქვედანაყოფთან ერთად საბაჟო დამუშავების ოპერაციების განხორციელებასთან დაკავშირებული საბაჟო პროცედურების განხორციელების საკითხებზე შესაბამისი მეთოდური მითითებების მომზადება;

ვ) კომპეტენციის ფარგლებში სამსახურის უფროსის სხვა დავალებების შესრულება.

2. საბაჟო კონტროლის ქვეშ გადაადგილებაზე ზედამხედველობის სამმართველოს ძირითადი ფუნქციებია:

ა) საბაჟო კონტროლის ქვეშ გადაადგილებისას საბაჟო ვალდებულების დაფარვის საგარანტიო (საბანკო გარანტია, დაზღვევა, დეპოზიტი და სხვა) სისტემის ფუნქციონირების ორგანიზება და საგარანტიო სისტემის ერთიანი სტანდარტების დანერგვა;

ბ) საქონლისა და სატრანსპორტო საშუალებების დანიშნულების საბაჟო ორგანოში წარდგენისათვის დადგენილი ვადებისა და პირობების შესრულებაზე, მათ შორის საბაჟო კონტროლის ქვეშ მყოფი საქონლისა და სატრანსპორტო საშუალების აღრიცხვის მოწმობებით საქართველოს საბაჟო ტერიტორიაზე საქონლის გადაადგილების პირობების შესრულებაზე მონიტორინგი და შესაბამისი რეაგირება;

გ) სასაზღვრო საბაჟო ორგანოებში რისკის მართვის სისტემის საფუძველზე საბაჟო კონტროლის ღონისძიებების მეთოდების შემუშავება;

დ) სასაზღვრო საბაჟო ორგანოში საბაჟო კონტროლის ქვეშ გადაადგილების დაწყებასთან ან დასრულებასთან მიმართებით საბაჟო კონტროლის განხორციელების და საბაჟო კონტროლის შედეგების რეალიზაციის ერთიანი პრინციპებისა და სტანდარტების დანერგვის, საბაჟო კონტროლის სრულყოფისა და ეფექტურობის გაზრდის მიზნით კომპეტენციის ფარგლებში რეგიონალური ცენტრების (საგადასახადო ინსპექციების) საქმიანობის ზედამხედველობა, სამსახურის ტერიტორიული ორგანოებისათვის პრაქტიკული დახმარების აღმოჩენა და კონკრეტულ საკითხებზე შესასრულებლად სავალდებულო მითითებების მიცემა;

ე) სასაზღვრო საბაჟო პროცედურებთან დაკავშირებულ საკითხებზე საერთაშორისო ორგანიზაციებთან ურთიერთობების ორგანიზება; სამმართველოს კომპეტენციაში შემავალი საკითხების ანალიზისა და საზღვარგარეთის ქვეყნების გამოცდილების შესწავლის საფუძველზე დეპარტამენტის ხელმძღვანელობისათვის კანონმდებლობაში აუცილებელი ცვლილებებისა და დამატებების განხორციელების თაობაზე რეკომენდაციების წარდგენა, სამსახურის ცენტრალური აპარატის შესაბამის სტრუქტურულ ქვედანაყოფთან ერთად სასაზღვრო საბაჟო ორგანოში საბაჟო პროცედურების განხორციელების საკითხებზე შესაბამისი მეთოდური მითითებების მომზადება;

ვ) კომპეტენციის ფარგლებში სამსახურის უფროსის სხვა დავალებების შესრულება.

