გადაწყვეტილება №26152/2/2025
📜 საკანონმდებლო ნორმები
📄 სრული ტექსტი
№26152/2/2025
03 დეკემბერი 2025
გ ა დ ა წ ყ ვ ე ტ ი ლ ე ბ ა
მომჩივანი: შპს „-------“ (ს/ნ -------)
მოპასუხე: აუდიტის დეპარტამენტი
საქართველოს ფინანსთა სამინისტროსთან არსებულმა დავების განხილვის საბჭომ, 21.11.2025 წელს განიხილა და მიიღო გადაწყვეტილება შპს ------- 11.11.2025 წელს რეგისტრირებულ საჩივარზე (რეგისტრაციის №26152/2/2025).
დავის საგანი:
შემოსავლების სამსახურის 18.03.2025 წლის №4736 ბრძანების აღსრულების შედეგები.
გასაჩივრებული გადაწყვეტილება:
1. აუდიტის დეპარტამენტის 22.07.2025 წლის №047-19 კორექტირებული საგადასახადო მოთხოვნა;
2. შემოსავლების სამსახურის 15.10.2025 წლის №21882 ბრძანება.
დარიცხული თანხა: 171 233.47 ლარი.
მათ შორის:
დღგ - 84 827
ჯარიმა - 42 404
საურავი - 44 002.47
ფაქტების აღწერა/დარიცხვის საფუძვლები
გადასახადის გადამხდელის საქმიანობაა საეკლესიო აქსესუარებით ვაჭრობა, საფლავის ქვებისა და ხატების ჩარჩოების წარმოება. კომპანია მასალებს ყიდულობს ძირითადად იმპორტის გზით ------- და -------.
შემოსავლების სამსახურის აუდიტის დეპარტამენტის მიერ ჩატარდა მომჩივნის საქმიანობის, 1.01.2021 წლიდან 1.02.2024 წლამდე, ხოლო სასაქონლო-მატერიალური ფასეულობების ინვენტარიზაციის შედეგების გამოყვანის მიზნით, 2024 წლის 26 თებერვლის ჩათვლით პერიოდის, კამერალური საგადასახადო შემოწმება. შემოწმების შედეგები აისახა 2024 წლის 11 დეკემბრის საგადასახადო შემოწმების აქტში, რომლის მიხედვით, სადავო დარიცხვა განპირობებულია შემდეგი გარემოებებით:
- გადასახადის გადამხდელმა, შემოწმების პროცესში, წარადგინა ბუღალტრული აღრიცხვის პროგრამა სუპერფინი, თუმცა არასრული მონაცემებით, სრულად არ ჰქონდა ნაწარმოები საქონლის აღრიცხვა, მ.შ. ჩამოწერები და წარმოების კალკულაციები. გადასახადის გადამხდელის მიერ დეკლარირებული დღგ-ით დასაბეგრი ბრუნვები შეადგენდა დოკუმენტურად რეალიზებულ შემოსავალს. საგადასახადო მონიტორინგის დეპარტამენტის 2024 წლის 26 თებერვლის №4117 ბრძანების საფუძველზე ჩატარდა სასაქონლო-მატერიალური ფასეულობების ინვენტარიზაცია. ვინაიდან, არ კონტროლდებოდა საქონლის მოძრაობა, ამასთან, გადასახადის გადამხდელის მიერ არ იქნა წარდგენილი წარმოების კალკულაციები, ხოლო საგადასახადო ორგანოში არსებული ინფორმაციით, ვერ დადგინდა დაბეგვრის ობიექტი, ასევე, კომპანიის ფასნამატი, გადასახადის გადამხდელის საგადასახადო ვალდებულებები განისაზღვრა არაპირდაპირი მეთოდით. კერძოდ, პირველადი სააღრიცხვო დოკუმენტაციის, საბაჟო დეკლარაციების, ინვენტარიზაციის შედეგად დადგენილი საბოლოო ნაშთის შეპირისპირებით გაანგარიშდა დოკუმენტის გარეშე რეალიზებული პროდუქციის თვითღირებულება, რომელზეც გავრცელდა ინვენტარიზაციის შედეგად დადგენილი ფასნამატები კატეგორიების შესაბამისად. მიღებული შემოსავალი გადანაწილდა დეკლარირებული ბრუნვების პროპორციულად. ამასთან, შესამოწმებელი პერიოდის ბოლოსთვის გაანგარიშდა განკარგვადი თანხები, რომლის ნაწილის გახარჯვაზეც გადასახადის გადამხდელმა წარადგინა ახსნა-განმარტება აღნიშნული თანხით კომპანიის კაპიტალში შენატანის შემცირებაზე, დარჩენილი განკარგვადი თანხა ჩაითვალა დირექტორზე გაცემულ ხელფასად. შედეგად, გადასახადის გადამხდელს დაერიცხა საშემოსავლო გადასახადი, დღგ და დაეკისრა საგადასახადო კოდექსის 275-ე მუხლით განსაზღვრული ჯარიმა.
