გადაწყვეტილება №26264/2/2025

№26264/2/2025

05 იანვარი 2026

გ ა დ ა წ ყ ვ ე ტ ი ლ ე ბ ა

 

მომჩივანი: „------“ (ს/ნ -----)

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ, 18.12.2025 წელს განიხილა და მიიღო გადაწყვეტილება ----- 3.12.2025 წელს რეგისტრირებულ საჩივარზე (რეგისტრაციის №26264/2/2025).

 

დავის საგანი:

შემოსავლების სამსახურის 25.06.2025 წლის №13451 ბრძანების აღსრულების შედეგები.

 

გასაჩივრებული გადაწყვეტილება:

1. აუდიტის დეპარტამენტის 10.10.2025 წლის №001-212 საგადასახადო მოთხოვნა;

2. შემოსავლების სამსახურის 20.11.2025 წლის №25606 ბრძანება.

 

დარიცხული თანხა: 175 371,11 ლარი.

მათ შორის:

დღგ - 97 212,04

ჯარიმა - 65 980,65

საურავი - 12 178,42

 

ფაქტების აღწერა/დარიცხვის საფუძვლები

აუდიტის დეპარტამენტის 30.04.2025 წლის კამერალური საგადასახდო შემოწმების აქტით შემოწმებულია, 1.01.2022 წლიდან 1.01.2025 წლამდე საანგარიშო პერიოდების საკონტროლო-სალარო აპარატითა და პოსტერმინალით განხორციელებული ანგარიშსწორებისას მიღებული თანხების დღგ-ის დეკლარაციაში ასახვის სისწორე. შემოწმების აქტიდან ირკვევა, რომ სადავო დარიცხვა გამოწვეულია შემდეგი გარემოებებით:

მომჩივანი გადასახადის გადამხდელად რეგისტრირებულია 23.04.2012 წლიდან, ხოლო დღგ-ის გადამხდელად 15.11.2021 წლიდან. ასევე მეწარმეს მინიჭებული აქვს მცირე მეწარმის სტატუსი 1.03.2021 წლიდან. გადასახადის გადამხდელს დოკუმენტურად (სასაქონლო ზედნადები/ანგარიშ-ფაქტურა) უფიქსირდება სხვადასხვა ხორც-პროდუქტებისა და ნახევარფაბრიკატების შეძენა (2 292 398 ლარის ღირებულების). მისივე განმარტებით, ახორციელებდა აღნიშნული შეძენილი საქონლის მომზადებას და თავისივე რესტორანში მზა საკვებად რეალიზაციას. შესამოწმებელ პერიოდში გადამხდელის მიერ დეკლარირებული დღგ-ით დასაბეგრი ბრუნვა შეადგენს 977 198 ლარს. შემოწმების მიმდინარეობისას პირის მიერ არასრულად იქნა წარმოდგენილი მოთხოვნილი ინფორმაცია-დოკუმენტაცია (საბანკო ამონაწერები). შედეგად, საგადასახადო ორგანომ იხელმძღვანელა შემოსავლების სამსახურის ერთიან საინფორმაციო ბაზაში არსებული მონაცემებით კერძოდ, ბაზაში არსებული საბანკო ტერმინალების და სალარო აპარატის მონაცემებით. საგადასახადო კოდექსის 159-ე, 163-ე და 164-ე მუხლების გათვალისწინებით გაიზარდა დღგ-ით დასაბეგრი ბრუნვა, შედეგად, გადამხდელს დაერიცხა დღგ და ჯარიმა საგადასახადო კოდექსის 275-ე მუხლის თანახმად.

შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 5.05.2025 წლის №001-59 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 25.06.2025 წლის №13451 ბრძანებით საჩივარი დაკმაყოფილდა ნაწილობრივ, დღგ-ის ჩასათვლელი თანხების დაზუსტების მიზნით გადასახადის გადამხდელს მიეცა წინადადება ამ ბრძანების ჩაბარებიდან 15 კალენდარული დღის ვადაში აუდიტის დეპარტამენტს წარუდგინოს დღგ-ის ჩათვლის უფლების დამადასტურებელი დოკუმენტაცია/მტკიცებულებები. აუდიტის დეპარტამენტს დაევალა დამატებით შეისწავლოს როგორც წარმოდგენილი, ასევე, შემოსავლების სამსახურის გადასახადების ადმინისტრირების საინფორმაციო სისტემაში არსებული დღგის ჩათვლის უფლების დამადასტურებელი დოკუმენტები და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით, განახორციელოს საგადასახადო ვალდებულებების კორექტირება (შემცირება).

