„2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის თავმჯდომარის თეა წულუკიანის მიერ წარმოდგენილი „2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის მიერ გაწეული საქმიანობის შუალედური ანგარიში (2025 წლის 13 თებერვალი - 2025 წლის 19 ივნისი)

2-8438/25 23-06-2025 საქართველოს პარლამენტის ბიუროს საქართველოს პარლამენტის რეგლამენტის 66-ე მუხლის პირველი პუნქტისა და მეორე პუნქტის „ა“ ქვეპუნქტის საფუძველზე, 2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის 2025 წლის 19 ივნისის სხდომაზე მიღებული გადაწყვეტილების შესაბამისად, წარმოგიდგენთ კომისიის მიერ გაწეული საქმიანობის შუალედურ ანგარიშს და მოგმართავთ თხოვნით, საქართველოს პარლამენტის პლენარული სხდომის დღის წესრიგში შესატანად განიხილოთ კომისიის უფლებამოსილების ვადის ერთი თვით გაგრძელების საკითხი. პატივისცემით, კომისიის თავმჯდომარე თეა წულუკიანი თბილისი 0118, რუსთაველის გამზ. № 8 საქართველოს პარლამენტის სასახლე ტელეფონი: (995 32) 2281679, ელ-ფოსტა contact@parliament.ge

2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის მიერ გაწეული საქმიანობის მესამე შუალედური ანგარიში (2025 წლის 13 თებერვალი - 2025 წლის 19 ივნისი) მოწონებულია კომისიის 2025 წლის 19 ივნისის სხდომაზე როგორც ცნობილია, საქართველოს პარლამენტის 2025 წლის 5 თებერვლის N240IIმს-XIმპ დადგენილების საფუძველზე შეიქმნა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საქართველოს პარლამენტის დროებითი საგამოძიებო კომისია“ (შემდგომში - საგამოძიებო კომისია). 2025 წლის 10 თებერვალს, საქართველოს პარლამენტის ბიურომ განსაზღვრა საგამოძიებო კომისიის შემადგენლობა: ილია ინჯია („ევროპელი სოციალისტები“), გურამ მაჭარაშვილი („ხალხის ძალა“), პაატა სალია („ქართული ოცნება“), სოზარ სუბარი („ხალხის ძალა“), ალექსანდრე ტაბატაძე („ქართული ოცნება“), ალუდა ღუდუშაური („ქართული ოცნება“), თენგიზ შარმანაშვილი („ქართული ოცნება“), და თეა წულუკიანი („ქართული ოცნება“). საქართველოს პარლამენტის რეგლამენტის 62-ე მუხლის მე-5 და მე-6 პუნქტების შესაბამისად, 2025 წლის 13 თებერვალს, საგამოძიებო კომისიამ გამართა პირველი საორგანიზაციო სხდომა, რომელზეც არჩეულ იქნენ საგამოძიებო კომისიის თავმჯდომარე (თეა წულუკიანი) და საგამოძიებო კომისიის მდივანი (სოზარ სუბარი). გარდა ამისა, აღნიშნულ სხდომაზე, კომისიამ შეიმუშავა საგამოძიებო კომისიის დებულების პროექტი, რომელსაც კენჭი ეყარა მომდევნო სხდომაზე, 17 თებერვალს, და ის დასამტკიცებლად გადაეგზავნა საქართველოს პარლამენტის ბიუროს. შემდგომში, 2025 წლის 25 მარტს, საგამოძიებო კომისიამ შეიმუშავა დამატებითი ცვლილებები კომისიის დებულებაში, რაც, დადგენილი წესით, ასევე გადაეგზავნა საქართველოს პარლამენტის ბიუროს დასამტკიცებლად. მოცემული