გადაწყვეტილება № 26409/2/2025
📜 საკანონმდებლო ნორმები
📄 სრული ტექსტი
№ 26409/2/2025
03 თებერვალი 2026
გ ა დ ა წ ყ ვ ე ტ ი ლ ე ბ ა
მომჩივანი: შპს „------“ (ს/ნ -----)
მოპასუხე: აუდიტის დეპარტამენტი
საქართველოს ფინანსთა სამინისტროსთან არსებულმა დავების განხილვის საბჭომ, 29.01.2026 წელს განიხილა და მიიღო გადაწყვეტილება შპს ------ 30.12.2025 წელს რეგისტრირებულ საჩივარზე (რეგისტრაციის №26409/2/2025).
დავის საგანი:
1. სახელმწიფო შესყიდვების (ტენდერი -----) ფარგლებში გაწეული მომსახურების შედეგად მიღებულ მიღება-ჩაბარებაზე დაყრდნობით (არ არის გამოწერილი ანგარიშ-ფაქტურა, არ არის ანაზღაურებული და დაკავებულია პირგასამტეხლოს სახით) დღგ-ის ბრუნვის გაზრდა;
2. გადასახადის გადამხდელად არარეგისტრირებული პირებისთვის გაცემული თანხის გადახდის წყაროსთან დაბეგვრა და მიღებული თავისუფალი ფულადი სახსრების კომპანიის დირექტორზე/დამფუძნებელზე ხელფასის სახით განაცემად ჩათვლა.
გასაჩივრებული გადაწყვეტილება:
1. აუდიტის დეპარტამენტის 27.10.2025 წლის №225-21 საგადასახადო მოთხოვნა;
2. შემოსავლების სამსახურის 26.12.2025 წლის №28537 ბრძანება.
დარიცხული თანხა: 38 456.26 ლარი.
მათ შორის:
გადასახადი - 18 148.21
დღგ - (- 13 647.63)
საშემოსავლო გადასახადი - 31 795.84
ჯარიმა - 18 146.40
საურავი - 2 161.65
პროცედურული გარემოებები
კომპანიის საქმიანობაა სახელმწიფო ტენდერებში მონაწილეობის საფუძველზე, დადებული ხელშეკრულების შესაბამისად მომსახურების გაწევა.
აუდიტის დეპარტამენტის 21.05.2025 წლის №10310 ბრძანების საფუძველზე ჩატარდა კომპანიის საქმიანობის, 1.01.2022 წლიდან 1.04.2025 წლამდე საანგარიშო პერიოდების, გარდა აუდიტის დეპარტამენტის 13.09.2023 წლის №22317 ბრძანებით მოცული საკითხებისა (შემოწმდა ელექტრონულად გამოწერილი საგადასახადო ანგარიშ-ფაქტურების/სასაქონლო ზედნადებების, მიღებული საგადასახადო ანგარიშ-ფაქტურებისა და საბაჟო დეკლარაციების 2021 წლის ივლისის, აგვისტოს, 2022 წლის აპრილისა და ივლისის თვეების საანგარიშო პერიოდების დღგ-ის დეკლარაციებში ასახვის სისწორე), კამერალური საგადასახადო შემოწმება. შემოწმების შედეგები აისახა 17.10.2025 წლის საგადასახადო შემოწმების აქტში შემოწმების აქტის საფუძველზე გამოიცა აუდიტის დეპარტამენტის 27.10.2025 წლის №23572 ბრძანება და ამავე თარიღის №225-21 საგადასახადო მოთხოვნა, რაც გასაჩივრდა შემოსავლების სამსახურში, რომლის 26.12.2025 წლის №28537 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
სადავო საკითხები:
1. სახელმწიფო შესყიდვების (ტენდერი ---) ფარგლებში გაწეული მომსახურების შედეგად მიღებულ მიღება-ჩაბარებაზე დაყრდნობით (არ არის გამოწერილი ანგარიშ-ფაქტურა, არ არის ანაზღაურებული და დაკავებულია პირგასამტეხლოს სახით) დღგ-ის ბრუნვის გაზრდაფაქტების აღწერა/დარიცხვის საფუძვლები
შესამოწმებელ პერიოდში კომპანია ასრულებს სამუშაოებს 13 ტენდერის ფარგლებში, ძირითადი მომსახურება შესრულებული აქვს მუნიციპალიტეტებისთვის (------), სსიპ-ებისთვის და ააიპ-ებისთვის. ასევე, შპს „------“-ს აწვდის სამშენებლო მასალას.
