„სახელმწიფო ბაჟის შესახებ“ საქართველოს კანონში ცვლილების შეტანის თაობაზე“

პროექტი საქართველოს კანონი „სახელმწიფო ბაჟის შესახებ“ საქართველოს კანონში ცვლილების შეტანის თაობაზე მუხლი 1. „სახელმწიფო ბაჟის შესახებ“ საქართველოს კანონის (პარლამენტის უწყებანი, №1920, 30.05.1998, გვ. 37) 62 მუხლი ჩამოყალიბდეს შემდეგი რედაქციით: „მუხლი 62. სახელმწიფო ბაჟის გადახდისგან განთავისუფლების დროებითი წესი 2027 წლის 1 იანვრამდე საერთო სასამართლოებში განსახილველ საქმეზე სახელმწიფო ბაჟის გადახდისგან თავისუფლდება სახელმწიფო შესყიდვებთან დაკავშირებული დავების განხილვის საბჭო, როგორც მოსარჩელე ან მოპასუხე, საჩივართან დაკავშირებით საბჭოს მიერ მიღებული გადაწყვეტილების გასაჩივრებასთან დაკავშირებულ საქმეზე.“. მუხლი 2. ეს კანონი ამოქმედდეს გამოქვეყნებისთანავე. საქართველოს პრეზიდენტი სალომე ზურაბიშვილი

განმარტებითი ბარათი საქართველოს კანონის პროექტზე „სახელმწიფო ბაჟის შესახებ“ საქართველოს კანონში შეტანის შესახებ“ ა) ზოგადი ინფორმაცია კანონპროექტის შესახებ: ა.ა) კანონპროექტის მიღების მიზეზი: ა.ა.ა) პრობლემა, რომლის გადაჭრასაც მიზნად ისახავს კანონპროექტი: კანონპროექტის მიღება განპირობებულია „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტის შემუშავებით, რომლის მიღების შედეგად, „საჯარო შესყიდვების შესახებ“ საქართველოს კანონის ძირითადი დებულებების ამოქმედების თარიღად, ნაცვლად 2025 წლის 1 იანვრისა განისაზღვრება 2027 წლის 1 იანვარი. საგულისხმოა, რომ „სახელმწიფო ბაჟის შესახებ“ საქართველოს კანონში ცვლილების შეტანის თაობაზე“ საქართველოს კანონის (საქართველოს საკანონმდებლო მაცნე (www.matsne.gov.ge), 27.02.2023, სარეგისტრაციო კოდი: 230000000.05.001.020799) მიღების ერთ-ერთ მიზანს წარმოადგენდა „სახელმწიფო ბაჟის შესახებ“ საქართველოს კანონის „საჯარო შესყიდვების შესახებ“ საქართველოს კანონთან შესაბამისობაში მოყვანა და „სახელმწიფო ბაჟის შესახებ“ საქართველოს კანონში არსებული ტერმინების, იმ ტერმინოლოგიით ჩანაცვლება, რომლის შემოღებასაც ახდენს „საჯარო შესყიდვების შესახებ“ საქართველოს კანონი, აგრეთვე – სახელმწიფო ბაჟის გადახდისგან განთავისუფლების დროებითი წესის დადგენა 2025 წლის 1 იანვრამდე, ვინაიდან სწორედ აღნიშნული თარიღიდან ამოქმედდებოდა „სახელმწიფო ბაჟის შესახებ“ საქართველოს კანონის მე-5 მუხლის პირველი პუნქტის „ჰ3“ ქვეპუნქტი, რომლითაც დადგენილია საჯარო შესყიდვებთან დაკავშირებული დავების განხილვის საბჭოს სახელმწიფო ბაჟის გადახდისგან განთავისუფლების წესი. ამდენად, იმის გათვალისწინებით, რომ წარმოდგენილი „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტის თანახმად, „საჯარო შესყიდვების შესახებ“ საქართველოს კანონის ძირითადი დებულებების ამოქმედების თარიღად, ნაცვლად 2025 წლის 1 იანვრისა განისაზღვრება 2027 წლის 1 იანვარი, საკანონმდებლო სივრცის ერთიანობის შენარჩუნების უზრუნველსაყოფად, აუცილებელია „სახელმწიფო ბაჟის შესახებ“ საქართველოს კანონის „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტთან შესაბამისობაში მოყვანა და დროებითი წესის გავრცელება 2027 წლის 1 იანვრამდე. აღნიშნული შესაბამისობის უზრუნველყოფა კი მხოლოდ „სახელმწიფო ბაჟის შესახებ“ საქართველოს კანონში ცვლილების განხორციელების გზით არის შესაძლებელი. ა.