ბრძანება N 26696

N 26696

04 დეკემბერი 2025

ბრძანება

შპს ,,------“ (ს/ნ ,,------“ )

(ფაქტ. მის.: ,,------“)

2025 წლის 18 ნოემბრის საჩივრის

დაკმაყოფილებაზე უარის თქმის თაობაზე

შემოსავლების სამსახურმა დავების განხილვის საბჭოს 2025 წლის 27 ნოემბრის სხდომაზე (ოქმი №98) განიხილა შპს ,,--------“ (ს/ნ ,,--------“) 2025 წლის 18 ნოემბრის №98879/1/2025 საჩივარი, აუდიტის დეპარტამენტის 2025 წლის 28 ოქტომბრის №022-16 საგადასახადო მოთხოვნასთან დაკავშირებით.

სადავო საკითხი:

გადასახადის გადამხდელი არ ეთანხმება განკარგვადი თანხის, 1 674 463.2 ლარის, საწარმოს დირექტორზე გაცემულ ხელფასად განხილვას და საშემოსავლო გადასახადში განსაზღვრულ საგადასახადო ვალდებულებებს, ასევე ჯარიმას. განმარტავს, რომ საქმიანობის სპეციფიკიდან გამომდინარე, საბაჟო ტვირთების ლოჯისტიკის შეუფერხებელი გადაზიდვის უზრუნველყოფის მიზნით, დირექტორის მიერ ანგარიშიდან გამოტანილ იქნა ჯამში 1 674 463,2 ლარი, რომელიც შემოწმებით ჩაითვალა დირექტორის ხელფასად. მიუთითებს, რომ ოპერაციის განუხორციელებლობის ან მომდევნო სამუშაო დრომდე ლოჯისტიკის გადადების შემთხვევაში, გატანილი თანხის დიდი ნაწილი 1 349 822 ლარი დირექტორის მიერ უკან იქნა შეტანილი საწარმოს ანგარიშზე, რომელიც არ იქნა ჩათვლილი აუდიტის დეპარტამენტის მიერ უკან დაბრუნებულ თანხად. აცხადებს, რომ საწარმოს ამონაწერში გარკვევითაა ასახული ანგარიშებიდან თანხის მოხსნა-დაბრუნების ოპერაცია და მოთხოვნის შემთხვევაში შეუძლია განმარტოს კონკრეტული ოპერაციები. ითხოვს დირექტორის მიერ ანგარიშზე შეტანილი თანხების ჩათვლას და აღნიშნულის გათვალისწინებით საშემოსავლო გადასახადში დარიცხული თანხის გადაანგარიშებას.

ფაქტობრივი გარემოებები:

საქმის მასალებით ირკვევა, რომ შემოსავლების სამსახურის აუდიტის დეპარტამენტის 2025 წლის 23 მაისის №10585 ბრძანების საფუძველზე ჩატარდა შპს ,,-------“ (ს/ნ ,,-------“) საქმიანობის კამერალური საგადასახადო შემოწმება. შესამოწმებელ პერიოდად განისაზღვრა 2022 წლის პირველი იანვრიდან 2025 წლის 23 მაისის ჩათვლით საანგარიშო პერიოდები. შემოწმების შედეგებზე 2025 წლის 24 ოქტომბერს შედგენილ იქნა საგადასახადო შემოწმების აქტი, გამოიცა 2025 წლის

28 ოქტომბრის №23649 ბრძანება და ამავე თარიღის №022-16 საგადასახადო მოთხოვნა, რომლის მიხედვით გადამხდელს დამატებით გადასახდელად განესაზღვრა სულ 702 921 ლარი, მათ შორის, გადასახადი 437 264 ლარი, ჯარიმა 221 512 ლარი, საურავი 44 145 ლარი.

საგადასახადო შემოწმების აქტის მიხედვით, საგადასახადო ვალდებულებები განსაზღვრულია შემდეგი გარემოებებით:

შპს ,,--------“ (ს/ნ ,,-------“) წარმოდგენილი აქვს შესამოწმებელ პერიოდში გადახდის წყაროსთან დაკავებული გადასახადების დეკლარაციები. შემოწმების შედეგად, შემოსავლების სამსახურის გადასახადების ადმინისტრირების საინფორმაციო სისტემის მონაცემების, გადამხდელის მიერ წარმოდგენილი და სხვა მონაცემების ურთიერშეჯერების საფუძველზე შედგა ფულადი სახსრების მოძრაობის ერთიანი ანგარიში. გადამხდელის ინფორმაციით და საგადასახადო მონიტორინგის დეპარტამენტის მიერ მასთან ჩატარებული სალაროს ინვენტარიზაციის შედეგად შესამოწმებელი პერიოდის ბოლოსთვის ნაღდი ფულის ნაშთი შეადგენს 0 ლარს. გამომდინარე აქედან, ფულადი სახსრების მოძრაობის შედეგად დარჩენილი ფულის ნაშთი 1 674 463 (აგროსილი 2 093 079) ლარის ოდენობით, ჩაითვალა საწარმოს დირექტორზე "------"-ზე გაცემულ ხელფასად და დაიბეგრა საშემოსავლო გადასახადით. შედეგად, პირს დაერიცხა საშემოსავლო გადასახადი და ჯარიმა საქართველოს საგადასახადო კოდექსის 275-ე მუხლის შესაბამისად.

შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:

საქართველოს საგადასახადო კოდექსის 302-ე მუხლის მე-2 ნაწილის თანახმად, დავის განმხილველი ორგანო საჩივარს განიხილავს მხოლოდ მომჩივნის მოთხოვნის ფარგლებში.

სადავო საკითხთან დაკავშირებით, შემოსავლების სამსახური მიუთითებს საქართველოს საგადასახადო კოდექსის 136-ე მუხლის მე-3 ნაწილზე, რომლის თანახმად, გადასახადის გადამხდელი ვალდებულია სრულად აღრიცხოს თავის საქმიანობასთან დაკავშირებული ყველა ოპერაცია, რათა გარანტირებული იყოს კონტროლი მათ დაწყებაზე, მიმდინარეობასა და დასრულებაზე.

შემოსავლების სამსახური მიუთითებს საქართველოს საგადასახადო კოდექსის 73-ე მუხლის მე-9 ნაწილის „ბ“ ქვეპუნქტზე, რომლის თანახმად, საგადასახადო ვალდებულების განსაზღვრის მიზნით საგადასახადო ორგანოს უფლება აქვს სამეურნეო ოპერაციის ფორმისა და შინაარსის გათვალისწინებით შეცვალოს მისი კვალიფიკაცია, თუ ოპერაციის ფორმა არ შეესაბამება მის შინაარსს. ამავე მუხლის მე-4 ნაწილის თანახმად, თუ რაიმე თანხა გამოიყენება კონკრეტული პირის ინტერესებისათვის, ჩაითვლება, რომ ეს თანხა მიღებული აქვს ამ პირს.

საქართველოს საგადასახადო კოდექსის 101-ე მუხლის პირველი ნაწილის თანახმად, ხელფასის სახით მიღებულ შემოსავლებს განეკუთვნება ფიზიკური პირის მიერ დაქირავებით მუშაობის შედეგად მიღებული ნებისმიერი საზღაური ან სარგებელი, მათ შორის, წინა სამუშაო ადგილიდან პენსიის ან სხვა სახით მიღებული შემოსავალი, ან შემოსავალი მომავალი სამუშაო ადგილიდან.

საქართველოს საგადასახადო კოდექსის 154-ე მუხლის პირველი ნაწილის „ა“ ქვეპუნქტის მიხედვით, გადახდის წყაროსთან გადასახადის დაკავება ევალება საგადასახადო აგენტს, რომელიც არის იურიდიული პირი, საწარმო/ორგანიზაცია ან მეწარმე ფიზიკური პირი, რომელიც დაქირავებულს უხდის ხელფასს.

ამავე მუხლის მე-2 ნაწილის „ა“ და „ბ“ ქვეპუნქტების თანახმად, გადახდის წყაროსთან გადასახადის დაკავებისას:

ა) გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს;

ბ) გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები.

საქართველოს საგადასახადო კოდექსის 43-ე მუხლის მე-4 ნაწილის თანახმად, საქართველოს საგადასახადო კანონმდებლობით დადგენილ ვალდებულებათა შეუსრულებლობის ან არაჯეროვნად შესრულების შემთხვევაში გადასახადის გადამხდელს ეკისრება ამ კოდექსით ან/და საქართველოს სხვა საკანონმდებლო აქტებით გათვალისწინებული პასუხისმგებლობა.

დადგენილი გარემოებაა, რომ შემოსავლების სამსახურის გადასახადების ადმინისტრირების საინფორმაციო სისტემის მონაცემებისა და გადამხდელის მიერ მიწოდებული ინფორმაციის/დოკუმენტაციის ურთიერშეჯერების საფუძველზე, შემოწმების მიერ განხორციელდა ფულადი სახსრების მოძრაობის ანალიზი, რის საფუძველზეც განგარიშებული ფულის ნაშთი 1 674 463 (აგროსილი 2 093 079) ლარის ოდენობით, საგადასახადო მონიტორინგის დეპარტამენტის მიერ ჩატარებული სალაროს ინვენტარიზაციის შედეგების გათვალისწინებით, ჩაითვალა საწარმოს დირექტორზე გაცემულ ხელფასად და დაიბეგრა გადახდის წყაროსთან.

