ბრძანება N 27345

N 27345

11 დეკემბერი 2025

ბ რ ძ ა ნ ე ბ ა

 

ი/მ ----- (ს/ნ -----) (მის.: ----- )

2025 წლის 28 ოქტომბრისა და 12 ნოემბრის

საჩივრების დაკმაყოფილებაზე

უარის თქმის თაობაზე.

 

შემოსავლების სამსახურმა დავების განხილვის საბჭოს 2025 წლის 13, 27 ნოემბრისა და 4 დეკემბრის სხდომებზე (ოქმი N 94, N 98 და N 101) განიხილა ი/მ ----- (ს/ნ ----- ) 2025 წლის 28 ოქტომბრის N 170451/21 და 12 ნოემბრის N 180143/21-11 საჩივრები, შემოსავლების სამსახურის აუდიტის დეპარტამენტის 2025 წლის 13 ოქტომბრის N 056-69 საგადასახადო მოთხოვნასთან დაკავშირებით.

 

გადასახადის გადამხდელის პოზიცია:

გადასახადის გადამხდელი არ ეთანხმება საგადასახადო მოთხოვნით დარიცხულ თანხებს, თუმცა საჩივრებში არგუმენტები/მტკიცებულებები არ აქვს წარმოდგენილი.

 

ფაქტობრივი გარემოებები:

საქმის მასალებით დგინდება, რომ შემოსავლების სამსახურის აუდიტის დეპარტამენტის 2025 წლის 23 მაისის N 10528 ბრძანების საფუძველზე ჩატარდა ი/მ ----- (ს/ნ ----- ) საქმიანობის კამერალური საგადასახადო შემოწმება. შესამოწმებელ პერიოდად განისაზღვრა 2022 წლის პირველი იანვრიდან 2025 წლის 22 მაისის ჩათვლით საანგარიშო პერიოდები. საგადასახადო შემოწმების შედეგებზე 2025 წლის 30 სექტემბერს შედგა საგადასახადო შემოწმების აქტი, გამოიცა 2025 წლის 13 ოქტომბრის N 21799 ბრძანება და ამავე თარიღის N 056–69 საგადასახადო მოთხოვნა, რომლის საფუძველზე გადასახადის გადამხდელს დამატებით გადასახდელად განესაზღვრა სულ 806 077 ლარი, მათ შორის გადასახადი 446 296 ლარი, ჯარიმა 209 411 ლარი და საურავი 150 370 ლარი.

 

საგადასახადო შემოწმების აქტის მიხედვით, საგადასახადო ვალდებულებები განსაზღვრულია შემდეგი გარემოებით:

. გადამხდელის საქმიანობაა პურ - ფუნთუშეულის წარმოება/რეალიზაცია. შემოწმების მიმდინარეობისას გადასახადის გადამხდელს ბუღალტრული პროგრამა არ წარუდგენია. გადამხდელმა შემმოწმებელს მიაწოდა წარმოებული პროდუქციის ნაწილში გამოყენებული ფქვილის შესახებ კალკულაციის ცხრილი, ეკონომიკურ საქმიანობაში გამოყენებული ძირითადი საშუალებების შესახებ მონაცემები და საბანკო ამონაწერები. გადამხდელის მიერ წარდგენილი იყო შესამოწმებელ პერიოდზე, როგორც დღგ-ის დეკლარაციები, ისე საშემოსავლო გადასახადის წლიური დეკლარაცია. ასევე, საგადასახადო მონიტორინგის დეპარტამენტის 2025 წლის 4 ივნისის N 11403 ბრძანების საფუძველზე ჩატარდა ი/მ ----- სმფ-ებისა და ძირითადი საშუალებების ნაშთის ფაქტობრივი აღრიცხვა, რაც მიეწოდა შემმოწმებელს შემოწმების ფარგლებში. გადამხდელს შესამოწმებელი პერიოდის განმავლობაში დეკლარირებული დღგ-ით დასაბეგრი ბრუნვა უფიქსირდებოდა 586 469 ლარის ოდენობით, ხოლო დოკუმენტური რეალიზაცია აღნიშნულ პერიოდზე შეადგენდა 520 364 ლარს. გადამხდელს პირველადი ხარჯის დამადასტურებელი დოკუმენტაციით რეალიზებული საქონლის მოცულობასთან მიმართებით უფიქსირდებოდა დიდი მოცულობის სასაქონლო - მატერიალური მარაგების შეძენა (გარდა ფქვილისა), მათ შორის მარილის შეძენა 26 750 კგ. ოდენობით. საფუარისა და სხვა ცხობისთვის საჭირო ნედლეულის ღირებულებამ შეადგინა 133 125 ლარი. ასევე, გადამხდელს საანგარიშო პერიოდზე უფიქსირდებოდა საგადასახადო ანგარიშ - ფაქტურებით ბუნებრივი აირის მიწოდება და გამოყენება, ჯამურად 245 193 ლარის ღირებულების, რაზეც მიღებული ჰქონდა შესაბამისი დღგ-ის ჩათვლა. შემოსავლების სამსახურის გადასახადების ადმინისტრირების საინფორმაციო სისტემაში არსებული მონაცემების ანალიზის შესაბამისად, გადასახადის გადამხდელს სატრანსპორტო სასაქონლო ზედნადებების მეშვეობით, მათ შორის გამოწერილი დისტრიბუციის სატრანსპორტო სასაქონლო ზედნადებების ანალიზით უფიქსირდებოდა იმაზე მეტი პროდუქციის წარმოება და სარეალიზაციოდ გატანა, ვიდრე დეკლარაციების შესაბამისად იყო ნაჩვენები. აღნიშნული ფაქტობრივი გარემოებების გათვალისწინებით, შემოწმებამ იხელმძღვანელა საქართველოს საგადასახადო კოდექსის 73-ე მუხლის მე-5-ე ნაწილით და გადამხდელის საგადასახადო ვალდებულებები განსაზღვრა არაპირდაპირი მეთოდის გამოყენებით. კერძოდ, შემოწმების მიმდინარეობისას ზემოაღნიშნული წარმოების მოცულობის, ქვე ზედნადებებისა და სხვა დოკუმენტური რეალიზაციის გათვალისწინების შემდეგ საქონლის ის ოდენობა, რომლის რეალიზაციაც არ განხორციელებულა დოკუმენტურად, შესაბამისი პერიოდებითა და დოკუმენტური ღირებულების გათვალისწინებით, შემოწმების მიერ ჩაითვალა რეალიზებულად. შესაბამისად, შემოწმების მიერ განისაზღვრა დღგ-ით დასაბეგრი ბრუნვის ოდენობები და ასევე, ერთობლივი შემოსავალი. შედეგად, გადამხდელს დაერიცხა დღგ, საშემოსავლო გადასახადი და საქართველოს საგადასახადო კოდექსის 275-ე მუხლით განსაზღვრული ჯარიმა.