3. ვეტერინარული, სანიტარიული და ფიტოსანიტარიული კონტროლის ორგანიზაციის სამმართველოს ძირითადი ფუნქციებია:

ა) საბაჟო ორგანოების მიერ სახელმწიფო ფიტოსანიტარიული სასაზღვრო-საკარანტინო, სახელმწიფო ვეტერინარული სასაზღვრო-საკარანტინო, სანიტარიულ-საკარანტინო კონტროლის განხორციელების ორგანიზაცია;

ბ) სახელმწიფო ფიტოსანიტარიულ სასაზღვრო-საკარანტინო, სახელმწიფო ვეტერინარულ სასაზღვრო-საკარანტინო, სანიტარიულ-საკარანტინო კონტროლს დაქვემდებარებული საქონლის საქართველოს საბაჟო ტერიტორიაზე შემოტანის, გადაადგილებისა და გატანის პროცესის მონიტორინგი. სასაზღვრო საბაჟო ორგანოების მიერ საქონლის მიმართ კანონმდებლობით დადგენილი წესით განხორციელებული სახელმწიფო ფიტოსანიტარიული სასაზღვრო-საკარანტინო, სახელმწიფო ვეტერინარული სასაზღვრო-საკარანტინო, სანიტარიულ-საკარანტინო კონტროლს დაქვემდებარებული საქონლის შემოწმების შედეგების შესახებ ინფორმაციის მიღება, ანალიზი, პრობლემების გამოვლენა და რეაგირების თაობაზე წინადადებების მომზადება;

გ) სასაზღვრო საბაჟო ორგანოში სახელმწიფო ფიტოსანიტარიული სასაზღვრო-საკარანტინო, სახელმწიფო ვეტერინარული სასაზღვრო-საკარანტინო, სანიტარიულ-საკარანტინო კონტროლის განხორციელების და კონტროლის შედეგების რეალიზაციის ერთიანი პრინციპებისა და სტანდარტების დანერგვის, კონტროლის სრულყოფისა და ეფექტურობის გაზრდის მიზნით რეგიონალური ცენტრების (საგადასახადო ინსპექციების) საქმიანობის ზედამხედველობა, სამსახურის ტერიტორიული ორგანოებისათვის კომპეტენციის ფარგლებში პრაქტიკული დახმარების აღმოჩენა და კონკრეტულ საკითხებზე შესასრულებლად სავალდებულო მითითებების მიცემა;

დ) სასაზღვრო საბაჟო ორგანოში სახელმწიფო ფიტოსანიტარიულ სასაზღვრო-საკარანტინო, სახელმწიფო ვეტერინარულ სასაზღვრო-საკარანტინო, სანიტარიულ-საკარანტინო კონტროლთან დაკავშირებულ საკითხებზე საერთაშორისო ორგანიზაციებთან ურთიერთობების ორგანიზება. სამმართველოს კომპეტენციაში შემავალი საკითხების ანალიზისა და საზღვარგარეთის ქვეყნების გამოცდილების შესწავლის საფუძველზე დეპარტამენტის ხელმძღვანელობისათვის კანონმდებლობაში აუცილებელი ცვლილებებისა და დამატებების განხორციელების თაობაზე რეკომენდაციების წარდგენა, სამსახურის ცენტრალური აპარატის შესაბამის სტრუქტურულ ქვედანაყოფთან ერთად სასაზღვრო საბაჟო ორგანოში საბაჟო პროცედურების განხორციელების საკითხებზე შესაბამისი მეთოდური მითითებების მომზადება;

ე) კომპეტენციის ფარგლებში სამსახურის უფროსის სხვა დავალებების შესრულება.

4. სპეციალური საბაჟო კონტროლის ორგანიზაციის სამმართველოს ძირითადი ფუნქციებია:

ა) კანონმდებლობით დადგენილი წესით, კომპეტენციის ფარგლებში სავალუტო კონტროლის, იარაღის, ნარკოტიკულ საშუალებათა და პრეკურსორების, სამკურნალო საშუალებათა, ორმაგი დანიშნულების საქონლის, სახიფათო ნარჩენების საქართველოში შემოტანასა და საქართველოდან გატანაზე ზედამხედველობის განხორციელება, ინტელექტუალურ საკუთრებასთან დაკავშირებული სასაზღვრო ღონისძიების განხორციელების, აგრეთვე სხვა სახის სახელწმიფო კონტროლის განხორციელების მონიტორინგი და შესაბამისი რეაგირება;

