„საქართველოს ფინანსთა სამინისტროს შემოსავლების სამსახურის მსხვილ გადამხდელთა საგადასახადო ინსპექციის დებულების დამტკიცების თაობაზე“ საქართველოს ფინანსთა მინისტრის 2007 წლის 2 მარტის №172 ბრძანებაში ცვლილებების და დამატების შეტანის თაობაზე

სახელმწიფო სარეგისტრაციო კოდი 010.320.010.22.033.012.287

საქართველოს ფინანსთა მინისტრის

ბრძანება №794

2008 წლის 20 ოქტომბერი

ქ. თბილისი

,,საქართველოს ფინანსთა სამინისტროს შემოსავლების სამსახურის მსხვილ გადამხდელთა საგადასახადო ინსპექციის დებულების დამტკიცების თაობაზე“ საქართველოს ფინანსთა მინისტრის 2007 წლის 2 მარტის №172 ბრძანებაში ცვლილებების და დამატების შეტანის თაობაზე

,,ნორმატიული აქტების შესახებ“ საქართველოს კანონის 36-ე მუხლის შესაბამისად, ვბრძანებ:

 მუხლი 1. ,,საქართველოს ფინანსთა სამინისტროს შემოსავლების სამსახურის მსხვილ გადამხდელთა საგადასახადო ინსპექციის დებულების დამტკიცების თაობაზე“ საქართველოს ფინანსთა მინისტრის 2007 წლის 2 მარტის №172 ბრძანებით დამტკიცებულ ,,საქართველოს ფინანსთა სამინისტროს შემოსავლების სამსახურის მსხვილ გადამხდელთა საგადასახადო ინსპექციის დებულებაში“ (სსმ III, 05.03.07, №29, მუხ.350) შეტანილ იქნეს შემდეგი ცვლილებები და დამატება:

1. მე-5 მუხლის პირველი პუნქტი ჩამოყალიბდეს შემდეგი რედაქციით:

,,1. ინსპექციაში გადასახადის გადამხდელთა შერჩევა ხორციელდება შემდეგი კრიტერიუმებით:

ა) გადასახადის გადამხდელის წლიური ბრუნვის მოცულობა (აღემატება 3 მლნ ლარს);

ბ) გადასახადის გადამხდელის საგადასახადო ვალდებულების ოდენობა (არანაკლებ 150 ათასი ლარი);

გ) აქციზის გადამხდელთათვის გადამხდელის წლიური ბრუნვის მოცულობა (აღემატება 1.5 მლნ ლარს);

დ) აქციზის გადამხდელთათვის საგადასახადო ვალდებულების ოდენობა (არანაკლებ 100 ათასი ლარი).“.

2. მე-5 მუხლის მე-3 პუნქტს დაემატოს შემდეგი შინაარსის ,,ა¹“ ქვეპუნქტი:

,,ა¹) ინსპექციაში გადასახადის გადამხდელთა საგადასახადო აღრიცხვაზე აყვანა ხორციელდება ამ მუხლის პირველი პუნქტით განსაზღვრული კრიტერიუმებით (ნებისმიერი უწყვეტი 12 თვის პერიოდის გათვალისწინებით) ყოველი კალენდარული წლის 1 ივლისის და 31 დეკემბრის მდგომარეობით;“.

3. მე-7 მუხლის მე-2 პუნქტის ,,ბ“ ქვეპუნქტი ჩამოყალიბდეს შემდეგი რედაქციით:

,,ბ) საინფორმაციო-ანალიტიკური და საგადასახადო შემოწმებების სამმართველო;“.

4. მე-7 მუხლის მე-2 პუნქტის ,,ვ“ ქვეპუნქტი ამოღებულ იქნეს.