შემოსავლების სამსახურის 25.06.2025 წლის №13451 ბრძანების აღსრულების შედეგებზე შედგენილი აუდიტის დეპარტამენტის 8.10.2025 წლის დასკვნის მიხედვით, საკითხი დამატებით შესწავლილი იქნა გადასახადის გადამხდელის მიერ წარმოდგენილი და შემოსავლების სამსახურის გადასახადების ადმინისტრირების საინფორმაციო სისტემაში არსებული დოკუმენტების საფუძველზე. აღნიშნულის შესაბამისად მოხდა დარიცხული საგადასახადო ვალდებულებების კორექტირება (შემცირება). გადასახადის გადამხდელს შეუმცირდა სულ 224 010,1 ლარი, მათ შორის გადასახადი

161 081,75 ლარი და ჯარიმა 62 928,35 ლარი.

აუდიტის დეპარტამენტის 8.10.2025 წლის დასკვნის საფუძველზე გადასახადის გადამხდელს წარედგინა ამავე დეპარტამენტის 10.10.2025 წლის

№001-212 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის 20.11.2025 წლის №25606 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

შემოსავლების სამსახური მიუთითებს საგადასახადო კოდექსის 304-ე მუხლის 21 ნაწილზე და გადასახადის გადამხდელის არგუმენტთან, შემოწმების მიერ შემოსავლების არასწორად დათვლასთან და დღგ-ის დარიცხვასთან დაკავშირებით, აღნიშნავს, რომ გადასახადის გადამხდელს მითითებული აქვს ისეთი ფაქტობრივი გარემოება, რაც თავდაპირველ საჩივარში სადავოდ არ გაუხდია და შესაბამისად, არ ყოფილა დავალებული შესასრულებლად აუდიტის დეპარტამენტისთვის.

ამასთან, გადასახადის გადამხდელის პოზიციასთან, დღგ-ის ჩასათვლელი თანხების გათვალისწინებასთან დაკავშირებით, შემოსავლების სამსახური ყურადღებას ამახვილებს აუდიტის დეპარტამენტის მიერ მოწოდებულ ინფორმაციაზე, რომლის თანახმად, გადასახადის გადამხდელს უფიქსირდებოდა საქონლის/მომსახურების შეძენასთან დაკავშირებით მიღებული საგადასახადო ანგარიშ-ფაქტურები. შემოწმების მიერ გაანალიზდა იყო თუ არა მეწარმის ეკონომიკურ საქმიანობასთან დაკავშირებული საქონლის/მომსახურების შეძენები. აღნიშნული შეძენების კატეგორიებს წარმოადგენდა: სარეალიზაციო საქონელი, ძირითადი საშუალებები (მაცივარი/კონდენციონერი), იჯარა, სარემონტო მასალები, კომუნალურები და საწვავი. გადასახადის გადამხდელს დაევალა წარმოედგინა შესაბამისი მტკიცებულებები, რომლითაც დადასტურდებოდა საქონლის/მომსახურების ეკონომიკურ საქმიანობაში გამოყენების ფაქტი. გადასახადის გადამხდელმა წარმოადგინა იჯარის ხელშეკრულებები და ახსნაგანმარტება, რომლითაც დადგინდა, რომ სხვადასხვა საქონლის/მომსახურების შეძენა ესაჭიროებოდა ეკონომიკური საქმიანობიდან გამომდინარე. აღნიშნულის საფუძველზე, შემოწმებამ დღგ-ის ჩათვლაში გაითვალისწინა ყველა მიღებული საგადასახადო ანგარიშ-ფაქტურა, მათ შორის, სპეციალური საგადასახადო ანგარიშ-ფაქტურები. ხოლო, გადასახადის გადამხდელის მიერ, დამატებით სხვა დოკუმენტები, რომელიც გავლენას მოახდენდა დღგ-ის ჩასათვლელ თანხაზე, არ ყოფილა წარმოდგენილი. ამასთან, შემოსავლების სამსახურში საკითხის ზეპირსიტყვიერი განხილვისას გადამხდელმა განაცხადა, რომ მომწოდებლებისთვის მოთხოვნილი აქვს საგადასახადო ანგარიშფაქტურები, თუმცა შემოსავლების სამსახურის გადასახადების ადმინისტრირების საინფორმაციო სისტემის მონაცემების მიხედვით, არ ფიქსირდება მომწოდებლების მიერ დამატებით გამოწერილი და დადასტურებული საგადასახადო ანგარიშ-ფაქტურები.

