,,საქართველოს პარლამენტის 2008 წლის 21 მაისის არჩევნებისათვის ზოგიერთი საარჩევნო ღონისძიებისა და ვადების განსაზღვრის თაობაზე“

,,საქართველოს პარლამენტის 2008 წლის 21 მაისის არჩევნებისათვის ზოგიერთი საარჩევნო ღონისძიებისა და ვადების განსაზღვრის თაობაზე“ სახელმწიფო სარეგისტრაციო კოდი 010.190.020.15.008.011.824 საქართველოს საარჩევნო ადმინისტრაცია საქართველოს ცენტრალური საარჩევნო კომისიის დადგენილება №30/2008 2008 წლის 11 მაისი ქ. თბილისი საქართველოს პარლამენტის 2008 წლის 21 მაისის არჩევნებისათვის ზოგიერთი საარჩევნო ღონისძიებისა და ვადების განსაზღვრის თაობაზე საქართველოს ორგანული კანონის „საქართველოს საარჩევნო კოდექსი“ მე-16 მუხლის მე-2 პუნქტის თანახმად, საარჩევნო უბნები იქმნება არა უმეტეს 1500 ამომრჩევლისათვის. №10 გლდანის საოლქო საარჩევნო კომისიის თავმჯდომარის 2008 წლის 9 მაისის №86/10 წერილის საფუძველზე ირკვევა, რომ №10 გლდანის საარჩევნო ოლქის №111 საარჩევნო უბანზე ამომრჩეველთა რაოდენობა ახლანდელი მონაცემებით შეადგენს 1914 ამომრჩეველს. №40 ახალქალაქის საოლქო საარჩევნო კომისიის თავმჯდომარის 2008 წლის 10 მაისის №33 წერილის საფუძველზე ირკვევა რომ, №40 ახალქალაქის №4 საარჩევნო უბანზე ამომრჩეველთა რაოდენობა ახლანდელი მონაცემებით შეადგენს 1890 ამომრჩეველს. №20 რუსთავის საოლქო საარჩევნო კომისიის თავმჯდომარის 2008 წლის 10 მაისის №გას/496 წერილის საფუძველზე და ცესკოს მონაცემებით ირკვევა, რომ №20 რუსთავის საარჩევნო ოლქის №70 უბანზე ამომრჩეველთა რაოდენობა ახლანდელი მონაცემებით შეადგენს 1934 ამომრჩეველს. მოცემულ შემთხვევაში ამომრჩეველთა რაოდენობამ აღნიშნულ საარჩევნო უბნებზე მნიშვნელოვნად გადააჭარბა კანონით დადგენილ რაოდენობას, რაც გამოიწვევს ამ საარჩევნო უბნებზე კენჭისყრის დღის პროცედურების ჩატარებას მნიშვნელოვანი შეფერხებებით, რის გამოც შესაძლოა შეუძლებელი გახდეს ამ უბნებზე, ამომრჩეველთა განსაკუთრებით დიდი რაოდენობის გამო, საქართველოს ორგანული კანონით „საქართველოს საარჩევნო კოდექსი“ დადგენილი მოთხოვნების შესრულება. შესაბამისად: საქართველოს ორგანული კანონის „საქართველოს საარჩევნო კოდექსი „25-ე მუხლის მე-3 პუნქტის; 29-ე მუხლის პირველი პუნქტის „გ“ ქვეპუნქტისა და 77-ე მუხლის მე-4, მე-5 პუნქტების საფუძველზე, საქართველოს ცენტრალური საარჩევნო კომისია ადგენს: მუხლი 1🔗. №10 გლდანის საოლქო საარჩევნო კომისიამ, №20 რუსთავის საოლქო საარჩევნო კომისიამ და №40 ახალქალაქის საოლქო საარჩევნო კომისიამ, არა უგვიანეს ამ დადგენილების ძალაში შესვლიდან მე-2 დღისა შექმნას ახალი საარჩევნო უბნები. მუხლი 2🔗. ამ დადგენილების პირველ მუხლში მითითებულმა საოლქო საარჩევნო კომისიებმა, საარჩევნო უბნის შექმნიდან არა უგვიანეს მომდევნო დღისა, საქართველოს ორგანული კანონით „საქართველოს საარჩევნო კოდექსი“ 37-ე მუხლით დადგენილი პირობებით, გამოაცხადოს კონკურსი საუბნო საარჩევნო კომისიის წევრების არჩევის თაობაზე. კონკურსის გამოცხადებიდან 5 კალენდარული დღის ვადში საოლქო საარჩევნო კომისიები ახდენენ საუბნო საარჩევნო კომისიის წევრთა არჩევას, ამავე ვადაში საოლქო საარჩევნო კომისიებს უნდა წარედგინოს უფლებამოსილი პოლიტიკური პარტიების გადაწყვეტილებები საუბნო საარჩევნო კომისიის წევრთა დანიშვნის შესახებ და კანონით განსაზღვრული თანდართული დოკუმენტაცია. თუ აღნიშნულ ვადაში საუბნო საარჩევნო კომისიის შემადგენლობა არ შეივსო კანონმდებლობით დადგენილ რაოდენობამდე, ან თუ უფლებამოსილება ვადამდე შეუწყდა საუბნო საარჩევნო კომისიის წევრს, ამ ვადის გასვლიდან მომდევნო 2 დღეში, საუბნო საარჩევნო კომისიის 13 წევრამდე შევსების უფლება, კანონმდებლობით დადგენილი წესით ეძლევა საოლქო საარჩევნო კომისიებს. მუხლი 3🔗. ეს დადგენილება შეიძლება გასაჩივრდეს თბილისის საქალაქო სასამართ­ლოს ადმინისტრაციულ საქმეთა კოლეგიაში (მისამართი: ქ. თბილისი, სარაჯიშვილის №1ა) მისი მიღებიდან 1 კალენდარული დღის ვადაში. მუხლი 4🔗. ეს დადგენილება ამოქმედდეს გამოქვეყნებისთანავე. კომისიის თავმჯდომარე                                                                     ლ. თარხნიშვილი კომისიის მდივანი                                                                                გ. მჭედლიძე