. შემოწმებით განსაზღვრულ შემოსავლებთან მიმართებით, გადასახადის გადამხდელს არ გააჩნდა საკმარისი ოდენობით ფქვილის დოკუმენტური შეძენა. ასევე, პირს შემოწმებისთვის არ წარუდგენია საწვავის ხარჯის დამადასტურებელი დოკუმენტაცია. გადამხდელმა შემოწმებას წარუდგინა განცხადება, სადაც მითითებული იყო თითოეული სატრანსპორტო საშუალების მიერ განხორციელებული გადაზიდვის შესახებ მონაცემები დღეების ჭრილში და გახარჯული საწვავისა და სატრანსპორტო საშუალებების გამართული მუშაობისთვის საჭირო ნედლეულის/საქონლის შეძენის შესახებ ჯამური მონაცემები. ასევე, გამოვლინდა სხვაობები სხვა გამოსაქვითი ხარჯის ნაწილში: მათ შორის ელექტროენერგიის, ამორტიზაციის და სხვა. გადამხდელის მიერ შემოწმებისთვის მიწოდებული ცხრილების, საბანკო ამონაწერებისა და სხვა ხარჯის დამადასტურებელი დოკუმენტაციის (კომუნალური ხარჯი) გათვალისიწინებით, დაკორექტირდა საშემოსავლო გადასახადის წლიურ დეკლარაციაში მითითებული ხარჯის ოდენობები. გადამხდელის მიერ წარდგენილი/აუდირებული კალკულაციისა და შემოწმებით განსაზღვრული რეალიზებული პროდუქციის ანალიზით, განისაზღვრა ფქვილის ის მოცულობა, რაც საჭირო იყო რეალიზებული პროდუქციის წარმოებისთვის. შემოსავლების სამსახურის უფროსის 2012 წლის 2 თებერვლის N 1162 ბრძანებით დამტკიცებული „საგადასახადო შემოწმებისას გასატარებელი ღონისძიებების სახელმძღვანელოს“ N 0256 სიტუაციური სახელმძღვანელოსა და საქართველოს საგადასახადო კოდექსის 73-ე მუხლის შესაბამისად, არაპირდაპირი მეთოდის გამოყენებით, დოკუმენტის გარეშე შეძენილ ფქვილთან მიმართებით ხარჯის ნაწილში შემოწმებამ გაითვალისწინა ფქვილის ღირებულების 75%. ამასთან, საწვავის ხარჯის ნაწილში გათვალისწინებულ იქნა გადამხდელის მიერ გაცხადებული/მიწოდებული და შემოწმებით შესწავლილი საწვავის ხარჯის 75%. ასევე, სხვა ხარჯების ნაწილში დაკორექტირდა დეკლარირებული გამოქვითვები და აღნიშნულის შესაბამისად, შემცირდა საშემოსავლო გადასახადის ოდენობა.

. გადასახადის გადამხდელს საანგარიშო პერიოდის განმავლობაში მიღებული ჰქონდა საგადასახადო ანგარიშ - ფაქტურები და შესაბამისი ჩათვლები დღგ-ის ნაწილში. შემოწმებით დადგინდა, რომ გადამხდელს უფიქსირდებოდა საანგარიშო პერიოდში ავანსის სახით მიღებული საგადასახადო ანგარიშ - ფაქტურა, რაზეც მიღებული ჰქონდა ჩათვლა. ასევე, გადამხდელს უფიქსირდებოდა შემდგომ პერიოდში იმ საგადასახადო ანგარიშ - ფაქტურების მიღება და ჩათვლებში გამოყენება, რომლითაც საგადასახადო ანგარიშ - ფაქტურის გამომწერ მხარეს განაშთული ჰქონდა ავანსის საგადასახადო ანგარიშ - ფაქტურა. ასევე, შესამოწმებელი პერიოდის განმავლობაში გადამხდელს საბაჟო დეკლარაციებით უფიქსირდებოდა იმპორტის განხორციელება, რომელთან დაკავშირებითაც დღგ-ის ჩათვლა მიღებული ჰქონდა ნაწილობრივ. შემოწმებამ იხელმძღვანელა საქართველოს საგადასახადო კოდექსის 174-ე, 175-ე და 176-ე მუხლებით და შემოსავლების სამსახურის გადასახადების ადმინისტრირების საინფორმაციო სისტემაში არსებული მონაცემების შესაბამისად, იმ ძირითადი განაშთვის საგადასახადო ანგარიშ - ფაქტურის საფუძველზე მიღებული ჩთვლა, რაზეც გადამხდელს უკვე ჰქონდა განხორციელებული ჩათვლა ავანსის საგადასახადო ანგარიშ - ფაქტურის მიხედვით, დაექვემდებარა შემცირებას. საბაჟო დეკლარაციების იმ ნაწილზე, რაზეც გადამხდელს არ ჰქონდა ჩათვლა განხორციელებული, დაექვემდებარა ჩათვლას (2 833 ლარი). შედეგად, გადამხდელს დაერიცხა დღგ და საქართველოს საგადასახადო კოდექსის 275-ე მუხლით განსაზღვრული ჯარიმა.