შესასრულებელ სამუშაოებს წარმოადგენს: საჯარო სკოლის რეაბილიტაცია, სკოლის მიმდებარე ტერიტორიაზე სკვერის მოწყობა, საჯარო სკოლის შეღობვის სამუშაოები, სოფელ ------- ხიდ-ბოგირის რეაბილიტაციის სამუშაოების შესრულება და ა.შ.
გადასახადის გადამხდელი თანამშრომლობდა შემოწმებასთან, წარდგენილია ბანკიდან ცნობა და საბანკო ანგარიშის ამონაწერები. გადასახადის გადამხდელს არ გააჩნია ბუღალტრული აღრიცხვის პროგრამა, მისი განცხადებით არ აქვს დაზუსტებული ინფორმაცია დებიტორ-კრედიტორული ნაშთების შესახებ.
შესამოწმებელ პერიოდში ჩატარებულია თემატური საგადასახადო შემოწმება, 2022 წლის აპრილსა და ივლისის თვეში, დღგ-ის დეკლარაციაში ასახვის სისწორის განსაზღვრის მიზნით. თემატური შემოწმების შედეგები გათვალისწინებულია აღნიშნულ სრული კამერალური საგადასახადო შემოწმების შედეგების გაანგარიშებისას. შემოწმების შედეგები ეყრდნობა სახელმწიფო შესყიდვების საიტზე (------), საბანკო ამონაწერებში და შემოსავლების სამსახურის გადასახადების ადმინისტრირების საინფორმაციო სისტემაში არსებულ მასალებს.
შემოწმების შედეგად ირკვევა, რომ საწარმოს სახელმწიფო შესყიდვების ----- ფარგლებში გაწეული მომსახურების შესაბამისად მიღებული აქვს მიღება-ჩაბარების დოკუმენტები, რომელზეც არ აქვს ანგარიშ-ფაქტურა გამოწერილი და არ არის გათვალისწინებული 18%-იანი ბრუნვის გაანგარიშებისას. აღნიშული თანხა ------- მუნიციპალიტეტის მიერ არ ანაზღაურებულა და დაკავებულია პირგასამტეხლოს სახით.
ამას გარდა, მომწოდებლების მიერ მოხდა გადასახადის გადამხდელის მიერ მიღებული ჩათვლის ანგარიშ-ფაქტურების კორექტირება, კორექტირების შედეგად შესამცირებელი აქვს ჩასათვლელი დღგ-ის თანხა და აღნიშნული არ აქვს გათვალისწინებული შესაბამისი პერიოდის დეკლარაციით.
ზემოთ აღნიშნულიდან გამომდინარე, გადასახადის გადამხდელს დაერიცხა დღგ და დაეკისრა ჯარიმა საგადასახადო კოდექსის 275-ე მუხლით.
