„საქართველოს ეკონომიკური განვითარების სამინისტროს იურიდიული დეპარტამენტის დებულების დამტკიცების შესახებ“ საქართველოს ეკონომიკური განვითარების მინისტრის 2009 წლის 18 სექტემბრის №1-1/2137 ბრძანებაში ცვლილებებისა და დამატებების შეტანის თაობაზე“

სახელმწიფო სარეგისტრაციო კოდი 010.240.030.22.024.013.815

საქართველოს ეკონომიკური განვითარების

მინისტრის ბრძანება №1-1/2709

2009 წლის 20 ნოემბერი

ქ. თბილისი

„საქართველოს ეკონომიკური განვითარების სამინისტროს იურიდიული დეპარტამენტის დებულების დამტკიცების შესახებ“ საქართველოს ეკონომიკური განვითარების მინისტრის 2009 წლის 18 სექტემბრის №1-1/2137 ბრძანებაში ცვლილებებისა და დამატებების შეტანის თაობაზე

„ნორმატიული აქტების შესახებ“ საქართველოს კანონის 36-ე მუხლის საფუძველზე, ვბრძანებ:

მუხლი 1. შეტანილ იქნეს ცვლილება და დამატება „საქართველოს ეკონომიკური განვითარების სამინისტროს იურიდიული დეპარტამენტის დებულების დამტკიცების შესახებ“ საქართველოს ეკონომიკური განვითარების მინისტრის 2009 წლის 18 სექტემბრის №1-1/2137 ბრძანებით დამტკიცებული დებულების (სსმ III, 24.09.2009, №116 მუხ.1323) მე-2 მუხლის პირველ პუნქტსა და მე-4 მუხლის მე-5 პუნქტებში და ჩამოყალიბდეს შემდეგი რედაქციით:

„1. დეპარტამენტის ძირითადი ამოცანები და უფლებამოსილებებია:

ა) კომპეტენციის ფარგლებში სამინისტროს კანონშემოქმედებითი საქმიანობის გეგმის შემუშავების ორგანიზება;

ბ) თავისი კომპეტენციის ფარგლებში ნორმატიული აქტების პროექტების მომზადება;

გ) სხვადასხვა უწყებიდან შემოსულ, ასევე უშუალოდ სამინისტროს სტრუქტურული ქვედანაყოფებისა და სამინისტროს სისტემაში შემავალი დაწესებულებების მიერ მომზადებული ნორმატიული აქტების პროექტებზე სამართლებრივი დასკვნების მომზადება;

დ) სამინისტროს პარლამენტთან ურთიერთობისა და სამინისტროსა და მის სისტემაში შემავალი დაწესებულებების მიერ მომზადებული საკანონმდებლო აქტების პროექტების კანონმდებლობით დადგენილი წესით საქართველოს პარლამენტში წარდგენის ორგანიზება;

ე) დამოუკიდებლად ან სამინისტროს სტრუქტურულ ქვედანაყოფებთან ერთად და სამინისტროს სისტემაში შემავალ დაწესებულებებთან ერთად ნორმატიული აქტების პროექტების შემუშავება ან მათი გაუქმების შესახებ წინადადებების მომზადება;

ვ) სამინისტროს სტრუქტურული ქვედანაყოფებისა და სამინისტროს სისტემაში შემავალი დაწესებულებების სამართლებრივი უზრუნველყოფა;

ზ) სამინისტროს წარმომადგენლობა ყველა ინსტანციის სასამართლოში;

თ) სამინისტროში შემოსული საჩივრებისა და სამინისტროს საქმიანობასთან დაკავშირებული სამართლებრივი დავების ანალიზის საფუძველზე წინადადებების მომზადება კანონმდებლობაში ცვლილებებისა და დამატებების შეტანის თაობაზე;

ი) მისთვის დაკისრებული ამოცანებისა და ფუნქციების შესასრულებლად ინფორმაციის გამოთხოვა სამინისტროს სტრუქტურული ქვედანაყოფებისა და სამინისტროს სისტემაში შემავალი დაწესებულებებიდან;

კ) ფიზიკურ და იურიდიულ პირთა საჩივრების, განცხადებების განხილვა და/ან მათ განხილვაში მონაწილეობა დეპარტამენტის კომპეტეციას მიკუთვნებულ საკითხებზე;

ლ) სამინისტროს სახელით დასადები ხელშეკრულების პროექტის მომზადება და შესაბამისი მინდობილობის საფუძველზე ხელშეკრულების გაფორმება;

