გადაწყვეტილება №26519/2/2026

№26519/2/2026

11 მარტი 2026

გ ა დ ა წ ყ ვ ე ტ ი ლ ე ბ ა

 

მომჩივანი:"--------" (ს/ნ "--------")

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ,12.02.2026 წელს განიხილა და მიიღო გადაწყვეტილება "--------"-ის 27.01.2026 წელს რეგისტრირებულ საჩივარზე (რეგისტრაციის №26519/2/2026).

 

დავის საგანი:

საჩივრის განუხილველად დატოვება - გასულია საჩივრის წარდგენის კანონით დადგენილი ვადა.

 

გასაჩივრებული გადაწყვეტილება:

1. აუდიტის დეპარტამენტის 18.11.2025 წლის №001-250 საგადასახადო მოთხოვნა;

2. შემოსავლების სამსახურის 23.01.2026 წლის №671 ბრძანება.

 

დარიცხული თანხა: 118 150,47 ლარი.

მათ შორის:

დღგ - 84 617,54

ჯარიმა - 0,01

საურავი - 33 532,92

 

ფაქტების აღწერა/დარიცხვის საფუძვლები

აუდიტის დეპარტამენტის 27.05.2025 წლის კამერალური საგადასახადო შემოწმების აქტით შემოწმებულია 1.01.2022 წლიდან 1.03.2025 წლამდე პერიოდის საკონტროლო-სალარო აპარატითა და პოსტერმინალით განხორციელებული ანგარიშსწორებისას მიღებული თანხების დღგ-ის დეკლარაციაში ასახვის სისწორე. შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 29.05.2025 წლის №001-80 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 22.07.2025 წლის №16435 ბრძანებით საჩივარი დაკმაყოფილდა ნაწილობრივ. შემოსავლების სამსახურის 22.07.2025 წლის №16435 ბრძანების აღსრულების შედეგებზე შედგენილი აუდიტის დეპარტამენტის 21.08.2025 წლის დასკვნის საფუძველზე გადასახადის გადამხდელს წარედგინა ამავე დეპარტამენტის 27.08.2025 წლის №001-195 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 29.10.2025 წლის №23793 ბრძანებით საჩივარი დაკმაყოფილდა ნაწილობრივ. შემოსავლების სამსახურის 29.10.2025 წლის №23793 ბრძანების აღსრულების შედეგებზე შედგენილი აუდიტის დეპარტამენტის 13.11.2025 წლის დასკვნის საფუძველზე გადასახადის გადამხდელს წარედგინა ამავე დეპარტამენტის 18.11.2025 წლის №001-250 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 23.01.2026 წლის №671 ბრძანებით საჩივარი დარჩა განუხილველი საგადასახადო კოდექსის 301-ე მუხლის „ე“ ქვეპუნქტის საფუძველზე, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური მიუთითებს საგადასახადო კოდექსის 44-ე მუხლის პირველ ნაწილზე, 44- ე მუხლის მე-9 ნაწილზე, 299-ე მუხლის პირველ, მე-4 და მე-10 ნაწილებზე და 301-ე მუხლის „ე“ ქვეპუნქტზე.

საქმის ირგვლივ არსებული მასალებითა და შემოსავლების სამსახურის გადასახადების ადმინისტრირების საინფორმაციო სისტემის მონაცემებით დგინდება, ი/მ "--------" (ს/ნ "--------") 2025 წლის 13 ნოემბრის საგადასახადო შემოწმების შედეგების გადაანგარიშების თაობაზე დასკვნას, გადასახადების/გადასახდელების და საგადასახადო სანქციების თანხების დარიცხვის/შემცირების შესახებ აუდიტის დეპარტამენტის 2025 წლის 18 ნოემბრის №25268 ბრძანებასა და ამავე თარიღის №001-250 კორექტირებულ საგადასახადო მოთხოვნას გადასახადის გადამხდელის ავტორიზებული მომხმარებლის გვერდზე გაეცნო 2025 წლის 19 ნოემბერს.

შემოსავლების სამსახურში საჩივარი წარმოდგენილია გასაჩივრებისათვის კანონით დადგენილი ვადის დარღვევით - 2025 წლის 26 დეკემბერს.

ამასთან, შემოსავლების სამსახური აღნიშნავს, რომ გადასახადის გადამხდელს წარმოდგენილ საჩივარში არ აქვს მითითებული არგუმენტები საჩივრის ვადაში წარდგენის შეუძლებლობის შესახებ.

მითითებულ სამართლებრივ ნორმებსა და ფაქტობრივ გარემოებებზე დაყრდნობით, შემოსავლების სამსახურმა მიიჩნია, რომ ვინაიდან საჩივარი წარმოდგენილია საგადასახადო ორგანოს გადაწყვეტილების გასაჩივრებისათვის კანონით დადგენილი 30 დღიანი ვადის დარღვევით, ხოლო მომჩივანს არ წარმოუდგენია არგუმენტაცია/მტკიცებულებები გასაჩივრების ვადის დარღვევის მისგან დამოუკიდებელი მიზეზით გამოწვევასთან დაკავშირებით, სახეზეა საჩივრის განუხილველად დატოვების საგადასახადო კოდექსის 301-ე მუხლის „ე“ ქვეპუნქტით გათვალისწინებული საფუძველი.

ზემოაღნიშნულის გათვალისწინებით, შემოსავლების სამსახურმა მიიჩნია, რომ ი/მ "--------"-ის (ს/ნ "--------") საჩივარი აუდიტის დეპარტამენტის 2025 წლის 18 ნოემბრის №001-250 საგადასახადო მოთხოვნასთან დაკავშირებით, საგადასახადო კოდექსის 301-ე მუხლის „ე“ ქვეპუნქტის საფუძველზე, უნდა დარჩეს განუხილველი.