შემოსავლების სამსახური აღნიშნავს, რომ გადასახადის გადამხდელი საჩივარში ვერ უთითებს იმ ფაქტობრივ და სამართლებრივ გარემოებებს, თუ რა ნაწილში არ მოხდა შემოსავლების სამსახურის გადაწყვეტილების აღსრულება და შესაბამისად, გადასახადის გადამხდელის მიერ საჩივარში გამოთქმული პრეტენზიები საფუძველს მოკლებულია.

საქმეზე არსებული მტკიცებულებების, აუდიტის დეპარტამენტის დასკვნის და შესაბამისად, განხორციელებული გადაანგარიშების შედეგებზე დაყრდნობით, შემოსავლების სამსახური მიიჩნევს, რომ შემოსავლების სამსახურის გადაწყვეტილების აღსრულება განხორციელებულია საქმისთვის არსებითი მნიშვნელობის მქონე ყველა გარემოებების გამოკვლევის/შესწავლის საფუძველზე, გასაჩივრებული ადმინისტრაციული აქტის შინაარსი შეესაბამება დავის განხილვისას მიღებულ გადაწყვეტილებას და არ არსებობს საჩივრის დაკმაყოფილების საფუძველი.

 

მომჩივნის არგუმენტაცია

№----- საგადასახადო მოთხოვნის საფუძველზე დაერიცხა გადასახადი. ითხოვს ეპატიოს ამ დოკუმენტით მოთხოვნილი ჯარიმა - 65 980 ლარი.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საგადასახადო კოდექსის 159-ე მუხლის პირველი ნაწილის „ა“ და „ბ“ ქვეპუნქტების თანახმად, დღგით დასაბეგრი ოპერაციებია, დასაბეგრი პირის მიერ საქართველოს ტერიტორიაზე ეკონომიკური საქმიანობის ფარგლებში ანაზღაურების სანაცვლოდ საქონლის მიწოდება, ასევე ანაზღაურების სანაცვლოდ მომსახურების გაწევა.

საგადასახადო კოდექსის 174-ე მუხლის პირველი და მე-2 ნაწილების თანახმად, დღგ-ის ჩათვლა არის დასაბეგრი პირის უფლება, შეიმციროს გადასახდელი დღგ-ის თანხა საქონლის მიწოდებასთან/მომსახურების გაწევასთან დაკავშირებული ხარჯის სხვადასხვა კომპონენტის ღირებულებაზე პირდაპირ მიკუთვნებული დღგ-ის თანხით. დღგ-ის ჩათვლის უფლება წარმოიშობა ჩასათვლელი დღგ-ის თანხის დარიცხვის ვალდებულების წარმოშობის (შესაბამისი ოპერაციის დღგ-ით დაბეგვრის) მომენტიდან.

საგადასახადო კოდექსის 175-ე მუხლის პირველი „ა“ ქვეპუნქტის თანახმად, თუ საქონელი/მომსახურება გამიზნულია ან გამოიყენება დღგ-ით დასაბეგრი ოპერაციის განხორციელებისთვის, დასაბეგრ პირს უფლება აქვს ჩაითვალოს საქართველოს ტერიტორიაზე სხვა დასაბეგრი პირისგან ამ საქონლის/მომსახურების შეძენისთვის გადახდილი/გადასახდელი დღგ.

საგადასახადო კოდექსის 176-ე მუხლის პირველი ნაწილის „ა“ და „ბ“ ქვეპუნქტების თანახმად დღგის ჩათვლის მიღების საფუძველია ამ კოდექსის 175-ე მუხლის პირველი ნაწილის „ა“ და „ბ“ ქვეპუნქტებითა და მე-2 ნაწილით გათვალისწინებულ შემთხვევებში – საქონლის/მომსახურების შეძენასთან დაკავშირებით ამ კოდექსით დადგენილი წესით გამოწერილი საგადასახადო ანგარიშ-ფაქტურა.

საგადასახადო კოდექსის 180-ე მუხლის პირველი ნაწილის თანახმად, თუ ამ კოდექსით სხვა რამ არის დადგენილი, დღგ-ის გადამხდელად რეგისტრირებული დასაბეგრი პირის მიერ სხვა დასაბეგრი პირისთვის საქონლის მიწოდების ან მომსახურების გაწევის შემთხვევაში, გამოიწერება საგადასახადო ანგარიშ-ფაქტურა.