შემოსავლების სამსახურის გადაწყვეტილების შინაარსი
შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე, 136-ე მუხლის მე-3 ნაწილზე, 158-ე მუხლის პირველ ნაწილზე, 159-ე მუხლის პირველი ნაწილის „ა“ და „ბ“ ქვეპუნქტებზე, 163-ე მუხლის პირველ და მე-2 ნაწილებზე, 164-ე მუხლის პირველ ნაწილზე, 174-ე მუხლის პირველ და მე-2 ნაწილზე, 175-ე მუხლის პირველი ნაწილის „ა“ ქვეპუნქტზე, 176-ე მუხლის პირველი ნაწილის „ა“ ქვეპუნქტზე, 179-ე მუხლის პირველ, მე-2 და მე-4 ნაწილებზე, 43-ე მუხლის მე-4 ნაწილზე, დადგენილ ფაქტობრივ გარემოებებზე და აღნიშნავს, რომ მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა საგადასახადო ვალდებულებები განსაზღვრული არამართლზომიერად. ხოლო, დავის წარმოების პროცესში არ ყოფილა წარდგენილი იმგვარი არგუმენტები/მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.
ზემოაღნიშნული სამართლებრივი ნორმების და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, საჩივარი დაუსაბუთებელია და არ უნდა დაკმაყოფილდეს.
მომჩივნის არგუმენტაცია
კომპანიის საქმიანობაა სახელმწიფო ტენდერებში მონაწილეობა და ხელშეკრულებების შესაბამისად სამშენებლო-სარემონტო სამუშაოების შესრულება. შესამოწმებელ პერიოდში კომპანია სამუშაოებს ასრულებდა 13 სხვადასხვა ტენდერის ფარგლებში, მათ შორის: ---- მუნიციპალიტეტების სსიპ-ები და ააიპ-ები. დამატებით ასევე ასრულებდა, სამშენებლო მასალის მიწოდებას შპს „------“.
შემმოწმებლებს კომპანიამ წარუდგინა ბანკის ცნობა და საბანკო ამონაწერები, ხელშეკრულებები და მიღება-ჩაბარების აქტები, ინფორმაცია ტენდერების შესახებ, კომპანია თანამშრომლობდა და სრულად წარადგინა ყველა არსებული დოკუმენტი.
2022 წლის აპრილიდან ივლისის ჩათვლით პერიოდზე კომპანიაში ჩატარდა თემატური საგადასახადო შემოწმება, რომლის შედეგებიც თავად შემოსავლების სამსახურმა გაითვალისწინა მიმდინარე კამერალური შემოწმებისას.
------ ტენდერის მიღება-ჩაბარების დოკუმენტებზე ანგარიშ-ფაქტურის არქონა არ შეიძლება ჩაითვალოს რეალიზაციის დამალვად. მიღება-ჩაბარების აქტები დამტკიცებულია ------ მუნიციპალიტეტის მიერ. აღნიშნული სამუშაოების ღირებულება არ არის ანაზღაურებული და დარჩენილია პირგასამტეხლოს სახით. შესაბამისად, შემოსავლად ვერ ჩაითვლება თანხა, რომელიც რეალურად არ მიუღია კომპანიას. მიღება-ჩაბარების აქტი არ ნიშნავს რეალიზაციის დასრულებას, თუ არ არსებობს ანგარიშ-ფაქტურა და გადახდა. კომპანიის მიერ შესაბამისი დღგ-ის ანგარიშ-ფაქტურა არ არის გამოწერილი და 18%-იანი ბრუნვა არ არის დათვლილი, აღნიშნული არ გახლავთ კანონიერი და მოკლებულია სამართლებრივ საფუძველს. აღნიშნული ტენდერის ფარგლებში თანხა კომპანიას არ მიუღია, შესამოწმებელი პერიოდისთვის თანხა ------ მუნიციპალიტეტს არ გადმოურიცხავს კომპანიისთვის. თანხა დაკავებულია პირგასამტეხლოს სახით, რაც არ წარმოადგენს ანაზღაურებას და არ შეიძლება ჩაითვალოს შემოსავალად. მიღება–ჩაბარების აქტის არსებობა არ წარმოადგენს საგადასახადო ღონისძიების (ბრუნვის) წარმოშობის საფუძველს, თუ ანაზღაურება რეალურად არ არის მიღებული. ტენდერის ღირებულება არ შეიძლება ჩაითვალოს ბრუნვად, თუ თანხა არ არის მიღებული; შესაბამისად, ------ ტენდერის მიხედვით დღგ-ის დარიცხვა არასწორია, რადგან არ არსებობდა „ანაზღაურება“, როგორც ამას განმარტავს საგადასახადო კოდექსის 158-ე და 159-ე მუხლები.