ბ) საბაჟო ორგანოებში არსებული სპეციალური ტექნიკის გამოყენების ორგანიზება; კონტროლის განხორციელებისათვის საჭირო ინფრასტრუქტურის განვითარების, ახალი მეთოდების და ტექნიკური საშუალებების დანერგვის თაობაზე წინადადებების შემუშავება;

გ) ინტელექტუალური საკუთრების ობიექტების რეესტრში ინტელექტუალური საკუთრების ობიექტების რეგისტრაციასთან, ცვლილებების შეტანასთან და გაუქმებასთან დაკავშირებული ადმინისტრაციული წარმოების წარმართვა და შესაბამისი გადაწყვეტილებების პროექტების მომზადება;

დ) ,,ლიცენზიებისა და ნებართვების შესახებ“ საქართველოს კანონით სამსახურის ქვემდებარეობას მიკუთვნებული ნებართვის (უბაჟო ვაჭრობის პუნქტის საქმიანობის ნებართვა, საბაჟო საწყობის (ღია, ან/და დახურული) საქმიანობის ნებართვა, დროებითი შენახვის საწყობის (ღია, ან/და დახურული) საქმიანობის ნებართვა) გაცემის, ნებართვაში ცვლილების შეტანისა და ნებართვის გაუქმებასთან დაკავშირებული ადმინისტრაციული წარმოების წარმართვა, კანონმდებლობით დადგენილი წესით სანებართვო პირობების შესრულების კონტროლის ორგანიზება და შესაბამისი გადაწყვეტილებების პროექტების მომზადება;

ე) კომპეტენციის ფარგლებში რეგიონალური ცენტრების (საგადასახადო ინსპექციების) საქმიანობის ზედამხედველობა, სამსახურის ტერიტორიული ორგანოებისათვის პრაქტიკული დახმარების აღმოჩენა და კონკრეტულ საკითხებზე შესასრულებლად სავალდებულო მითითებების მიცემა;

ვ) სპეციალურ კონტროლთან დაკავშირებულ საკითხებზე საერთაშორისო ორგანიზაციებთან ურთიერთობების ორგანიზება. სამმართველოს კომპეტენციაში შემავალი საკითხების ანალიზისა და საზღვარგარეთის ქვეყნების გამოცდილების შესწავლის საფუძველზე სამსახურის ხელმძღვანელობისათვის კანონმდებლობაში აუცილებელი ცვლილებებისა და დამატებების განხორციელების თაობაზე რეკომენდაციების წარდგენა, სამსახურის ცენტრალური აპარატის შესაბამის სტრუქტურულ ქვედანაყოფთან ერთად საბაჟო პროცედურების განხორციელების საკითხებზე შესაბამისი მეთოდური მითითებების მომზადება;

ზ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 14. სპეციალურ გამოკვლევათა და ფინანსური ექსპერტიზის დეპარტამენტი

1. განსაკუთრებით მნიშვნელოვან საქმეთა სამმართველოს ძირითადი ფუნქციებია:

ა) სასამართლოს, გამომძიებლის, პროკურორის დადგენილების თანახმად, რევიზიით, ინვენტარიზაციით ან/და ფინანსურ სფეროში სპეციალური გამოკვლევებით მტკიცებულებათა აღმოჩენა, დამტკიცება და დამაგრება; მიღებულ შედეგებზე გამოძიებისათვის შესაბამისი დასკვნების (დოკუმენტების) წარდგენა;

ბ) წინასწარი გამოძიების სტადიაზე ფინანსური ექსპერტიზის ორგანიზება და განხორციელება;

გ) კომპეტენციის ფარგლებში შემოსავლების სამსახურის საგამოძიებო დეპარტამენტის განსაკუთრებით მნიშვნელოვან საქმეთა მთავარი სამმართველოს რეგიონალური სამმართველოების და რეგიონალური სამართალდამცავი ორგანოების (გარდა ამ მუხლის მე-2 პუნქტის ,,გ“ ქვეპუნქტით გათვალისწინებული ორგანოებისა) წარმოებაში არსებულ სისხლის სამართლის საქმესთან დაკავშირებით მიღებული დადგენილებების შესრულება;

დ) კომპეტენციის ფარგლებში სამსახურის უფროსის სხვა დავალებების შესრულება.