ცვლილებების შედეგად, სხვებს შორის, გაფართოვდა საგამოძიებო კომისიის ინდივიდუალური წევრის უფლებამოსილებები, რომელსაც შესაძლებლობა მიეცა, გამოკითხოს ესა თუ ის პირი, შეადგინოს შესაბამისი ოქმი და წარუდგინოს ის საგამოძიებო კომისიას განსახილველად. ამასთან, საგამოძიებო კომისიამ, მისი წევრების ქმედითი დახმარების შედეგად, საქმიანობის პირველივე დღეებიდანვე განსაზღვრა კომისიის მხარდამჭერი ადმინისტრაციული პერსონალი (შემდგომში - კომისიის ადმინისტრაციული პერსონალი). საანგარიშო პერიოდში, საგამოძიებო კომისიას დახმარებას უწევდა საქართველოს პარლამენტის ადმინისტრაცია და მისი სხვადასხვა სტრუქტურული ერთეულები. საგამოძიებო კომისიასთან საუკეთესო თანამშრომლობა ჰქონდა ყველა სახელმწიფო სტრუქტურას, განსაკუთრებით კი - საქართველოს პროკურატურას. საგამოძიებო კომისიამ წარმატებით ითანამშრომლა შემდეგ მედიასაშუალებებთან, რომელთაც მოთხოვნისამებრ წარმოადგინეს მნიშვნელოვანი საარქივო მასალები: ტელეკომპანია „იმედი“, ტელეკომპანია „რუსთავი-2“, საქართველოს საზოგადოებრივი მაუწყებელი და საქართველოს საპატრიარქოს ტელევიზია „ერთსულოვნება“. ამასთან, ტელეკომპანია „მაესტრო“ პირდაპირ ეთერში გადაცემდა კომისიის თითოეულ სხდომას. 2025 წლის 1 აპრილს, საქართველოს პარლამენტმა მიიღო დადგენილება, რომლის საფუძველზეც გაფართოვდა საგამოძიებო კომისიის მანდატი და კომისიის სახელწოდებაც ახლებურად ჩამოყალიბდა („2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისია“). 2025 წლის 10 აპრილის სხდომაზე, საგამოძიებო კომისიამ მიიღო გადაწყვეტილება, შუამდგომლობით მიემართა პარლამენტისათვის მისი უფლებამოსილების ვადის 1 თვით გაგრძელების თაობაზე, როგორც ამას პარლამენტის რეგლამენტის 66-ე მუხლი ითვალისწინებს. კერძოდ, კომისიის სხდომაზე აღინიშნა, რომ მოცემული დამატებითი ვადა აუცილებელი გახდა არა მხოლოდ თავდაპირველად განსაზღვრული გამოსაკვლევი საკითხების დიდი მოცულობიდან გამომდინარე, არამედ იმის გათვალისწინებითაც, რომ პარლამენტის 2025 წლის 1 აპრილის დადგენილების საფუძველზე, მნიშვნელოვნად გაფართოვდა საგამოძიებო კომისიის მანდატი და 2012-2025 წლების პერიოდიც მოიცვა. პარლამენტის დადგენილებით 29 აპრილის პლენარულ სხდომაზე კომისიას ვადა გაუგრძელდა 5 ივნისამდე. მომდევნო პერიოდში, საგამოძიებო კომისიის 2025 წლის 26 მაისის შუამდგომლობა განხილულ იქნა კანონმდებლობით დადგენილი წესით და, 2025 წლის 28 მაისის პლენარულ სხდომაზე, საქართველოს პარლამენტმა მიიღო გადაწყვეტილება კომისიისათვის უფლებამოსილების ვადის 5 ივლისამდე გაგრძელების შესახებ. 