5. მე-10 მუხლი ჩამოყალიბდეს შემდეგი რედაქციით:

     „მუხლი 10. საინფორმაციო-ანალიტიკური და საგადასახადო შემოწმებების სამმართველო

1. საინფორმაციო-ანალიტიკური და საგადასახადო შემოწმებების სამმართველოს ძირითადი ფუნქციებია:

ა) ინსპექციაში საინფორმაციო საძიებო სისტემების დანერგვა-ექსპლოატაცია;

ბ) ინსპექციის ამოცანების შესრულების უზრუნველყოფისათვის საჭირო ინფორმაციის მოგროვება-სისტემატიზაცია, ანალიზი და დამუშავებული ფორმების ინსპექციის დანაყოფებისათვის მიწოდება;

გ) გადამხდელის მიერ წარმოდგენილი მონაცემების (დეკლარაციების და სხვა გაანგარიშებების) დამუშავება-ანალიზი, რისკის-ფაქტორების განსაზღვრა, საბაჟო მონაცემების დამუშავება, მათი შედარება საგადასახადო მონაცემებთან;

დ) დღგ-ის შეგროვების მდგომარეობის ანალიზი, აქტივების წარმოშობის ანალიზი, ამ გადასახადებში ნარჩენების დაგროვების ანალიზი, ასევე დღგ-ის და სპეციალური დღგ-ის ანგარიშ-ფაქტურების მოძრაობის ანალიზი, დღგ-ის ბრუნვების (მათ შორის გათავისუფლებული და ნულოვანი ბრუნვების) ანალიზი;

ე) გადამხდელთა ანალიტიკური ბარათების შემუშავება, საქმიანობის მიხედვით გადამხდელთა საქმიანობის ანალიზი და რისკის ფაქტორების განსაზღვრა, ამ სფეროში გადამხდელთა ბრუნვების და შემოსული გადასახადების ანალიზი;

ვ) ინსპექციის უფროსის დავალებების შესაბამისად, სხვა ანალიტიკური ინფორმაციის შემუშავება;

ზ) სამოქმედო ტერიტორიაზე საგადასახადო და სტატისტიკური ანგარიშების მონაცემების ეკონომიკური ანალიზის ჩატარება;

თ) კომპეტენციის ფარგლებში გადასახადის გადამხდელთა საქმიანობასთან დაკავშირებული კამერალური საგადასახადო შემოწმების განხორციელება;

ი) კომპეტენციის ფარგლებში საქართველოს საგადასახადო კოდექსის 156-ე მუხლის პირველი ნაწილით ან/და 158-ე მუხლის მე-2 ნაწილით გათვალისწინებული საგადასახადო შემოწმებების ჩატარება;

კ) საგადასახადო კანონმდებლობით დადგენილი წესით და ვადებში საგადასახადო შემოწმების აქტების შედგენა, შემოწმების აქტის საფუძველზე განხილვის ოქმისა და გადაწყვეტილების პროექტის მომზადება და გადაწყვეტილების მისაღებად ინსპექციის უფროსისათვის/მოადგილისათვის წარდგენა;

ლ) საგადასახადო შემოწმებისას დანაშაულის ნიშნების გამოვლენის შემთხვევაში ინსპექციის უფროსისათვის სათანადო მასალების წარდგენის უზრუნველყოფა მათი კანონმდებლობით დადგენილი წესით შესაბამისი საგამოძიებო ორგანოსათვის გადასაცემად;

მ) კომპეტენციის ფარგლებში საქართველოს ადმინისტრაციულ სამართალდარღვევათა კოდექსით და საქართველოს საგადასახადო კოდექსით გათვალისწინებული სამართალდარღვევების გამოვლენის შემთხვევაში შესაბამისი ოქმების შედგენა და რეაგირებისათვის დაუყოვნებლივ გადაცემა იურიდიულ საკითხთა სამმართველოსათვის;

ნ) საგადასახადო შემოწმებასთან დაკავშირებით შემოსავლების სამსახურის აუდიტის დეპარტამენტთან თანამშრომლობა და საჭიროების შემთხვევაში შესაბამისი ინფორმაციის მიწოდება;

ო) ინსპექციის უფროსისათვის სამმართველოში საგადასახადო შემოწმებების კუთხით გაწეული მუშაობის შესახებ ინფორმაციის წარდგენა.

2. საინფორმაციო-ანალიტიკური და საგადასახადო შემოწმებების სამმართველო არ ახორციელებს იმ გადასახადის გადამხდელთა საგადასახადო შემოწმებას, რომელთა მიმართ გასვლით საგადასახადო შემოწმებას მოცემული პერიოდისათვის ატარებს შემოსავლების სამსახურის აუდიტის დეპარტამენტი.“.

6. 13¹ მუხლი ამოღებულ იქნეს.

 მუხლი 2. ეს ბრძანება ამოქმედდეს 2008 წლის 1 ნოემბრიდან.

ნ. გილაური