2. სპეციალურ გამოკვლევათა სამმართველოს ძირითადი ფუნქციებია:

ა) სასამართლოს, გამომძიებლის, პროკურორის დადგენილების თანახმად, რევიზიით, ინვენტარიზაციით ან/და ფინანსურ სფეროში სპეციალური გამოკვლევებით მტკიცებულებათა აღმოჩენა, დამტკიცება და დამაგრება; მიღებულ შედეგებზე გამოძიებისათვის შესაბამისი დასკვნების (დოკუმენტების) წარდგენა;

ბ) წინასწარი გამოძიების სტადიაზე ფინანსური ექსპერტიზის ორგანიზება და განხორციელება;

 გ) კომპეტენციის ფარგლებში საქართველოს სასამართლოს, საქართველოს გენერალური პროკურატურის, ქ. თბილისის პროკურატურის, ქ. თბილისის სხვა სამართალდამცავი ორგანოების და შემოსავლების სამსახურის საგამოძიებო დეპარტამენტის თბილისის მთავარი სამმართველოს წარმოებაში არსებულ სისხლის სამართლის საქმეებთან დაკავშირებით მიღებული დადგენილებების შესრულება;

დ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 15. ინფორმაციის დამუშავების და ანალიზის დეპარტამენტი

1. რისკების მართვის სამმართველოს ძირითადი ფუნქციებია:

ა) კომპეტენციის ფარგლებში საგადასახადო და საბაჟო კანონმდებლობის სრულყოფაზე წინადადებების, შესაბამისი ნორმატიული აქტების და მეთოდური მითითებების პროექტების მომზადება, საგადასახადო და საბაჟო ორგანოებისათვის პრაქტიკული დახმარების აღმოჩენა;

ბ) საბაჟო პროცედურების განხორციელებისას პირების მიერ წარდგენილი დოკუმენტაციის და ინფორმაციის ანალიზი და შერჩევითი შემოწმება საერთაშორისო საბაჟო თანამშრომლობის მექანიზმების გამოყენებით და შესაბამისი რეაგირება;

გ) წინადადებების მომზადება მკაცრი აღრიცხვის ბლანკების გამოყენებით წარმოქმნილ დარღვევებზე რეაგირების შესახებ და შემდგომი ღონისძიებების გატარების მიზნით ინფორმაციის მიწოდება შემოსავლების სამსახურის ტერიტორიული და სპეციალიზირებული ორგანოებისათვის;

დ) კომპეტენციის ფარგლებში ექსპორტ-იმპორტის ოპერაციების და უცხოეთის სახელმწიფოების უფლებამოსილი ორგანოებიდან მიღებული საგადასახადო ინფორმაციის დამუშავება, ანალიზი და შესაბამის საგადასახადო და საბაჟო ორგანოებზე დაყვანა;

ე) ინფორმაციული ბაზების, სპეციალური საბაჟო სტატისტიკის მონაცემების, საბაჟო და საგადასახადო კანონმდებლობის დარღვევების თაობაზე არსებული, აგრეთვე საერთაშორისო საბაჟო და საგადასახადო თანამშრომლობის მექანიზმების გამოყენებით მიღებული ინფორმაციის გათვალისწინებით რისკის ფაქტორების გამოვლენა და ანალიზი, რისკების მენეჯმენტის თაობაზე წინადადებების შემუშავება და მათი განხორციელების კოორდინაცია;

ვ) კომპეტენციის ფარგლებში სამსახურის უფროსის სხვა დავალებების შესრულება.

