გადაწყვეტილება №26560/2/2026
📜 საკანონმდებლო ნორმები
📄 სრული ტექსტი
№26560/2/2026
25 თებერვალი 2026
გ ა დ ა წ ყ ვ ე ტ ი ლ ე ბ ა
მომჩივანი: შპს „-------“ (ს/ნ -------)
მოპასუხე: აუდიტის დეპარტამენტი
საქართველოს ფინანსთა სამინისტროსთან არსებულმა დავების განხილვის საბჭომ, 12.02.2026 წელს განიხილა და მიიღო გადაწყვეტილება შპს „-------“-ის 2.02.2026 წელს რეგისტრირებულ საჩივარზე (რეგისტრაციის №26560/2/2026).
დავის საგანი:
შემოსავლების სამსახურის 30.07.2025 წლის №17091 ბრძანების აღსრულების შედეგები.
გასაჩივრებული გადაწყვეტილება:
1. აუდიტის დეპარტამენტის 17.10.2025 წლის №001-218 საგადასახო მოთხოვნა;
2. შემოსავლების სამსახურის 24.12.2025 წლის №28202 ბრძანება.
დარიცხული თანხა: 476 979,56 ლარი.
მათ შორის:
გადასახადი - 263 190
დღგ - 99 743
საშემოსავლო გადასახადი - 163 447
ჯარიმა - 131 589
საურავი - 82 200,56
ფაქტების აღწერა/დარიცხვის საფუძვლები
მომჩივნის საქმიანობაა ფეხსაცმლით ვაჭრობა.
აუდიტის დეპარტამენტის 27.11.2024 წლის კამერალური საგადასახადო შემოწმების აქტით შემოწმებულია მომჩივნის საქმიანობის 2.05.2022 წლიდან 1.06.2024 წლამდე პერიოდი. შემოწმების აქტიდან ირკვევა, რომ სადავო დარიცხვა განპირობებულია შემდეგი გარემოებებით:
შესამოწმებელ პერიოდში საწარმოს ადგილობრივი შეძენები არ უფიქსირდება, შესყიდვების 100% შედგება იმპორტირებული საქონლისგან. გადასახადის გადამხდელი აღრიცხვას აწარმოებს ბუღალტრული პროგრამის საშუალებით. გადასახადის გადამხდელს აქვს მხოლოდ ერთი საკონტროლოსალარო აპარატი, მისამართი: -------, -------, თუმცა საგადასახადო მონიტორინგის დეპარტამენტის 23.07.2024 წლის №17256 ბრძანების აღსრულების პროცესში აღნიშნულ მისამართზე მომჩივანი ვერ მოიძებნა.
გადასახადის გადამხდელი აფიქსირებს, რომ ვაჭრობს ბითუმად, მაგრამ დოკუმენტური რეალიზაცია ფაქტობრივად არ აქვს (მხოლოდ 1%-ია). მისი შემოსავალი სრულად შედგებოდა რეალიზაციისას ნაღდი ანგარიშსწორებით მიღებული თანხებისგან. დაბეგვრის ობიექტის განსაზღვრისთვის გამოყენებულ იქნა არაპირდაპირი მეთოდი. შესამოწმებელ პერიოდში უდოკუმენტოდ რეალიზებულ საქონელზე გავრცელდა მსგავსი საქმიანობის განმახორციელებელი გადასახადის გადამხდელის აუდირებული ფასნამატი. შედეგად მომჩივანს დაერიცხა დღგ და დაეკისრა ჯარიმა საგადასახადო კოდექსის 275-ე მუხლის მიხედვით.
შემოწმების პროცესში განხორციელდა ნაღდი ფულის მოძრაობის ანალიზი, რა დროსაც გათვალისწინებულ იქნა არაპირდაპირი მეთოდით გაანგარიშებული შემოსავლები, რასაც შეუპირისპირდა დოკუმენტურად დადასტურებული ხარჯები, გაცემული ხელფასები და ბიუჯეტში გადახდილი გადასახადები. ასევე, გათვალისწინებულ იქნა ბუღალტრულ პროგრამაში დაფიქსირებული სალაროს ნაშთი. გამოვლენილი თანხა ჩაითვალა საწარმოს დირექტორზე გაცემული ხელფასად (სარგებლად) და დაიბეგრა გადახდის წყაროსთან საშემოსავლო გადასახადით. მომჩივანს ასევე დაეკისრა საგადასახადო კოდექსის 275-ე მუხლით განსაზღვრული ჯარიმა.