. საქართველოს შინაგან საქმეთა სამინისტროს ელექტრონული მონაცემთა ბაზიდან გამოთხოვილი ინფორმაციის ფარგლებში დადგინდა, რომ 2022 წლის 11 მაისის შემდეგ გადამხდელი ფლობდა რეგისტრირებულ სატრანსპორტო საშუალებას ----- თუმცა შემდგომ, უკვე 2024 წლის 2 ნოემბერს, მოახდინა მისი რეალიზაცია და რეგისტრაციიდან მოხსნაც. ზემოაღნიშნული ფაქტობრივი გარემოებების გათვალისწინებით, ვინაიდან შემოსავლების სამსახურის გადასახადების ადმინისტრირების საინფორმაციო სისტემაში არსებული მონაცემებისა და საქართველოს შინაგან საქმეთა სამინისტროს ელექტრონული მონაცემების თანახმად, გადამხდელს უფიქსირდებოდა ეკონომიკურ საქმიანობაში გამოყენებული სატრანსპორტო საშუალების რეალიზაცია შესამოწმებელი პერიოდის განმავლობაში, თუმცა აღნიშნული სატრანსპორტო საშუალების რეალიზაცია არ ჰქონდა ასახული დღგ-ით დასაბეგრი ბრუნვის ნაწილში, შემოწმებით, 73-ე მუხლების საფუძველზე, არაპირდაპირი მეთოდის გამოყენებით განსაზღვრა დღგ-ით დასაბეგრი ბრუნვა. შედეგად, გადამხდელს დაერიცხა დღგ და საქართველოს საგადასახადო კოდექსის 275-ე მუხლით განსაზღვრული ჯარიმა.

. გადასახადის გადამხდელს შესამოწმებელ პერიოდზე წარდგენილი ჰქონდა ფიზიკური პირის ქონების გადასახადის წლიური დეკლარაციები (ავტომატური), რომლის ანალიზით დადგინდა, რომ გადამხდელი ადეკლარირებდა არასასოფლო - სამეურნეო დანიშნულების მიწის ნაკვეთებს, რომლებიც მდებარეობს ----- მუნიციპალიტეტის ტერიტორიაზე. შემოსავლების სამსახურის გადასახადების ადმინისტრირების საინფორმაციო სისტემაში არსებული მონაცემებისა და სსიპ საჯარო რეესტრის ეროვნული სააგენტოს მონაცემების მიხედვით, გადამხდელს შესამოწმებელი პერიოდის განმავლობაში უფიქსირდებოდა საკუთრებაში მხოლოდ ერთი ნაკვეთი (ს/კ: ----- ), ხოლო მეორე (ს/კ: ----- ) არასასოფლო - სამეურნეო დანიშნულების ნაკვეთს გადამხდელი არ ფლობდა 2021 წლის 2 ივლისის შემდგომ პერიოდზე. აღნიშნულიდან გამომდინარე, გადამხდელს შეუმცირდა მიწაზე ქონების გადასახადის ნაწილში დეკლარირებული თანხა, შესაბამისი პერიოდებით. ამასთან, საგადასახადო შემოწმების ფარგლებში, არაპირდაპირი მეთოდის გამოყენების შედეგად გადამხდელის მიერ მიღებულმა დასაბეგრმა შემოსავალმა 2022, 2023 და 2024 წლებში გადააჭარბა 100 000 ლარს. შესაბამისად, პირს წარმოეშვა ქონების გადასახადის დეკლარირების ვალდებულება. შემოწმებამ იხელმძღვანელა საქართველოს საგადასახადო კოდექსის 202-ე, 203-ე მუხლებით. შედეგად, გადამხდელს დაერიცხა ქონების გადასახადი და საქართველოს საგადასახადო კოდექსის 275-ე მუხლით განსაზღვრული ჯარიმა.