2. სტატისტიკის და ანალიზის სამმართველოს ძირითადი ფუნქციებია:

ა) კომპეტენციის ფარგლებში საგადასახადო და საბაჟო კანონმდებლობის სრულყოფაზე წინადადებების, შესაბამისი ნორმატიული აქტების და მეთოდური მითითებების პროექტების მომზადება. საგადასახადო და საბაჟო ორგანოებისათვის პრაქტიკული დახმარების აღმოჩენა;

ბ) სამსახურის ხელმძღვანელობისათვის, აგრეთვე სამსახურის სტრუქტურული ქვედანაყოფებისათვის აუცილებელი ინფორმაციის მიწოდება;

გ) დანაშაულობათა (მათში მონაწილე პირთა) და სამართალდარღვევათა აღრიცხვა-სისტემატიზაცია, სტატისტიკური ანალიზი, საინფორმაციო საძიებო კომპიუტერული სისტემების დანერგვა და ექსპლუატაცია;

დ) სახელმწიფო დაწესებულებებიდან, ასევე კანონით დასაშვები წყაროებიდან სამსახურის ფუნქციონირებისათვის საჭირო ინფორმაციის მოგროვება, სისტემატიზაცია;

ე) საგარეო ვაჭრობის საბაჟო სტატისტიკის, სპეციალური საბაჟო, საგადასახადო და სხვა შესაბამისი სტატისტიკის წარმოება, საგარეო ვაჭრობის საბაჟო სტატისტიკის და სპეციალური საბაჟო სტატისტიკის მონაცემების, საგარეო-ეკონომიკური საქმიანობის რეგულირების არსებული სატარიფო და არასატარიფო მექანიზმების საგარეო-ეკონომიკური ურთიერთობების დინამიკაზე ზეგავლენის ანალიზი, შესაბამისი რეკომენდაციებისა და წინადადებების შემუშავება;

ვ) ფიზიკურ პირთა ქონების გადასახადის შესახებ შემოსავლების სამსახურის ტერიტორიული და სხვა სპეციალიზირებული ორგანოებიდან წარმოდგენილი ინფორმაციების მიღება და ანალიზი;

ზ) ელექტრონული და სხვა სახის ინფორმაციის მიღება და დამუშავება სამსახურის ადმინისტრირებადი შემოსავლების შესახებ;

თ) დამტკიცებული საგეგმო-საპროგნოზო მაჩვენებლების დაყვანა საგადასახადო და საბაჟო ორგანოებამდე;

ი) შემოსავლების დამუშავების ორგანიზება გადასახადის სახეების, ტერიტორიული ერთეულების, ეკონომიკის ძირითადი დარგების მიხედვით;

კ) საგადასახადო შემოსავლების მიმდინარეობის, მათ შორის ეკონომიკის დარგების და რაიონების მიხედვით, აგრეთვე დაბეგვრის საკითხებზე აქტუალური ინფორმაციების და მასალების მომზადება;

ლ) საგადასახადო ბაზის საპროგნოზო გაანგარიშებების წარმოება საქართველოს ფინანსთა სამინისტროს მიერ დაშვებული წესით;

მ) მონაცემთა ელექტრონული (ქსელური და ელექტრონული ინფორმაციის მატარებლების გამოყენებით დაცული) და არაელექტრონული ბაზების შექმნა, ოპერატიული განახლება, სისტემატიზაცია და წარმართვა;

ნ) სამსახურის ხელმძღვანელობისათვის, აგრეთვე სამსახურის სტრუქტურული ქვედანაყოფებისათვის აუცილებელი ინფორმაციის მიწოდება;

ო) საგადასახადო შემოსავლების მობილიზაციის და მათი აკრეფის გაუმჯობესების შესახებ წინადადებების და ანალიტიკური ინფორმაციის მომზადება;

პ) საგადასახადო და საბაჟო ორგანოებში საბიუჯეტო შემოსულობათა (მათ შორის, ზედმეტად გადახდილი თანხის), გადატანების, დაბრუნებების, საგადასახადო სანქციებისა და საურავების მიხედვით აღრიცხვის წარმოების წესების შემუშავება;