შემოწმების აქტის საფუძველზე გადასახადის გადამხდელს წარედგინა აუდიტის დეპარტამენტის 4.12.2024 წლის №001-220 საგადასახადო მოთხოვნა, რაც გასაჩივრდა შემოსავლების სამსახურში.
შემოსავლების სამსახურის 30.01.2025 წლის №927 ბრძანებით საჩივარი დაკმაყოფილდა ნაწილობრივ, აუდიტის დეპარტამენტს დაევალა, შეისწავლოს საგადასახადო ვალდებულებების არაპირდაპირი მეთოდის გამოყენების სამართლებრივი საფუძველი და შესწავლის შედეგების გათვალისწინებით, თუ დადასტურდება აღნიშნული მეთოდის გამოყენების მართლზომიერება, ფასნამატის განსაზღვრისას იხელმძღვანელოს მსგავსი საქმიანობის განმახორციელებელი პირების საბითუმო აუდირებული ფასნამატის შესახებ აუდიტის დეპარტამენტში არსებული ინფორმაციით და სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება).
შემოსავლების სამსახურის 30.01.2025 წლის №927 ბრძანება გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში. საბჭოს 13.02.2025 წლის №24683/2/2025 გადაწყვეტილებით საჩივარი არ დაკმაყოფილდა.
შემოსავლების სამსახურის 30.01.2025 წლის №927 ბრძანების აღსრულების შედეგად აუდიტის დეპარტამენტის 30.06.2025 წლის დასკვნის საფუძველზე, საგადასახდო შემოწმების აქტით დარიცხული თანხები კორექტირებას (შემცირებას) არ დაექვემდებარა.
აუდიტის დეპარტამენტის 30.06.2025 წლის დასკვნის საფუძველზე გადასახადის გადამხდელს წარედგინა ამავე დეპარტამენტის 7.07.2025 წლის №001-142 საგადასახადო მოთხოვნა, რაც გასაჩივრდა შემოსავლების სამსახურში.
შემოსავლების სამსახურის 30.07.2025 წლის №17091 ბრძანებით საჩივარი დაკმაყოფილდა ნაწილობრივ. შემოსავლების სამსახურის 30.01.2025 წლის №927 ბრძანების სრულყოფილად აღსრულების მიზნით, აუდიტის დეპარტამენტს დაევალა ფასნამატის განსაზღვრისას იხელმძღვანელოს მსგავსი საქმიანობის განმახორციელებელი პირების საბითუმო აუდირებული ფასნამატის შესახებ აუდიტის დეპარტამენტში არსებული ინფორმაციით და აღნიშნულის გათვალისწინებით, განახორციელოს საგადასახადო ვალდებულებების კორექტირება (შემცირება).
შემოსავლების სამსახურის 30.07.2025 წლის №17091 ბრძანება გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში. საბჭოს 9.10.2025 წლის №25574/2/2025 გადაწყვეტილებით საჩივარი არ დაკმაყოფილდა.
შემოსავლების სამსახურის 30.07.2025 წლის №17091 ბრძანების აღსრულების შედეგებზე შედგენილი აუდიტის დეპარტამენტის 19.09.2025 წლის დასკვნის მიხედვით, შემმოწმებელთა ჯგუფის მიერ, მოძიებულ იქნა აუდიტის დეპარტამენტში არსებული ინფორმაცია, მსგავსი საქმიანობის განმახორციელებელი პირების საბითუმო აუდირებული ფასნამატის შესახებ, რომელიც გავრცელდა უდოკუმენტოდ რეალიზებულ საქონელზე. შესაბამისად განხორციელდა საგადასახადო შემოწმების აქტით დარიცხული თანხები კორექტირება (შემცირება).