შემოწმების შედეგები ეფუძნება მხოლოდ სახელმწიფო შესყიდვების საიტს და საბანკო ამონაწერებს, რაც არ ასახავს სრულ ბრუნვას, შესყიდვების სააგენტოს საიტზე განთავსებული ინფორმაცია შეიცავს ტენდერის ღირებულებას, ხოლო არა ფაქტობრივად მიღებულ შემოსავალს. შემოსავლები განისაზღვრება რეალურად მიღებული თანხით, შესაბამისად ბრუნვის გაზრდა ტენდერის თანხით არის შეცდომა. გაურკვეველია კონკრეტულად გადასახადი რაზეა დარიცხული.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი ამ ნაწილში არ უნდა დაკმაყოფილდეს შემდეგ გარემოებათა გამო:
საგადასახადო კოდექსის 136-ე მუხლის მე-3 ნაწილის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.
საგადასახადო კოდექსის 159-ე მუხლის პირველი ნაწილის „ა“ და „ბ“ ქვეპუნქტების მიხედვით, დღგით დასაბეგრი ოპერაციებია დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება, ასევე დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ მომსახურების გაწევა.
საგადასახადო კოდექსის 163-ე მუხლის პირველი და მე-2 ნაწილების თანახმად, საქონლის მიწოდების/მომსახურების გაწევის დღგ-ით დაბეგვრა ხორციელდება საქონლის მიწოდების/მომსახურების გაწევის მომენტში, თუ ამ მუხლით სხვა რამ არ არის გათვალისწინებული. თუ თანხა სრულად ან ნაწილობრივ ანაზღაურებულია საქონლის მიწოდებამდე/მომსახურების გაწევამდე, ანაზღაურებული თანხის შესაბამისი დღგ-ის გადახდა ხორციელდება ანაზღაურების თანხის გადახდის საანგარიშო პერიოდის მიხედვით, გარდა ამ მუხლის მე-5 და მე-9 ნაწილებით გათვალისწინებული შემთხვევებისა.
საგადასახადო კოდექსის 164-ე მუხლის პირველი ნაწილის შესაბამისად, თუ ამ მუხლით სხვა რამ არ არის გათვალისწინებული, დღგ-ით დასაბეგრი თანხა არის საქონლის მიწოდების/მომსახურების გაწევის სანაცვლოდ მიღებული/მისაღები ანაზღაურება დღგ-ის გარეშე, საქონლის/მომსახურების ფასთან პირდაპირ დაკავშირებული სუბსიდიის ჩათვლით. აღნიშნული დებულება გამოიყენება საქონლის/მომსახურების გაცვლის ოპერაციის (ბარტერული ოპერაციის) შემთხვევაშიც.
საბჭოს სხდომაზე, საჩივრის ზეპირი განხილვისას, მომჩივნის წარმომადგენელმა განმარტა, რომ აღნიშნული ტენდერის ფარგლებში შესრულებული აქვს სამუშაოები, ანაზღაურება არ არის მიღებული, რაზეც სასამართლოში მიმდინარეობს დავა. სასამართლოში პირველი ინსტანცია მის სასარგებლოდ დასრულდა, რომელიც მეორე მხარემ გაასაჩივრა. დავის დასრულების შემდგომ შესაძლოა თანხამ განიცადოს ცვლილება, რის გამოც არ განახორციელა შესაბამისი დღგ-ის გადახდა. ამასთან, შემოსავლად ვერ ჩაითვლება თანხა, რომელიც რეალურად არ მიუღია კომპანიას. მიღება-ჩაბარების აქტი არ ნიშნავს რეალიზაციის დასრულებას, თუ არ არსებობს ანგარიშ-ფაქტურა და გადახდა. აღნიშნული ტენდერის ფარგლებში თანხა კომპანიას არ მიუღია, შესამოწმებელი პერიოდისთვის თანხა ------ მუნიციპალიტეტს არ გადმოურიცხავს კომპანიისთვის. თანხა დაკავებულია პირგასამტეხლოს სახით, რაც არ წარმოადგენს ანაზღაურებას და არ შეიძლება ჩაითვალოს შემოსავალად.