ჟ) საგადასახადო შემოსავლების ანგარიშგების სტატისტიკური ფორმების შედგენის მეთოდოლოგიის შემუშავება-სრულყოფა და ეკონომიკური ანალიზი;

რ) გაწეული მუშაობის შედეგების, ასევე მათი კონტროლის განხორციელების მიზნით ანგარიშების მიღება, თავისი კომპეტენციის ფარგლებში სისტემატიზაცია და ანალიზი; სამსახურის მუშაობის შემაჯამებელი ანგარიშების მომზადება;

ს) საზღვარგარეთის ქვეყნების ტექნიკური დახმარების პროექტებით იმპორტირებული საქონლის აღრიცხვა;

ტ) გადამხდელთა პირადი აღრიცხვის ბარათების წარმოების მეთოდოლოგიის შემუშავება და სრულყოფა;

უ) კომპეტენციის ფარგლებში სამსახურის უფროსის სხვა დავალებების შესრულება.

3. ადმინისტრირების ღონისძიებების სამმართველოს ძირითადი ფუნქციებია:

ა) კომპეტენციის ფარგლებში საგადასახადო და საბაჟო კანონმდებლობის სრულყოფაზე წინადადებების და შესაბამისი ნორმატიული აქტების პროექტების მომზადება;

ბ) ვადაგადაცილებულ დავალიანებათა აღრიცხვა და ანალიზი;

გ) სამსახურის ტერიტორიული ორგანოების მიერ საგადასახადო და საბაჟო ვალდებულების შესრულების უზრუნველყოფის ღონისძიებების განხორციელების ანალიზი;

დ) რესტრუქტურიზაციის რეჟიმში მომუშავე საწარმოების (ორგანიზაციების) მიერ საქართველოს ფინანსთა სამინისტროსთან დადებული რესტრუქტურიზაციის ხელშეკრულებით გათვალისწინებული პირობების შესრულების შესახებ ინფორმაციის მიწოდება საქართველოს ფინანსთა სამინისტროსათვის;

ე) საგადასახადო და საბაჟო ორგანოების მიერ მიმდინარე კონტროლის პროცედურების შედეგების ანალიზი, შესაბამისი ანგარიშგების წარმოება;

ვ) შემოსავლების სამსახურის ტერიტორიული და სპეციალიზირებული ორგანოებიდან მათ მიერ გამოვლენილ სამართალდარღვევებზე წარმოდგენილი ინფორმაციის მიღება და ანალიზი;

ზ) კომპეტენციის ფარგლებში სამსახურის უფროსის სხვა დავალებების შესრულება.

    მუხლი 16. სამსახურის სათათბირო ორგანო

1. სამსახურის საქმიანობასთან დაკავშირებული განსაკუთრებული მნიშვნელობის საკითხების განხილვისა და მათ შესახებ რეკომენდაციების შემუშავების მიზნით სამსახურის უფროსს შეუძლია თავისი მმართველობის სფეროში შექმნას სათათბირო ორგანოები სათათბირო უფლებით.

2. სათათბირო ორგანოები იქმნება სამსახურის უფროსის ინდივიდუალური ადმინისტრაციულ-სამართლებრივი აქტით.

3. სათათბირო ორგანოების სხდომების ორგანიზებას და სხდომის ოქმების წარმოებას უზრუნველყოფს სამსახურის უფროსის მიერ განსაზღვრული სტრუქტურული ქვედანაყოფი.

    მუხლი 17. სამსახურის რეორგანიზაცია, საქმიანობის შეწყვეტა, დებულებაში ცვლილებების შეტანა

1. სამსახურის რეორგანიზაცია ან მისი საქმიანობის შეწყვეტა ხდება კანონმდებლობით დადგენილი წესით.

2. სამსახურის დებულებაში ცვლილებების შეტანა ხორციელდება საქართველოს ფინანსთა მინისტრის ბრძანებით.