აუდიტის დეპარტამენტის 19.09.2025 წლის დასკვნის საფუძველზე გადასახადის გადამხდელს წარედგინა ამავე დეპარტამენტის 17.10.2025 წლის №001-218 საგადასახადო მოთხოვნა, რაც გასაჩივრდა შემოსავლების სამსახურში.
შემოსავლების სამსახურის 24.12.2025 წლის №28202 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.
შემოსავლების სამსახურის გადაწყვეტილების შინაარსი
შემოსავლების სამსახური მიუთითებს საგადასახადო კოდექსის 302-ე მუხლის მე-6 ნაწილზე და აღნიშნავს, რომ საჩივრის განხილვა საგადასახადო ორგანოში ჩაინიშნა 27.11.2025 წელს, 11:30 სთ-ზე, გადასახადის გადამხდელის მონაწილეობით. გადასახადის გადამხდელს ეცნობა საჩივრის განხილვის დროისა და ადგილის შესახებ, თუმცა მომჩივანი არ გამოცხადდა საჩივრის ზეპირ განხილვაზე და არც განცხადება წარმოუდგენია განხილვის გადადებასთან დაკავშირებით.
შემოსავლების სამსახური მიუთითებს 304-ე მუხლის 21 ნაწილზე და საგადასახადო შემოწმების შედეგების გადაანგარიშების თაობაზე აუდიტის დეპარტამენტის მიერ გამოცემულ დასკვნაზე, რომლის თანახმადაც, შემმოწმებელთა ჯგუფის მიერ, მოძიებულ იქნა აუდიტის დეპარტამენტში არსებული ინფორმაცია, მსგავსი საქმიანობის განმახორციელებელი პირების საბითუმო აუდირებული ფასნამატების შესახებ, რომელიც გავრცელდა დოკუმენტის გარეშე რეალიზებულ საქონელზე.
ამასთან, შემოსავლების სამსახური აღნიშნავს, რომ მომჩივანს საგადასახადო დავის ეტაპზე არ წარმოუდგენია ისეთი დოკუმენტაცია/მტკიცებულება, რომელიც შეცვლიდა საგადასახადო შემოწმების შედეგების გადაანგარიშებაზე გამოცემულ დასკვნაში ასახულ ფაქტობრივ გარემოებებს.
საქმეზე არსებული მტკიცებულებების, აუდიტის დეპარტამენტის მიერ შედგენილი დასკვნის და შესაბამისად, განხორციელებული გადაანგარიშების შედეგებზე დაყრდნობით, შემოსავლების სამსახური მიიჩნევს, რომ შემოსავლების სამსახურის გადაწყვეტილების აღსრულება განხორციელებულია საქმისთვის არსებითი მნიშვნელობის მქონე ყველა გარემოების გამოკვლევის/შესწავლის საფუძველზე, გასაჩივრებული ადმინისტრაციული აქტის შინაარსი შეესაბამება დავის განხილვისას მიღებულ გადაწყვეტილებას და არ არსებობს წარმოდგენილი საჩივრის დაკმაყოფილების სამართლებრივი საფუძველი.
მომჩივნის არგუმენტაცია
აუდიტის დეპარტამენტმა მოხდინა გადაანგარიშება და საცალოდ არსებული ფასნამატის პროცენტული მაჩვენებელი შეცვალა და მიუყენა საბითუმო ფასნამატი - 26%, აღნიშნული ფასნამატის პროცენტული მაჩვენებელი მიუღებელია რადგან საბითუმო ფასნამატი სპორტულ (დაბალფასიან) ფეხსაცმელებზე შეადგენს 12%-დან 16%-მდე, ხოლო აუდიტის დეპარტამენტმა საიდან აიღო 26%-იანი ფასნამატის მაჩვენებელი უცნობია, აქედან გამომდინარე უნდა გავრცელდეს 12%-იანი ფასნამატი.