ა.ბ) არსებული პრობლემის გადასაჭრელად კანონის მიღების აუცილებლობა: კანონპროექტის მიღების აუცილებლობა გამოწვეულია „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტთან „სახელმწიფო ბაჟის შესახებ“ საქართველოს კანონის შესაბამისობის საჭიროებით. ა.ბ) კანონპროექტის მოსალოდნელი შედეგები: კანონპროექტის მიღებით, „სახელმწიფო ბაჟის შესახებ“ საქართველოს კანონი შესაბამისობაში იქნება მოყვანილი „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტთან. ა.გ) კანონპროექტის ძირითადი არსი: „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტის თანახმად, „საჯარო შესყიდვების შესახებ“ საქართველოს კანონის ძირითადი დებულებების ამოქმედების თარიღად, ნაცვლად 2025 წლის 1 იანვრისა განისაზღვრება 2027 წლის 1 იანვარი. ამდენად, საკანონმდებლო სივრცის ერთიანობის შენარჩუნების უზრუნველსაყოფად, აუცილებელია „საჯარო შესყიდვების შესახებ“ საქართველოს კანონის თანმდევი აქტებით გათვალისწინებული ყველა იმ ნორმის ორი წლით გადავადება, რომელთა ამოქმედების თარიღად 2025 წლის 1 იანვარი იყო განსაზღვრული. კანონპროექტის არსს წარმოადგენს „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტთან „სახელმწიფო ბაჟის შესახებ“ საქართველოს კანონის შესაბამისობის უზრუნველყოფა. ა.დ) კანონპროექტის კავშირი სამთავრობო პროგრამასთან და შესაბამის სფეროში არსებულ სამოქმედო გეგმასთან, ასეთის არსებობის შემთხვევაში (საქართველოს მთავრობის მიერ ინიციირებული კანონპროექტის შემთხვევაში): ასეთი არ არსებობს. ა.ე) კანონპროექტის ძალაში შესვლის თარიღის შერჩევის პრინციპი, ხოლო კანონისთვის უკუძალის მინიჭების შემთხვევაში − აღნიშნულის თაობაზე შესაბამისი დასაბუთება: კანონპროექტის ძალაში შესვლა გათვალისწინებულია გამოქვეყნებისთანავე, ვინაიდან, მისი ამოქმედება დაკავშირებულია „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტის ამოქმედებასთან. კანონპროექტი არ ითვალისწინებს კანონისთვის უკუძალის მინიჭებას. ა.ვ) კანონპროექტის დაჩქარებული წესით განხილვის მიზეზები და შესაბამისი დასაბუთება (თუ ინიციატორი ითხოვს კანონპროექტის დაჩქარებული წესით განხილვას): საგულისხმოა, რომ „საჯარო შესყიდვების შესახებ“ საქართველოს კანონის 99-ე მუხლის მე-3 პუნქტის თანახმად, „შემსყიდველი ორგანიზაცია ვალდებულია არაუგვიანეს 2024 წლის 1 ნოემბრისა შესაბამის სისტემაში წარადგინოს ამ კანონის მე-100 მუხლის მე-2 პუნქტში მითითებული ნორმების შესაბამისად შედგენილი წლიური გეგმა. ამ გეგმაში უნდა აისახოს 2025 წლის 1 იანვრიდან გამოსაცხადებელი საჯარო შესყიდვები, აგრეთვე ინფორმაცია „სახელმწიფო შესყიდვების შესახებ“ საქართველოს კანონის საფუძველზე 2024 წლის ნოემბერსა და დეკემბერში გამოსაცხადებელი, 2025 წლის საჯარო შესყიდვების გეგმით გათვალისწინებული სახელმწიფო შესყიდვის/შესყიდვების შესახებ.