შემოწმების აქტის საფუძველზე გამოიცა აუდიტის დეპარტამენტის 17.12.2024 წლის №26457 ბრძანება და №047-22 საგადასახადო მოთხოვნა, რაც გასაჩივრდა შემოსავლების სამსახურში. შემოსავლების სამსახურის 18.03.2025 წლის №4736 ბრძანებით საჩივარი ნაწილობრივ დაკმაყოფილდა:
- პირველ და მე-3 სადავო საკითხებთან დაკავშირებით:
ა) გადასახადის გადამხდელს მიეცა წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს ინდივიდუალურ მეწარმესთან გაფორმებული და სათანადო წესით დამოწმებული შედარების აქტი, ასევე, დებიტორებისა და მივლინების შესახებ მტკიცებულებები;
ბ) „ა“ ქვეპუნქტით განსაზღვრულ ვადაში, მტკიცებულებების წარდგენის შემთხვევაში, აუდიტის დეპარტამენტს დაევალა წარდგენილი მტკიცებულებების შესწავლა/გამოკვლევა და შესწავლის შედეგების გათვალისწინებით, სათანადო საფუძვლების არსებობის შემთხვევაში, საგადასახადო ვალდებულებების შესაბამისი კორექტირება (შემცირება);
- მე-2 სადავო საკითხთან დაკავშირებით, საწარმოო დანაკარგის დადგენის მიზნით:
ა) გადასახადის გადამხდელს მიეცა წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს კომპეტენტურ პირთან (საექსპერტო დაწესებულება) გაფორმებული ხელშეკრულება ექსპერტიზის დანიშვნის შესახებ;
ბ) „ა“ ქვეპუნქტით განსაზღვრულ ვადაში, შესაბამისი მტკიცებულებების წარდგენის შემთხვევაში, აუდიტის დეპარტამენტს დაევალა, ხელშეკრულების საფუძველზე მომზადებული ექსპერტიზის დასკვნის შესწავლა და შესწავლის შედეგების გათვალისწინებით, სათანადო საფუძვლების არსებობის შემთხვევაში, საგადასახადო ვალდებულებების შესაბამისი კორექტირება (შემცირება);
- დანარჩენ ნაწილში საჩივარი არ დაკმაყოფილდა.
აღსანიშნავია, რომ შემოსავლების სამსახურის 18.03.2025 წლის №4736 ბრძანება გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში, რომლის 2.05.2025 წლის №25032/2/2025 გადაწყვეტილებით საჩივარი არ დაკმაყოფილდა.