საბჭოს სხდომაზე, აუდიტის დეპარტამენტის წარმომადგენლის განმარტებით და 16.01.2026 წლის №----- წერილით წარმოდგენილი ინფორმაციით დგინდება, რომ შემოწმების შედეგები ეყრდნობა სახელმწიფო შესყიდვების საიტზე (------), საბანკო ამონაწერებში და გადასახადების ადმინისტრირების სისტემაში არსებულ მასალებს. კომპანიას სახელმწიფო შესყიდვების ტენდერის ------ ფარგლებში გაწეული მომსახურების შესაბამისად მიღებული აქვს მიღება-ჩაბარების დოკუმენტები, რომელზეც არ აქვს ანგარიშ-ფაქტურა გამოწერილი და არ არის გათვალისწინებული დღგის გაანგარიშებისას. შედეგად განხორციელდა აღნიშნული მიღება-ჩაბარების თანხის დღგ-ით დაბეგვრა.
აღნიშნული გარემოებებიდან გამომდინარე, საბჭოს მიაჩნია, რომ ამ ნაწილში გადასახადის გადამხდელის საგადასახადო ვალდებულებები განსაზღვრულია მართებულად და არ არსებობს მომჩივნის არგუმენტების გათვალისწინების და საჩივრის დაკმაყოფილების საფუძველი.
2. გადასახადის გადამხდელად არარეგისტრირებული პირებისთვის გაცემული თანხის გადახდის წყაროსთან დაბეგვრა და მიღებული თავისუფალი ფულადი სახსრების კომპანიის დირექტორზე/დამფუძნებელზე ხელფასის სახით განაცემად ჩათვლა
ფაქტების აღწერა/დარიცხვის საფუძვლები
დეკლარირებული (თითოეულ პირზე ხელფასის განაცემის, წყაროსთან დასაკავებელი მიღებული მომსახურების) მონაცემებისა და საბანკო ამონაწერების ანალიზით დადგინდა, რომ გადასახადის გადამხდელს მიღებული მომსახურების სანაცვლოდ საბანკო ამონაწერების მიხედვით გაცემული აქვს თანხები გადასახადის არაგადამხდელი პირთათვის, რომელიც ექვემდებარება გადახდის წყაროსთან დაბეგვრას.
შემოწმების შედეგად ასევე, განისაზღვრა სალაროში ნაღდი ფულის ნაშთი შესამოწმებელი პერიოდის ბოლოს. შემოსავლების სამსახურის უფროსის 2019 წლის 8 ივლისის №22708 ბრძანების (დანართი №9) მიხედვით და სალაროს ინვენტარიზაციის შედეგის გათვალისწინებით (0 ლარი), მიღებული თავისუფალი ფულადი სახსრები ჩათვლილია კომპანიის დირექტორ/დამფუძნებელზე ხელფასის სახით განაცემად. თავისუფალი თანხების გაანგარიშებისას გათვალისწინებულია მიღებული შემოსავალი და გაწეული ხარჯები, დამფუძნებლის მიერ თანხის შეტანა/გამოტანა, სესხის სახით მიღებული შემოსავალი, ბიუჯეტში გადახდილი თანხები და ბანკის საკომისიო. აღნიშნულისა გათვალისწინებით, მომჩივანს დაერიცხა საშემოსავლო გადასახადი და დაეკისრა ჯარიმა საგადასახადო კოდექსის 275-ე მუხლის შესაბამისად.