 

შემოსავლების სამსახურმა განიხილა წარმოდგენილი საჩივრები და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:

შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

ამავე კოდექსის 49-ე მუხლის პირველი ნაწილის „ე“ ქვეპუნქტის თანახმად, ამ კოდექსის დებულებათა გათვალისწინებით საგადასახადო ორგანოებს თავიანთი კომპეტენციის ფარგლებში და საქართველოს კანონმდებლობით დადგენილი წესით უფლება აქვთ დამოუკიდებლად განსაზღვრონ გადასახადის გადამხდელის საგადასახადო ვალდებულების მოცულობა საგადასახადო ორგანოში არსებული ინფორმაციით (მათ შორის, გადასახადის გადამხდელის დანახარჯების შესახებ) ან შედარების მეთოდით - სხვა ამგვარი გადასახადის გადამხდელების შესახებ ინფორმაციის ანალიზის საფუძველზე, თუ გადასახადის გადამხდელი არ წარადგენს საგადასახადო კონტროლის განსახორციელებლად საჭირო სააღრიცხვო დოკუმენტაციას ან დადგენილი წესის დარღვევით აწარმოებს ბუღალტერიას, აგრეთვე ამ კოდექსით გათვალისწინებულ სხვა შემთხვევებში.

საქართველოს საგადასახადო კოდექსის 61-ე მუხლის მე-3 ნაწილის თანახმად, საგადასახადო ორგანო უფლებამოსილია პირს დაარიცხოს გადასახადი თავის ხელთ არსებული ინფორმაციის საფუძველზე, თუ პირი მას არ წარუდგენს გადასახადის დასარიცხად საჭირო ინფორმაციას.

საქართველოს საგადასახადო კოდექსის 73-ე მუხლის მე-5 ნაწილის „ა“ ქვეპუნქტის თანახმად, საგადასახადო ორგანოს უფლება აქვს, პირის საგადასახადო ვალდებულებები განსაზღვროს არაპირდაპირი მეთოდების გამოყენებით (აქტივების სიდიდის, საოპერაციო შემოსავლებისა და ხარჯების, პირის შესახებ ინფორმაციის მისი საქმიანობის სხვა საგადასახადო პერიოდთან ან სხვა ამგვარი გადასახადის გადამხდელის შესახებ მონაცემების შედარების, აგრეთვე სხვა მსგავსი ინფორმაციის ანალიზის საფუძველზე), თუ პირს არ აქვს სააღრიცხვო დოკუმენტაცია ან სააღრიცხვო დოკუმენტაციით შეუძლებელია დაბეგვრის ობიექტის დადგენა.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

შემოსავლების სამსახური ყურადღებას ამახვილებს დადგენილ ფაქტობრივ გარემოებაზე, რომლის მიხედვით, გადასახადის გადამხდელის მიერ წარმოდგენილ საჩივარში არ არის მითითებული სადავო საკითხები. გადასახადის გადამხდელს 2025 წლის 31 ოქტომბერს გაეგზავნა N ----- წერილი, რათა დაეზუსტებინა საჩივარი და მიეთითებინა სადავო საკითხები. წერილს გადასახადის გადამხდელი გაეცნო გადამხდელის ავტორიზებული მომხმარებლის გვერდზე 2025 წლის 31 ოქტომბერს, ხოლო დაზუსტებული საჩივარი წერილით განსაზღვრულ ვადაში არ წარმოუდგენია.