 

მომჩივნის არგუმენტაცია

წარმოადგინა საჩივარი, რომელიც გაეგზავნა შემოსავლების სამსახურს. შემოსავლების სამსახურიდან მიიღო პასუხი, რომ არ განიხილეს, თუმცა წერილში ეწერა, რომ კვლავაც შეუძლია საქართველოს ფინანსთა სამინისტროსთან არსებულ დავების განხილვის საბჭოში გაასაჩივროს. ითხოვს განხილულ იქნას მისი, როგორც კეთილსინდისიერი გადასახადის გადამხდელის მდგომარეობა და დაკისრებული საურავი ეპატიოს, რადგან ნელ-ნელა იხდის გადასახადს.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საგადასახადო კოდექსის 44-ე მუხლის მე-9 ნაწილის თანახმად, საგადასახადო ორგანოს მიერ პირისათვის ელექტრონული ფორმით გაგზავნილი დოკუმენტი ჩაბარებულად ითვლება ადრესატის მიერ მისი გაცნობისთანავე.

საგადასახადო კოდექსის 299-ე მუხლის მე-4 და მე-10 ნაწილების თანახმად, პირს უფლება აქვს, გაასაჩივროს საგადასახადო ორგანოს გადაწყვეტილება მისი ჩაბარებიდან 30 დღის ვადაში. საგადასახადო ორგანოს გადაწყვეტილება შეიძლება გასაჩივრდეს საჩივრის წარდგენის ვადის გასვლის შემდეგაც, თუ მომჩივანი დაამტკიცებს, რომ გასაჩივრების ვადის დარღვევა მისგან დამოუკიდებელი მიზეზით იყო გამოწვეული.

აუდიტის დეპარტამენტის 30.01.2026 წლის №------ წერილის მიხედვით, აუდიტის დეპარტამენტის 13.11.2025 წლის დასკვნას, მის საფუძველზე გამოცემულ 18.11.2025 წლის №25268 ბრძანებას და 18.11.2025 წლის №001-250 საგადასახადო მოთხოვნას გადასახადის გადამხდელი გაეცნო ელექტრონულად შემოსავლების სამსახურის ოფიციალური ვებგვერდის (www.rs.ge) საშუალებით 19.11.2025 წელს.

აღნიშნულიდან გამომდინარე, აუდიტის დეპარტამენტის 18.11.2025 წლის №001-250 საგადასახადო მოთხოვნის გასაჩივრების ვადის ბოლო დღე იყო 19.12.2025 წელს. აუდიტის დეპარტამენტის 18.11.2025 წლის №001-250 საგადასახადო მოთხოვნის გაუქმების თაობაზე საჩივარი შემოსავლების სამსახურში წარდგენილია 26.12.2025 წელს, მისი გასაჩივრების ვადის გასვლის შემდეგ.

ამასთან, მომჩივანს არ წარმოუდგენია რაიმე მტკიცებულება ან/და არგუმენტაცია სადავო აქტის გასაჩივრებისათვის დადგენილი ვადის მისგან დამოუკიდებელი მიზეზით დარღვევასთან დაკავშირებით. შესაბამისად, საბჭომ მიიჩნია, რომ შემოსავლების სამსახურის 23.01.2026 წლის №671 ბრძანება საჩივრის საგადასახადო კოდექსის 301-ე მუხლის „ე“ ქვეპუნქტის საფუძველზე განუხილველად დატოვების თაობაზე მართლზომიერია და არ არსებობს მისი გაუქმების საფუძველი.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი

მომჩივანი ითხოვს განხილულ იქნას მისი, როგორც კეთილსინდისიერი გადასახადის გადამხდელის მდგომარეობა და დაკისრებული საურავი ეპატიოს.

 

ფაქტობრივი გარემოებები

მომჩივანის საქმიანობის საგანს წარმოადგენს გაყინული ხორცპროდუქტებითა და ნახევარფაბრიკატებით ვაჭრობა. მომჩივანი 2022 წლის პირველ მაისს რეგისტრირებულია დღგ-ს გადამხდელად.მიღებულმა შემოსავალმა გადააჭარბა 100 000 ლარს 2022 წლის 11 მარტს, ხოლო მეწარმის მიერ ეკონომიკური საქმიანობის ფარგლებში განხორციელებული საქონლის/მომსახურების მიწოდება სსკ-ის შესაბამისად არ არის გათავისუფლებული დღგ-ისგან. შემოწმებით გადამხდელს დღგ-ის გადამხდელად სავალდებულო რეგისტრაციის თარიღად განესაზღვრა 2022 წლის 11 მარტი, შედეგად დასაბეგრი ოპერაციის განხორციელების მომენტიდან შესამოწმებელ პერიოდში მეწარმის მიერ მიღებული შემოსავალი შეადგენს 865 805 ლარს,შესაბამისად, სხვაობა დაიბეგრა დღგ-ით. ასევე, შემოწმებით მიღებული ანგარიშფაქტურების შესაბამისად გაიზარდა ჩასათვლელი დღგ-ის თანხა. შედეგად, გადამხდელს დაერიცხა დღგ და ჯარიმა.

საჩივარი დარჩა განუხილველი სსკ-ის 301-ე მუხლის „ე“ ქვეპუნქტის საფუძველზე.

 

გადაწყვეტილება

საბჭომ მიიჩნია, რომ საჩივრის საგადასახადო კოდექსის 301-ე მუხლის „ე“ ქვეპუნქტის საფუძველზე განუხილველად დატოვების თაობაზე მართლზომიერია და არ არსებობს მისი გაუქმების საფუძველი.

 

დასაბუთება

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს :

301(ე).