,,საქართველოს თავდაცვის სამინისტროს ადმინისტრაციის დებულების დამტკიცების შესახებ“ საქართველოს თავდაცვის მინისტრის 2006 წლის 29 დეკემბრის №394 ბრძანებაში ცვლილებებისა და დამატების შეტანის თაობაზე“

სახელმწიფო სარეგისტრაციო კოდი 120.010.000.22.026.011.900

საქართველოს თავდაცვის მინისტრის

ბრძანება №312

2008 წლის 9 ივნისი

ქ. თბილისი

,,საქართველოს თავდაცვის სამინისტროს ადმინისტრაციის დებულების დამტკიცების შესახებ“ საქართველოს თავდაცვის მინისტრის 2006 წლის 29 დეკემბრის №394 ბრძანებაში ცვლილებებისა და დამატების შეტანის თაობაზე

,,ნორმატიული აქტების შესახებ“ საქართველოს კანონის 36-ე მუხლის შესაბამისად, ვბრძანებ:

    მუხლი 1

 ,,საქართველოს თავდაცვის სამინისტროს ადმინისტრაციის დებულების დამტკიცების შესახებ“ საქართველოს თავდაცვის მინისტრის 2006 წლის 29 დეკემბრის №394 ბრძანებით (სსმ III, 2006 წ., №176, მუხლი 2416) დამტკიცებულ დებულებაში შეტანილ იქნეს ცვლილებები და დამატება შემდეგი რედაქციით:

1. დებულების 32₂ პუნქტი ჩამოყალიბდეს შემდეგი რედაქციით:

,,32₂. მართვის ავტომატიზებული სისტემის განვითარების, კოორდინაციისა და კონტროლის სამმართველოს ქვედანაყოფებია:

ა) მართვის ავტომატიზებული სისტემების განვითარების პოლიტიკისა და კოორდინაციის განყოფილება;

ბ) მართვის ავტომატიზებული სისტემების ფუნქციონირების ანალიზისა და კონტროლის განყოფილება;

გ) მართვის ავტომატიზებული სისტემების ინფორმაციული უსაფრთხოების პოლიტიკის განყოფილება.“.

2. დებულების 32³ პუნქტი ჩამოყალიბდეს შემდეგი რედაქციით:

323. მართვის ავტომატიზებული სისტემის განვითარების, კოორდინაციისა და კონტროლის სამმართველო ახორციელებს შემდეგ ძირითად ფუნქციებს:

ა) ჯარების მართვის ავტომატიზებული სისტემის პროტოტიპის შექმნა;

ბ) საქართველოს თავდაცვის სამინისტროს სტრუქტურულ ქვედანაყოფებში მართვის ავტომატიზებული სისტემის დანერგვა, სისტემის შემდგომი განვითარების უზრუნველყოფა, შესრულების ხარისხის ანალიზი და სისტემის განვითარების მიზნით ერთიანი პოლიტიკის გატარება;

გ) მართვის ავტომატიზებული და საინფორმაციო სისტემის ინტეგრაციული პროცესების კოორდინაცია;

დ) მართვის ავტომატიზებული სისტემის ფუნქციონირების და ექსპლუატაციის კონტროლი;

ე) კოდიფიკაციის და სტანდარტიზაციის სისტემების, საერთაშორისო სტანდარტებთან თავსებადობაში მოყვანისათვის აუცილებელი პროცედურების განხორციელება;

ვ) ტექნიკური პერსონალის სწავლება/გადამზადების განხორციელება, ავტომატიზებული სისტემის დანერგვისა და შემდგომ ეტაპზე ეფექტურად ათვისების ხელშეწყობის მიზნით;

ზ) საქართველოს თავდაცვის სამინისტროს სისტემაში მართვის ავტომატიზებული სისტემების ინფორმაციული უსაფრთხოების პოლიტიკის შემუშავება და მის განხორციელებაზე კონტროლი.“.

3. დებულებას დაემატოს 32⁴ პუნქტი შემდეგი რედაქციით:

,,32⁴. ელექტრონული და ვიდეოკონტროლის განყოფილება ახორციელებს შემდეგ ძირითად ფუნქციებს:

ა) საქართველოს თავდაცვის სამინისტროს ადმინისტრაციული შენობის (შემდგომში – ადმინისტრაციული შენობა) ვიდეოკონტროლს;

ბ) ადმინისტრაციულ შენობაში განთავსებული სამოქალაქო ოფისის მოსამსახურეთა სამსახურში გამოცხადების/გამოუცხადებლობის ელექტრონული და ვიდეოკონტროლს;

გ) ადმინისტრაციულ შენობაში არსებული ვიდეო და ელექტრონული კონტროლის სისტემის პროგრამულ უზრუნველყოფას;

დ) ვიდეო და ელექტრონული კონტროლის საფუძველზე არსებული ინფორმაციის ფილტრაციასა და მის მიწოდებას შესაბამისი თანამდებობის პირისათვის.“.

    მუხლი 2

 ბრძანებას გაეცნონ საქართველოს თავდაცვის მინისტრის მოადგილეები, საქართველოს შეიარაღებული ძალების გაერთიანებული შტაბის უფროსი, მისი მოადგილეები და საქართველოს თავდაცვის სამინისტროს ყველა სტრუქტურული ქვედანაყოფი.

    მუხლი 3

ბრძანება ძალაშია გამოქვეყნებისთანავე.

დ. კეზერაშვილი