გადასახადის გადამხდელის პოზიციასთან, განკარგვადი თანხის გაანგარიშებისას დირექტორის მიერ ანგარიშზე შეტანილი თანხების გათვალისწინებასთან დაკავშირებით, შემოსავლების სამსახური ყურადღებას ამახვილებს აუდიტის დეპარტამენტის წარმომადგენლის განმარტებაზე, რომ ფულადი სახსრების ნაშთის განსაზღვრისას შემოწმების მიერ გათვალისწინებულია ყველა დოკუმენტურად დადასტურებული ხარჯი, ასევე კაპიტალის შესახებ ინფორმაცია და საბანკო ანგარიშზე არსებული ნაშთები. აგრეთვე, შემოწმების პროცესში გადამხდელისთვის გაგზავნილ იქნა ფულადი სახსრების მოძრაობის ანალიზის ცხრილი და გადამხდელს ეთხოვა განემარტა არის თუ არა კიდევ გასათვალისწინებელი მონაცემები/ინფორმაცია, ხოლო გადამხდელის განმარტებით, მას არ გააჩნდა ისეთი ნაღდი ანგარიშსწორებით განხორციელებული გადახდა, რისი გათვალისწინებაც შესაძლებელია. შემოწმების მიერ ხარჯებში დაახლოებით გათვალისწინებულ იქნა 14 000 000 ლარის ოდენობით ხარჯი (საბანკო ანგარიშზე არსებული საბოლოო ნაშთების გათვალისწინებით).

ამასთან, შემოსავლების სამსახური აღნიშნავს, რომ მომჩივანი საჩივარში, მათ შორის საჩივრის ზეპირი განხილვისას, ვერ უთითებს ფაქტობრივ და სამართლებრივ გარემოებებზე, თუ რა ნაწილში იქნა განსაზღვრული საგადასახადო ვალდებულებები არამართლზომიერად. ხოლო, დავის წარმოების პროცესში არ ყოფილა წარმოდგენილი ისეთი მტკიცებულებები, რომლებიც შეცვლიდა საგადასახადო შემოწმებით დადგენილ გარემოებებს.

ზემოაღნიშნული სამართლებრივი ნორმების და დადგენილი ფაქტობრივი გარემოებების გათვალისწინებით, შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებების განსაზღვრა და სანქციის შეფარდება შესაბამისობაშია კანონმდებლობის მოთხოვნებთან, წარმოდგენილი საჩივარი დაუსაბუთებელია და არ უნდა დაკმაყოფილდეს.

საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :

1. შპს ,,--------“ (ს/ნ ,,-------“) საჩივარი არ დაკმაყოფილდეს;

2. აღნიშნული ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. ქუთაისი, ვიქტორ კუპრაძის ქ. №11), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

 

სადავო საკითხი

გადამხდელი არ ეთანხმება განკარგვადი თანხის,საწარმოს დირექტორზე გაცემულ ხელფასად განხილვას და საშემოსავლო გადასახადში განსაზღვრულ საგადასახადო ვალდებულებებს.

ითხოვს დირექტორის მიერ ანგარიშზე შეტანილი თანხების ჩათვლას და აღნიშნულის გათვალისწინებით საშემოსავლო გადასახადში დარიცხული თანხის გადაანგარიშებას.

 

ფაქტობრივი გარემოებები

მომჩივანს წარმოდგენილი აქვს შესამოწმებელ პერიოდში გადახდის წყაროსთან დაკავებული გადასახადების დეკლარაციები.გადამხდელის ინფორმაციით და საგადასახადო მონიტორინგის დეპარტამენტის მიერ მასთან ჩატარებული სალაროს ინვენტარიზაციის შედეგად შესამოწმებელი პერიოდის ბოლოსთვის ნაღდი ფულის ნაშთი შეადგენს 0 ლარს. გამომდინარე აქედან, ფულადი სახსრების მოძრაობის შედეგად დარჩენილი ფულის ნაშთი 1 674 463 ლარის ოდენობით, ჩაითვალა საწარმოს დირექტორზე გაცემულ ხელფასად და დაიბეგრა საშემოსავლო გადასახადით. შედეგად, პირს დაერიცხა საშემოსავლო გადასახადი და ჯარიმა.

 

გადაწყვეტილება

შემოსავლების სამსახურმა მიიჩნია, რომ საგადასახადო შემოწმების შედეგად საგადასახადო ვალდებულებების განსაზღვრა და სანქციის შეფარდება შესაბამისობაშია კანონმდებლობის მოთხოვნებთან, წარმოდგენილი საჩივარი დაუსაბუთებელია და არ უნდა დაკმაყოფილდეს.

 

დასაბუთება

შემოსავლების სამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს:

73(9),101,154,275.