შემოსავლების სამსახურის გადაწყვეტილების შინაარსი
შემოსავლების სამსახური მიუთითებს საგადასახადო კოდექსის 136-ე მუხლის მე-3 ნაწილზე, 73-ე მუხლის მე-9 ნაწილის „ბ“ ქვეპუნქტზე, ამავე მუხლის მე-4 ნაწილზე, 101-ე მუხლის პირველ ნაწილზე, 154- ე მუხლის პირველი ნაწილის „ა“ ქვეპუნქტზე, ამავე მუხლის მე-2 ნაწილის „ა“ და „ბ“ ქვეპუნქტებზე, 43-ე მუხლის მე-4 ნაწილზე.
დადგენილი ფაქტობრივი გარემოებისა და აუდიტის დეპარტამენტის ინფორმაციით დგინდება, რომ ფულადი სახსრების მოძრაობის გაანგარიშებისას გათვალიწინებულ იქნა, მხოლოდ ის შემოსავალი, რომლის მიღებაც გადასახადის გადამხდელს რეალურად უფიქსირდება. ვინაიდან, ----- ტენდერის ფარგლებში მიღება-ჩაბარების თანხა სრულად არ არის ანაზღაურებული, ფულადი სახსრების მოძრაობის გაანგარიშებისას გათვალისწინებულია თანხის მხოლოდ ის ნაწილი, რომლის მიღებაც რეალურად ფიქსირდება. მიუღებელი თანხები არ არის გათვალისწინებული სალაროს ნაშთის გაანგარიშებაში.
მომჩივანი საჩივარში ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა საგადასახადო ვალდებულებები განსაზღვრული არამართლზომიერად. ხოლო, დავის წარმოების პროცესში არ ყოფილა წარდგენილი იმგვარი არგუმენტები/მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.
ზემოაღნიშნული სამართლებრივი ნორმების და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებები განსაზღვრულია კანონმდებლობის მოთხოვნათა დაცვით, საჩივარი დაუსაბუთებელია და არ უნდა დაკმაყოფილდეს.
მომჩივნის არგუმენტაცია
შემოწმების შედეგად საშემოსავლო გადასახადში დარიცხულ თანხას არ ეთანხმება, ითხოვს დეტალურად განიმარტოს დარიცხვის რა მეთოდით და როგორ იხელმძღვანელა შემმოწმებელმა, კონკრეტულად ვისზე მოხდა დარიცხვა ან როგორ. განსაკუთრებით საინტერესოა დარიცხვა თანხით - 13 808 ლარი, პერიოდი 30.11.2023 წელი.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი ამ ნაწილში უნდა დაკმაყოფილდეს ნაწილობრივ შემდეგ გარემოებათა გამო:
საგადასახადო კოდექსის 136-ე მუხლის მე-3 ნაწილის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.
საგადასახადო კოდექსის 73-ე მუხლის მე-4 ნაწილის და მე-9 ნაწილის „ბ“ ქვეპუნქტის მიხედვით, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს. საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს.
საგადასახადო კოდექსის 101-ე მუხლის პირველი ნაწილის შესაბამისად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.
საგადასახადო კოდექსის 154-ე მუხლის პირველი ნაწილის „ა“ ქვეპუნქტის მიხედვით, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, კერძოდ პირი, რომელიც დაქირავებულს უხდის ხელფასს.
მომჩივანი ითხოვს დეტალურად განიმარტოს დარიცხვის რა მეთოდით და როგორ იხელმძღვანელა შემმოწმებელმა, კონკრეტულად ვისზე მოხდა დარიცხვა ან როგორ. კომპანიის დამფუძნებლის მიერ შეტანილი და გატანილი თანხის გაანგარიშებისას არ არის დადგენილი და გათვალისწინებული საწყისი ნაშთი.