“. ვინაიდან „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტი ითვალისწინებს „საჯარო შესყიდვების შესახებ“ საქართველოს კანონის ძირითადი დებულებების ამოქმედების თარიღის გადავადებას 2027 წლის 1 იანვრამდე, შემსყიდველი ორგანიზაციების მიერ 2025 და 2026 წლის წლიური გეგმა წარდგენილ უნდა იქნეს, მოქმედი „სახელმწიფო შესყიდვების შესახებ“ საქართველოს კანონის მიხედვით. ამდენად, წარმოდგენილი კანონპროექტის 2024 წლის 1 ნოემბრამდე მიღება აუცილებლობას წარმოადგენს შემსყიდველი ორგანიზაციების შეუფერხებელი საქმიანობის უზრუნველსაყოფად. შესაბამისად, მოთხოვნილია კანონპროექტის დაჩქარებული წესით განხილვა. ბ)კანონპროექტის ფინანსური გავლენის შეფასება საშუალოვადიან პერიოდში (კანონპროექტის ამოქმედების წელი და შემდგომი 3 წელი): ბ.ა) კანონპროექტის მიღებასთან დაკავშირებით აუცილებელი ხარჯების დაფინანსების წყარო: კანონპროექტის მიღება არ არის დაკავშირებულ ხარჯებთან. ბ.ბ) კანონპროექტის გავლენა სახელმწიფო, ავტონომიური რესპუბლიკის რესპუბლიკური ან/და მუნიციპალიტეტის ბიუჯეტის საშემოსავლო ნაწილზე: კანონპროექტის მიღება გავლენას არ ახდენს სახელმწიფო, ავტონომიური რესპუბლიკის რესპუბლიკური ან/და მუნიციპალიტეტის ბიუჯეტის საშემოსავლო ნაწილზე. გასათვალისწინებელია, რომ „სახელმწიფო ბაჟის შესახებ“ საქართველოს კანონში ცვლილების შეტანის თაობაზე“ საქართველოს კანონის (საქართველოს საკანონმდებლო მაცნე (www.matsne.gov.ge), 27.02.2023, სარეგისტრაციო კოდი: 230000000.05.001.020799) განმარტებითი ბარათის თანახმად, „რამდენადაც საჯარო შესყიდვებთან დაკავშირებული დავების განხილვის საბჭოს (ამჟამადმოქმედი სახელმწიფო შესყიდვებთან დაკავშირებული დავების განხილვის საბჭო) აღარ მოუწევს სახელმწიფო ბაჟის გადახდა, საჩივართან დაკავშირებული საბჭოს გადაწყვეტილების გასაჩივრებასთან დაკავშირებულ საქმეზე, შესაბამისად, კანონპროექტის მიღებას გავლენა ექნება სახელმწიფო ბიუჯეტის საშემოსავლო ნაწილზე. გავლენის ოდენობა დაკავშირებული იქნება მოსარჩელეთა რაოდენობასა და სასარჩელო მოთხოვნის ოდენობაზე.“. საგულისხმოა, რომ აღნიშნული რეგულაცია ამოქმედდა კანონის გამოქვეყნებისთანავე, ვინაიდან იგი ადგენდა სახელმწიფო ბაჟის გადახდისგან განთავისუფლების დროებით წესს 2025 წლის 1 იანვრამდე, ხოლო აღნიშნული თარიღიდან უნდა ამოქმედებულიყო „სახელმწიფო ბაჟის შესახებ“ საქართველოს კანონის მე-5 მუხლის პირველი პუნქტის „ჰ3“ ქვეპუნქტი, რომლითაც დადგენილია საჯარო შესყიდვებთან დაკავშირებული დავების განხილვის საბჭოს სახელმწიფო ბაჟის გადახდისგან განთავისუფლების წესი. ვინაიდან წარმოდგენილი კანონპროექტი, საკანონმდებლო სივრცის ერთიანობის შენარჩუნების უზრუნველსაყოფად, ითვალისწინებს „სახელმწიფო ბაჟის შესახებ“ საქართველოს კანონის „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტთან შესაბამისობაში მოყვანას, ნარჩუნდება დღეს არსებული მდგომარეობა, რომლის თანახმად, საერთო სასამართლოებში განსახილველ საქმეზე სახელმწიფო ბაჟის გადახდისგან გათავისუფლებულია სახელმწიფო შესყიდვებთან დაკავშირებული დავების განხილვის საბჭო, როგორც მოსარჩელე ან მოპასუხე, საჩივართან დაკავშირებით საბჭოს მიერ მიღებული გადაწყვეტილების გასაჩივრებასთან დაკავშირებულ საქმეზე. ბ.