შემოსავლების სამსახურის არგუმენტია, რომ შემმოწმებელთა ჯგუფის მიერ, მოძიებულ იქნა აუდიტის დეპარტამენტში არსებული ინფორმაცია, მსგავსი საქმიანობის განმახორციელებელი პირების საბითუმო აუდირებული ფასნამატის შესახებ. ე.ი. მრავალი პირისაგან აიღეს საბითუმო ფასნამატი. ანალოგიური საქონელი, რომელიც იმპორტირებულია შპს „-------“-ის მიერ იმ პერიოდში სხვა კომპანიას არ აქვს იმპორტირებული. საიდან აიღეს საბითუმო ფასნამატი, როცა ე.წ. ლილოს ბაზრობაზე საბითუმო რეალიზაციას ახდენდა მხოლოდ შპს „-------“ და ბუღალტრულ აღრიცხვაში დაფიქსირებული ფასნამატი შეესაბამება იმ დროისათვის საბაზრო ფასებს. აუდიტის დეპარტამენტის დასკვნა არ შეესაბამება საბაზრო ფასებს და უნდა შემცირდეს ფასნამატი 12%-მდე. შესაბამისად აუდიტის დეპარტამენტმა ხელმეორედ უნდა გადაიანგარიშოს დამატებით დარიცხული გადასახადები.
დავების განხილვის საბჭო
მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:
საგადასახადო კოდექსის 136-ე მუხლის პირველი და მე-3 ნაწილების თანახმად, გადასახადის გადამხდელი ვალდებულია სწორად და დროულად აღრიცხოს შემოსავლები და ხარჯები დოკუმენტურად დადასტურებულ მონაცემთა საფუძველზე, ამ თავით გათვალისწინებული მეთოდების გამოყენებით და მიაკუთვნოს იმ საანგარიშო პერიოდს, რომელშიც მოხდა მათი მიღება და გაწევა. გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.
საგადასახადო კოდექსის 73-ე მუხლის მე-5 ნაწილის „ა“ ქვეპუნქტის თანახმად, საგადასახადო ორგანოს უფლება აქვს, პირის საგადასახადო ვალდებულებები განსაზღვროს არაპირდაპირი მეთოდების გამოყენებით (აქტივების სიდიდის, საოპერაციო შემოსავლებისა და ხარჯების, პირის შესახებ ინფორმაციის მისი საქმიანობის სხვა საგადასახადო პერიოდთან ან სხვა ამგვარი გადასახადის გადამხდელის შესახებ მონაცემების შედარების, აგრეთვე სხვა მსგავსი ინფორმაციის ანალიზის საფუძველზე) თუ პირს არ აქვს სააღრიცხვო დოკუმენტაცია ან სააღრიცხვო დოკუმენტაციით შეუძლებელია დაბეგვრის ობიექტის დადგენა.
შემოსავლების სამსახურის 30.01.2025 წლის №927 ბრძანებით საჩივარი დაკმაყოფილდა ნაწილობრივ, აუდიტის დეპარტამენტს დაევალა, შეისწავლოს საგადასახადო ვალდებულებების არაპირდაპირი მეთოდის გამოყენების სამართლებრივი საფუძველი და შესწავლის შედეგების გათვალისწინებით, თუ დადასტურდება აღნიშნული მეთოდის გამოყენების მართლზომიერება, ფასნამატის განსაზღვრისას იხელმძღვანელოს მსგავსი საქმიანობის განმახორციელებელი პირების საბითუმო აუდირებული ფასნამატის შესახებ აუდიტის დეპარტამენტში არსებული ინფორმაციით და სათანადო საფუძვლების არსებობის შემთხვევაში, განახორციელოს საგადასახადო ვალდებულებების კორექტირება (შემცირება).