შემოსავლების სამსახურის 2025 წლის 18 მარტის №4736 ბრძანების აღსრულების შედეგად, 2025 წლის 30 ივნისის დასკვნის საფუძველზე, შემოწმებით დარიცხული თანხები შემცირდა სულ 122 233 ლარით, აღნიშნულის საფუძველზე გამოიცა აუდიტის დეპარტამენტის 22.07.2025 წლის №047-19 კორექტირებული საგადასახადო მოთხოვნა, რაც გასაჩივრდა შემოსავლების სამსახურში.
შემოსავლების სამსახურის 15.10.2025 წლის №21882 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
შემოსავლების სამსახურის გადაწყვეტილების შინაარსი
შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე, 304-ე მუხლის 21 ნაწილზე, საგადასახადო შემოწმების შედეგების გადაანგარიშების თაობაზე გამოცემული დასკვნის შინაარსზე, აღნიშნავს, რომ:
- არაპირდაპირი მეთოდით განსაზღვრული ფასნამატის ოდენობასთან დაკავშირებით, აუდიტის დეპარტამენტს დავალებული ჰქონდა გადასახადის გადამხდელის მიერ წარდგენილი ინდივიდუალურ მეწარმესთან გაფორმებული და სათანადო წესით დამოწმებული შედარების აქტების ყოველმხრივ შესწავლა, რაც აუდიტის დეპარტამენტის მიერ შესრულდა და შედეგად, გადასახადის გადამხდელს შეუმცირდა დღგ-სა და საშემოსავლო გადასახადში განსაზღვრული ვალდებულებები;
- წარმოების დროს არსებული დანაკარგის გათვალისწინებასთან დაკავშირებით, გადასახადის გადამხდელს დავალებული ჰქონდა აუდიტის დეპარტამენტისთვის წარედგინა კომპეტენტურ პირთან (საექსპერტო დაწესებულება) გაფორმებული ხელშეკრულება ექსპერტიზის დანიშვნის შესახებ, რაც გადასახადის გადამხდელის მიერ არ შესრულებულა, შესაბამისად, აღნიშნული საკითხი გადაანგარიშებას არ დაექვემდებარა;
- ფულის ნაშთის ოდენობის დაზუსტების მიზნით, აუდიტის დეპარტამენტს დავალებული ჰქონდა გადასახადის გადამხდელის მიერ წარდგენილი მტკიცებულებების შესწავლა, რაც აუდიტის დეპარტამენტის მიერ შესრულდა და შედეგად, დაკორექტირდა საგადასახადო ვალდებულებები. ამასთან, დამფუძნებლის შენატანის ნაშთი განისაზღვრა 46 723 ლარით, ხოლო წარდგენილი შედარების აქტებით დებიტორულმა დავალიანებამ შეადგინა 191 768 ლარი.
შემოსავლების სამსახურმა მიიჩნია, რომ შემოსავლების სამსახურის გადაწყვეტილების აღსრულება განხორციელებულია საქმისთვის არსებითი მნიშვნელობის მქონე ყველა გარემოებების გამოკვლევის/შესწავლის საფუძველზე, გასაჩივრებული ადმინისტრაციული აქტის შინაარსი შეესაბამება დავის განხილვისას მიღებულ გადაწყვეტილებას და არ არსებობს წარდგენილი საჩივრის დაკმაყოფილების სამართლებრივი საფუძველი.