გ) კანონპროექტის გავლენა სახელმწიფო, ავტონომიური რესპუბლიკის რესპუბლიკური ან/და მუნიციპალიტეტის ბიუჯეტის ხარჯვით ნაწილზე: კანონპროექტი გავლენას არ ახდენს სახელმწიფო, ავტონომიური რესპუბლიკის რესპუბლიკური ან/და მუნიციპალიტეტის ბიუჯეტის ხარჯვით ნაწილზე. გასათვალისწინებელია, რომ „სახელმწიფო ბაჟის შესახებ“ საქართველოს კანონში ცვლილების შეტანის თაობაზე“ საქართველოს კანონის (საქართველოს საკანონმდებლო მაცნე (www.matsne.gov.ge), 27.02.2023, სარეგისტრაციო კოდი: 230000000.05.001.020799) განმარტებითი ბარათის თანახმად, „რამდენადაც საჯარო შესყიდვებთან დაკავშირებული დავების განხილვის საბჭოს (ამჟამადმოქმედი სახელმწიფო შესყიდვებთან დაკავშირებული დავების განხილვის საბჭო) აღარ მოუწევს სახელმწიფო ბაჟის გადახდა, საჩივართან დაკავშირებული საბჭოს გადაწყვეტილების გასაჩივრებასთან დაკავშირებულ საქმეზე, შესაბამისად, კანონპროექტის მიღებას გავლენა ექნება, სახელმწიფო ბიუჯეტის ხარჯვით ნაწილზე. გავლენის ოდენობა დაკავშირებული იქნება მოსარჩელეთა რაოდენობასა და სასარჩელო მოთხოვნის ოდენობაზე.“. საგულისხმოა, რომ აღნიშნული რეგულაცია ამოქმედდა კანონის გამოქვეყნებისთანავე, ვინაიდან იგი ადგენდა სახელმწიფო ბაჟის გადახდისგან განთავისუფლების დროებით წესს 2025 წლის 1 იანვრამდე, ხოლო აღნიშნული თარიღიდან უნდა ამოქმედებულიყო „სახელმწიფო ბაჟის შესახებ“ საქართველოს კანონის მე-5 მუხლის პირველი პუნქტის „ჰ3“ ქვეპუნქტი, რომლითაც დადგენილია საჯარო შესყიდვებთან დაკავშირებული დავების განხილვის საბჭოს სახელმწიფო ბაჟის გადახდისგან განთავისუფლების წესი. ვინაიდან წარმოდგენილი კანონპროექტი, საკანონმდებლო სივრცის ერთიანობის შენარჩუნების უზრუნველსაყოფად, ითვალისწინებს „სახელმწიფო ბაჟის შესახებ“ საქართველოს კანონის „საჯარო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს კანონის პროექტთან შესაბამისობაში მოყვანას, ნარჩუნდება დღეს არსებული მდგომარეობა, რომლის თანახმად, საერთო სასამართლოებში განსახილველ საქმეზე სახელმწიფო ბაჟის გადახდისგან გათავისუფლებულია სახელმწიფო შესყიდვებთან დაკავშირებული დავების განხილვის საბჭო, როგორც მოსარჩელე ან მოპასუხე, საჩივართან დაკავშირებით საბჭოს მიერ მიღებული გადაწყვეტილების გასაჩივრებასთან დაკავშირებულ საქმეზე. ბ.დ) სახელმწიფოს ახალი ფინანსური ვალდებულებები, კანონპროექტის გავლენით სახელმწიფოს ან მის სისტემაში არსებული უწყების მიერ მისაღები პირდაპირი ფინანსური ვალდებულებების (საშინაო ან საგარეო ვალდებულებები) მითითებით: კანონპროექტის მიღება სახელმწიფოს მხრიდან ახალი ფინანსური ვალდებულების აღებას არ ითვალისწინებს. ბ.ე) კანონპროექტის მოსალოდნელი ფინანსური შედეგები იმ პირთათვის, რომელთა მიმართაც ვრცელდება კანონპროექტის მოქმედება, იმ ფიზიკურ და იურიდიულ პირებზე გავლენის ბუნებისა და მიმართულების მითითებით, რომლებზედაც მოსალოდნელია კანონპროექტით განსაზღვრულ ქმედებებს ჰქონდეს პირდაპირი გავლენა: კანონპროექტის არ იქონიებს ფინანსურ შედეგებს იმ პირებზე, რომლებზეც გავრცელდება მისი მოქმედება. ბ.