მ) სამინისტროს კომპეტენციის ფარგლებში, საერთაშორისო ხელშეკრულების დადების მიზანშეწონილობის საკითხის განსაზღვრაში მონაწილეობა და საერთაშორისო ხელშეკრულების პროექტის მომზადება შესაბამის სტრუქტურულ ქვედანაყოფთან ერთად;

ნ)    სხვადასხვა უწყებიდან შემოსული, ასევე უშუალოდ სამინისტროს სტრუქტურული ქვედანაყოფების, სამინისტროს სისტემაში შემავალი დაწესებულებებისა და საერთაშორისო ორგანოების მიერ მომზადებულ ხელშეკრულებათა პროექტებზე სამართლებრივი დასკვნების მომზადება;

ო) სახელშეკრულებო ვალდებულებათა მონიტორინგის დეპარტამენტის დასკვნის საფუძველზე ინდივიდუალური ადმინისტრაციულ-სამართლებრივი აქტების მომზადება კანონმდებლობით გათვალისწინებულ შემთხვევებში ხელშეკრულებების მოშლის შესახებ;

პ) ხელშეკრულების შეწყვეტის შემთხვევაში აღნიშნულის შესახებ ინფორმაციის მიწოდება სახელშეკრულებო ვალდებულებათა მონიტორინგისა და სახელმწიფო ქონების მართვის პოლიტიკისა და პრივატიზების დეპარტამენტისათვის.“.

2. მე-4 მუხლის მე-5 პუნქტი ჩამოყალიბდეს შემდეგი რედაქციით:

„5. სამართლებრივი უზრუნველყოფის სამმართველო:

ა) ახორციელებს სამინისტროს სტრუქტურული ქვედანაყოფებისა და სამინისტროს სისტემაში შემავალი დაწესებულებების სამართლებრივ უზრუნველყოფას თავისი კომპეტენციის ფარგლებში;

ბ) ამზადებს სამინისტროს სახელით დასადები სახელმწიფო ქონების პრივატიზების ან სარგებლობაში გადაცემის ხელშეკრულების პროექტებს და აფორმებს მათ შესაბამისი მინდობილობის საფუძველზე;

გ) ამზადებს სამართლებრივ დასკვნებს სხვადასხვა უწყებიდან შემოსულ, ასევე უშუალოდ სამინისტროს სტრუქტურული ქვედანაყოფების, სამინისტროს სისტემაში შემავალი დაწესებულებებისა და საერთაშორისო ორგანიზაციების მიერ მომზადებულ ხელშეკრულებათა პროექტებზე;

დ)   მონაწილეობს საერთაშორისო ხელშეკრულების მომზადებაში;

ე)    განიხილავს ფიზიკურ და იურიდიულ პირთა საჩივრებს, განცხადებებს ან/და მონაწილეობს მათ განხილვაში სამინისტროს კომპეტენციას მიკუთვნებულ საკითხებზე;

ვ)    სამინისტროში შემოსული საჩივრების ანალიზის საფუძველზე ამზადებს წინადადებებს კანონმდებლობაში ცვლილებებისა და დამატებების შეტანის თაობაზე;

ზ)   ამზადებს სამართლებრივ დასკვნებს სხვადასხვა უწყებიდან შემოსული, ასევე უშუალოდ სამინისტროს სტრუქტურული ქვედანაყოფებისა და სამინისტროს სისტემაში შემავალი დაწესებულებების მიერ მომზადებული ნორმატიული აქტების პროექტებზე;

თ)   განიხილავს სამმართველოში შემოსულ კორესპონდენციას და ახდენს შესაბამის რეაგირებას;

ი) ახორციელებს კანონმდებლობით დადგენილი წესით მისთვის მინიჭებულ სხვა უფლებამოსილებებს და დაკისრებულ ამოცანებს;

კ) სახელშეკრულებო ვალდებულებათა მონიტორინგის დეპარტამენტის დასკვნის საფუძველზე ამზადებს ინდივიდუალურ ადმინისტრაციულ-სამართლებრივ აქტებს კანონმდებლობით გათვალისწინებულ შემთხვევებში ხელშეკრულებების მოშლის შესახებ;

ლ) ხელშეკრულების შეწყვეტის შემთხვევაში აღნიშნულის შესახებ ინფორმაციას აწვდის სახელშეკრულებო ვალდებულებათა მონიტორინგისა და სახელმწიფო ქონების მართვის პოლიტიკისა და პრივატიზების დეპარტამენტს.“.

მუხლი 2. ბრძანება ძალაშია გამოქვეყნებისთანავე.

ზ. პოლოლიკაშვილი