აღნიშნული ბრძანების აღსრულების მიზნით გამოიცა აუდიტის დეპარტამენტის 30.06.2025 წლის დასკვნა, სადაც მითითებულია შემდეგი: შესწავლილ იქნა საგადასახადო ვალდებულებების არაპირდაპირი მეთოდის გამოყენების სამართლებრივი საფუძვლები, „ცალკეულ შემთხვევაში პირის საგადასახდო ვალდებულებების განსაზღვრის მიზნით მეთოდური მითითების დამტკიცების თაობაზე“ შემოსავლების სამსახურის უფროსის №22708 ბრძანების შესაბამისად დამტკიცებული „პირის საგადასახადო ვალდებულების არაპირდაპირი მეთოდით განსაზღვრის შესახებ“ მეთოდური მითითების შესაბამისად განსაზღვრულია დაბეგვრის ობიექტის დაუდგენლობა, რომელიც მათ შორის, გულისხმობს, რომ მიუხედავად იმისა, სააღრიცხვო დოკუმენტაციით შეიძლება დადგინდეს სამეურნეო ოპერაციის დაწყებას, მიმდინარეობას და დასრულებას (შედეგს) შორის კავშირი, თუ ამავე სააღრიცხვო დოკუმენტაციაში ასახული დაბეგვრის ობიექტთან დაკავშირებული სამეურნეო ოპერაცია არ შეესაბამება რეალობას ან/და არალოგიკურია, შეიცავს არსებით ტექნიკურ უზუსტობებს ან/და შინაარსობრივ შეცდომებს, ჩაითვლება, რომ აღნიშნულ ნაწილში ვერ დგინდება დაბეგვრის ობიექტი. აღნიშნულიდან გამოდინარე გადასახადის გადამხდელის მიერ ნაწარმოებ ბუღალტრულ პროგრამაში ასახული ინფორმაცია არ შეესაბამება რეალობას და არალოგიკურია. ასევე იდენტიფიცირებული ფასნამატის განსაზღვრა ვერ ხდება და ის არალოგიკურად აცდენილია, შესამოწმებელ პერიოდში ბაზარზე არსებულ ფასნამატთან, ამასთან, გადასახადის გადამხდელის მიერ განხორციელებული დოკუმენტური რეალიზაცია არაარსებითია სრულ ბრუნვაში. აღნიშნულის გათვალისწინებით, საგადასახადო ორგანოს აქვს არაპირდაპირი მეთოდის გამოყენების საფუძვლები.
რაც შეეხება მსგავსი საქმიანობის განმახორციელებელი პირების საბითუმო აუდირებული ფასნამატის შესახებ აუდიტის დეპარტამენტში არსებულ ინფორმაციას აღნიშნული მოძიებულ იქნა შემმოწმებელთა ჯგუფის მიერ, თუმცა გადასახადის გადამხდელის სააღრიცხვო მონაცემებით არ დასტურდება საბითუმო რეალიზაცია და არ იძლევა საბითუმო რეალიზაციის იდენტიფიცირების საშუალებას. ყოველივე ზემოაღნიშნულის გათვალისწინებით საგადასახდო შემოწმების აქტით დარიცხული თანხები კორექტირებას (შემცირებას) არ დაექვემდებარა.
შემოსავლების სამსახურის 30.01.2025 წლის №927 ბრძანების აღსრულების შედეგები გასაჩივრდა შემოსავლების სამსახურში, რომელმაც 30.07.2025 წლის №17091 ბრძანებით საჩივარი დაკმაყოფილდა ნაწილობრივ, აუდიტის დეპარტამენტს დაევალა, ფასნამატის განსაზღვრისას იხელმძღვანელოს მსგავსი საქმიანობის განმახორციელებელი პირების საბითუმო აუდირებული ფასნამატის შესახებ აუდიტის დეპარტამენტში არსებული ინფორმაციით და აღნიშნულის გათვალისწინებით, განახორციელოს საგადასახადო ვალდებულებების კორექტირება (შემცირება).
აუდიტის დეპარტამენტის 19.09.2025 წლის დასკვნის მიხედვით, შემმოწმებელთა ჯგუფის მიერ მოძიებულ იქნა აუდიტის დეპარტამენტში არსებული ინფორმაცია, მსგავსი საქმიანობის განმახორციელებელი პირების საბითუმო აუდირებული ფასნამატის შესახებ, რომელიც გავრცელდა უდოკუმენტოდ რეალიზებულ საქონელზე. აღნიშნულის გათვალისწინებით განხორციელდა საგადასახადო შემოწმების აქტით დარიცხული თანხები კორექტირება (შემცირება).