შემოსავლების სამსახურის 25.06.2025 წლის №13451 ბრძანებით, დღგ-ის ჩათვლასთან დაკავშირებით აუდიტის დეპარტამენტს დაევალა, დამატებით შეისწავლოს როგორც წარმოდგენილი, ასევე, შემოსავლების სამსახურის გადასახადების ადმინისტრირების საინფორმაციო სისტემაში არსებული დღგის ჩათვლის უფლების დამადასტურებელი დოკუმენტები და დღგ-ის ჩათვლის მიღებასთან დაკავშირებით კანონმდებლობით დადგენილი შეზღუდვების გათვალისწინებით, განახორციელოს საგადასახადო ვალდებულებების კორექტირება (შემცირება).

აუდიტის დეპარტამენტის 8.10.2025 წლის დასკვნის მიხედვით, საკითხი დამატებით შესწავლილი იქნა გადასახადის გადამხდელის მიერ წარმოდგენილი და შემოსავლების სამსახურის გადასახადების ადმინისტრირების საინფორმაციო სისტემაში არსებული დოკუმენტების საფუძველზე. აღნიშნულის შესაბამისად მოხდა დარიცხული საგადასახადო ვალდებულებების კორექტირება (შემცირება).

საბჭო ყურადღებას ამახვილებს იმ გარემოებაზე, რომ საგადასახადო შემოწმების შედეგების გადაანგარიშებისას შესწავლილი და სათანადო საფუძვლების არსებობის შემთხვევაში გათვალისწინებული იქნა გადასახადის გადამხდელის მიერ წარდგენილი და შემოსავლების სამსახურის გადასახადების ადმინისტრირების საინფორმაციო სისტემაში არსებული დოკუმენტები, შედეგად შემცირებას დაექვემდებარა გადასახადის და სანქციის თანხები.

აღნიშნულიდან გამომდინარე, საბჭო მიიჩნევს, რომ აუდიტის დეპარტამენტის 8.10.2025 წლის დასკვნა გამოცემულია შემოსავლების სამსახურის 25.06.2025 წლის №13451 ბრძანების შესაბამისად და არ არსებობს სადავო აქტების გაუქმების საფუძველი.

მომჩივანი ითხოვს ეპატიოს ჯარიმა - 65 980 ლარი. საბჭო მიუთითებს, რომ ვერ იმსჯელებს აღნიშნულ საკითხზე, ვინაიდან განსახილველ შემთხვევაში სადავოა (გასაჩივრებულია) შემოსავლების სამსახურის 25.06.2025 წლის №13451 ბრძანების აღსრულების საკითხი - რამდენად სწორად და სრულად აღსრულდა აღნიშნული გადაწყვეტილება აუდიტის დეპარტამენტის მიერ. შესაბამისად, საბჭო ვერ გასცდება აღნიშნულ ფარგლებს.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი

შემოსავლების სამსახურის 25.06.2025 წლის №13451 ბრძანების აღსრულების შედეგები.

 

ფაქტობრივი გარემოებები

შესამოწმებელ პერიოდში გადამხდელის მიერ დეკლარირებული დღგ-ით დასაბეგრი ბრუნვა შეადგენს 977 198 ლარს. შემოწმების მიმდინარეობისას პირის მიერ არასრულად იქნა წარმოდგენილი მოთხოვნილი ინფორმაცია-დოკუმენტაცია (საბანკო ამონაწერები). შედეგად, საგადასახადო ორგანომ იხელმძღვანელა შემოსავლების სამსახურის ერთიან საინფორმაციო ბაზაში არსებული მონაცემებით. გაიზარდა დღგ-ით დასაბეგრი ბრუნვა, შედეგად, გადამხდელს დაერიცხა დღგ და ჯარიმა

საგადასახადო შემოწმების შედეგების გადაანგარიშებისას შესწავლილი და სათანადო საფუძვლების არსებობის შემთხვევაში გათვალისწინებული იქნა გადასახადის გადამხდელის მიერ წარდგენილი და შემოსავლების სამსახურის გადასახადების ადმინისტრირების საინფორმაციო სისტემაში არსებული დოკუმენტები, შედეგად შემცირებას დაექვემდებარა გადასახადის და სანქციის თანხები.

 

გადაწყვეტილება

საბჭო მიიჩნევს, რომ აუდიტის დეპარტამენტის დასკვნა გამოცემულია შემოსავლების სამსახურის 25.06.2025 წლის №13451 ბრძანების შესაბამისად და არ არსებობს სადავო აქტების გაუქმების საფუძველი.

 

დასაბუთება

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს; 159:174:175:180;