მომჩივნის არგუმენტაცია
არგუმენტები წარმოდგენილი არ არის.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:
შემოსავლების სამსახურის 18.03.2025 წლის №4736 ბრძანებით საჩივარი ნაწილობრივ დაკმაყოფილდა:
- პირველ და მე-3 სადავო საკითხებთან დაკავშირებით:
ა) გადასახადის გადამხდელს მიეცა წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს ინდივიდუალურ მეწარმესთან გაფორმებული და სათანადო წესით დამოწმებული შედარების აქტი, ასევე, დებიტორებისა და მივლინების შესახებ მტკიცებულებები;
ბ) „ა“ ქვეპუნქტით განსაზღვრულ ვადაში, მტკიცებულებების წარდგენის შემთხვევაში, აუდიტის დეპარტამენტს დაევალა წარდგენილი მტკიცებულებების შესწავლა/გამოკვლევა და შესწავლის შედეგების გათვალისწინებით, სათანადო საფუძვლების არსებობის შემთხვევაში, საგადასახადო ვალდებულებების შესაბამისი კორექტირება (შემცირება);
- მე-2 სადავო საკითხთან დაკავშირებით, საწარმოო დანაკარგის დადგენის მიზნით:
ა) გადასახადის გადამხდელს მიეცა წინადადება, ამ ბრძანების ჩაბარებიდან 15 კალენდარული დღის ვადაში, აუდიტის დეპარტამენტს წარუდგინოს კომპეტენტურ პირთან (საექსპერტო დაწესებულება) გაფორმებული ხელშეკრულება ექსპერტიზის დანიშვნის შესახებ;
ბ) „ა“ ქვეპუნქტით განსაზღვრულ ვადაში, შესაბამისი მტკიცებულებების წარდგენის შემთხვევაში, აუდიტის დეპარტამენტს დაევალა, ხელშეკრულების საფუძველზე მომზადებული ექსპერტიზის დასკვნის შესწავლა და შესწავლის შედეგების გათვალისწინებით, სათანადო საფუძვლების არსებობის შემთხვევაში, საგადასახადო ვალდებულებების შესაბამისი კორექტირება (შემცირება).
ხსენებული ბრძანების აღსრულების საფუძველზე, შემოწმებით დარიცხული თანხები შემცირდა სულ 122 233 ლარით, ხოლო საგადასახადო შემოწმების შედეგების გადაანგარიშების თაობაზე გამოცემული აუდიტის დეპარტამენტის 2025 წლის 30 ივნისის დასკვნის მიხედვით დგინდება შემდეგი:
- გადასახადის გადამხდელმა, არაპირდაპირი მეთოდით განსაზღვრული ფასნამატის ოდენობის დაზუსტების მიზნით, წარადგინა ი/მ ------- (ს/ნ -------) და ი/მ ------- (ს/ნ -------) ნოტარიულად დადასტურებული შედარების აქტები, გაბროს ქვის შესყიდვის თაობაზე. შესაბამისად, შემოწმების მიერ გაანგარიშდა აღნიშნულ პირებზე მიწოდებული საქონლის თვითღირებულება, რომლითაც შემცირდა არაპირდაპირი მეთოდით გაანგარიშებული საცალო რეალიზაციის თვითღირებულება და შესაბამისად მიღებული შემოსავალი. გადაანგარიშებით შემცირდა დღგ-ით და საშემოსავლო გადასახადით დასაბეგრი ბრუნვა/ბაზა. ასევე, შემცირდა ჯარიმა;
- წარმოების დროს არსებული დანაკარგის გათვალისწინებასთან დაკავშირებით, გადასახადის გადამხდელს განსაზღვრულ ვადაში არ წარუდგენია შესაბამისი დოკუმენტაცია. შესაბამისად, აღნიშნული საკითხი გადაანგარიშებას არ დაექვემდებარა;
- ფულის ნაშთის ოდენობის დაზუსტების მიზნით, გადასახადის გადამხდელმა წარადგინა კომპანიის დირექტორის მივლინების დამადასტურებელი ბრძანებები და ბილეთები. ამასთან, ნოტარიულად დამოწმებული შედარების აქტები დებიტორული დავალიანებების შესახებ (გაფორმებული სხვადასხვა ეკლესია-მონასტრის წარმომადგენელთან). აღნიშნულის და პირველი საკითხის გათვალისწინებით, სრულად შემცირდა საგადასახადო შემოწმებით გამოვლენილი ფულის ნაშთი და მასზე დარიცხული საშემოსავლო გადასახადი. ამასთან, დამფუძნებლის შენატანის ნაშთი განისაზღვრა 46 723 ლარით, ხოლო წარდგენილი შედარების აქტებით დებიტორულმა დავალიანებამ შეადგინა 191 768 ლარი.