შემოსავლების სამსახური აღნიშნავს, რომ საკითხის 2025 წლის 27 ნოემბრის დავების განხილვის საბჭოს სხდომაზე განხილვისას გადასახადის გადამხდელს მიეცა დოკუმენტაცია/მტკიცებულებების წარმოდგენის შესაძლებლობა, საკითხის განხილვა გადაიდო 1 კვირის ვადით, თუმცა დღეის მდგომარეობით, მათ შორის საგადასახადო დავის ეტაპზე გადამხდელის მხრიდან არ წარმოდგენილა რაიმე არგუმენტები/მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.

ზემოაღნიშნული სამართლებრივი ნორმებისა და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივრები დაუსაბუთებელია და არ უნდა დაკმაყოფილდეს.

 

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ

 

1. ი/მ ----- (ს/ნ ----- ) საჩივრები არ დაკმაყოფილდეს;

2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. N 16) ან სასამართლოში (მის.: ქ. თბილისი, დავით აღმაშენებლის ხეივანი N 64), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხი:

გადასახადის გადამხდელი არ ეთანხმება საგადასახადო მოთხოვნით დარიცხულ თანხებს.

 

ფაქტობრივი გარემოებები:

გადამხდელის საქმიანობაა პურ - ფუნთუშეულის წარმოება/რეალიზაცია. შემოწმების მიმდინარეობისას გადასახადის გადამხდელს ბუღალტრული პროგრამა არ წარუდგენია. გადამხდელმა შემმოწმებელს მიაწოდა წარმოებული პროდუქციის ნაწილში გამოყენებული ფქვილის შესახებ კალკულაციის ცხრილი, ეკონომიკურ საქმიანობაში გამოყენებული ძირითადი საშუალებების შესახებ. გადამხდელის მიერ წარდგენილი იყო შესამოწმებელ პერიოდზე, როგორც დღგ-ის დეკლარაციები, ისე საშემოსავლო გადასახადის წლიური დეკლარაცია. შემოსავლების სამსახურის გადასახადების ადმინისტრირების საინფორმაციო სისტემაში არსებული მონაცემების ანალიზის შესაბამისად, გადასახადის გადამხდელს სატრანსპორტო სასაქონლო ზედნადებების მეშვეობით, მათ შორის გამოწერილი დისტრიბუციის სატრანსპორტო სასაქონლო ზედნადებების ანალიზით უფიქსირდებოდა იმაზე მეტი პროდუქციის წარმოება და სარეალიზაციოდ გატანა, ვიდრე დეკლარაციების შესაბამისად იყო ნაჩვენები. შემოწმების მიმდინარეობისას ზემოაღნიშნული წარმოების მოცულობის, ქვე ზედნადებებისა და სხვა დოკუმენტური რეალიზაციის გათვალისწინების შემდეგ საქონლის ის ოდენობა, რომლის რეალიზაციაც არ განხორციელებულა დოკუმენტურად, შესაბამისი პერიოდებითა და დოკუმენტური ღირებულების გათვალისწინებით, შემოწმების მიერ ჩაითვალა რეალიზებულად. შესაბამისად, შემოწმების მიერ განისაზღვრა დღგ-ით დასაბეგრი ბრუნვის ოდენობები და ასევე, ერთობლივი შემოსავალი. შედეგად, გადამხდელს დაერიცხა დღგ, საშემოსავლო გადასახადი და საქართველოს საგადასახადო კოდექსის 275-ე მუხლით განსაზღვრული ჯარიმა.

 

გადაწყვეტილება:

შემოსავლების სამსახური ყურადღებას ამახვილებს დადგენილ ფაქტობრივ გარემოებაზე, რომლის მიხედვით, გადასახადის გადამხდელის მიერ წარმოდგენილ საჩივარში არ არის მითითებული სადავო საკითხები. ასევე გადამხდელის მხრიდან არ წარმოდგენილა რაიმე არგუმენტები/მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს., მიიჩნია რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, წარმოდგენილი საჩივრები დაუსაბუთებელია და არ უნდა დაკმაყოფილდეს.

 

დასაბუთება:

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: მუხლი 73 (5);.