აუდიტის დეპარტამენტის წარმომადგენლის განმარტებით, ფულადი სახსრების მოძრაობის გაანგარიშებისას გათვალიწინებულ იქნა, მხოლოდ ის შემოსავალი, რომლის მიღებაც გადასახადის გადამხდელს რეალურად უფიქსირდება. ვინაიდან, ----- ტენდერის ფარგლებში მიღებაჩაბარების თანხა სრულად არ არის ანაზღაურებული, ფულადი სახსრების მოძრაობის გაანგარიშებისას გათვალისწინებულია თანხის მხოლოდ ის ნაწილი, რომლის მიღებაც რეალურად ფიქსირდება. მიუღებელი თანხები არ არის გათვალისწინებული სალაროს ნაშთის გაანგარიშებაში. დეკლარირებული (თითოეულ პირზე ხელფასის განაცემის, წყაროსთან დასაკავებელი მიღებული მომსახურების) მონაცემებისა და საბანკო ამონაწერების ანალიზით დადგინდა, რომ გადასახადის გადამხდელს მიღებული მომსახურების სანაცვლოდ საბანკო ამონაწერების მიხედვით გაცემული აქვს თანხები გადასახადის არაგადამხდელი პირთათვის, რომელიც დაექვემდებარა გადახდის წყაროსთან დაბეგვრას.
იგივე პოზიციაა ასახული აუდიტის დეპარტამენტის 16.01.2026 წლის №------ წერილით წარმოდგენილ ინფორმაციაში.
საქართველოს მთავრობის 2011 წლის 14 დეკემბრის №473 დადგენილებით დამტკიცებული „დავის განმხილველი ორგანოების რეგლამენტის“ 33-ე მუხლის პირველი პუნქტის „ბ“ ქვეპუნქტის თანახმად, დავების განხილვის საბჭო უფლებამოსილია გააუქმოს შემოსავლების სამსახურის მიერ დავის განხილვისას მიღებული გადაწყვეტილება და საქმე დაუბრუნოს შემოსავლების სამსახურს ხელახლა განსახილველად, თუ შემოსავლების სამსახურს სათანადოდ არ გამოუკვლევია საქმისათვის არსებითად მნიშვნელოვანი სამართლებრივი ან/და ფაქტობრივი გარემოებები.
საბჭო მიუთითებს საგადასახადო კოდექსის 302-ე მუხლის მე-6 ნაწილზე, რომლის თანახმად, დავის განმხილველ ორგანოებს უფლება აქვთ, საჩივარი განიხილონ მომჩივნის დაუსწრებლად, თუ საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები.
საბჭო განმარტავს, რომ აღნიშნული ნორმის საფუძველზე მომჩივნის მოწვევის გარეშე საჩივრის განხილვა შესაძლებელია, როდესაც საქმეში არსებული მასალებიდან სრულად დგინდება დავის საგანთან დაკავშირებული ფაქტობრივი გარემოებები, ამასთანავე, ფაქტობრივი გარემოებები, რომელსაც სანქციის შეფარდება ეფუძნება არ არის სადავო ან სადავოა თუმცა დადგენილია დავის განმხილველი ორგანოს მიერ საჩივრის განხილვის ეტაპზე.
განსახილველ შემთხვევაში, საბჭოს მიაჩნია, რომ გადასახადის გადამხდელის მიერ წარმოდგენილი არგუმენტები შესაფასებელია შემოსავლების სამსახურის მიერ, ამდენად, საჩივარი ამ ნაწილში, მომჩივნის მონაწილეობით, ხელახლა განსახილველად უნდა დაუბრუნდეს ამავე სამსახურს.
საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „ბ“ ქვეპუნქტით და გადაწყვიტა:
1. საჩივარი დაკმაყოფილდეს ნაწილობრივ;
2. ნაწილობრივ გაუქმდეს შემოსავლების სამსახურის 26.12.2025 წლის №28537 ბრძანება;
3. საჩივარი მე-2 დავის საგნის ნაწილში, მომჩივნის მონაწილეობით, ხელახლა განსახილველად დაუბრუნდეს შემოსავლების სამსახურს;
4. დანარჩენ ნაწილში საჩივარი არ დაკმაყოფილდეს;
5. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.
სადავო საკითხი
1. სახელმწიფო შესყიდვების ფარგლებში გაწეული მომსახურების შედეგად მიღებულ მიღება-ჩაბარებაზე დაყრდნობით დღგ-ის ბრუნვის გაზრდა;
2. გადასახადის გადამხდელად არარეგისტრირებული პირებისთვის გაცემული თანხის გადახდის წყაროსთან დაბეგვრა და მიღებული თავისუფალი ფულადი სახსრების კომპანიის დირექტორზე/დამფუძნებელზე ხელფასის სახით განაცემად ჩათვლა.
ფაქტობრივი გარემოებები
შესამოწმებელ პერიოდში კომპანია ასრულებს სამუშაოებს 13 ტენდერის ფარგლებში, ძირითადი მომსახურება შესრულებული აქვს მუნიციპალიტეტებისთვის. გადასახადის გადამხდელს არ გააჩნია ბუღალტრული აღრიცხვის პროგრამა, მისი განცხადებით არ აქვს დაზუსტებული ინფორმაცია დებიტორ-კრედიტორული ნაშთების შესახებ. შემოწმების შედეგად ირკვევა, რომ საწარმოს სახელმწიფო შესყიდვების ფარგლებში გაწეული მომსახურების შესაბამისად მიღებული აქვს მიღება-ჩაბარების დოკუმენტები, რომელზეც არ აქვს ანგარიშ-ფაქტურა გამოწერილი და არ არის გათვალისწინებული 18%-იანი ბრუნვის გაანგარიშებისას. აღნიშული თანხა მუნიციპალიტეტის მიერ არ ანაზღაურებულა და დაკავებულია პირგასამტეხლოს სახით. ასევე, მომწოდებლების მიერ მოხდა გადასახადის გადამხდელის მიერ მიღებული ჩათვლის ანგარიშ-ფაქტურების კორექტირება, კორექტირების შედეგად შესამცირებელი აქვს ჩასათვლელი დღგ-ის თანხა და აღნიშნული არ აქვს გათვალისწინებული შესაბამისი პერიოდის დეკლარაციით. გადასახადის გადამხდელს დაერიცხა დღგ და დაეკისრა ჯარიმა.
დეკლარირებული (თითოეულ პირზე ხელფასის განაცემის, წყაროსთან დასაკავებელი მიღებული მომსახურების) მონაცემებისა და საბანკო ამონაწერების ანალიზით დადგინდა, რომ გადასახადის გადამხდელს მიღებული მომსახურების სანაცვლოდ საბანკო ამონაწერების მიხედვით გაცემული აქვს თანხები გადასახადის არაგადამხდელი პირთათვის, რომელიც ექვემდებარება გადახდის წყაროსთან დაბეგვრას. შემოწმების შედეგად ასევე, განისაზღვრა სალაროში ნაღდი ფულის ნაშთი შესამოწმებელი პერიოდის ბოლოს. მომჩივანს დაერიცხა საშემოსავლო გადასახადი და დაეკისრა ჯარიმა.
გადაწყვეტილება
საჩივარი დაკმაყოფილდეს ნაწილობრივ;
ნაწილობრივ გაუქმდეს შემოსავლების სამსახურის 26.12.2025 წლის №28537 ბრძანება; საჩივარი მე-2 დავის საგნის ნაწილში, მომჩივნის მონაწილეობით, ხელახლა განსახილველად დაუბრუნდეს შემოსავლების სამსახურს;დანარჩენ ნაწილში საჩივარი არ დაკმაყოფილდეს;
დასაბუთება
საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს;159;163;164;275;101;154;