ამგვარად ირკვევა, რომ არაპირდაპირი მეთოდით განსაზღვრული ფასნამატის ოდენობასთან დაკავშირებით, გადასახადის გადამხდელის მიერ წარდგენილი ინდივიდუალურ მეწარმესთან გაფორმებული და სათანადო წესით დამოწმებული შედარების აქტების შესწავლის საფუძველზე, აუდიტის დეპარტამენტის მიერ გადასახადის გადამხდელს შეუმცირდა დღგ-სა და საშემოსავლო გადასახადში განსაზღვრული საგადასახადო ვალდებულებები. ფულის ნაშთის ოდენობასთან დაკავშირებით, ასევე გადასახადის გადამხდელის მიერ წარდგენილი მტკიცებულებების შესწავლის შედეგად, აუდიტის დეპარტამენტის მიერ მოხდა საგადასახადო ვალდებულებების კორექტირება. ხოლო, წარმოების დროს არსებული დანაკარგის გათვალისწინებასთან დაკავშირებით, ვინაიდან გადასახადის გადამხდელს აუდიტის დეპარტამენტისთვის არ წარუდგენია კომპეტენტურ პირთან (საექსპერტო დაწესებულება) გაფორმებული ხელშეკრულება ექსპერტიზის დანიშვნის შესახებ, აღნიშნული საკითხის ნაწილში აუდიტის დეპარტამენტის მიერ გადაანგარიშება არ განხორციელებულა.
შემოსავლების სამსახურის სადავო ბრძანებით ირკვევა, რომ მომჩივანი წარდგენილი საჩივრით არ ეთანხმებოდა გადაანგარიშების შედეგებს, თუმცა არგუმენტები არ წარუდგენია.
მომჩივანი, ამაჟამად წარმოდგენილ საჩივრით, გასაჩივრებულ დოკუმენტად მიუთითებს და შესაბამისად, სადავოდ ხდის შემოსავლების სამსახურის სადავო გადაწყვეტილებას მისი საჩივრის არ დაკმაყოფილების თაობაზე, წარმოადგენს შესაბამის დოკუმენტაციას, მაგრამ კვლავაც არ წარმოადგენს არგუმენტებს, შესაბამისად არ ირკვევა, რა ნაწილში მიიჩნევს გადაანგარიშების შედეგებს არამართლზომიერად და აღსრულებას შემოსავლების სამსახურის 18.03.2025 წლის №4736 ბრძანებით მიღებული გადაწყვეტილების შეუსაბამოდ. ამასთან, მომჩივანი არც ამჟამად არ წარმოადგენს, წარმოების დროს არსებული დანაკარგის გათვალისწინებასთან დაკავშირებით, კომპეტენტურ პირთან (საექსპერტო დაწესებულება) გაფორმებულ ხელშეკრულებას ექსპერტიზის დანიშვნის შესახებ, როგორც ეს ხსენებული ბრძანებით იყო განსაზღვრული. ამდენად, წარმოდგენილი საჩივარი დაუსაბუთებელია.
საქმესთან არსებული მასალების, ფაქტობრივი გარემოებების გათვალისწინებით, საბჭო მიიჩნევს, რომ შემოსავლების სამსახურის 18.03.2025 წლის №4736 ბრძანების აღსრულება განხორციელებულია ამავე ბრძანებით მიღებული გადაწყვეტილების შესაბამისად, საქმისთვის მნიშვნელობის მქონე ყველა გარემოებების შესწავლის საფუძველზე, შემოსავლების სამსახურის სადავო ბრძანება მართლზომიერია და არ არსებობს მისი გაუქმების საფუძველი.
საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:
1. საჩივარი არ დაკმაყოფილდეს;
2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.
