საქართველოს ეროვნული ბანკის პრეზიდენტის მომართვა 2019 წლის აპრილში საქართველოს პარლამენტის პლენარულ სხდომაზე ეროვნული ბანკის პრეზიდენტის მოსმენის თაობაზე

N 2-14/1211 1211-14-2-201903261209 26/03/2019 საქართველოს პარლამენტის თავმჯდომარეს, ბატონ ირაკლი კობახიძეს ასლი: საქართველოს პარლამენტის საფინანსო-საბიუჯეტო კომიტეტის თავმჯდომარეს, ბატონ ირაკლი კოვზანაძეს ბატონო ირაკლი, როგორც მოგეხსენებათ, ფრაქცია „ევროპული საქართველოს“ მოთხოვნების საფუძველზე, საქართველოს ეროვნული ბანკის პრეზიდენტს მოეთხოვა გამოცხადებულიყო საქართველოს პარლამენტის საფინანსო-საბიუჯეტო კომიტეტის სხდომაზე სს თიბისი ბანკთან დაკავშირებით ეროვნული ბანკის მიერ მიღებული გადაწყვეტილებების შესახებ (N2627/4-3/19, 11-03-2019) და საქართველოს პარლამენტის დარგობრივი ეკონომიკის კომიტეტის სხდომაზე 2019 წლის 1 იანვარს შემოღებულ საცალო დაკრედიტების რეგულაციების შესახებ (N1682/4-6/19, 19-02-2019) სასაუბროდ. ამ უკანასკნელი საკითხის განხილვა გადაიდო 26 თებერვლის კომიტეტის სხდომაზე, რადგანაც ეროვნულ ბანკს სჭირდებოდა რეგულაციების მიმდინარეობის პრაქტიკაზე დაკვირვების როგორც მინიმუმ ერთი კვარტალის შედეგების ანალიზი პირველადი დასკვნის გამოტანისათვის. გთხოვთ, საქართველოს ეროვნული ბანკის პრეზიდენტის მოხსენება ზემოხსენებულ საკითხებზე, მოისმინოთ საქართველოს პარლამენტის პლენარულ სხდომაზე საქართველოს პარლამენტის რეგლამენტის 154-ე მუხლით გათვალისწინებული წესის შესაბამისად, აპრილის თვეში, პარლამენტისათვის ხელსაყრელ დროს. პატივისცემით, კობა გვენეტაძე პრეზიდენტი საქართველოს ეროვნული ბანკი