2025 წლის 19 ივნისის სხდომაზე, საგამოძიებო კომისიამ მიიღო გადაწყვეტილება, შუამდგომლობით მიემართა საქართველოს პარლამენტისათვის მისი უფლებამოსილების ვადის 5 აგვისტომდე გაგრძელების თაობაზე, როგორც ამას საქართველოს პარლამენტის 66-ე მუხლი ითვალისწინებს. კერძოდ, კომისიის სხდომაზე აღინიშნა, რომ მოცემული დამატებითი ვადა აუცილებელია დასკვნის პროექტზე მუშაობისა და მოქალაქეების მიერ შემოტანილი განცხადებების განხილვის დასრულებისთვის. კომისია გეგმავს, უფლებამოსილების მიმდინარე ვადის განმავლობაში, ბოლო საჯარო მოსმენა გამართოს 2 ივლისს, ხოლო საქართველოს პარლამენტის თანხმობის შემთხვევაში, შემდგომი პერიოდი დოკუმენტებზე მუშაობას დაუთმოს და კომისიის დასკვნა დაამტკიცოს 2025 წლის 4 აგვისტოს სხდომაზე. 2025 წლის 13 თებერვლიდან 19 ივნისის ჩათვლით, საგამოძიებო კომისიამ 39 სხდომა გამართა, რომელთაგან მხოლოდ ერთი სხდომის ერთი ნაწილი გამოცხადდა დახურულად მოწვეული პირის (ბატონი გრიგოლ ვაშაძე) მოთხოვნის საფუძველზე. კომისიის სამი წევრის მიერ გამოკითხვის ფორმატში ჩატარდა 3 სხდომა და გამოიკითხა 5 პირი. 2025 წლის 2 ივნისს საგამოძიებო კომისიამ ერთი გასვლითი შეხვედრა გამართა ხონის ყოფილ სასაჯელაღსრულების დაწესებულებაში. კომისიის სხდომები (გარდა დახურული ნაწილისა) გადაიცემოდა პირდაპირი ტრანსლაციით საზოგადოებრივი მაუწყებლის პარლამენტის არხით და ტელეკომპანია „მაესტროს“ ეთერით, ასევე, საქართველოს პარლამენტის ვებგვერდზე და სოციალურ პლატფორმებზე. საანგარიშო პერიოდში, საგამოძიებო კომისიის მიერ გამოკითხულ იქნა 123 პირი, მათ შორის, 91 დაზარალებული პირი/მსხვერპლი. საგამოძიებო კომისიის მოთხოვნის შეუსრულებლობის (სხდომაზე გამოცხადება) არაერთი ფაქტის სამართლებრივი შეფასების მიზნით, საგამოძიებო კომისიამ საქართველოს გენერალურ პროკურატურას გადაუგზავნა შემდეგ პირებთან დაკავშირებული ინფორმაცია: ბადრი ჯაფარიძე, მამუკა ხაზარაძე, ირაკლი ოქრუაშვილი, ნიკა გვარამია, ზურაბ გირჩი ჯაფარიძე, გიორგი ვაშაძე, ნიკანორ მელია, გიორგი (გივი) თარგამაძე. ამჟამად, მოცემული პირების მიმართ მიმდინარეობს კანონმდებლობით გათვალისწინებული სასამართლო პროცედურები, რაც სცილდება საგამოძიებო კომისიის კომპეტენციის ფარგლებს. კომისიის სამდივნოს შესაბამისი წარმომადგენლები განუხრელად თანამშრომლობდნენ საგამოძიებო ორგანოებთან კანონმდებლობის შესაბამისად და დადგენილი წესით. 2025 წლის 19 ივნისის მდგომარეობით, საგამოძიებო კომისიის სახელზე შემოსულია 656 განცხადება, რომელთაგან უმეტესი ნაწილი წამებას, არაადამიანურ მოპყრობას და ქონებრივი უფლებების დარღვევას ეხება. კვლავ მიმდინარეობს კომისიის სხდომების სტენოგრაფიული ჩანაწერების შედგენა და მოცემული ინფორმაციის ანალიზი საგამოძიებო კომისიის დასკვნაში მათი სათანადოდ ასახვის მიზნით. ამ ეტაპისთვის დასრულებულია 23 და დარჩენილია 20-მდე სტენოგრაფიული ჩანაწერის შედგენა. ჯამში, საგამოძიებო კომისიის დასკვნის პროექტის სხვადასხვა თემატური თავის/ქვეთავის შედგენა წარმატებით მიმდინარეობს.