სადავო საკითხები:
შემოსავლების სამსახურის 18.03.2025 წლის №4736 ბრძანების აღსრულების შედეგები.
ფაქტობრივი გარემოებები
გადასახადის გადამხდელის საქმიანობაა საეკლესიო აქსესუარებით ვაჭრობა, საფლავის ქვებისა და ხატების ჩარჩოების წარმოება. კომპანია მასალებს ყიდულობს ძირითადად იმპორტის გზით.
შემოსავლების სამსახურის აუდიტის დეპარტამენტის მიერ ჩატარდა მომჩივნის საქმიანობის კამერალური საგადასახადო შემოწმება. შემოწმების შედეგები საგადასახადო შემოწმების აქტში, რომლის მიხედვით, სადავო დარიცხვა განპირობებულია შემდეგი გარემოებებით:
- გადასახადის გადამხდელმა, შემოწმების პროცესში, წარადგინა ბუღალტრული აღრიცხვის პროგრამა, თუმცა არასრული მონაცემებით, სრულად არ ჰქონდა ნაწარმოები საქონლის აღრიცხვა, მ.შ. ჩამოწერები და წარმოების კალკულაციები. გადასახადის გადამხდელის მიერ დეკლარირებული დღგ-ით დასაბეგრი ბრუნვები შეადგენდა დოკუმენტურად რეალიზებულ შემოსავალს. ვინაიდან, არ კონტროლდებოდა საქონლის მოძრაობა, ამასთან, გადასახადის გადამხდელის მიერ არ იქნა წარდგენილი წარმოების კალკულაციები, ხოლო საგადასახადო ორგანოში არსებული ინფორმაციით, ვერ დადგინდა დაბეგვრის ობიექტი, ასევე, კომპანიის ფასნამატი, გადასახადის გადამხდელის საგადასახადო ვალდებულებები განისაზღვრა არაპირდაპირი მეთოდით. კერძოდ, პირველადი სააღრიცხვო დოკუმენტაციის, საბაჟო დეკლარაციების, ინვენტარიზაციის შედეგად დადგენილი საბოლოო ნაშთის შეპირისპირებით გაანგარიშდა დოკუმენტის გარეშე რეალიზებული პროდუქციის თვითღირებულება, რომელზეც გავრცელდა ინვენტარიზაციის შედეგად დადგენილი ფასნამატები კატეგორიების შესაბამისად. მიღებული შემოსავალი გადანაწილდა დეკლარირებული ბრუნვების პროპორციულად. ამასთან, შესამოწმებელი პერიოდის ბოლოსთვის გაანგარიშდა განკარგვადი თანხები, რომლის ნაწილის გახარჯვაზეც გადასახადის გადამხდელმა წარადგინა ახსნა-განმარტება აღნიშნული თანხით კომპანიის კაპიტალში შენატანის შემცირებაზე, დარჩენილი განკარგვადი თანხა ჩაითვალა დირექტორზე გაცემულ ხელფასად. შედეგად, გადასახადის გადამხდელს დაერიცხა საშემოსავლო გადასახადი, დღგ და დაეკისრა ჯარიმა.
გადაწყვეტილება
საქმესთან არსებული მასალების, ფაქტობრივი გარემოებების გათვალისწინებით, საბჭო მიიჩნევს, რომ შემოსავლების სამსახურის 18.03.2025 წლის №4736 ბრძანების აღსრულება განხორციელებულია ამავე ბრძანებით მიღებული გადაწყვეტილების შესაბამისად, საქმისთვის მნიშვნელობის მქონე ყველა გარემოებების შესწავლის საფუძველზე, შემოსავლების სამსახურის სადავო ბრძანება მართლზომიერია და არ არსებობს მისი გაუქმების საფუძველი.
დასაბუთება
საქართველოს ფინანსთა სამინისტორსთან არსებული დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 304(21)