საბჭო ყურადღებას ამახვილებს იმ გარემოებაზე, რომ საგადასახადო შემოწმების შედეგების გადაანგარიშებისას შესწავლილი და სათანადო საფუძვლების არსებობის შემთხვევაში გათვალისწინებული იქნა აუდიტის დეპარტამენტში არსებული ინფორმაცია, მსგავსი საქმიანობის განმახორციელებელი პირების საბითუმო აუდირებული ფასნამატის შესახებ და შედეგად შემცირებას დაექვემდებარა გადასახადის და სანქციის თანხები.
ამასთან, მომჩივნის მიერ არ არის წარმოდგენილი მტკიცებულებები, რომლითაც დადგინდება გადაანგარიშების შედეგად დადგენილისაგან განსხვავებული გარემოებები.
აღნიშნულიდან გამომდინარე, საბჭო მიიჩნევს, რომ აუდიტის დეპარტამენტის 19.09.2025 წლის დასკვნა გამოცემულია შემოსავლების სამსახურის 30.07.2025 წლის №17091 ბრძანების შესაბამისად და არ არსებობს სადავო აქტების გაუქმების საფუძველი.
საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:
1. საჩივარი არ დაკმაყოფილდეს;
2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.
სადავო საკითხები:
შემოსავლების სამსახურის 30.07.2025 წლის №17091 ბრძანების აღსრულების შედეგები.
ფაქტობრივი გარემოებები
მოსავლების სამსახურის 30.01.2025 წლის №927 ბრძანების აღსრულების შედეგები გასაჩივრდა შემოსავლების სამსახურში, რომელმაც 30.07.2025 წლის №17091 ბრძანებით საჩივარი დაკმაყოფილდა ნაწილობრივ, აუდიტის დეპარტამენტს დაევალა, ფასნამატის განსაზღვრისას იხელმძღვანელოს მსგავსი საქმიანობის განმახორციელებელი პირების საბითუმო აუდირებული ფასნამატის შესახებ აუდიტის დეპარტამენტში არსებული ინფორმაციით და აღნიშნულის გათვალისწინებით, განახორციელოს საგადასახადო ვალდებულებების კორექტირება (შემცირება).
აუდიტის დეპარტამენტის დასკვნის მიხედვით, შემმოწმებელთა ჯგუფის მიერ მოძიებულ იქნა აუდიტის დეპარტამენტში არსებული ინფორმაცია, მსგავსი საქმიანობის განმახორციელებელი პირების საბითუმო აუდირებული ფასნამატის შესახებ, რომელიც გავრცელდა უდოკუმენტოდ რეალიზებულ საქონელზე. აღნიშნულის გათვალისწინებით განხორციელდა საგადასახადო შემოწმების აქტით დარიცხული თანხები კორექტირება (შემცირება).
საბჭო ყურადღებას ამახვილებს იმ გარემოებაზე, რომ საგადასახადო შემოწმების შედეგების გადაანგარიშებისას შესწავლილი და სათანადო საფუძვლების არსებობის შემთხვევაში გათვალისწინებული იქნა აუდიტის დეპარტამენტში არსებული ინფორმაცია, მსგავსი საქმიანობის განმახორციელებელი პირების საბითუმო აუდირებული ფასნამატის შესახებ და შედეგად შემცირებას დაექვემდებარა გადასახადის და სანქციის თანხები.
ამასთან, მომჩივნის მიერ არ არის წარმოდგენილი მტკიცებულებები, რომლითაც დადგინდება გადაანგარიშების შედეგად დადგენილისაგან განსხვავებული გარემოებები.
გადაწყვეტილება
საბჭო მიიჩნევს, რომ აუდიტის დეპარტამენტის 19.09.2025 წლის დასკვნა გამოცემულია შემოსავლების სამსახურის 30.07.2025 წლის №17091 ბრძანების შესაბამისად და არ არსებობს სადავო აქტების გაუქმების საფუძველი.
დასაბუთება
საქართველოს ფინანსთა სამინისტორსთან არსებული დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 304(21)