ვ) კანონპროექტით დადგენილი გადასახადის, მოსაკრებლის ან სხვა სახის გადასახდელის (ფულადი შენატანის) ოდენობა შესაბამის ბიუჯეტში და ოდენობის განსაზღვრის პრინციპი: კანონპროექტი არ ითვალისწინებს გადასახადის, მოსაკრებელის ან სხვა სახის გადასახდელის დაწესებას. ბ1) ბავშვის უფლებრივ მდგომარეობაზე კანონპროექტის ზეგავლენის შეფასება: კანონპროექტის მიღება არ იქონიებს ზეგავლენას ბავშვის უფლებრივ მდგომარეობაზე. ბ2) გენდერული თანასწორობის მდგომარეობაზე კანონპროექტის მოსალოდნელი ზეგავლენის შეფასება; კანონპროექტს არ აქვს მოსალოდნელი ზეგავლენა გენდერული თანასწორობის მდგომარეობაზე. გ) კანონპროექტის მიმართება საერთაშორისო სამართლებრივ სტანდარტებთან: გ.ა) კანონპროექტის მიმართება ევროკავშირის სამართალთან: კანონპროექტი არ ეწინააღმდეგება ევროკავშირის სამართალს. გ.ბ) კანონპროექტის მიმართება საერთაშორისო ორგანიზაციებში საქართველოს წევრობასთან დაკავშირებულ ვალდებულებებთან: კანონპროექტი არ ეწინააღმდეგება საერთაშორისო ორგანიზაციებში საქართველოს წევრობასთან დაკავშირებულ ვალდებულებებს. გ.გ) კანონპროექტის მიმართება საქართველოს ორმხრივ და მრავალმხრივ ხელშეკრულებებთან და შეთანხმებებთან, აგრეთვე, ისეთი ხელშეკრულების/შეთანხმების არსებობის შემთხვევაში, რომელსაც უკავშირდება კანონპროექტის მომზადება, − მისი შესაბამისი მუხლი ან/და ნაწილი: კანონპროექტის მიღება არ ეწინააღმდეგება საქართველოს ორმხრივ და მრავალმხრივ ხელშეკრულებებს და შეთანხმებებს. აგრეთვე, კანონპროექტი არ უკავშირდება რომელიმე ხელშეკრულებას/შეთანხმებას. გ.დ) არსებობის შემთხვევაში, ევროკავშირის ის სამართლებრივი აქტი, რომელთან დაახლოების ვალდებულებაც გამომდინარეობს „ერთი მხრივ, საქართველოსა და, მეორე მხრივ, ევროკავშირსა და ევროპის ატომური ენერგიის გაერთიანებას და მათ წევრ სახელმწიფოებს შორის ასოცირების შესახებ შეთანხმებიდან“ ან ევროკავშირთან დადებული საქართველოს სხვა ორმხრივი და მრავალმხრივი ხელშეკრულებებიდან: ასეთი არ არსებობს. დ) კანონპროექტის მომზადების პროცესში მიღებული კონსულტაციები: დ.ა) სახელმწიფო, არასახელმწიფო ან/და საერთაშორისო ორგანიზაცია/დაწესებულება, ექსპერტი, სამუშაო ჯგუფი, რომელმაც მონაწილეობა მიიღო კანონპროექტის შემუშავებაში, ასეთის არსებობის შემთხვევაში: ასეთი არ არსებობს. დ.ბ) კანონპროექტის შემუშავებაში მონაწილე ორგანიზაციის/დაწესებულების, სამუშაო ჯგუფის, ექსპერტის შეფასება კანონპროექტის მიმართ, ასეთის არსებობის შემთხვევაში: ასეთი არ არსებობს. დ.გ) სხვა ქვეყნების გამოცდილება კანონპროექტის მსგავსი კანონების იმპლემენტაციის სფეროში, იმ გამოცდილების მიმოხილვა, რომელიც მაგალითად იქნა გამოყენებული კანონპროექტის მომზადებისას, ასეთი მიმოხილვის მომზადების შემთხვევაში: ასეთი მიმოხილვა არ მომზადებულა. ე) კანონპროექტის ავტორი: საჯარო სამართლის იურიდიული პირი − სახელმწიფო შესყიდვების სააგენტო. ვ) კანონპროექტის ინიციატორი: საქართველოს მთავრობა.